Febwari 1832

Josef mo Sidni, Tufala I Lanem abaot Heven

Wan visen abaot blesing blong God i go long ol pikinini blong Hem.

Wan dei, Josef Smit mo Sidni Rigdon, tufala i stap ridim Baebol. Tufala i stap rid abaot wanem bae i hapen long ol pipol afta we oli ded. Josef mo Sidni oli stap tingting long wanem oli bin ridim, mo wantem blong lanem moa.

Doktrin mo Ol Kavenan 76:11–18

Lod i bin givim wan naes visen long tufala. Tufala i luk Papa long Heven mo Jisas Kraes we ol enjel i raonem tufala. Oli harem wan voes we talem se Jisas i Pikinini Boe blong God. Voes ia we i talem se Jisas i bin ded from yumi mo i bin laef bakegen—Hem i laef bakegen. From Hem i bin mekem hemia, bae yumi tu i laef bakegen long ded.

Doktrin mo Ol Kavenan 76:19–24, 39–43

Josef mo Sidni i lanem se afta we yumi laef bakegen long ded, bae yumi laef long wan long ol tri ples ia long heven, we oli singaotem ol kingdom. Pipol we oli no akseptem gospel blong Jisas Kraes bae oli go long telestial kingdom. Lod i stap komperem kingdom ia long laet blong ol sta.

Doktrin mo Ol Kavenan 76:81–86

Josef mo Sidni i lanem abaot wan kingdom we oli singaotem terestrial kingdom. Kingdom ia i blong ol pipol we oli gat ol gud laef be oli no laef folem gospel blong Jisas Kraes fulwan. Oli no strong long fet blong olgeta long Hem. Lod i stap komperem kingdom ia long laet blong ol mun.

Doktrin mo Ol Kavenan 76:71–80

Kingdom we i moa hae hem i selestial kingdom. Pipol long kingdom ia oli mekem ol kavenan, o ol promes, wetem God mo kipim ol kavenan blong olgeta. Olgeta oli sakem sin mo folem Jisas Kraes. Oli laef wetem Papa long Heven mo Jisas blong oltaem mo kam olsem Tufala. Lod i stap komperem kingdom ia long laet blong ol san.

Doktrin mo Ol Kavenan 76:50–70

Lod i askem Josef mo Sidni blong no serem evri samting we oli luk long visen ia. Be Hem i wantem tufala blong raet abaot sam long ol visen ia mo serem wetem ol narawan Plante memba blong Jos oli glad blong talem long ol pipol abaot visen ia.

Doktrin mo Ol Kavenan 76:113–119; Saints, 1:149–50

Be samfala pipol oli no laekem visen ia. Hem i defren long wanem oli bilif long hem. Be plante long ol Sent oli glad se oli save abaot revelesen ia. I soem long olgeta se Papa long Heven i lavem ol pikinini blong Hem mo i mekem wan wei blong olgeta i gobak long Hem.

Saints, 1:149–50