2020
Itum̧wilaļ in Būruōd
Māe 2020

Itum̧wilaļ in Būruōd

Jān Douglas D. Holmes

Rikakpilōklōk eo Kein Kajuon eo ej kab m̧ōj kōtļo̧ke jān jerbal ilo Būreejtōnji eo Eutiej an Doulul eo an Likao ro

Irooj ej kajjieon̄ jipan̄ kōj—aolepād wōj—bōkļo̧k gospel eo An n̄an ijo em̧wilaļ ļo̧k ilo būruōd.

Kōrā ro im em̧m̧aan ro jeiū im jatū, en̄in ej juon iien aiboojoj jej mour ie. Ilo ad kakeememej e ijjino eo an Jepļaaktok eo, ej barāinwōt jetjet n̄an kakeememej e Jepļaaktok eo ej wōnm̧aanļo̧k wōt me jej kam̧oole. Ij lan̄lōn̄ ippāmi n̄an mour ilo tōre in.1 Irooj ej wōnm̧aanļo̧k wōt n̄an likūt ilo jikin, kōn rikanaan ro An, aolep men ko aikuji n̄an jipan̄ kōj m̧aanjabpopo n̄an bōk E.2

Juon iaan men ko aikuji ej ijjino kāāl eo an Ajri ro im Jodikdik ro. Elōn̄ iaami rejeļā kōn aorōk eo an būrookraam̧ in ilo kōm̧m̧an kōttōpar ko, kōkaļļe ko rekāāl kōn uwaan, im kweilo̧k ko an N̄an Kōkajoorļo̧k Jodikdik ro. Bōtaab jab kōtļo̧k bwe men ko ren katinaad erreļo̧k eo ad kōn pedped ko būrookraam̧ eo ej ekkal ioon im jibadbad eo aer: n̄an jipan̄ bōkļo̧k gospel eo an Jisōs Kraist n̄an itum̧wlaļ in būruōn ajri ro im jodikdik ro ad.3

Ij tōmak ilo ad itok n̄an an alikkar ļo̧k ad lo pedped in katak kein, jenaaj kile menin āinwōt eļapļo̧k jān juon būrookraam̧ n̄an membōr ro dettaer 8 n̄an 18. Jenaaj lo ekōjkan an Irooj kajjieon̄ jipan̄ kōj—aolepād wōj—bōkļo̧k gospel eo An n̄an ijo em̧wilaļ ļo̧k ilo būruōd. Ij jar Jetōb Kwojarjar eo enaaj jipan̄ kōj ekkatak ippān doon.

Jemjerā ko—“Pād Ippāer”4

Pedped in katak eo m̧oktata ej jemjerā ko. Kōnke rej juon m̧ōttan Kabun̄ eo an Jisōs Kraist, jet iien jej meļo̧kļo̧k aorōk eo an jemjerā ko ilo iaļ eo ad n̄an Kraist ej wōnm̧aanļo̧k wōt. Jab kōtmene n̄an lo ak etetal ilo iaļ in bujen eo make ļo̧k. Jej aikuj iakwe eo im rejtake eo jān ro jinen im jemān, ro jet uwaan baam̧le eo, ro jerad, im ritōl ro me rej barāinwōt etetal ilo iaļ eo.

Kain jemjerā kein ebōk iien. Iien n̄an ippān doon. Iien n̄an etōōn̄, ikkure, ekkatak ippān doon im jerbal ippān doon. Iien n̄an kam̧m̧oolol kōn itok limo ko im apan̄ ko an doon. Iien n̄an jab ālkin jepjep im m̧ool n̄an doon ilo ad kajjieon̄ em̧m̧anļo̧k ippān doon. Jemjerā kein rej juon iaan jibadbad ko reļļap an aiintok doon ilowaan baam̧le ko, doulul ko, kūlaaj ko, im jarlepju ko. Rej pedped eo n̄an jerbal in karejar eo ewejepedik.5

