Ogis–Oktoba 1840

Ol Sent Oli Lanem abaot Baptaes blong olgeta Dedman

Hop blong ol memba blong famli we oli no bin kasem baptaes

Jane Neyman i stap laef long Nauvu. Hem i kam long wan fenerol we Josef Smit i stap toktok long hem. Fenerol ia i mekem Jane i tingbaot boe blong hem Cyrus. Hem i bin ded mo i no bin baptaes. Jane i wari long Cyrus. Hem i save se yumi mas baptaes blong save go stap wetem Papa long Heven.

Saints, 1:421

Josef i save olsem wanem Jane i filim. Hem i stap wari long semfala samting abaot brata blong hem, Alvin, we i bin ded tu bifo hem i bin baptaes.

Saints, 1:421

Long wan fenerol, Josef i bin serem ol samting we God i bin tijim long hem. Hem i bin talem taem wan man i ded be i no bin baptaes, yumi save mekem baptaes long bihaf blong hem.

Saints, 1:421

!Jane i glad tumas blong harem abaot hemia! Afta nomo we fenerol i finis, hem i go long wan reva wetem wan elda blong Jos. Man ia i bin baptaesem Jane long bihaf blong Cyrus.

Saints, 1:421

Sam wik afta, Josef i tijim ol Sent moa abaot baptaes blong olgeta dedman. Hem i talem se plante pipol we oli bin ded oli wantem blong kasem baptaes. Oli wantem blong folem Jisas Kraes. Oli stap wet mo stap hop se ol famli memba blong olgeta we oli laef i stap, oli mekem baptaes long bihaf blong olgeta.

Doktrin mo Ol Kavenan 128:15–19; Saints, 1:423

Ol Sent oli ron stret i go long reva. Oli bin baptaes long bihaf blong ol pipol we oli lavem. Haeram Smit i bin baptaes long bihaf blong Alvin. Afta, Lod i tijim se baptaes blong olgeta dedman bae oli mekem nomo long tempol, wan man i mas kipim rekod blong wanwan baptaes, mo ol man oli mekem baptaes long bihaf blong man mo woman long bihaf blong woman.

Doktrin mo Ol Kavenan 124:29–32; 127:5–12; 128:1–9; Saints, 1:424