O Faneva le Faifeautalai
Sa autilo atu Faneva i fafo i le faamalama i le auala pisi i fafo o lona fale. Sa mafai ona ia vaaia tagata o toso a latou taavale o fualaau faisua, alaisa, lavalava, ma isi oloa e faatau atu. Sa mafai ona ia lagona atu pu o taavale o faaee ma taifau o loo ou. Ona ia faalogoina lea o se isi leo.
“Mama, o la e i ai se tagata o loo tu’itu’i mai!” Sa valaau atu ai Faneva. Sa tatala e Mama le faitotoa. E toalua ni alii talavou e fai o la suti ma fusiua sa tutū i le faasitepu. E lei vaai muamua lava Faneva i se tasi o laei faapea i lo latou pitonuu i Madagascar.
“O i ma’ua o ni faifeautalai mai Le Ekalesia a Iesu Keriso o le Au Paia o Aso e Gata Ai,” sa fai ane ai se tasi o i la’ua. “Ma te aoao tagata e uiga ia Iesu. E mafai ona ma faasoa atu se savali ia te oe?”
Sa fiafia Faneva ina ua faaafe e Mama i la’ua i totonu. Sa faapotopoto ane le aiga atoa e faalogologo e uiga ia Iesu Keriso ma pe na faapefea ona toe oo mai Lana Ekalesia i le lalolagi.
Ina ua uma lena aso, sa toe asiasi soo atu ia faifeautalai i le aiga o Faneva. Sa la aumaia se tusi e igoa o Tala o le Tusi a Mamona. Sa fiafia Faneva e faitauina ma lona aiga!
O le a i ai se aso o le a avea ai au o se faifeautalai ma ou faasoa atu le Tusi a Mamona i isi, sa fai ifo ai Faneva ia te ia lava.
I se isi taimi ina ua o mai faifeautalai, sa la aoaoina le aiga o Faneva i le ala e tatalo ai. Sa aoao Faneva e mafai ona ia talanoa i le Tama Faalelagi i soo se taimi, i soo se mea.
O le a i ai se aso o le a avea ai au o se faifeautalai ma ou aoao ia tagata e uiga i le tatalo. na mafaufau ai Faneva.
I se tasi aso na i ai i faifeautalai se fesili taua.
“Pe o le a e mulimuli i le faataitaiga a Iesu Keriso ma papatiso?” sa fesili ane ai se tasi o i la’ua.
Sa lagona e Faneva le fiafia i lona loto. “Ioe!” o lana tala lea.
“Ioe!” na fai atu ai lona uso ma Mama.
Sa fai atu Papa e lei saunia o ia e papatiso. Ae sa le afaina pe a papatiso uma le isi vaega o le aiga. Ma na papatisoina i latou! Sa papatisoina Faneva e se tasi o faifeautalai o lē sa aoaoina o ia e uiga ia Iesu.
O le a i ai se aso o le a avea ai au o se faifeautalai ma ou fesoasoani ai i tagata ia papatiso, na mafaufau ai Faneva.
O se tasi o vaega aupito sili o le avea ma se tagata o le Ekalesia o le alu i le Peraimeri. Sa fiafia Faneva i gaoioiga ma le feiloai i uo fou. Ae o lana mea aupito sili o le usuina lea o pese o le Peraimeri. I se tasi o Aso Sa i le Peraimeri, sa latou usuina ai pese e uiga i le faasoa atu o le talalelei.
“Ou te fia faifeautalai nei,” na pese ai Faneva. “Ou te le fia faatali sei matua.”
E mafai ona ou amata faia le galuega faafaifeautalai i le taimi nei, na mataulia ai e Faneva. Ou te le tau faatali seia oo i se aso!
Mai lava i lena taimi, sa vaavaai ai Faneva mo ni auala e mafai ai ona ia faasoa atu le talalelei. Sa ia taumafai e avea ma faataitaiga lelei. Sa ia valaaulia tagata i le lotu. Sa fesoasoani o ia i ona tuaoi. Ina ua mavae ni nai tausaga, sa lava lona matua e fesoasoani ai i faifeautalai e aoao ia tagata i lona nuu. I ni nai tausaga mulimuli ane, sa faamisiona ai o ia lava---sa feiloai atu i tagata fou ma faasoa atu le talalelei, e faapei o faifeautalai sa faasoa atu ia te ia.