Hanuere 1–7: He Whakaaturanga Mai Anō mō Ihu Karaiti

Ko ngā Whārangi Tōmua o te Pukapuka a Moromona

I mua noa i tō taenga atu ki 1 Nīwhai upoko 1, ka kite koe ehara te Pukapuka a Moromona i te pukapuka noa iho. Ka whakatakotohia iho i roto i ngā whārangi tōmua tētahi kōrero kāore e rite ana ki tētahi atu—arā, mō ngā toronga ihotanga a ngā anahera, he tuhinga tawhito i tanumia iho mō ngā rau tau maha i te taha o tētahi puke, me tētahi tāne taiohi e whakapākehātia ana te tuhinga i runga i te mana o te Atua. Ehara te Pukapuka a Moromona i te pukapuka noa iho e pā ana ki ngā iwi taketake i Amerika. E whai ana ki te whakapakepake i te katoa “ko Ihu te Karaiti” (whārangi taitara o te Pukapuka a Moromona), ā, nā te Atua ake anō i tohutohu me pēhea tana tuhinga, tana tiakanga, ā, kua whakaputaina mai ki a tātou. I tēnei tau, i a koe e pānui ana i te Pukapuka a Moromona, me inoi, me whakamahi ōna whakaakoranga, kātahi koe ka kukume mai i te mana a te Kaiwhakaora ki roto ki tō oranga. Kātahi pea ka ākina tō ngākau kia kī ake ai, pērā i tā ngā Kaiwhakaatu Tokotoru i kī ai i tā rātou whakaaturanga, “He mīharo i [ōku] karu.”

He Whakaaro mō te Ako i te Kāinga me te Hāhi

Ko te whārangi taitara o te Pukapuka a Moromona

Mā te rangahau i te Pukapuka a Moromona e whakakahangia ai tōku whakapono i a Ihu Karaiti.

He nui ake tā te whārangi taitara o te Pukapuka a Moromona i te taitara noa iho. Atu i ētahi mea, ka whakarārangihia iho ētahi take mō tēnei tuhinga tapu. Kimihia ēnei take i roto i te whārangi taitara. Ka āwhina ngā pātai pēnei i a koe e whakaaroaro ana i ēnei mea: He aha i riro mai ai ki a tātou te Pukapuka a Moromona? He aha te rerekē o te Pukapuka a Moromona i ētahi atu pukapuka?

Ko nāianei pea te wā me whakarite koe i tētahi mahere mōu ake, mō tō whānau rānei e pā ana ki te pānuitanga o te Pukapuka a Moromona i tēnei tau. Āhea, ki hea pānui ai koe? Me pēhea koe e tono mai ai i te Wairua ki roto ki tō rangahau? He mea pū anō e kimihia ai e koe i a koe e rangahau ana? Hei tauira, tērā pea ka kimi koe i ētahi whiti e whakatutuki ana i te take i kimihia nei e koe i te whārangi taitara. Tērā pea ka puritia tētahi rārangi whiti e whakakaha ana i tō whakapono i a Ihu Karaiti.

Tirohia anōtia a 2 Nīwhai 25:26; Mōhia 3:5–8; Arami 5:48; 7:10–13; Heramana 5:12; 3 Nīwhai 9:13–18; 11:6–14; Moronai 10:32–33.

Tētahi kupu whakaari poropititanga. I kī ake a Tumuaki Russell M. Nelson, “Ko taku kupu whakaari ki a koe i a koe e whakaaroaro ana tāu i rangahau ai [i roto i te Pukapuka a Moromona], ka tūwhera ngā matapihi o te rangi, ā, ka whiwhi koe i ngā whakautu ki āu ake pātai, ā, ka ārahina koe i runga i tō ake huarahi o te oranga” (”Ko te Pukapuka a Moromona: Ka pēhea tō oranga mehemea kāore i a koe?,” Liahona, Noema 2017, 62–63).

Ko te Tīmatanga o te Pukapuka a Moromona; “Ko te Whakaaturanga a ngā Kaiwhakaatu Tokotoru”; “Ko te Whakaaturanga a ngā Kaiwhakaatu Tokowaru”

Ka taea e au hei kaiwhakaatu mō te Pukapuka a Moromona.