Elder Dale G. Renlund ekar letok kii eo n̄an kaddōkļo̧k jemjerā kein ke ekar ba: “N̄an wājepdik in jerbal n̄an ro jet jej aikuj loi … kōn imejān Jemedwōj Ilan̄. Innām jemaron̄ in jino meļeļe mool in aorōk eo an juon jetōb. Jān menin wōt im jemaron̄ meļeļe iakwe eo ippān Jemedwōj Ilan̄ n̄an aolep ajri ro Nejin.”6

Lo ro jet āinwōt an Anij lo er ej juon menin letok. Ij kajjitōk ippādwōj aolep n̄an kappukōt menin letok in. Ilo an mejād peļļo̧k n̄an loe,7 jenaaj barāinwōt maron̄ in jipan̄ ro jet lo kōn er make āinwōt an Anij loe.8 Būreejtōn Henry B. Eyring ekar kōmejajaik kajoor eo an iien in ke ekar ba: “Ta eo enaaj aorōk tata ej ta eo [ro jet] rej ekkatak jān [kwe] kōn wōn lukkuun er im ta eo remaron̄ lukkuun in erom. Elmakot eo aō ej bwe eban ļap aer ekkatak kake jān katakin kōn kōnono ko. Renaaj bōke jān en̄jake ko kōn wōn kwe, wōn eo kwoj ļōmņak kōn er, im ta eo kwoj ļōmņak remaron̄ in erom.”9 Jipan̄ ro jet meļeļe kadkad eo aer em̧ool im jibadbad eo aer ej juon iaan menin letok ko reļļaptata jemaron̄ leļo̧k.10 Pukot ro jet im kōj make āinwōt an Anij deel būruwōd “ippān doon ilo bōrokuk im ilo iakwe.”11

Kōn ļapļo̧k wōt in kajoor ko an wujwan an laļ kareel kōj, jej aikuji kōkajoorļo̧k eo ej itok jān jemjerā ko reiakwe. Ilo ad ļōmaki m̧akūtkūt ko, kweilo̧k ko, im aiintok doon ko jet, jooj en keememej jibadbad eo eļap an aiintok doon kein ej n̄an kalōk jemjerā ko ewōr iakwe ie me rej kobaik kōj ippān doon im jipan̄ bōkļo̧k gospel eo an Jisōs Kraist n̄an ijo em̧wilaļļok ilo būruōd.12

Revelesōn, Anemkwoj in Kāālet, im Ukweļo̧k—“Kobaik Er ippān Lan̄”13

Aaet, ejjab baj bwe wōt n̄an ekkejel ippān doon. Elōn̄ kumi ko im doulul ko me rej bōk juon wōt ipeļaakin jerbal ko roktak jān doon. Ak ippān doon eo jej kappukōte ej n̄an erom juon wōt ilo Kraist, n̄an kobaik kōj make Ippān.14 N̄an kobaik būruwōd ippān lan̄, jej aikuji en̄jake ko ilo jetōb an kajjojo armej, āinwōt an Elder Andersen baj kajoor an kar kōnono n̄an kōj kake.15 En̄jake ko rej itok āinwōt an Jetōb Kwojarjar eo bōktok naan eo im iakwe eo an Anij n̄an ļōmņak eo ad im būruōd.16

Revelesōn in ej itok jān jeje ko rekwojarjar, eļaptata jān Bok in Mormom eo, jān naan ko reim̧we an rikanaan ro remour im rikaļoor ro jet retiljek, im jān ainikien eo edik.17 Naan kein reļapļo̧k jān kōļar ilo juon peij, ainikien ilo lo̧jilin̄id, ļōmņak ko ilo ļōmņak ko ak, en̄jake ko ilo būruwōd. Naan eo an Anij ej kajoor ilo jetōb.18 Ej m̧ool eo im meram eo.19 En̄in ej wāween ad ron̄jak E! Naan eo ej jino im kōļapļo̧k tōmak eo ad ilo Kraist im kōlowetak ilo kōj juon ikdeelel n̄an eromļo̧k āinwōt Rilo̧mo̧o̧r eo—en̄in ej n̄an ukweļo̧k im etetal ilo iaļ in bujen eo.20

