Fas Visen blong Josef Smit

Wan ansa blong wan prea wetem tingting we i stap daon

Josef Smit i stap lisin long ol pipol we oli stap prij abaot ol defdefren bilif blong ol relijin.

Long ples we famli blong Josef Smit i stap long hem, long ples ia i gat plante jos we oli tij abaot Jisas Kraes. Olgeta evriwan oli tijim ol defdefren samting abaot Hem. Josef i no sua se huia nao i stap talem tru samting. Hem i save se hem i nidim Sevya, be hem i no save wijwan jos blong joenem.

Josef Smit—Histri 1:5–6; Saints, 1:9

Josef Smit i stap wok long fam blong hem.

Josef i tingting abaot hemia blong wan longfala taem. Hem i wantem blong kasem fogivnes from ol sin blong hem. Hem i visitim plante jos, be hem i filim konfius yet.

Josef Smit—Histri 1:8–10; Saints, 1:9–12

Josef Smit i stap ridim Baebol wetem wan laet blong kandel.

Wan dei, Josef i ridim Jemes 1:5 insaed long Baebol. Skripja ia i talem se sapos yumi nidim waes, yumi save askem long God. Josef i filim insaed long hat blong hem se, hemia i wanem we hem i nid blong mekem.

Josef Smit—Histri 1:11–13

Josef Smit i stap wokbaot i go insaed long bus blong ol bigfala tri kolosap long hom blong hem, blong prea.

Long moning blong wan naesfala dei blong spring, long 1820, Josef i go insaed long bus blong ol bigfala tri kolosap long hom blong hem. Hem i wantem blong stap long wan ples we hem i save stap hemwan blong prea long Papa long Heven.

Josef Smit—Histri 1:14–15

Josef Smit i stap prea long bus blong ol bigfala tri.

Josef i nildaon mo stat blong prea. Taem hem i mekem olsem, hem i filim wan ivel paoa i holemtaet hem. Hem i filim tudak i raonem hem. I olsem se, wan i stap traem blong stopem hem blong toktok long God. Josef i yusum evri paoa blong hem blong askem God blong sevem hem.

Josef Smit—Histri 1:15–16

Papa long Heven mo Jisas Kraes i kamkamaot long Josef Smit. Hem i nildaon long fored blong Tufala.

Wantaem nomo, Josef i luk wan laet we i naes tumas, we i saen strong i kam daon long heven. Tudak i ronwe, mo hem i filim pis. Long laet ia, Josef i bin luk Papa long Heven mo Jisas Kraes we Tufala i stap stanap long ea. Papa long Heven i singaotem nem blong Josef. Afta Hem i poen i go long Jisas mo i talem se, “Hem ia, Hem i Stret Pikinini blong Mi we Mi Lavem Tumas. !Lisin gud long Hem!”

Josef Smit—Histri 1:16–17.

Jisas i talem long Josef Smit se, Hem i fogivim ol sin blong hem.

Jisas i bin talem long Josef se, Hem i fogivim ol sin blong hem. Josef i askem Jisas se, wijwan jos nao hem i mas joenem. Jisas i talem se hem i no mas joenem wan long olgeta.

Josef Smit—Histri 1:18–19; Saints, 1:16

Josef Smit, i stap nildaon long wan bus blong ol tri, i stap lisin long Sevya.

Jisas i talem se ol impoten trutok blong gospel blong Hem, oli bin lus. Hem i talem se bae Hem i sendem ol enjel blong tijim ol trutok ia long Josef, blong serem wetem wol.

Saints, 1:16–17

Josef Smit i stap wokbaot i kamaot long bus blong ol bigfala tri, mo stap gobak hom.

Afta we visen i stop, Josef i fulap long lav mo glad. Hem i nomo konfius. Hem i save se God i lavem hem. Nomata se sam pipol oli no laekem hem from hem i stap talem se hem i bin luk Papa long Heven mo Jisas Kraes, Josef i save se hemia i tru.

Josef Smit—Histri 1:20–26; Saints, 1:16