“Samuel Smit I Serem Buk blong Momon,” Ol Doktrin mo Kavenan Stori (2024)
“Samuel Smit I Serem Buk blong Momon,” Ol Doktrin mo Kavenan Stori
1830–1832
Samuel Smit I Serem Buk blong Momon
Wan buk i stap blesem plante laef
Lod i bin singaotem Samuel Smit, smol brata blong Josef, long wan misin blong serem gospel. Samuel i bin mitim Jon mo Rhoda Grin mo talem long tufala abaot Buk blong Momon. Jon i wan prija long wan nara jos. Hem i talem se bae hem i karem wan kopi blong Buk blong Momon mo luk sapos eni wan long jos blong hem i wantem ridim.
Saints, 1:99
Afta sam manis, Samuel i kambak. Rhoda i talem se hasban blong hem i no save faenem wan we i wantem blong ridim Buk blong Momon. Hem i givimbak long Samuel.
Saints, 1:99
Samuel i harem nogud tumas. Hem i tanem hem blong i go, be Rhoda i stopem hem. Hem i talem se hem i bin ridim Buk blong Momon, mo hem i laekem.
Saints, 1:99
Tabu Spirit i talem long Samuel blong givimbak buk ia long Rhoda. “Askem God blong i givim yu wan testemoni,” Samuel i talem long hem. Hem i tijim Rhoda abaot Tabu Spirit mo olsem wanem bae hem i save se Buk blong Momon i tru.
Moronae 10:3–5; Saints, 1:99–100
Samuel i stap kambak hom afta long misin blong hem. Hem i no bin baptaesem eniwan, mo i gat sam man nomo we oli intres long Buk blong Momon.
Rhoda mo Jon i prea, mo Tabu Spirit i talem long tufala se Buk blong Momon i tru. Afta, Rhoda i serem Buk blong Momon wetem brata blong hem Brigham Yang.
Saints, 1:100
Brigham mo fren blong hem, Heber Kimbol, oli stap lukaotem tru Jos blong Jisas. Oli ridim Buk blong Momon. Oli stadi mo prea abaot gospel blong Jisas Kraes kolosap blong tu yia.
Stat long taem ia, Brigham mo Heber oli go long ol Jos miting wetem ol famli blong olgeta. Long wan long ol miting ia, Brigham i lisin long wan misinari we i stap serem testemoni blong hem. Misinari ia i no wan gudfala man blong toktok, be Brigham i filim Tabu Spirit taem hem i stap toktok. Brigham i save se hem i stap talem trutok.
Brigham, Heber, mo ol waef blong olgeta, Miriam mo Vilate, oli kasem baptaes. Oli lavem Sevya mo gospel blong Hem. Plante yia afta, Lod i singaotem Brigham mo Heber blong kam olsem ol Aposol blong Hem mo givim seves long ol misin. From se Samuel i serem Buk blong Momon, plante pipol i joenem Jos blong Sevya.
Doktrin mo Ol Kavenan 124:127–29; 126; Saints, 1:215–16