Eprōļ eo ļo̧k, Būreejtōn Russell M. Nelson ekar jipan̄ kōj meļeļe jerbal eo eļap an ukweļo̧k em̧m̧akūt in kōn kanaan.21 Ekar ba: “N̄e jej kāālet n̄an ukweļo̧k, jej kāālet n̄an oktak! Jej kōtļo̧k an Rilo̧mo̧o̧r eo ukōt kōj n̄an juon nememe eo ad make em̧m̧antata. … Jej kāālet n̄an erom̧ āinwōt Jisōs Kraist!”22 En̄in ej jekjek eo an oktak, kar kōlowetak jān naan an Anij, ej wāween ad ekkejel ippān lan̄.

Pedped ilo kūr eo an Būreejtōn Nelson n̄an ukweļo̧k ej pedped in katak an anemkwoj in kāālet. Jej aikuj kāālete ukweļo̧k kōj make. Gospel eo ban kipel e tok n̄an būruwōd. Āinwōt an Elder Renlund ekar ba, “Kōttōpar eo an Jemedwōj Ilan̄ ilo kōkaajriri ejjab n̄an ajri ro Nejin bwe ren kōm̧m̧ane ta eo ejim̧we; ej n̄an ajri ro Nejin bwe ren kāālet n̄an kōm̧m̧ane ta eo ejim̧we.”23

Ilo būrookraam̧ ko kar bōk jikier kōn Ajri ro im Jodikdik ro, ekar wōr elōn̄ļo̧k jān 500 men ko aikuji n̄an kadedeļo̧k n̄an maron̄ in bōk kein nōbar ko roktak jān doon.24 Rainin, ewōr juon wōt emenin aikuj. Ej juon kūr n̄an kāālet n̄an eromļo̧k āinwōt Rilo̧mo̧o̧r eo. Jej kōm̧m̧ane menin jān ad bōk naan eo an Anij jān Jetōb Kwojarjar eo im kōtļo̧k an Kraist ukōt kōj n̄an em̧m̧an tata eo ad make.

Menin eļapļo̧k jān juon kaminene in kōm̧m̧an kōttōpar ak kōkōm̧anm̧anļo̧k juon make. Kōttōpar ko rej juon kein jerbal me ej jipan̄ kōj ekkejel ippān lan̄ kōn revelesōn, anemkwoj in kāālet, im ukweļo̧k—n̄an itok n̄an Kraist im bōk gospel eo An ilo ijo em̧wilaļļo̧k ilo būruōd.

Bōk Koņaan im Kaarmejete—“Kōtļo̧k Bwe Ren Tōl”25

Āliktata, n̄an bōkļo̧k gospel eo an Jisōs Kraist n̄an ijo em̧wilaļ ilo būruōd jej aikuj bōk ko̧nad ie—n̄an leļo̧k iien eo ad im tōļan ko n̄ane, n̄an kaarmejete n̄ane.26 Jej aolep kōņaan mour juon mour ewōr meļeļe in, im menin eļap tata an m̧ool kōn diktak in epepen in. Rej ikdeelel kōn juon jerbal.

Gospel eo an Jisōs Kraist ej jerbal eo eļap tata ioon laļ in. Būreejtōn Ezra Taft Benson ekar ba: “Kar kakien kōj jān Anij n̄an bōkļo̧k gospel in n̄an aolepān laļ in. En̄in ej jerbal eo me aikuj in kakobaik kōj rainin. Gospel eo wōt enaaj lo̧mo̧o̧ren laļ in jān jerata eo an kakkure an make. Gospel eo wōt enaaj kobaik em̧m̧aan ro [im kōrā ro] an aolep bwij im rilaļ ilo aenōm̧m̧an. Gospel eo wōt enaaj bōktok lan̄lōn̄, m̧ōņōņō, im lo̧mo̧o̧r n̄an baam̧le eo an armej.”27

