Ua Na’o Tusiga Faatekinolosi
O Le Iloaina o Sauaga o Lagona
“O lou toalua e le o se tagata saua. E ‘e’e mai ia te a’u ma valaau mai ia te a’u ni igoa, a e le o se saua lena mea, e sa’o ea?”
Ua tatou iloa “e tausalaina e le Alii amioga saua i soo se ituaiga.”1 Ma o nisi ituaiga o sauaga, e pei o sauaga faaletino, e faigofie ona vaaia, ae o le sauaina o lagona e sili atu ona faigata ona iloa. O le faaleagaina e i’u i le fenumiai, fefe, maasiasi, leai o se faamoemoe, ma lagona o le le faatauaina o le tagata lava ia.
O le sauaina o lagona o se taumafaiga a se tagata e toatasi e aveesea le faitalia o le isi ma maua ai le puleaina o i latou i upu po o amioga e faaseseina ai lagona po o filifiliga. O le sauaina o lagona e mafai ona tupu i soo se ituaiga o sootaga: i le va o taitoalua, i le va o matua ma fanau, i faauoga, i tafaoga faamasani, po o totonu i le va o tagata faigaluega.
O a Ni Faataitaiga o Sauaga o Lagona?
O le iloaina o faailoga o le sauaina o lagona e mafai ona fesoasoani ia te oe e puipuia oe lava ma e pele ia te oe. O nisi o amioga saua e aofia ai:
-
Faaigoa oe i ni igoa po o le faatatau ia te oe i ni auala faato’ilalo tagata.
-
Faamaasiasi o oe i nofoaga faitele.
-
Faitioina ma le ta’u faatauva’aina o mea ua e ausiaina ma mea e te faia.
-
Tuuaia oe mo a latou amioga ae le tali atu i mea na latou faia.
-
O le faia o se mea e te lagona ai le tausalaina ina ia e faia se mea mo i latou ona sa latou faia se mea mo oe.
-
Faaesea oe mai isi ma puleaina le auala e te faaaluina ai lou taimi.
-
Faia o taufaamatau pe afai e te le faia mea i se auala faapitoa pe faia ni mea faapitoa.
-
Taofia le alofa seia oo ina e faia ni mea faapitoa mo i latou.
-
Taitai seseina oe faaleagaga e ala i le faaaogaina o talitonuga faalelotu e pulea ai oe.
E Mafai Faapefea Ona Ou Iloa Le Sauaina o Lagona?
E tutusa lava le taua o lou masani i amioga saua ma faailoilo lapatai o i totonu ia te oe. O nisi nei o mamanu masani ma faaiuga e mafai ona faatumauina ai oe i se sootaga saua o lagona:
-
Faia o ni alofaga o amioga o lē o loo sauaina oe:
-
Tauamiotonuina o amioga a lē ua faasaua: “E le masani ona ia faia lenei mea—e mamafa tele lava se avega o loo ia te ia i le taimi nei.”
-
Tuuitiitia le amio: “Sa le o se tulaga tele tele.”
-
Tuuaia oe lava mo a latou amioga: “Ana ou saunia le meaai i le taimi tatau ai, semanu e le ita o ia ma ee mai ia te au.”
-
Le amanaiaina o lagona tiga. I le taimi muamua, afai o oe lea e aafia i le sauaina o lagona, atonu e te manao e aloese mai le tagata na faatiga ona e te lagona le le toafimalie po o le le lelei ia te oe lava ia pe a o faatasi ma i latou. Ina ia faasaoina le sootaga, atonu o le a e le amanaiaina nei lagona le lelei. E i ai taimi, e mafai ona mou ese atu lena le fiafia ona o se taunuuga o le masani i a latou amioga.
