Julae 1831–Julae 1833

Trabol long Misuri

Kipim fet i strong long ol taem blong denja.

Plante long ol Sent oli kam blong stap long Misuri. Lod i wantem olgeta blong bildim siti blong Saeon long ples ia. Be ol Sent mo ol pipol we oli stap finis long Indipendens oli no kaen long olgeta. Oli no agri long fulap samting. Sam pipol long taon ia oli kros mo oli wantem blong mekem ol Sent i aot.

Doktrin mo Ol Kavenan 57:1–3; Saints, 1:171–74

Edwod Patrij i bisop long Indipendens. Hem i kam long wan miting wetem ol lida blong taon. Oli talem se ol Sent oli mas aot long Independens. Bisop Patrij i save se God i wantem ol Sent blong bildim Saeon long Indipendens. Hem i talem se bae ol Sent oli no save aot.

Saints, 1:176

Ol man we oli kros oli stat blong stap brebrekem ol haos mo ol bilding we ol Sent oli bildim.

Saints, 1:177–78, 182

Ol man oli bin tekem Bisop Patrij mo wan narafala man we nem blong hem Charles Alen long ol haos blong olgeta. Oli pulum tufala kasem medel blong taon.

Saints, 1:179

Bisop Patrij i talem, “Sapos mi mas safa from relijin blong mi, hem i no moa long wanem ol narawan i bin mekem bifo mi.” Ol man oli bin pusum Bisop Patrij mo Charles i go long graon. Oli putum hot ta mo feta long ful bodi blong olgeta.

Saints, 1:179–80

Wiliam MakLelin, wan memba blong Jos long Indipendens, i harem wanem ol man blong kros i stap mekem. Hem i fraet mo i ron i go long bus blong haed.

Saints, 1:182

Hem i stap tingting long wanem bae i hapen sapos ol man blong kros oli faenem hem. ?Bae hem i talem se Buk blong Momon i tru, iven sapos oli traem blong kilim hem i ded from buk ia?

Saints, 1:182–83

Ol fren blong Wiliam Oliva Kaodri mo Deved Witma oli faenem hem long bus. Wiliam i save se Oliva mo Deved tufala i bilif long Buk blong Momon. Wan enjel i bin soem long olgeta ol buk we oli wokem long gol. Wiliam i askem tufala,“?Talem long mi, ?Buk blong Momon ia i tru?”

Saints, 1:183

Oliva mo Deved i talem long Wiliam se Buk blong Momon i tru. Tufala i talem se iven sapos ol man blong kros oli wantem kilim tufala, bae oli neva stop blong serem testemoni blong olgeta wetem ol pipol. Wiliam i talem, “mi bilivim yutufala.”

Doktrin mo Ol Kavenan 17:3–6; Saints, 1:183