Auaunaga e ala i le Polokalama a Tamaiti ma le Autalavou

Valaauina o isi ia ola ma fesoasoani ia i latou i luga o le ala o le fatu lea o le auaunaga.

Ata

young man playing keyboard

Ata na pueina e Tom Garner

E anoanoai avanoa mo le auaunaga e ala i le polokalama a Tamaiti ma le Autalavou. Atonu o i ai sau fanau laiti po o ni talavou i le fale. Atonu o oe o se taitai i le polokalama po o oe foi o se auauna i aiga e i ai tamaiti ma ni talavou. Pe atonu foi e te ono iloa ni tamaiti ma ni talavou (e ono aofia uma ai i tatou). Po o le a lava lou tulaga o i ai, e tele auala e faaaoga ai le polokalama po o ona mataupu faavae e faamanuiaina ai olaga o isi.

Atiina ae Faatasi o i Tatou Lava

I le fatu o Tamaiti ma le Autalavou o loo i ai se taulaiga o le taumafai i aso taitasi e avea atili e faapei o le Faaola, o lē na auauna mai i le atoatoa. O le toatele o i latou ua auai i le faatinoga o le polokalama ua aoaoina e faapea o le tele o lou alualu i luma i itu eseese o lou olaga, o le lelei tele foi lena o le faaauupegaina o oe e fesoasoani ai pe auauna atu i isi.

Ae i le polokalama a Tamaiti ma le Autalavou, o le faamanuiaina o isi e le tau faatali seia e aoaoina se mea. O le faatinoga o le aoaoina lava ia, e maua ai avanoa e auauna atu ai.

Mo se alii talavou e igoa ia Perofeta e nofo i Kana, na faatuina le sini i Tamaiti ma le Autalavou e aoao pe faapefea ona taina le piano sa na o se amataga. “O la’u sini o le fesoasoani foi i isi tagata ia iloa le mea lea ou te aoaoina,” o le tala lea a Perofeta.

E ui e lei avea o ia o se faiaoga, ae ua tuputupu ae lana sini ua avea o se mea telē atu nai lo le mea sa ia mafaufauina. Ua to’a 50 nei tamaiti ua i ai i le vasega tapiano i le faletapuai faatasi ai ma Perofeta. Ma mata o ai o aoaoina ia Perofeta ma isi tamaiti e to’a 50? Alexander M. ma Kelvin M., e ta’i 13 uma o la tausaga. “Ma te mananao e faaali atu taga o le agalelei i isi tagata,” ua fai mai ai Kelvin.

E tolu aso i le vaiaso e aoao atu ai e le autalavou ia e toalua ia lesona amata o le piano e le totogiina ia i latou uma e o mai e aoao. Ua i ai se aoga faaopoopo i lesona tapiano. Ua toatele tamaiti a’oga piano ua folasia atu i ai le Ekalesia e ala i lesona tapiano mulimuli ane, ua aoao i le talalelei ma ua tonu ia i latou e papatiso.

Ao tatou faia taumafaiga e faaleleia i tatou lava, e mafai ona tatou auauna atu i isi e ala i le valaauliaina o i latou e auai mai faatasi ma i tatou.

Ata

woman preparing food

Ata na pueina e Jonas Rebicki

O Se Fua Manumalo mo Auaunaga

I le avea ai o se peresitene o le Peraimeri i le siteki, o Sabrina Simões Deus Augusto o Curitiba, Pasila, ua vaaia le ala ua faamanuiaina ai e itu o le atina’ega patino o le polokalama a tamaiti ma le autalavou i lana siteki. Ae ua ia vaaia foi le tele o auala e faaaoga ai mea sa ia aoaoina e uiga i le atinaega patino i lona tofiga o se tuafafine auauna atu.

“Ina ua ou atiina a’e se taleni,” ua saunoa ai Tuafafine Augusto, “ua mafai ona ou faaaogaina lena taleni e faamanuia ai se tasi ou te auauna atu i ai.”

