E whakamahia ana Haere Mai, Whai Mai i Ahau—Mō te Kāinga me te Hāhi

Mā Wai Tēnei Rauemi?

Mā ngā tāngata katoa tēnei rauemi e hiahia ana ki te ako i te Pukapuka a Moromona—takitahi, ā–whānau, i roto i ngā akomanga Hāhi anō hoki. Mehemea kīhai koe i ako i ngā karaipiture i mua, ka āwhina tēnei rauemi i a koe kia tīmata ai. Mehemea he kaha kē koe ki te ako i ngā karaipiture, ka āwhina tēnei rauemi i a koe kia whaihua ake ō akoranga.

Ko ngā Tangata Takitahi me ngā Whānau i te Kāinga

Ko te Kāinga te tino wāhi ki te ako i te rongopai Mā ōu kaiako i te hāhi koe e tautoko, ā, ka whakakahangia koe e ētahi atu o ngā mema i te wāri. Engari me whāngai koutou ko tō whānau ia te rā, ia te rā ki te “kupu pai a te Atua” (Moronai 6:4; tirohia anōtia a Russell M. Nelson, “Opening Remarks,” Liahona, Noema. 2018, 6–8).

Whakamahia tēnei rauemi e rite ana ki tāu e pai ai hei āwhina i a koe. E āta hāngai ana ngā taipitopito i ētahi o ngā mea pono mau tonu kei roto nei i te Pukapuka a Moromona, ā, ka tuku whakaaro, me ētahi mahi hei āwhina i a koe ki te rangahau i ngā karaipiture ko koe anake, i te taha rānei o tō whānau, i te taha rānei o ōu hoa. I a koe e ako ana, whaia te reo o te Wairua kia kite ai koe i ngā mea pono mau tonu e whai tikanga ana ki a koe. Kimihia ngā karere a te Atua mōu, ā, me whai atu i aua karere e whiwhi ai koe.

Ko ngā Kaiako me ngā Ākonga ki te Hāhi

Mehemea ka whakaako koe i tētahi karaehe, he karaehe taiohi, he karaehe Kura Rātapu mō te hunga pakeke, he karaehe mō tētahi kōrama o te Pirīhitanga o Arona, he karaehe Taitamāhine rānei, e ākina ana koe ki te whakamahi i ngā kōrero i roto i tēnei rauemi hei āwhina i a koe ki te whakarite ki te whakaako. Haere Mai, Whai Mai i Ahau—Mō te Kāinga me te Hāhi he marautanga ia mō tō karaehe kura Rātapu. Kei roto i tēnei pukapuka aratohu ētahi whakaaro me ētahi rauemi hei āwhina i ngā mahi ako i te kāinga me te hāhi. I a koe e whakarite ana ki te whakaako, me tīmata tuatahi i runga i ōu ake aronga i roto i ngā karaipiture. Ka puta tō whakaritenga whakahirahira tino nui i a koe e tirohia ana ngā karaipiture me te whai atu i te whakaaweawenga a te Wairua Tapu. Kimihia ngā mea pono mau tonu e āwhina ai i a koe kia meinga kia rite ake ki tō tātou Matua i te Rangi rāua ko Ihu Karaiti. E āhei ana i aHaere Mai, Whai Mai i Ahau ki te āwhina i a koe kia kitea ai ētahi o ēnei mea pono mau tonu, ā, ki te mārama anō ki te horopaki o ngā karaipiture.

Me mau tonu ki ōu whakaaro, nā, ko te tino tiketiketanga o te rongopai, kei roto i te kāinga, ā, e tautokona ana e te hāhi. Kia kī pēnei kē, ko tāu tino mahi he āwhina i ngā tāngata i tō karaehe i roto i ā rātou mahi ki te ako me te whakatīnana i te rongopai i te kāinga. Tukuna rātou kia kōrerohia mai ai e rātou ā rātou aronga, ō rātou whakaaro, me ā rātou pātai mō ngā whiti karaipiture. Tonoa rātou ki te tohatoha mai i ngā mea pono mau tonu i kitea ai e rātou. He mea nui ake tēnei i te aro nui atu ki nui o ngā mea me whakaako.

Paraimere

Ka tīmata tō whakarite ki te whakaako i te Paraimere i a koe e ako ana i te Pukapuka a Moromona ko koe anake, i te taha rānei o tō whānau. I a koe e pēnei ana, me wātea koe ki ngā aronga me ngā whakaaro e ahu mai ai i te Wairua Tapu e pā ana ki ngā tamariki i roto i tō karaehe Paraimere. Me kaha ki te inoi, kātahi ka whakatōngia he whakaaro e te Wairua ki roto i a koe hei āwhina i a rātou ki te ako i te rongopai a Ihu Karaiti.

I a koe e whakarite ana ki te whakaako, tērā pea ka whiwhi koe i ētahi whakaaro kē mā te tirotiro atu i ngā whakaaro whakaako kei roto i tēnei rauemi. Kei ngā taipitopito katoa i roto i te Haere Mai, Whai Mai i Ahau—Mō te Kāinga me te Hāhi tētahi wāhanga e kīa ana :Ko ngā Whakaaro mō te Whakaako Tamariki.” Me whakaaro koe he kōrero noa iho ēnei kupu hei whakakā ake i ōu whakaaro. E mōhio ana koe ki ngā tamariki i roto i tō karaehe—ā, ka nui ake tō mōhio ki a rātou i a koe e kōrero ana ki a rātou i roto i te karaehe. E mōhio ana te Atua ki a rātou anō hoki, Māna hoki koe e whakaaweawe ki ngā huarahi pai ake hei whakaako, ā, hei manaaki i a rātou.

