Auaunaga a Marta i Aso Taitasi
O lenei tina ma lana tama teine e galulue malosi ia ola faatasi i le talalelei. Ma ua mafai e Marta ona ola ai e ala i le auauna atu i lona tina i ni ala tulaga ese.
Ata na pueina e Leslie Nilsson
O Marta e 11-tausaga le matua mai Potukale, ma e faapei foi o le tele o teineiti o lona vaitausaga, e fiifia e faaalu ona taimi ma ana uo, ’ai meaai ma taalo i ana pepe taalo. E fiafia foi o ia e faaalu lona taimi ma lona tina. Ae o le nonofo faatasi ma lona tina o lona uiga e fai si eseesega o le olaga o Marta nai lo isi tamaiti.
O le tina o Marta, o Sonia, sa fanau mai ma se faaletonu faaletino na faigata ai mo ia ona savali. E le pipili atoa o ia, ae na te manaomia se tootoo vaefa e pipii ai ma savali. E le mafai ona faia e ia ona lava lavalava, faataele ia lava, pe oso na o ia i lona moega. O le mea lea sa faigata ai ia te ia ona nofo na o ia. Sa mafai e Marta ona auauna atu ia Sonia mo ni nai tausaga ua mavae e ala i le fesoasoani ia te ia i mea e le mafai ona faia e ia lava.
“Ou te teu faamamaina mea ou te taalo ai ina ia mafai ai ona faigofie le fealuai o lo’u tina,” o le tala lea a Marta. “Ou te faaavanoaina foi ni taimi mai lo’u taalo ina ia ou siakiina ai lo’u tina ma vaai pe na te manaomia se fesoasoani. Afai ou te taalo ae valaau mai, ou te vave alu lava ona e ono avea o se mea e manaomia vave.”
Ae e taumafai lava Sonia e tuu Marta e ola i le olaga masani i le mea na te mafaia. Afai e le manaomia e Sonia se fesoasoani, na te faamautinoaina o maua e Marta se taimi e taaalo ai ma ana uo.
Ola i lo La Faatuatua
E maua le avanoa o Marta e ola ai i le talalelei i aso taitasi e ala i le auauna atu i lona tina. Na te tauaveina le tele o tiutetauave e le masani ona maua e isi tamaiti. Mo se faataitaiga, e ala po e fesoasoani i lona tina e sauniuni mo galuega a o lei amataina aoga. A aunoa ma le fesoasoani o Marta, e le mafai e Sonia ona fealuai pe alu e faigaluega i aso uma.
E o faatasi foi Marta ma Sonia i le lotu. Sa papatisoina Sonia ina ua valu ona tausaga, o lea la na ola ae ai Marta i le Ekalesia. E aoao e Sonia ia Marta e uiga i le taua o le talalelei i aso uma. O se tasi auala na te faia ai lenei mea o le i ai o ata e tele o Iesu Keriso i lo la fale.
“Ou te iloa o loo soifua le Atua ma o Iesu Keriso e moni,” na fai mai ai Sonia. “Ma ou te manao i tagata uma e o mai i lo’u fale ia iloa e taua tele le faatuatua ia te au. E taua foi ia te au le aoao atu o lenei mea ia Marta ina ia ola a’e o ia ma le malamalama ia Iesu Keriso.”
Ua faaaoga e Marta mea na aoao ai o ia e lona tina ma o loo aoao atili foi e ia lava e uiga i le talalelei. O se tasi auala e fiafia o ia e aoao ai o le faitauina lea o tusitusiga paia, lea e fesoasoani ia te ia e fausia ai se sootaga malosi atu ma le Tama Faalelagi ma le Faaola. “A ou faitau i tusitusiga paia, ou te lagonaina le i ai o Iesu Keriso i o’u autafa,” na ia fai mai ai.
Mauaina o le Mafanafana
E ui ina mafai ona faigata ona tauaveina se tiutetauave tele naua, ae o le alu i le lotu i vaiaso taitasi ua fesoasoani ia Marta e maua ai le mafanafana na te manaomia ia fesoasoani atili ai i lona tina. “A oo ina fai ia tatalo e amata ai ma faaiu le sauniga faamanatuga, e ese a le toafilemu” na ia fai mai ai. “A ou i ai iina, o nisi taimi ou te lagonaina ai e pei o ta’u mai e le Tama Faalelagi ia te au faapea o au o se tagata lelei ma e tatau ona avea pea lava o se tagata lelei e fesoasoani i lo’u tina.”
Soo se taimi na te lagona ai faapea, na te manatua ai lona lotofaafetai tele mo lona tina. Na te lagonaina le auina mai e le Tama Faalelagi o agelu e lagolagoina o ia. “Ou te manatu e faamalosi mai o Ia ia te au e ala i luga ma fiafia ma mitamita i le tina ua ou maua,” na fai mai ai Marta.
O se tasi o lesona ua aoaoina faatasi e Sonia ma Marta o le, e le faigofie pe atoatoa le olaga---mo soo se tagata. Fai mai Sonia, “E leai ni o’u faafitauli ou te faanoanoa ai. Ou te iloa na aumai e le Atua ia te au lenei tino ma le toto ma ponaivi faapea, ona e faapitoa lava au, ma ta’u mai e le Atua ia te au e mafai ona ou faia. Ou te faia le mea sili ou te mafaia. E mafai ona ou faia isi mau mea, ae o le asō o lea e ou te manuia lava. Ou te mitamita i mea ua ou faia, i mea ua ou maua, ma mea o le a ou faia a taeao.
Ua iloa foi e Marta o le a lelei mea uma, e ui ina e mafai ona faigata le olaga i taimi, a o ia tausia lona tina. Ua ia iloa e eseese luitau o tagata uma. “E leai se olaga o se tasi e atoatoa,” o lana tala lea. Ae e oo lava foi i ona lava luitau patino, e maua lava e Marta mea lelei i tulaga uma---o le la sootaga ma lona tina o se tasi lea o faataitaiga. “O lo’u tina e i ai tapulaa faaletino, ae i le mafaufau ma lagona e ese le atamai. O i ma’ua o se uo lelei tele.”
Vaavaai atu i Luma.
O le a la se mea o i le lumanai mo Marta ma Sonia? Fai mai Marta, “Ou te manao e latalata i lo’u tina, ma ioe, ou te fia faaipoipo, fai sa’u fanau, ma fai so’u aiga. Peitai i le lumanai, pe afai e mafai, ou te manao e faatau se fale mo lo’u aiga ma lo’u tina aua ou te le manao e mamao mai ia te ia e oo lava i se aso se tasi!”
E lagona e Sonia e i ai le faamoemoe mo le lumanai faapea foi o le ia faafetai pea e le aunoa mo le mafutaga ma Marta ma lona alofa. “E maeu le i ai o se tama teine matagofie. E ese le manaia o le i ai o Marta i lo’u olaga. O ia o se meaalofa mai le Atua. Sa Ia saunia ia Marta e nofo iinei faatasi ma au.”