Elder David A. Bednar ekar kallim̧ur, “Ilo ad kōkajoor jodikdik ro kōn kajjitōk im kōtļo̧k bwe ren jerbal, Kabun̄ in enaaj wōnm̧aanļo̧k ilo wāween ko rekabwilōn̄lōn̄.”28 Ekanooj emakijkij ad jab kajjitōk im kōtļo̧k bwe jodikdik ro ren kaarmejete kōn jerbal in eļap an Kraist. Elder Neal A. Maxwell ekar watata, “Eļan̄n̄e jodikdik ro [ad] eļap aer edodo [kōn jerbal eo an Anij] eļap wōt aer nej edodo kōn laļ in.”29

Būrookraam̧ an Ajri ro im Jodikdik ro ej pedped ioon kōkajoor jodikdik ro. Rej kāālet kōttōpar ko aer make. Būreejtōnji ko an doulul eo im kūlaaj eo rej likūt er ilo jerbal eo aer ekkar. Ko̧o̧njeļ eo an jodikdik ro ilo ward eo, ejja āinwōt ward ko̧o̧njeļ eo, rej kalimjōk wōt jerbal in lo̧mo̧o̧r im mour āinwōt Anij.30 Im doulul ko im kūlaaj ko rej jino kweilo̧k ko aer kōn kapilōk kōn ekōjkan kōm̧m̧ane jerbal eo an Anij kar leļo̧k n̄an er.31

Būreejtōn Nelson ekar ba n̄an jodikdik ro an Kabun̄ in: “Eļan̄n̄e kom̧ij kāālet n̄an, eļan̄n̄e kom̧ij kōņaan n̄an, … kom̧ maron̄ juon m̧ōttan eļap an juon men ekilep, juon men eutiej, juon men ekabwilōn̄lōn̄! … Kom̧ij ibwilijin ro rem̧m̧an tata Irooj ekar jilkintok n̄an laļ in. Ewōr ippāmi maron̄ eo n̄an māletletļo̧k im lo̧ļeļo̧k im eļapļo̧k kilaan ioon laļ in jān jabdewōt epepen im̧aanļok!”32 Ilo juon iien, Būreejtōn Nelson ekar jiron̄ jodikdik ro: “Ewōr aō lōke edipio ilo kom̧. Ij iakwe kom̧, im Irooj barāinwōt. Jej armej ro An, rej bōk koņaer ippān doon ilo jerbal eo An ekwojarjar.”33 Kom̧ jodikdik raņ, kom̧ maron̄ ke en̄jake lōke eo an Būreejtōn Nelson ilo kom̧ im ewi jon̄an ami aorōk n̄an jerbal in?

Ro jinen im jemān, ritōl ro rōrūtto, ij kajjitōk ippāmi n̄an kalimjōk jodikdik ro āinwōt an Būreejtōn Nelson kalimjōk er. Ilo an jodikdik ro en̄jake iakwe im lōke eo ami, ilo ami kōketak im katakin er wāween tōl—innām kōtlo̧k bwe ren tōl—renaaj kōppaļ kom̧ kōn kōļmenļo̧kejņ ko aer, maron̄ ko, im kallim̧ur eo n̄an gospel eo.34 Renaaj en̄jake lan̄lōn̄ eo an kāālet n̄an bōk koņan ilo im kaarmejete n̄an jerbal eo an Kraist. Gospel eo An enaaj m̧wilaļļo̧k ilo būruōer, im jerbal eo enaaj wōnm̧aanļo̧k ilo wāween ko rekabwilōn̄lōn̄.

