O Ia Lava o Sō Ta’ua
Sa tuu e faamauina i ma’ua ma lo’u toalua, ae sa matua telē naua lenei sauniga paia nai lo i ma’ua e toalua.
Ata na tusia e Joshua Dennis
Ina ua mavae tausaga e fitu o le faamoemoe ma le faatalitali mo se fanau, sa iu ina faamanuiaina i maua ma lo’u toalua i se tama teine. O Alisi o le malamalama o o ma olaga, ae sa na o le lima masina na ola ai o ia ae maliu i le limonia.
O le aafiaga sili lea ona faigata i lo’u olaga. O aso uma ou te sau ai i le fale mai le galuega ma saofai ma tagi. E tele ina matou saofafai ma matua o lo’u toalua ma la te aumaia le malosiaga ia te au. Sa ou tatalo pea mo se isi tamaitiiti, ae e leai lava. Sa faatumulia au i le faanoanoa.
Sa amata e o’u matua faale-tulafono ona fautuaina i ma’ua ma lo’u toalua e ma te o i le Malumalu i Suva Fiti e faamauina ai. Ma te lei o muamua i le malumalu, ma sa tonu ia i ma’ua o le auala sili lea mo i ma’ua e maua ai le faamoemoe ma le faamalologa.
Sa leai se mea sa tapenaina ai au mo le mea sa ou lagonaina i lena aso! Sa ou iloaina o le a faamauina i ma’ua ma lo’u toalua mo le faavavau. Sa faatumulia a’u i lea malamalama ma le lotofaafetai ma le alofa. Ae sa ou le malamalama faapea o lenei sauniga paia e telē atu nai lo i ma’ua e toalua.
I le malumalu na ou aoaoina ai e mafai ona faamauina Alisi ia i ma’ua. Sa ou tagiina loimata o le olioli ina ua ou iloaina lenei aoaoga faavae paia. O le a ma faatasi pea ma la ma tama teine le faavavau atoa! Ou te molimau atu ua saunia e le Atua mea uma tatou te manaomia mo le fiafia i Lona maota paia.
I tausaga talu mai lena taimi, ua faamanuiaina i ma’ua ma lo’u toalua i se atalii ma ni fanau vaetamaina e toatolu. Ae e le mafai lava ona ma faagaloina Alisi. Ona o sauniga paia o le malumalu, ua avea ai lo ma afafine o se vaega o lo matou aiga e faavavau.
Pe a ou feiloai i se tasi ua maliu se tamaitiiti, ou te lagonaina faatasi ma i latou o latou tiga. Ae ua ou iloaina foi o lena tiga e le o le iuga lea. I le maliu o Alisi, faapea foi le oo i isi tofotofoga, ua ou iloa ai o loo i ai le Atua iina mo au. Pe a ou lotovaivai pe faitio i ni mea, ou te iloaina lava o loo i ai pea lava le Atua iina.
Ua ou iloa o le a ou toe vaai ia Alisi, ma e faaauau pea ona faatumulia e le upumoni i ma’ua ma lo’u toalua i le olioli loloto.