Ka taea e te Wairua Tapu te whakaatu atu ki a koe he pono te Pukapuka a Moromona, ahakoa kāore koe i kite atu i ngā papa kōura pērā i ngā Kaiwhakaatu Tokotoru me ngā Kaiwhakaatu Tokowaru. I a koe e pānui ana i ā rātou kupu, me āta aro atu ōu whakaaro ki ō rātou whakaaturanga me pēhea hoki ērā e whakakaha ake i tōu.

He aha te mea nui mōu i te āhuatanga o tā rātou tuku whakaaturanga mō te Pukapuka a Moromona? Me whakaaroaro koe i ngā huarahi e taea ai e koe te tuku atu i tō whakaaturanga o te Pukapuka a Moromona—me tōna whakaaturanga anō mō Ihu Karaiti. Hei tauira, me whakaaro koe me te mea nei kei te kōrero koe ki tētahi hoa ōu kāore anō kia rongo noa mō te Pukapuka a Moromona. He aha tāu e kī ai ki a ia? Me pēhea koe e whakakipakipa ake i a ia kia pānuitia ai? Tērā pea me huri atu te titiro ki He Kupu Tīmatanga mō te Pukapuka a Moromona. Ka kite pea koe i reira ngā mea e āwhina i a koe kia tukuna atu ai ki tōu hoa. Ka puta mai anō hoki ētahi whakaaro ki a koe i ēnei whitiāhua:

• “Te Tīmatanga o te Pukapuka a Moromona”

• He aha tēnei mea te Pukapuka a Moromona? He Tirohanga 60–Hekona

  What is the Book of Mormon about?

• “He Paki Kōrero Pukapuka a Moromona”

Me whakaaro pea koe he aha ngā mea e tuku atu ai koe ki tētahi hoa e pā ana ki te Pukapuka a Moromona. Me ngana koe ki te tuku atu i te Pukapuka a Moromona i runga i te whakamahi i te Taupānga Pukapuka a Moromona.

Tirohia anōtia a Ronald A. Rasband, “This Day, ” Liahona, Noema 2022, 25–28; Gospel Topics, “Pukapuka a Moromona,” Gospel Library; “An Angel from on High,” Hymns, no. 13.

I whakaatu ngā Kaiwhakaatu Tokotoru mō te Pukapuka a Moromona.

“Ko te Whakaaturanga a te Poropiti Hōhepa Mete”

He merekara te putanga mai o te Pukapuka a Moromona.

Mehemea i uia mai koe e tētahi i ahu mai te Pukapuka a Moromona i hea, he aha tāu ki a ia? Me pēhea tāu whakamārama atu i tā te Atua mahi i roto i te whakaputanga mai o te Pukapuka a Moromona ki a tātou? I a koe e pānui ana i tā Hōhepa Mete whakaaturanga, me āta aro atu ki tana whakamārama i taua mea. Nā runga i tāu i pānui ai, e pēhea ana, ki a koe, ngā whakaaro o te Atua e pā ana ki tō te Pukapuka a Moromona hiranga?

Tirohia anōtia a Ulisses Soares, ”The Coming Forth of the Book of Mormon,” Liahona, Mei 2020, 32–35; Saints, vol. 1, The Standard of Truth, 21–30; Gospel Topics Essays, “Book of Mormon Translation,” Gospel Library.

Tirohia iho te whakaputanga mō tēnei marama mō ētahi atu whakaaro Liahona me For the Strength of Youth makahīni.

He Whakaaro mō te Whakaako Tamariki

Ko te whārangi taitara o te Pukapuka a Moromona

Mā te pānui i te Pukapuka a Moromona e kaha ake taku whakapono i a Ihu Karaiti.