Kallim̧ur im Naan in Kam̧ool

Ij kallim̧ur, ilo ad kalimjōk pedped in katak kein—jemjerā ko, revelesōn, anemkwoj in kāālet, ukweļo̧k, im kaarmejete—gospel eo an Jisōs Kraist enaaj m̧wilaļļo̧k an pād ilo būruōd. Jenaaj lo an Jepļaaktok eo ej wōnm̧aanļo̧k n̄an jibadbad eo an eļap tata, pinmuur eo an Israel im jutak eo an Zaion,35 ijo im Kraist enaaj irooj āinwōt Kiin̄ in kiin̄ raņ.

Ij kam̧ool bwe Anij ej wōnm̧aanļo̧k wōt n̄an kōm̧m̧ani aolep men ko remenin aikuj n̄an kōpooj armej ro An n̄an raan jab eo. Kōm̧m̧an bwe jen lo Pein ilo jerbal in eaiboojoj ilo ad aolep kajjieon̄ in “itok n̄an Kraist, im weeppān ilo e.”36 Ilo etan Jisōs Kraist, amen.

Kakeememej ko

  1. Lale Katak im Bujen Ko 45:12. Būreejtōn Nelson ekar ba: “Baj ļōmņak kōn itok limo eo im kijooror eo n̄an kobaik Israel: aolep rikanaan ijjino ippān Adam rekar lo tōre in ad. Im aolep rikanaan ro raar kōnono kōn tōre in ad, ke Israel enaaj kar koba im laļ in enaaj kar m̧aanjabpopo n̄an Itok eo Kein Karuo an Rilo̧mo̧o̧r eo. Ļōmņak kake! Jān aolep armej ro rekar mour ioon laļ in, kōj jej armej ro rej bōk koņaer ilo m̧akūtkūt in āliktata, an aiintok doon in eļap. Ewi jon̄an an kaitoktok limo menin!” (“Hope of Israel” [worldwide youth devotional, June 3, 2018], HopeofIsrael.ChurchofJesusChrist.org).

    Elder Jeffrey R. Holland ekar katakin:

    “En̄in ej juon tōre eļap n̄an mour!

    “Gospel eo an Jisōs Kraist ej men eo em̧ool tata, im ineem̧m̧an tata, kōjatdikdik ioon tata, im m̧ool eo eļap tata ioon laļ in im ilo lan̄, ilo iien im ilo indeeo. Ejjeļo̧k—ejjeļo̧k jabdewōt, ejjeļo̧k juon, ejjeļo̧k jabdewōt kareel—naaj dāpij Kabun̄ in jān an kakūrm̧ool mijen eo an im kile mejān kajjik eo kar kwaļo̧k jān jino in pedped eo an laļ in. … Ejjeļo̧k aikuj in mijak ak ban kōm̧m̧ane kōn ilju jekļaj.

    “Ejjab āinwōt ilo jabdwōt tōre ko jet im̧aad, tōre in bōk eddo in ejjamin ioon juon bun̄ jān tōmak; ejjamin naaj jerwane priesthood kii ko; ejjamin naaj ioon juon bōjrak in revelesōn jān ainikien Anij Kajoor Bōtata . … Juon tōre aiboojoj me jej mour ie!

    “… Eļan̄n̄e kom̧ij jan̄in de kile, ij kōbōļaļaik kōn raan ko āliktata. … Tōmak. Jutak ļōn̄tak. Tiljek. Im kortokjān tōre in ekabwilōn̄lōn̄ me jej mour ie!” (Facebook post, May 27, 2015; barāinwōt lale “Be Not Afraid, Only Believe” [address to Church Educational System religious educators, Feb. 6, 2015], broadcasts.ChurchofJesusChrist.org).

  2. Lale Jon 1:12.

  3. Ejjab to ālkin am kar kūr āinwōt Būreejtōnji eo Eutiej an Doulul eo an Likao ro, Būreejtōn Henry B. Eyring ekar ekōnono ippām kōn apan̄ ko rejej uwaer im iien ko rem̧m̧an jodikdik ro an Kabun̄ in rej jelmai rainin. Ekar kapilōk kōm n̄an kalimjōk wōt men ko me renaaj kar jipan̄ bōk laļļo̧k n̄an ijo em̧wilaļ ilo būruōer gospel eo an Jisōs Kraist. Kapilōk in ekar juon kōkaļļe n̄an kōm āinwōt Būreejtōn eo an Doulul eo an Likao ro.

