Ala Na Ou Maua ai le Faamalologa mai Sauaga Tau-Feusuaiga
Sa ou ola malu’ia. Ae mulimuli ane sa ou aoaoina ai e faapea o o’u taimi aupito pogisa, sa mafai ai ona ou faalagolago i lo’u Faaola.
Ata pue mai le Getty Images, faʻaaogaina mo faamoemoega tau-faʻamatalaga, faaalia e tagata faataitai
Sa amata ona ou malu’ia ina ua na o le fitu o’u tausaga ma sa toe faaipoipo ai lo’u tina. Sa matou fiafia lava i lo’u tamā fai fou. Sa agalelei o ia, ma sa fetaui lelei ma lo matou aiga. Sa ou lagonaina lava lo’u saogalemu i le i ai faatasi ma ia. Sa manaia mea uma seia oo i se tasi aso, ina ua taufai pisi tagata uma, sa ia sauaina faalefeusuaiga ai au.
Sa ou le malamalama pe o le a lana mea sa fai ia te au. Sa ou lagona le fefe, fememea’i, ma sa ou matua maasiasi lava. Ae sa ou fefe tele e ta’u i se tasi. Sa ou mafaufau o le a ou faaleagaina le fiafia fou ua maua e lo’u aiga ma o le a leai se tasi e talitonu ia te au. O lea sa tonu ai ia te au e aua ou te pisa.
Sa na o le tasi le taimi na ia faatiga ai ia te au, ae o le manatua o le sauaina o le a mamafa pea i lo’u mafaufau. Sa iu ina ua ou matua masalosalo lava o le a iloa mai e se tasi lo’u tiga ma alia’e ai la’u mealilo sa ou taumafai e nanā le mea moni i le avea ai o se uo lelei i lo’u tamā fai. Sa faapitoa lona agalelei mai ia te au, ma sa amata foi ona ou toe fiafia i ai.
Ae na oo ina matua sili atu le leaga o le mea ua oo i ai. Ina ua amata ona faigaluega Tina i le po, sa amata ona faifai pea le sauaina o a’u e lo’u tamā fai. Sa ou matua lagonaina le mafatia. Sa ou manao e ta’u, ae sa matua alofagia lo’u tamā fai ma sa ou manatu ai o le a tutū tagata uma mo ia. O le mea lea i le po ina ua na o au, sa ou aioi atu ai i le Atua e fesoasoani mai ia te a’u e ufiufi la’u mealilo.
Tautala e Ta’u
I se tasi aso sa i’u ina tuu le sauaina. Sa ou le iloa pe aisea. E ui ina sa ia lei toe faatiga ia te au, ae sa ou lagonaina pea le palapala ma le maasiasi. Sa ou inoino ia te au lava ia. O nisi taimi sa oo ina ou felafoa’i pe faigofie atu le oti nai le fesagai ma le mea moni. Sa ou manao pea e ta’u, ae sa ou fefe i le mea o le a faia e le mea moni.
Ona oo lea i se tasi Aso Sa i le lotu ina ua 14 o’u tausaga, sa ou faalogo ai i se lesona e uiga i le faia o faaiuga tetele. Sa fautuaina i matou e lo’u faiaoga e anapogi ma tatalo ma sa folafola mai o le a faamalolosia e le Atua i matou e faia le mea sa’o. Ina ua tuua le lotu, sa ou mafaufau pea e uiga i le mea sa ia fai mai ai. Sa ou mafaufau pe afai ou te fesili, pe mata o le a fesoasoani moni mai le Atua ia te a’u e ta’u?
O le aso na sosoo ai, sa ou anapogi ai mo le lototele e ta’u ai ia Tina e uiga i le sauaina. Sa le mafai ona ou mafaufau i le aoga aua na pau le mea sa mafai ona ou mafaufau i ai o le pe faapefea sana tali. E oo atu i le taimi na ou taunuu ai i le fale, sa ou matua lagonaina le ma’i. Sa ou toe tatalo mo se malosi, aua sa ou lagona ou te lei saunia e ta’u atu ia te ia.