• Tuku āu tamariki kia titiro ai, ā, kia pupuri ai ki tētahi kape o te Pukapuka a Moromona. Āwhina i a rātou kia tuhia atu te matikara ki te taitara hauraro, He Whakaaturanga Mai Anō mō Ihu Karaiti. Tērā pea ka āwhina i a rātou kia kite ai, i runga i te whārangi taitara, te rerenga kōrero “Ko Ihu te Karaiti, te Atua Ora Tonu, e whakakite ana i a ia anō ki ngā iwi katoa.” Āwhina i a rātou kia mārama ai, nā, ko te tikanga o tēnei, nā, kei te whakaako te Pukapuka a Moromona i a tātou e pā ana ki a Ihu Karaiti. Me kōrero poto koe ki a rātou me pēhea te Pukapuka a Moromona i whakakahangia ake ai tō whakapono i a Ihu Karaiti. Ka taea e koe te ui atu he aha ā rātou paki kōrero pai rawa i roto i te Pukapuka a Moromona. Mā te waiata i te ”Book of Mormon Stories” (Children’s Songbook, 118–19) e mahara nei rātou ki ētahi o ēnei paki kōrero.

He Kupu Tīmatanga mō te Pukapuka a Moromona

Ko te Pukapuka a Moromona te poutokomanawa, arā, te kohatu kī o tō tātou whakapono.

• Mā te whārangi mahi mō tēnei wiki me te whakaahua kei raro iho e āwhina i āu tamariki kia mārama ai ki ēnei kupu a Hōhepa Mete i te Whakatakinga ki te Pukapuka a Moromona: “Ko te Pukapuka a Moromona te kōhatu kī o tō tātou whakapono.” Tērā pea ka pai te tā, te hanga rānei i tētahi kōpere me tētahi kōhatu kī kei tōna tihi. Ka ahatia mēnā ka tangohia atu te kōhatu kī? Ka ahatia mehemea kāore i a tātou te Pukapuka a Moromona? Tērā pea ka pānui koutou i te kōwae whakamutunga o te whakatakinga kia kite ai he aha atu tā tātou e ako ai ina whakaae ki te pono o te Pukapuka a Moromona. Me pēhea tātou e whakarite i te Pukapuka a Moromona hei kōhatu kī o tō tātou whakapono i a Ihu Karaiti?

Ko te Pukapuka a Moromona te poutokomanawa, arā, te kohatu kī o tō tātou whakapono.

“Ko te Whakaaturanga a ngā Kaiwhakaatu Tokotoru”; “Ko te Whakaaturanga a ngā Kaiwhakaatu Tokowaru”

Ka taea e au hei kaiwhakaatu mō te Pukapuka a Moromona.

• Mā te whakamārama atu ki āu tamariki e pā ana ki tētahi mea kua kite nei koe engari kāore anō rātou kia kite e āwhina ai i āu tamariki kia mārama ai he aha te tikanga o te tū hei kaiwhakaatu. Kātahi ka tukuna rātou kia pērātia ki a koe. Mā konei puare ake te huarahi ki ngā kōrero e pā ana ki ngā tāngata 11 i kite ai i ngā papa kōura nō konā whakapākehātia ai te Pukapuka a Moromona. I a koutou e pānuitia ngātahitia ana ngā whakaaturanga, ka taea e koe te kōrero atu e pā ana ki te take i hiahia ai ēnei kaiwhakaatu kia mōhio ētahi atu e pā ana ki ō rātou whakaaturanga. Ko wai ngā tāngata e hiahia ana tātou kia whakamōhiohia ai e pā ana ki te Pukapuka a Moromona?

“Ko te Whakaaturanga a te Poropiti Hōhepa Mete”

I homai te Pukapuka a Moromona ki a tātou i runga i te mana o te Atua.

• Ka taea te pānui i ētahi wāhanga o “Te Whakaaturanga a te Poropiti Hōhepa Mete” hei āwhina i āu tamariki ki te ako e pā ana ki te ara i homai ai te Atua i te Pukapuka a Moromona ki a tātou. Ka whakamahi pea koe i te ”Chapter 1: How We Got the Book of Mormon” (i roto i Book of Mormon Stories, 2–4). Tērā pea ka pai ki āu tamariki te mahi whakaari i taua kōrero i ētahi wā.

  Chapter 1: How We Got the Book of Mormon

Tirohia iho te whakaputanga mō tēnei marama mō ētahi atu whakaaro Liahona me For the Strength of Youth makahīni.

Ka Tukuna atu e Moronai ngā Papa Kōura, nā Gary L. Kapp