Ko te Whakatahuritanga Tō Tātou Whāinga

Ko te whāinga o ngā akoranga me ngā whakaakoranga o te rongopai, he whakahohonu i ō tātou whakatahuritanga me te āwhina i a tātou kia rite ake ki a Ihu Karaiti. Mō tēnei take, i a tātou e ako ana, ehara i te mea kei te kimi tātou i ngā kōrero hou, ka hiahia kē tātou kia meinga hei “mea hou” (2 Corinthians 5:17,) Ko te tikanga o tēnei he whakawhirinaki ki runga i tō tātou Matua i te Rangi rāua ko Ihu Karaiti hei āwhina i a tātou kia whakatahuritia ai ō tātou ngākau, ō tātou tirohanga, ā tātou mahinga, me ō tātou tino āhuatanga ake anō.

Engari kāore e puta ake taua momo akoranga rongopai e whakakaha ai i ō tātou whakapono me te ārahi atu ki te merekara o te whakatahuritanga i te wā kotahi. Kei tua noa atu tērā i te whare akomanga, ā, kei roto kē i tō tētahi ngākau, i tō tētahi kāinga. Mā te ū, mā te tākare anake ia rā, ia rā e mārama ai, e whakatīnana ai i te rongopai. Mā te whakaaweawenga a te Wairua Tapu e puta ake ai te whakatahuritanga tūturu.

Mā te Wairua Tapu tātou e ārahi ki te pono me te whakaatu mai e pā ana ki taua pono (tirohia John 16:13,). Māna ō tātou hinengaro e whakamārama, e whakatere i ō tātou māramatanga, ā, ka pā ki ō tātou ngākau ki te whakakitenga a te Atua, te puna o te pono katoa. Mā te Wairua Tapu ō tātou ngākau e whakamā. Māna tātou e whakaaweawe kia ora i runga i te pono, ā, Māna e kōhimu ki a tātou ngā huarahi e pēnei ai. He pono, “Ka whakaako te Wairua Tapu … i ngā mea katoa ki a [tātou]” (Hoani 14:26,).

Mō ēnei take, i a tātou e ora ana, e ako ana, ā, e whakaako ana i te rongopai, me whai tuatahi atu tātou i te piringa tahitanga a te Wairua. Mā tēnei whāinga ō tātou kōwhiringa e āki, ā, e ārahi hoki i ō tātou whakaaro me ā tātou mahi. Me whai atu tātou i ngā mea katoa e pōhiri mai nei i te whakaaweawenga o te Wairua me te whakaparahako atu i ngā mea katoa e āia atu ai tōna whakaaweawenga—nā te mea e mōhio ana tātou mehemea e taea ana e tātou te noho tika kia piri tahi mai ai te Wairua Tapu, ka taea anōtia e tātou te noho tika kia uru atu ai ki roto i te aroaro o tō tātou Matua i te Rangi rāua ko Tana Tama, a Ihu Karaiti.