Sa aoaoina e Tuafafine Augusto se tasi o tuafafine na tofi i ai o ia, i le ala e fai ai ia lole sukalati. Ua fai nei e lena tuafafine ma faatau atu lole e fesoasoani ai i le tupe maua faaopoopo a lona aiga. “I ni masina mulimuli ane, sa faamanuiaina ai au ina ua aoao mai au e se isi uso, i le faiga o le falaoa hani e mafai ona ou faatau atu,” na saunoa ai Tuafafine Augusto. “O le atiina a’e ma le fefaasoaai o a tatou taleni e mafai ona faamanuiaina ai olaga o le tasi ma le isi, ma faalolotoina ai a tatou sootaga o ni uso a auaunaga.”

E Mafai Faapefea Ona Fesoasoani le Polokalama a Tamaiti ma le Autalavou ia te Oe e Auauna Atu?

Valaaulia isi e auai i le faatinoga o le polokalama a Tamaiti ma le Autalavou.

E mafai ona e valaaulia ia aiga o le autalavou ma tamaiti e te auauna atu i ai e auai i le faatinoga o le polokalama o le Tamaiti ma le Autalavou. Latou te ono fiafia e auai i gaoioiga, atina’ega patino, po o vaega o le suesueina o le talalelei o le polokalama. (Mo nisi faamatalaga e uiga i le auaunaga e ala i le Sau, Mulimuli Mai ia te A’u, tagai “Auaunaga e ala i le Sau, Mulimuli Mai ia te A’u,” i le Liahona Setema 2020.)
Lagolago a latou sini.

I le avea ai o se uso po o se tuafafine auauna atu i aiga e i ai talavou, ua e i ai i se tulaga masani e lagolagoina ia sini atonu o latou galulue agai i ai i Tamaiti ma le Autalavou. E ui ina patino a latou sini, ae afai e te iloaina le mea latou te naunau i ai, e mafai ona e ofo atu e fesoasoani i ni auala eseese. O lea mea e mafai ona avea o se ituaiga o le sueina o sapalai o ata o loo latou sailia, avea o se faamasino o a latou kuki o loo fai, pe avea foi o se faiaoga i se itu e te malamalama i ai. Pe e te iloa sui le suauu o se taavale? Fono se ofu masae? Pe o oe o se tagata tomai i faatalatalanoaga mo galuega? E mafai ona e ofo e faasoa atu le malamalama po o ou tomai pe afai latou te fiafia i ai.
Ia valaaulia isi e avea ma se vaega o lou lava atina’ega patino.

O le atina’ega patino e le o faapolopoloina mo tamaiti ma le autalavou. E mafai ona e auai oe lava i le faatinoga o le polokalama tusa lava po o le a lou matua. A o e faaaluina se taimi e faaleleia atili ai faaleagaga, faaleagafesootai, faaletino, ma faaleatamai i lou olaga, o le a sili atu le lelei o lou saunia e auauna atu i tagata taitoatasi, tusa lava po o ai lua te fetaiai. E faapei foi o Perofeta i Kana, e mafai ona e faamanuiaina isi e ala i le valaaulia o i latou e auai faatasi ma oe, pe o le faatulagaina o lesona tapiano, o i se vasega faamalositino, po o le aoaoina faatasi o se gagana.
Ia avea le auaunaga o se sini.

Mafaufau e faaalu se taimi i aso taitasi mo le auaunaga. O lenei mea atonu o le auina atu o se tesi, po o le afe i ai e vaai pe o faapefea mai, pe fuafua se faatasiga. E mafai ona aofia ai le vaai o se taimi e faakalena ai aso fanau o i latou e te auauna i ai pe tulitatao foi i latou i le ala o fesootaiga ia iloa ai pe o a mea latou te fiafia i ai, po o mea foi sa latou faia talu ai. Tusa lava foi pe na o le faaalu o sina lima minute e mafaufau ai pe o le a le mea o moomia e se tasi, e mafai ona ta’a’ina atu ai i manatu musuia e mafai ona faia ai se eseesega.