-
Faaaogaina o talitonuga faalelotu e faamaonia ai le tulaga. O lenei mea e taatele i lo tatou lalolagi, e aofia ai ma tagata o le Ekalesia. Atonu e mafaufau le tagata o loo sauaina i se mea faapenei: “Ua poloaiina i tatou e le Alii ia faamagalo atu. O loo ou faia le agasala pe afai ou te le faamagalo atu.” O le Faamagalo atu o se poloaiga. Ae pei ona aoao mai Elder Jeffrey R. Holland e uiga i le Faaola, “Na te le’i saunoa mai, ‘E le faatagaina outou e lagonaina le tiga moni po o faanoanoaga moni mai aafiaga matuitui na e oo i ai ona o le isi tagata.’ E le’i faapea mai foi, ‘Ina ia mafai ona faamagalo atu atoatoa, e ao ona e toe faia se sootaga faatiga pe toe foi atu i se tulaga faasaua ma faataumaoi.’”2
-
Faatuatuanai i ou lava manaoga. E te taulimaina manaoga o isi i le tau e tausia ai oe lava ia. Mo se faataitaiga, mafatia i tiga o lagona ina ia aloese mai le faatiga atu i lagona o se tasi po o le tuuina atu o tupe i se uo, e tusa lava pe le mafai ona e gafatia.
-
Lagona le lē aoga. O le sauaina o lagona e mafai ona faalavelaveina ai ou lagona o le taua faaletagata lava ia. Peitai o oe o se atalii po o se afafine o le Atua, ma ua i ai se natura paia ma se taunuuga. O lou taua, lea e maoae, e le masuia (tagai Mataupu Faavae ma Feagaiga 18:10).
O le a Se Mea e Mafai Ona Ou Faia pe Afai o Loo Sauaina O’u Lagona?
O nisi taimi, o se mafutaga ua sauaina faalelagona e ono matua malepelepe e avea ai le alu ‘ese mai se mafutaga, o se mea e tatau ona fai. Ae peitai, o le alu ‘ese e le na o le pau lea o le filifiliga i tulaga uma. E mafai ona i ai se suiga, ma o se mafutaga e mafai ona maloloina lelei i le galueaina, ma le tele o le fesoasoani a se tagata tomai faapitoa. Afai e te talitonu o loo e i ai i se mafutaga e sauaina ai lagona, o mea nei e mafai ona fesoasoani:
-
Saili le lagolago ma se fesoasoani mai se tagata faatuatuaina e mafai ona e faasoa atu i ai ou aafiaga, e pei o se uo, se taitai o le Ekalesia, po o se tomai faapitoa i se faalapotopotoga a le nuu. E mafai e lenei tagata ona tuuina atu le lagolago i lagona ma se vaaiga lelei po o ai oe ma e mafai ona faaalu ai se taimi ‘anoa ma oe e ese mai sauaga. (Tagai i le sauaina. ChurchofJesusChrist.org. Kiliki le “I leTulaga Matautia” mo se lisi o laina fesoasoani.)
-
Faatulaga ma tausisi i tuaoi ma le tagata na te faaalia amioga saua e ala i le faailoaina o amioga e saua ma le faatulagaina o ni tapulaa mo a outou fegalegaleaiga faifai pea. E mafai ona e faapea atu, “Ou te lagona lou le faaaloalo mai ia te a’u i le taimi nei. Ou te fia talanoa ia te oe, ae se’i vagana ua e faia faalelei au ma le faaaloalo ma le agalelei.”
-
Saili se fesoasoani mai se faufautua faapolofesa o lē e malamalama i le sauaina o lagona ma ona aafiaga. O nisi taimi e le iloa ai e e solia le tulafono, o loo latou faia sauaga. E mafai ona latou aoao e suia pe afai latou te naunau e saili le fesoasoani. Afai e le faaauau pea le mafutaga, o le saili atu i se fesoasoani faapolofesa, faatasi ai ma le fesoasoani a le Alii, o le a fesoasoani ia te oe e faamalolo ai.
-
Saili ni faamatalaga ma ni punaoa aoga e uiga i le sauaina. ChurchofJesusChrist.org.
Po o a lava tulaga ua e o’o i ai, ia iloa o loo i ai tagata e alolofa ia te oe ma mananao e fesoasoani ia te oe. Ma o le liliu atu i lou Tama Faalelagi, le Faaola, ma le Agaga Paia, e mafai ai ona maua le faamoemoe ma le faamalologa.