  4. Lale “Be with Them,” ChurchofJesusChrist.org/callings/aaronic-priesthood-quorums/my-calling/leader-instruction/be-with-them.

  5. Lale Mosaia 18:25; Moronai 6:5.

  6. Dale G. Renlund, “Kōn Māj ko Mejān Anij,” Liaona, Nob. 2015, 94; lale barāinwōt Moses 1:4–6.

    Būreejtōn Thomas S. Monson ekar katakin: “Ewōr ippād eddo eo n̄an kalimjōk kajjojo āinwōt aer jab ak ilo aer maron̄ erom. Ij akwelap ippami n̄an ļōmņak kōn er ilo iaļ eo ami.” (“Lo Ro Jet āinwōt Aer Maron̄ Erom,” Liaona, Nob. 2012, 70).

    Elder Neal A. Maxwell ekar katakin: “Ekanooj emakijkij, an itulikin juon jodikdik jab ļoor jon̄ak ko an Kabun̄ in, ak an kajjitōk kajjitōk ko rej āinwōt kōm̧m̧an iakwelel, ak an kwaļo̧k ļōm̧ņak pere ko rekōm̧m̧an bwe ren ekajete. Tōprak ko remaron̄ in etoļo̧k im, jet iien, jeno̧lok jān juon kumi. Iakwe em̧ool ejjab āinwōt jon̄ak ko!” (“Unto the Rising Generation,” Ensign, Apr. 1985, 9).

  7. Lale 2 Kiin̄ 6:17.

  8. Stephen L. Richards, āinwōt juon uwaan Bureejtōnji eo Kein Kajuon, ekar ba: “Kain kile eo eutiejtata ej eo me ej loe ippen lo jet im kwaļo̧k tok n̄an er em̧m̧an eo aer, em̧m̧an eo epād ilowaer” (in Conference Report, Apr. 1950, 162; in David A. Bednar, “Quick to Observe,” Ensign, Dec. 2006, 35; Liahona, Dec. 2006, 19). Lale barāinwōt 2 Kiin̄ 6:17.

  9. Henry B. Eyring, “Teaching Is a Moral Act” (kōnono eo ilo Brigham Young University, Aug. 27, 1991), 3, speeches.byu.edu; emphasis added; barāinwōt lale Henry B. Eyring, “Help Them Aim High,” Liahona, Nov. 2012, 60–67.

  10. Lale Moses 1:3–6.

  11. Mosaia 18:21; lale barāinwōt Moses 7:18.

  12. “Likao ro me ewōr ippāer jemjerā ko rekijin̄en̄e im em̧m̧an ippān juon baam̧le in [Armej ro Rekwojarjar ilo Raan-ko Āliktata], ro m̧ōttan, im ritōl ro, me rej jipan̄ er kōļapļo̧k juon jemjerā ippān Jemāer Ilan̄, rej āinwōt naaj niknik wōt. M̧ōttan ko an būrookraam̧ rejeno̧lok—ko āinwōt laajrak in kein katakin an Jabōt, būrookraam̧ in m̧akūtkūt an [Doulul eo an Likao ro], kōtmene ko an nōbar ko an juon make … emaron̄ wōr jidik kilaan makeļo̧k an jemjera ko. … Kajjitōk eo aorōk ejjab ewi jon̄an an dedeļo̧k m̧ōttan ko an būrookraam̧ rejeno̧lok rej kōjerbali, bōtaab ekōjkan aer jipan̄ļo̧k jemjerā ko rem̧m̧an me rej kōkajoorļo̧k paotok eo an kabun̄ an likao ro an [Armej ro Rekwojarjar ilo Raan-ko Āliktata]” (“Be with Them,” ChurchofJesusChrist.org/callings/aaronic-priesthood-quorums/my-calling/leader-instruction/be-with-them).

