Tuuatoatasi i le Malologa i le Aoauli
E alaala le tusitala i Iuta, ISA.
Sa na ona manao lava o Kali i se uo.
“E musumusu mai Ia [Agaga Paia] i se leo mālu” (Tusipese a Tamaiti, 56).
Sa savali atu Kali i le potu’ai i le aoauli ma tilotilo solo. Sa taufetuli sa’o uma isi tamaiti i a latou uo ma faapotopoto ai i laulau. Sa pisapisao le potu ma leo sagisagi fiafia ma taliēga. Sa na o le aso lona lua lea i le aoga, ae sa foliga mai sa tofu tagata uma ma se tagata la te nonofo vagana ai Kali.
Sa ia oomiina le ’au o le pusa o lana meaai, ma savali atu i se tasi o laulau. “E mafai ona ou nofo i ou autafa?” Sa fesili atu ai Kali?
Sa tepa ae i luga se teineitiiti ma lana fili uumi lanuenaena. Sa tuufeula ma lulū lona ulu. “Leai. Ua i ai le tagata e nofo ai,” o lana tali lea.
“Ua lelei.” Sa savali atu Kali i se nofoa na avanoa ma tuu i lalo le pusa o lana meaai.
“E le mafai ona e nofo i i! O lea ou te faasaoina le nofoa lena,” sa fai ane ai se tamaitiiti e tusitusi lanumeamata lona ofutino. Sa ia tuleia le pusa o le meaai a Kali i le fola. Sa taliē uma ana uo.
Sa punou ifo i lalo Kali ma toe piki i luga le pusa o lana meaai. Sa savali atu o ia i le isi itu o le potu’ai ma saofai ai i se laulau avanoa. Sa ia iloa atu se tasi mai lo latou pitonuu ma taumafai e talo atu i ai, ae sa ia toe tilotilo i le isi itu. Sa faaūū Kali. Aisea na le manao ai se tasi e avea ma ana uo?
Sa autilo ifo Kali i lana meaai. Sa lei toe fia ’ai o ia. Sa ia soloia ona mata, tapuni le pusa o lana meaai, ma savali i fafo.
O la ua taaalo tagata uma ma a latou uo. Sa nofonofo Kali na o ia i luga o se nofoaumi ma matamata i isi tamaiti la e fiafia e aunoa ma ia. Ona vaaia lea e Kali se tamaitiiti pe tusa o lona matua o nofonofo na o ia i luga o le mutia. Sa fai lona ofutino lanu samasama pisipisia, ma sa tutū i luga lona lauulu i tua.
Sa tilotilo ese ia Kali. Sa ia vaaia se vaega o teineiti o lana vasega o taaalo i le sikueafa. Sa ia moomoo maimau pe ana latou valaaulia o ia latou te taaalo.
Sa toe tilotilo atu Kali i le tamaitiiti. Sa faagaugau i lalo lona ulu, ma sa ia veleveleina vao sa i autafa o ona vae. Sa manatua e Kali se mea sa fai atu ai lona Tina i nisi o taimi: Vaavaai mo tamaiti e tuuatoatasi.
Sa faaūū Kali. O ia foi sa tuuatoatasi. Sa leai se tasi na taumafai e avea ma ana uo!
Ona mafaufau lea o Kali i le taimi sa papatiso ai i le tausaga ua te’a. Sa ia folafola atu e faalogo i le Agaga Paia. Atonu sa fesoasoani le Agaga Paia ia te ia e manatua mea na ta’u atu e lona Tina ia te ia. Atonu sa taumafai le Agaga Paia e ta’u atu ia te ia e taaalo ma le tamaitiiti ofutino lanu samasama.
Sa mapuea Kali ma tu i luga. Sa faatumulia lona loto i se lagona mafanafana. Sa ia savali atu ma nofo ifo i talaane o le tamaitiiti i luga o le mutia.
“Talofa,” sa ia fai atu ai.
“Talofa,” sa ia memumemu atu ai.
“O le a le lanu e te fiafia i ai?”
“O le … lanumeamata.”
“Manaia. “Ou te fiafia i le lanupiniki,” na fai atu ai Kali. “E i ai se meaola e te fiafia i ai?”
Na saofai sa’o teisi ae le tamatiiti i luga ma tilotilo atu ia Kali. “Ioe. Ou te fiafia lava i tainosoa.”
“E faapena foi au. E sili ona ou fiafia i se tainosoa seutolu.”
Sa ataata le tamaitiiti.
Ona ta mai lea o le logo. Sa tu ae i luga Kali ma faatofa atu i le tamaitiiti. Sa ataata o ia a o savali atu na o ia i le potuaoga. Atonu e leai sana uo sili, ae sa ia lagona le fiafia i lona iloa ai sa ia faia ia manaia atu le malologa a se tasi.