Disemba 1830–Ogis 1831

Famli Naet (Knight) mo Ol Narawan Oli Kam Tugeta long Saeon

Obei long singaot blong Lod

Poli mo Josef Naet tufala i laef wetem ol famli blong tufala long Niu Yok. Oli save gud long Profet Josef Smit. Afta we oli lanem abaot gospel, oli jusum blong joenem Jos. Taem we Lod i askem ol Sent blong muv i go long Ohaeo, Famli Naet (Knight) i obei.

Doktrin mo Ol Kavenan 37; Saints, 1:33, 94, 109–110

Famli Naet (Knight) oli hapi taem oli kasem Ohaeo. Leman Kopli, wan memba blong Jos, i talem se sam long ol Sent oli save stap long graon blong hem. I gat inaf spes blong oli planem ol kakae mo bildim ol haos. Josef Naet (Knight) mo ol pikinini boe blong hem oli wokhad blong rere long graon blong planem ol kakae.

Saints, 1:126–27

Be wan dei, Leman i jenisim maen blong hem abaot graon blong hem. Hem i no wantem ol Sent blong oli stap long hem. Hem i talem long Famli Naet (Knight) mo evriwan blong oli aot.

Saints, 1:127

Ol Sent oli wari. Naoia oli nogat ples blong stap long hem. Oli askem Josef Smit wanem oli sud mekem.

Doktrin mo Ol Kavenan 54; Saints, 1:127

Lod i talem se ol Sent ia oli mas go long Misuri mo bildim Saeon. Saeon bae hem i wan siti we pipol blong Lod i save kam tugeta long hem. Long Saeon, bae oli bildim wan tempol we bae oli mekem ol kavenan, o ol promes wetem God. Bae Hem i blesem olgeta sapos oli kipim ol kavenan ia. Famli Naet (Knight) oli glad blong go.

Doktrin mo Ol Kavenan 29:1–8; 42:30–36; 45:59–66; 54:6–9; 57:1–2; Saints, 1:128

Taem Famli Naet (Knight) i travel i go long Misuri, Poli i sik tumas. Man blong hem, Josef, mo ol pikinini boe blong hem oli wari se bae hem i no laef longtaem tumas. Be Poli i talem long famli blong hem se, hem i wantem blong stap long Saeon bifo hem i ded. !Hem i wantem tumas hemia bitim eni narafala samting!

Saints, 1:128

Afta long wan longfala rod, Famli Naet (Knight) oli kasem Misuri. Poli i talem tangkyu long Lod se hem i laef blong luk Saeon. Tingting blong Famli Naet(Knight) se graon ia i naes tumas. Oli gat fet se oli save kipim komanmen blong Lod blong bildim Saeon long ples ia.

Saints, 1:132

Ol Sent oli talem wan spesel prea mo singaotem graon ia Saeon, ples we ol pipol blong Lod bae oli kam long hem. Profet Josef i putum wan ston blong makem ples we kona blong tempol bae i stap long hem. Samfala dei i pas, Poli i ded. Lod i bin mekem promes se ol Sent we oli kam long Saeon mo oli ded bae oli spel long heven.

Doktrin mo Ol Kavenan 59:1–2; Saints, 1:132–33