  13. Lale “Connect Them with Heaven,” ChurchofJesusChrist.org/callings/aaronic-priesthood-quorums/my-calling/leader-instruction/connect-them-with-heaven.

  14. Lale Jon 15:1–5; 17:11; Pilippai 4:13; 1 Jon 2:6; Jekab 1:7; Omni 1:26; Moronai 10:32

  15. Jeje ko rekwojarjar robrak kōn waanjon̄ak ko an menin, errein rej ruo wōt: 1 Nipai 2:16; Inōs 1:1–4.

  16. Lale Luk 24:32; 2 Nipai 33:1–2; Jekab 3:2; Moronai 8:26; Katak im Bujen Ko 8:2–3.

  17. Lale 2 Timote 3:15–16; Katak im Bujen Ko 68:3–4; 88:66; 113:10.

  18. Lale 1 Tessalonika 1:5; Alma 26:13; 31:5; Hilamōn 3:29; 5:17; Katak im Bujen Ko 21:4–6; 42:61; 43:8–10; 50:17–22; 68:4.

  19. Lale Jon 6:63; 17:17; Alma 5:7; Katak im Bujen Ko 84:43–45; 88:66; 93:36.

  20. Lale Jon 15:3; 1 Piter 1:23; Mosaia 1:5; Alma 5:7, 11–13; 32:28, 41–42; 36:26; 62:45; Hilamōn 14:13.

  21. Lale 2 Nipai 31:19–21; 32:3, 5.

  22. Russell M. Nelson, “Jemaron̄ Kōm̧m̧an Em̧m̧anļo̧k im Maron̄ Em̧m̧anļo̧k; Liaona, Māe 2019, 67.

  23. Dale G. Renlund “Kom̧in Kāālōt Rainin,” Liaona, Nob. 2018, 104.

  24. Nōm̧ba in ekobiak men ko aikuji an būrookraam̧ ko an Jikaut, mee kiiō epaak raar m̧ōttan būrookraam̧ in m̧akūtkūt eo an Kabun̄ in n̄an ļaddik ro im likao ro, eļap tata ilo United States im Canada. Ilo eria ko me rejjab bōk koņaer ilo Jikaut, nōm̧ba eo an men ko aikuji raar lōn̄ļo̧k jān 200. Ilo kakobaba, būrookraam in m̧akūtkūt ko rellōn̄ n̄an ļaddik ro, leddik ro, likao ro, im jiron̄ ro raar kar oktak ejaki, kōm̧m̧an bwe aolepān menin en ļapļo̧k an kaibokbok n̄an baam̧le ko.

  25. Lale “Let Them Lead,” ChurchofJesusChrist.org/callings/aaronic-priesthood-quorums/my-calling/leader-instruction/let-them-lead.

  26. Lale Omni 1:26; 3 Nipai 9:20; 12:19; Katak im Bujen Ko 64:34. “Juon kabun̄ ejjab aikuji kaarmejete eo an aolep men ko ejjan̄in kar bwe aer kajoor n̄an kwaļo̧k tōmak eo emenin aikuj n̄an mour im lo̧mo̧o̧r” (Lectures on Faith [1985], 69).

  27. Ezra Taft Benson, The Teachings of Ezra Taft Benson (1988), 167; in Preach My Gospel: A Guide to Missionary Service (2019), 13; barāinwōt lale Russell M. Nelson, “Hope of Israel,” HopeofIsrael.ChurchofJesusChrist.org.

  28. Kweilo̧k ippān Elder David A. Bednar; barāinwōt lale “2020 Temple and Family History Leadership Instruction,” Feb. 27, 2020, ChurchofJesusChrist.org/family-history.

