2020
Folafolaga Faa-Perofeta
Oketopa 2020

SAVALI FAALEAUTAITAI I LE ERIA

Folafolaga Faa-Perofeta

Saunia e Elder Daniel G Hamilton

Fitugafulu Eria

Talu mai lava le Konafesi Aoao ofoofogia ia Aperila 2020, sa ou mafaufau lava e uiga i mea ia ua ta’ua o, Folafolaga Faa-Perofeta.

Na e faalogo muamua i ai? O e mauaina nei mea?

Mai fuaiupu e lua i le Mataupu Faavae ma Feagaiga ua tatou maua ai ni malamalamaaga uiga ese i Folafolaga Faa-Perofeta.

Muamua, Vaega 1:38 o lo’o a’oa’o mai afai e saunoa auauna a le Alii, Ana perofeta, ua faia e pei o lo’o fetalai mai le Alii lava ia; “. . . pe i lo’u lava leo po o i leo o a’u auauna, ua tutusa lava.”

Lona Lua, Vaega 82:10 ua faaopoopo i ai lenei tautinoga mamana faaselesitila; “O a’u, o le Alii, ua noatia a’u pe a outou faia mea Ou te fai atu ai; ae a outou lē faia mea Ou te fai atu ai, e leai se folafolaga mo outou.”

E ui lava o nei fuaiupu e lua na mauaina ma faamaumauina o ni faaaliga eseese, ae a faitau faatasi, e aumaia e o laua savali se malamalamaaga, faauigaga, ma le mana fou.

O le aumaia faatasi o mataupu faavae o lo’o i nei fuaiupu e lua, ua faamautinoa mai ia i tatou, e faapea a saunoa loa Perofeta, Tagatavaai ma Talifaaaliga e faapea, “Ou te Folafola Atu” ua noatia le Alii i lena folafolaga, pe afai tatou te ola i mea e mana’omia ua atofaina mo na faamanuiaga ua folafolaina.1

E tolu la’asaga o le mauaina o, Folafolaga Faa-Perofeta.

  1. Ia e va’ava’ai faapitoa mo latou.

  2. Mata’itu po’o a mea e mana’omia ina ia agava’a ai i latou.

  3. Ola ai ina ia mafai ona e mauaina.

E iva Folafolaga Faa-Perofeta na fofogaina i le taimi o le Konafesi Aoao ia Aperila 2020.

Peresitene Russell M Nelson; “Talu ai nei, sa ou folafola atu ai afai o le a tatou faia le mea sili tatou te mafaia e toefuatai ai le igoa sa’o o le Ekalesia a le Alii, o le Ia liligi mai Lona mana I lalo ma faamanuiaga i luga o ulu o le Au Paia o Aso e Gata Ai, i auala tatou te lei vaaia lava. Ou te faafouina lena folafolaga i le asō.2”

“Ou te folafola atu pe a e faateleina lou taimi i galuega faalemalumalu ma talafaasolopito o aiga, o le a e faateleina ma faaleleia lou tomai e faalogo ai ia te Ia.”3

I le saunoga lava lea e tasi na faaopoopo ai le perofeta a le Alii e faapea; “O le a le mea o le a tupu pe a e faalogo, lagona, ma usitai ma le faamoemoe atili I mea ua fetalaia mai e le Faaola ma mea o loo Ia fetalaia mai nei e ala mai i Ana perofeta? Ou te folafola atu o le a faamanuiaina outou i le mana faaopoopoina e taulima ai faaosoosoga, faigata, ma vaivaiga. Ou te folafola atu vavega I a outou fa’aipoipoga, mafutaga faaleaiga, ma galuega i aso taitasi. Ma ou te folafola atu o le a faateleina lou gafatia e lagona ai le olioli e tusa lava pe faateleina puapuaga i lou olaga.”4

I upu faai’u o le konafesi na tuuina mai ai e Peresitene Nelson se folafolaga lenei mo I tatou; “Matou te tatalo ia amata ona outou toetuuto atu moni e faalogo, lagona, ma usitai i afioga a le Faaola. Ou te folafola atu o le a mulimuli mai le faaitiitia o le fefe ma le faatuatua faateleina.”5

Elder Neil L Andersen; “Ou te folafola atu a e aloaia ma le naunautai ma faapelepele ma le faaeteete ia mea tutupu musuia faaleagaga i lou olaga, o le a tele atu isi mea e oo mai ia te oe.”6

O Elder Ulisses Soares a’o ia saunoa e uiga i le Tusi a Mamona na ia faapea ai; “Ou te folafola atu ia te oe a e suesue soo ma le agaga tatalo i ona upu, e mafai ona e taumafa i ana folafolaga ma faamanuiaga silisili i lou olaga. Ou te toe faamautu tasi atu le folafolaga o loo tatagi pea i ona itulau: afai tou te “ōle atu i le Atua, le Tamā Faavavau, i le suafa o Iesu Keriso, pe ua le moni ea nei mea; ma afai tou ōle atu ma le loto faamaoni, ma le manatu moni i ai, ma le faatuatua ia Keriso,” i le alofa mutimutivale “o le a ia faaali mai le moni o ia mea ia te outou, i le mana o le Agaga Paia.”7

Elder Ronald A Rasband; “Ou te folafola atu a outou mulimuli i fautuaga musuia a lo tatou perofeta pele, o Peresitene Russell M. Nelson, o ona fesoasoani, o Aposetolo, ma isi taitai o le Ekalesia, ma a outou gauai atu i perofeta anamua o e sa mua’i ta’ua o tatou aso, o le a faatumuina outou, i le ta’ele o outou loto ma agaga, i le agaga ma le galuega o le Toefuataiga. Ou te folafola atu o le a outou vaai i le aao o le Atua i o outou olaga, faalogo i Ana uunaiga, ma lagonaina Lona alofa.”8

Ou te faailoa atu lo’u agaga faafetai loloto ona o le ta’ita’iga a Perofeta soifua, Tagatavaai ma Talifaaaliga. E maeu le matagofie o le i ai o a latou ta’ita’iga musuia ma faata’ita’iga o le tu’uto atu i le Alii o Iesu Keriso.

Ou te molimau atu e faafofoga ma tali mai e le Tama Faalelagi a tatou tatalo. Pe a faia e Perofeta, Tagatavaai, ma Talifaaaliga folafolaga ia i tatou, o na folafolaga o le a faamamaluina pe afai tatou te ola ai ina ia maua [na folafolaga]. Ou te molimau atu foi o Iesu o le Keriso, o lona uiga, o le Mesia ma le Faaola o le lalolagi ua leva ona tatou faatalitali iai. O lo’o soifua o Ia!

Maufaasino

  1. Mataupu Faavae ma Feagaiga 130:21

  2. Russell M. Nelson, “Tatalaina o le Lagi mo se Fesoasoani”, O Le Liahona, Me 2020, 72.

  3. Russell M. Nelson, “Faalogo ia te Ia”, O Le Liahona, Me 2020, 88.

  4. Russell M. Nelson, “Faalogo ia te Ia”, O Le Liahona, Me 2020, 88.

  5. Russell M. Nelson, “Agai i Luma i le Faatuatua”, O Le Liahona, Me 2020, 114.

  6. Neil L. Andersen, “O Manatuaga Musuia Faaleagaga. O Le Liahona, Me 2020, 18.

  7. Ulisses Soares, “O Le Oo Mai o le Tusi a Mamona”, O Le Liahona, Me 2020, 32.

  8. Ronald A. Rasband, “Faataunuuga o le Valoaga”, O Le Liahona, Me 2020, 75.