Fesili & Tali

E faapefea ona ou faagaloina lagona o le tuuatoatasi?

girl with her head down

Ata na Pueina e Kay Lynn Hodges

Atiina A’e Au Taleni

Ou te faagaloina o’u lagona o le tuuatoatasi e ala i le atiina ae o a’u taleni, pe o se mea faimusika, o se mea ou te fiafia i ai, ma isi mea. E fesoasoani lena e faasalaveia ai oe mai ou lagona o le tuuatoatasi, ma e tele ina mou ese atoa atu ai. O le a tau atu ai foi i le mauaina o isi e tufa atu i ai mea e te fiafia i ai.

Steven H., 12 tausaga, Mekisiko Fou, ISA

Saili Atu i le Malamalama

Ou te sailia le lagolago, faamalosiauga, ma le alofa o le Tama Faalelagi ma le Agaga Paia e aumaia ai ia te au le filemu, faamoemoe, ma le malosiaga pe a ou mafaufau loloto, tatalo, ma faitau i tusitusiga paia. E pei ona fai mai i le 3 Nifae 11:11, o Iesu Keriso “o le malamalama ma le ola o le lalolagi.” Na afio mai o Ia e tuliese le pogisa.

Andrea B., 18 tausaga, Zulia, Venesuela

Aapa Atu i Uo ma Aiga

Pe a ou lagonaina le tuuatoatasi, ou te fia aapa atu i a’u uo ma aiga; ou te fiafia moni ai lava. Ou te vaavaai i faamanuiaga i lo’u olaga ma faafetai i le Tama Faalelagi i le tele o mea ua Ia tuuina mai ia te au!

Talli N., 16 tausaga, Oregon, ISA

Manatua le Fuafuaga a le Atua

Ia iloa e ala i le fuafuaga a le Atua, e le manaomia ai lo tatou lagona tuuatoatasi. E mafuta pea lava le Agaga Paia ma i tatou, ma e silafia e le Atua mea o loo tatou tauivi ai. Na uia e le Alii tofotofoga uma ma tauiviga o loo tatou feagai. O se tasi o mea sili ona taua tatou te lagonaina i le olaga nei o le fiafia, ae e le mafai ona tatou maua le fiafia e aunoa ma le faanoanoa (tagai i le 2 Nifae 2:11). Tatalo i le Atua ma ole atu i ai mo se fesoasoani; Na te le tuulafoaiina lava se tasi o i tatou.

Brock S., 17 tausaga, Iuta, ISA

Faalagolago i le Alii

O le tuua o le aiga ae sau i Pasila mo la’u misiona sa faigata. Sa faigata ona ou tautala i le gagana! Ae ua ou aoaoina foi e faapea afai e ia te oe le Agaga o le Alii, e te le lagonaina lava le tuuatoatasi. Na te silafia oe, ma o le a fesoasoani pea lava ia te oe. Faalagolago ia te Ia!

Elder Joseph Tolen, 20 tausaga le matua, Misiona a Pasila Campinas

“O le tiga o le tuuatoatasi e foliga mai o se vaega o le poto masani i le olaga faitino. Ae o le Alii i Lona alofa mutimutivale ua ia faia ina ia tatou le taulimaina lava na o i tatou ia luitau o le olaga faitino. … Ua uma ona folafola mai ia i tatou le mafutaga faifai pea a le sui lona tolu o le Aigaatua ma o lea e maua ai le avanoa paia e tali ai faaaliga mo o tatou lava olaga. E le o tuua lava na o i tatou!”

Sheri L. Dew, o se fesoasoani lua i le Au Peresitene Aoao o le Aualofa sa i ai, “E Le o Tuua Lava Na o i Tatou,” Liahona Nov. 1999, 112.

O Le A Sou Manatu?

“O le a se mea e tatau ona ou faia pe afai ua ou salamo ae le mafai ona tuua lo’u mafaufau pea e uiga i le mea sese sa ou faia?”

Auina mai lau tali ma, afai e manaomia, se ata pue manino, a o lei aulia le aso 15 o Novema, 2020, i le liahona.ChurchofJesusChrist.org (kiliki le “Submit an Article po o le Feedback”).

E ono iloiloina tali mo le uumi po o le manino. O tali ua lolomiina e faamoemoe mo se fesoasoani ma ni manatu tonu, ae e le o ni faalauiloaina aloaia o aoaoga faavae a le Ekalesia.

• Tuusao i le Mataupu