Fas Toktok

Abaot Doktrin mo Ol Kavenan

Lod i toktok bakegen

Papa long Heven i lavem yumi. Papa blong yumi long Heven i wantem yumi blong mekem ol kavenan, o ol promes, wetem Hem blong mekem se Hem i save blesem yumi. Hem i bin sendem Pikinini blong Hem, Jisas Kraes, blong i kam Sevya blong yumi mo helpem yumi blong gobak long Hem.

God i sendem ol profet tu blong tijim yumi abaot Jisas Kraes mo ol komanmen blong Hem. Ol profet oli wok blong Jisas Kraes mo oli help blong lidim Jos blong Hem.

Jisas i stap talem wanem blong ol profet oli tijim long yumi. Ol toktok blong ol profet long taem bifo, oli raetem insaed long ol skripja olsem Baebol mo Buk blong Momon.

Plante yia afta we Jisas i bin stap long wol, i nomo gat ol profet. Ol pipol oli no stap mekem mo kipim ol kavenan wetem God. Jos Ia blong Jisas Kraes i no bin stap long wol.

Be afta God i singaotem Josef Smit blong kam wan profet. Josef i wan yangfala man nomo, be God i gat wan samting we i impoten tumas blong hem i mekem.

Josef Smit i tijim abaot Jisas. Hem i help blong oganaesem Jos blong Jisas. Jisas i tijim Josef Smit abaot gospel blong Hem mo olsem wanem blong lidim Jos blong Hem.

Oli raetem plante samting we Jisas i bin talem long Josef Smit, insaed long Doktrin mo Ol Kavenan. Doktrin mo Ol Kavenan i wan buk blong skripja olsem Baebol mo Buk blong Momon.

Ol Doktrin mo Kavenan Stori i talem long yumi olsem wanem Jisas i bin karembak, o putumbak, Jos Ia blong Hem, wetem help blong Profet Josef Smit mo ol narawan. Oli singaotem ol memba blong Jos, Ol Sent. Ol stori ia oli soem se God i lavem ol pikinini blong Hem raon long ful wol. Hem i wantem blesem yumi taem yumi mekem ol kavenan wetem Hem.