  29. Neal A. Maxwell, “Unto the Rising Generation,” 11. Elder Maxwell ekar wōnm̧aanļo̧k wōt: “Ilo wāween kōm̧m̧ane, jete būreejtōnji ko an doulul eo an tikōn ro im rūkaki ro ej kobain kūr juon n̄an kōm̧m̧ane juon jar ak letok letak kwojkwoj eo? Em̧m̧aan ro, men kein rej lukkuun in jetōb ko rejeno̧lok, im remaron̄ kōm̧m̧ane men ko reļļap eļan̄n̄e leļo̧k juon iien!”

  30. Lale General Handbook: Serving in The Church of Jesus Christ of Latter-day Saints, 2.2, ChurchofJesusChrist.org.

  31. Jejjo kein jipan̄ ko ewōr ilo Gospel Library eo n̄an jipan̄ jodikdik ro tōl, ekoba “Quorum and Class Presidency Resources,” “Using Come, Follow Me—For Aaronic Priesthood Quorums and Young Women Classes,” and in the resources for Young Women classes and Aaronic Priesthood quorums in “Ward or Branch Callings.”

  32. Russell M. Nelson, “Hope of Israel,” HopeofIsrael.ChurchofJesusChrist.org. Ilo ejja nokon in jota in wōt, Būreejtōn Nelson ekar ba: “Jemedwōj Ilan̄ eaar kepooj elōn̄ iaan jetōb ro Nejin routiej—bōlen, imaron̄ in ba, kumi eo An rem̧m̧an tata—n̄an m̧ōttan in āliktata. Jetōb ko raorōk—rikkure ro remōkade tata—ro rebun̄bun̄—rej kom̧!”

  33. Russell M. Nelson, ennaan in kōppeļo̧k ko ilo “Children and Youth: A Face to Face Event with Elder Gerrit W. Gong,” Nov. 17, 2019, broadcasts.ChurchofJesusChrist.org.

  34. Būreejtōn Nelson ekar ba: “Jej aikuj in kōtļo̧k bwe armej ro ren tōl, eļaptata ro em̧ōj aer kūr im kōjenoļo̧k n̄an jerbal ilo būreejtōnji ko an kūlaaj im doulul. Mālim eo an priesthood enaaj kar m̧ōj an kōmālim er. Renaaj ekkatak ekōjkan n̄an bōk im̧we ilo tōl kūlaaj im doulul eo aer” (ilo “Children and Youth Introductory Video Presentation,” Sept. 29, 2019, ChurchofJesusChrist.org).

    Elder Quentin L. Cook ekar ba, “Jodikdik ro nejid emōj kajjitōk ippāer n̄an bōk eļapļo̧k eddo ko ilo iiō ko aer ke rej dik wōt—ilo an jab ro jineer im jemāer im ritōl kōm̧m̧ani n̄an er men ko remaron̄ kōm̧m̧ani n̄an er make” (“Oktak ko n̄an Kōkajoorļok Jodikdik ro,” Liaona, Nob. 2019, 40).

  35. Būreejtōn George Q. Cannon ekar katakin: “Anij ekar kōjparoki jetōb ko n̄an tōre in bōk eddo in ro reperan im kijejeto n̄an jelm̧ae laļ in, im aolep kajoor ko an eo enana, loe im jab loe, n̄an kwaļo̧k gospel eo im kajim̧we m̧ool eo im kajutak im kalōk aelōn̄ in Zaion an ad Anij jab mijak ilo jabdewōt jekjek ko. Ekar jilkintok jetōb kein ilo tōre in bōk eddo in n̄an katōt pedped eo an Zaion im ej jāmin ukōje, im n̄an karūtoļo̧k juon ine me enaaj wāppen, im enaaj kautiej Anij, im kautiej E eļaptata, im maron̄ pokake E ium̧win aolep jekjek ko” (“Remarks,” Deseret News, May 31, 1866, 203); see also Teachings of Presidents of the Church: Joseph Smith (2007), 186.

  36. Moronai 10:32.