Tērā pea kua mahi kē ētahi o ngā tamariki i tō karaehe i ētahi o ngā mahi kei roto i te Haere Mai, Whai Mai i Ahau i te taha o ō rātou whānau. Kei te pai tēnā. He pai te tōai. Tērā pea he whakaaro pai kia tonoa mai ngā tamariki ki te whakamārama mai i ngā mea i ākona ai e rātou i te kāinga—ahakoa tērā me whakarite koe i ngā huarahi e ako tahi ai ngā tamariki ahakoa kāore rātou e ako ana i te kāinga. Ka kaha ake te ako a ngā tamariki i ngā mea pono o te rongopai i ngā wā e tōaitia ana ēnei mea pono mā roto i ngā momo mahi maha. Mēnā ka kite koe i tētahi mahi e whai hua ana mā ngā tamariki, me whakaaro koe mēnā he pai kia tōaitia, mehemea e whakaako ana i ngā tamariki ka tika. Tērā pea ka tirohia anōtia tētahi mahi nō tētahi atu akoranga.

Hei ngā marama e rima ngā Rātapu, e ākina ana ngā kaiako Paraimere kia rīwhi te akoranga mō taua rā o Haere Mai, Whai Mai i Ahauki te mahi i tētahi, i ētahi rānei o ngā mahi ako iĀpitihanga B: Mō te Paraimere—Ko te Whakarite i ngā Tamariki mō tētahi Oranga i runga i tō te Atua Huarahi Kawenata.”

Ko ngā Karaehe Kura Rātapu mō te Hunga Taiohi me te Hunga Pakeke

Ko tētahi o ngā tino take e hui tahi ai tātou i roto i ngā karaehe Kura Rātapu, arā, ko te tautoko tētahi i tētahi i a tātou e ū ana ki te whai atu i a Ihu Karaiti. Ko tētahi huarahi e pēnei ai, arā, ko te tuku atu i tētahi pātai pēnei” He aha tā te Wairua Tapu i whakaako ai ki a koe i tēnei wiki i a koe e rangahau ana i te Pukapuka a Moromona i te taha o Haere Mai, Whai Mai i Ahau?” Mā ngā whakautu ki tēnei pātai puta ake ai ngā whakawhitinga kōrero hohonu e whakakaha ake i te whakapono i a Ihu Karaiti me Tana rongopai.

Kātahi ka puare ake ngā kōrero e hangaia ake ana i runga i ngā kōrero rangahau i roto i te Haere Mai, Whai Mai i Ahau. Hei tauira, ka kī ake tētahi o ngā whakaaro ako kia tirohia a Arami 36 me te waihanga i tētahi rārangi kupu e whakaako ana e pā ana ki tō te Kaiwhakaora tūranga i roto i ngā mahi rīpenetā. Tērā pea ka ui atu koe i ngā mema o te karaehe kia kōrero mai e pā ana ki ngā kupu i kitea ai e rātou. Ka huri tahi atu rānei ki te waihanga ngātahi i tēnei rārangi kupu.

Ko ngā Kōrama o te Pirīhitanga o Arona me ngā Akoranga Taitamāhine

I ngā wā e hui tahi ai ngā kōrama o te Pirīhitanga o Arona me ngā Akoranga Taitamāhine, he paku rerekē tō ēnā kaupapa i tō te Kura Rātapu. Hei āpiti atu i te āwhina tētahi i tētahi ki te ako i te rongopai o Ihu Karaiti, ka hui tahi anō ēnei rōpū hei rūnanga tahi e pā ana ki te whakatutukiranga i te mahi o te whakaoranga me te whakateiteitanga (tirohia te Pukapuka Aratohu Whānui: Ko te Mahi i roto i Te Hāhi o Ihu Karaiti o te Hunga Tapu i ngā Rā o Muri nei, 1.2). Ka pēnei rātou i raro i ngā tohutohu a ngā tumuaki karaehe me ngā tumuaki kōrama.

Mō tēnei take, me tīmata ia karaehe kōrama i runga i tā tētahi mema o te kōrama, tumuakitanga karaehe rānei e ārahi ana i ngā kōrero mō ngā mahi ki te whakatīnana i te rongopai, ki te minita ki ngā tāngata e hapa ana, ki te tohatoha atu i te rongopai, ki te mahi rānei i ngā mahi temepara me ngā mahi whakapapa.

Whai muri iho i tēnei wā rūnanga tahi, ka ārahi te kaiako i te karaehe, i te kōrama rānei i roto i ngā mahi ako ngātahi i te rongopai. E pai ana kia waiho mā tētahi o ngā kaiako pakeke, mema pakeke rānei o te karaehe hei whakaako i te akoranga. Mā te tumuakitanga o te karaehe, o te kōrama rānei, i runga i te kōrero tahi me ngā mea pakeke e tuku atu i ēnei mahi.

Me whakamahi e te hunga kua tonoa ki te whakaako, i ngā taipitopito kōrero whakaako i roto i te taipitopito whakaako ā–wiki o te Haere Mai, Whai Mai i Ahau hei whakarite. Kei roto i ia taipitopito, ka tohua tēnei tohu i tētahi mahi e hāngai pū ana ki te hunga taiohi. Heoi anō, e taea ana te whakamahi i ngā kōrero i roto i ngā taipitopito hei mahi ako mā te hunga taiohi.

Tirohia te āpitihanga D mō tētahi tauira o te rārangi take mō ngā hui kōrama me ngā hui karaehe.