I lena afiafi, sa ou soso atu ai i lo’u tina a o kuka le matou meaai o le afiafi. Ou te le iloa po o le a se tala e fai atu, ae ina ua ou vaai atu i ona mata, sa ou maua le lototoa e tau ai lava ina amata ona ou tautala. O le taimi lava na ou amata ai, sa masaa uma mai ai mea sa nanā mo le tele o tausaga.
Sa ma saofafai ifo ma lo’u tina i luga o le nofoa ma fetagisi faatasi ai. Mulimuli ane, sa ma faafesootaia lo matou peresitene o le paranesi ma telefoni ia leoleo. Sa molia lo’u tamā fai i le mea sa ia faia ia te au, ma sa ou maua le puipuiga sa ou moomia---o le a ou le toe vaai ai lava ia te ia.
O Le Ala i le Faamalologa
I le taimi lena, sa faigata ona toe faamatala lo’u aafiaga i taitai, ma le tuufesili o a’u uo po o fea o i ai lo’u tamā fai, ae faatasi ai ma le lagolago a lo’u aiga, sa le toe tuua ai na o au. Faatasi, sa matou toe opogi faatasi i se autu fou faaleaiga: “Ou te mafaia mea uma lava i le faamalosi mai o Keriso ia te a’u” (Filipi 4:13). Sa ofoina mai e lo matou aiga lautele lo latou alolofa ma le lagolago ma, i le mavae ai o se taimi, sa amata ona faamaloloina faatasi i matou.
Sa ma o ma lo’u tina e auai i fautuaga faapolofesa, lea sa avea ma fesoasoani tele! O lo’u faufautua o le mea tonu lava lea sa ou moomia. Sa ia fesoasoani ia te au e malamalama i lagona uma sa ou lagonaina ma sa fesoasoani mai ia te au i le taulimaina o manatuaga leaga uma. Ou te lei iloaina le tele o lo’u tiga, vagana ai ina ua amata ona ou toe lagonaina le atoatoa.
Ou te lei manatu o le a mou ese atu le tiga ona ua ou tautala e ta’u, ae ou te lei iloaina foi le tele o le taimi (ma le onosai) ou te moomia ia faamaloloina ai. Aua na umi tele se taimi sa ou lagonaina ai le le agavaa. Sa tatau ona ou toe aoaoina e alofa ia te au lava.
Sa ou maua le filemu sili ina ua ou liliu atu i lo’u Faaola ma lo’u Tama Faalelagi. O le iloaina sa La’ua silafia tonu o’u lagona na aumaia ai ia te au le malosi ma le faamoemoe. Sa ou faalagolago ia te i La’ua i taimi aupito sili ona pogisa. Ina ua mavae se taimi umi, sa amata ona mou atu manatuaga, ma sa ou lagonaina moni le filemu e ala i le alofa o le Faaola.
O se tasi o vaega aupito sili ona tauia i le faagasologa o le faamalologa o le iloaina lea e faapea sa i ai so’u lumanai susulu. Ina ua sauaina au, sa le mafai ona ou manatu e i ai so’u olaga e pei ona masani ai. Sa ou lagonaina lo’u masofasofa tumau. Ae e ala mai i le fesoasoani ma le faamalologa, sa ou maua ai mea e sagisagi atu i ai. Sa amata ona ou faamatalaina la’u tala i isi teineiti o e sa tiga foi, ma sa ou filifili foi e auauna atu i se misiona. O le faasoa atu o la’u molimau i isi, na faamalosia ai au.
E le fuaina lo’u taua i mea na faia e lo’u tamā fai ia te au. Na ia suia e faavavau lo’u olaga, ae ua ou filifili e faaaoga lo’u aafiaga e fesoasoani ai i isi. E i ai lava nisi aso e faigata ai, ae e ala i mea uma, ua faamalosia ai au e le Alii, ma ou te iloa o le Ia fesoasoani mai pea lava ia te au. Ua suia a’u mai sē na afaina fua i sē ua laveaiina.