“Ol Enjel Oli Putumbak Prishud,” Ol Enjel Oli Putumbak Prishud (2024)
“Ol Enjel Oli Putumbak Prishud,” Ol Doktrin mo Kavenan Stori
1829
Ol Enjel Oli Putumbak Prishud
Paoa blong mekem wok blong God
Taem we Josef mo Oliva i transletem ol buk we oli wokem long gol tufala i lanem se Jisas i wantem evriwan blong kasem baptaes. Hem i givim paoa tu long ol pipol blong baptaesem ol narawan. Josef i no bin kasem baptaes. Hem i wantem blong save moa abaot fasin blong baptaes.
Josef Smit—Histri 1:68; Saints, 1:65–66
Josef mo Oliva i stap tingting plante se huia i gat paoa blong stap baptaesem ol pipol naoia. Tufala i disaed blong askem God. Tufala i go long bus blong ol bigfala tri mo nildaon blong prea.
Josef Smit—Histri 1:68; Saints, 1:66
Taem tufala i prea, wan enjel i kamkamaot long tufala. Hem i talem se, hem, hem i Jon Baptaes, we i bin baptaesem Jisas Kraes long taem bifo. Hem i givim Aronik Prishud long Josef mo Oliva. Prishud i paoa blong God. Oli yusum blong stap blesem ol pikinini blong God.
Doktrin mo Ol Kavenan 13; Josef Smit—Histri 1:69, 72; Saints, 1:66–67
Jon Baptaes i talem se, wan man we i gat Aronik Prishud, i save tijim ol pipol blong sakem sin mo kasem baptaes. Jon i talem long Josef mo Oliva blong kasem baptaes. Tufala i go insaed long wan reva mo baptaesem wanwan long tufala. Taem tufala i kamaot long wota, tufala i fulap wetem Tabu Spirit. !Tufala i glad tumas!
Afta, ol narafala enjel oli bin kam. Tri long ol Aposol blong Jisas—Pita, Jemes, mo Jon—oli givim Melkesedek Prishud long Josef mo Oliva. Naoia, Josef mo Oliva, tufala i save givim presen ia we i Tabu Spirit. Josef mo Oliva, tufala i kam Ol Aposol tu. Tufala i save lidim Jos mo stap olsem ol spesel witnes blong Jisas Kraes.
Doktrin mo Ol Kavenan 27:12; Saints, 1:84