Ememļo̧kjeņ ko Ralikkar ilo Jetōb
N̄e apan̄ ko ad make, ak jekjek ko an laļin ilōn̄ļo̧k maron̄ ko ad ej kamarok iaļ ko ad, ememļo̧kjeņ kōn iien ko jetōb ej bōk jikin ilo mour ko ad rej āinwōt dōkā ko rej ebbōļ ilo marok me rej jipan̄ kōm̧eramļo̧k iaļ ko ad im̧aan.
Jon̄oulralitōk iiō ko ālkin Visōn eo M̧oktata, Rikanaan Josep Smith eaar je juon bwebwenato kōn en̄jake eo an. Eaar jelm̧aen jum̧ae, en̄taan, kakkure, mijak, im kaamijak.1 Aet ekar wōnm̧aanļo̧k wōt n̄an lukkuun kam̧ool kōn Visōn eo an M̧oktata “Iaar lo juon meram, im ilo ilubwiljin meram eo iaar lo ruo Armej, im rekar ilo lukkuun m̧ool ekkōnono n̄an eō; im men̄e rekar dike im matōrtōr eō kōn aō kar ba bwe iaar lo juon visōn, mekarta ekar m̧ool. … Ikar jeļā, im iaar jeļā bwe Anij ekar jeļā, im iban kar maron̄ kariab e.”2
Ilo awa ko reppen ilo mour eo an, ememļo̧kjeņ eo an Josep kar bōk likļo̧k enan̄in bukwi iiō ko kōn iakwe an Anij n̄an e im iien ko raorōk me rekar waļok ko eto aer kar ilo kanaan kake ilo Jepļaaktok eo. Ļōmņak kōn jetōb eo an, Josep eaar ba: “Ijjab ņaruwōn jabdewōt n̄e rejjab tōmak bwebwenato eo aō. Eļan̄n̄e in kar jab loe ta eo iaar loe, inkar jab bar tōmake ippa make.”3
Ak en̄jake in ekar m̧ool, im ijamin meļo̧kļo̧ke ak kaarmejeti, ej kapen naan in kam̧ool eo an ilo an kar etal n̄an Carthage. “Ij etal āinwōt juon lamb n̄an m̧anm̧an,” eaar ba, “ak Ij ineem̧m̧an āinwōt juon jibbon̄ in rak; ewōr Ippa juon koļmānļo̧kijeņ eo ejjeļo̧k ruō ņae Anij, im ņae aolep armej.”4
Ememļo̧kjeņ ko Am̧ Ralikkar ilo Jetōb
Ewōr juon katak n̄an kōj jen waanjon̄ok eo an Rikanaan Josep. Ippān tōl in aenōm̧m̧an eo jej bōke jān Jetōb Kwojarjar, jān iien n̄an iien, Anij ekajoor im ej lukkuun kallim̧uri kōj wōj aolep bwe E ejeļā kajjied im iakwe kōj im bwe E ej kōjeraam̧m̧an kōj. Innām, ilo iien apan̄ ko ad, Rilo̧mo̧o̧r ej bar kōro̧o̧ltok en̄jake kein n̄an ļōmņak ko ad.
Ļōmņak kōn mour eo am̧ make. Ilo iiō kein, em̧ōj aō ron̄ taujin en̄jake ko rejetōbtōb jān Armej ro Rekwojarjar ilo Raan kein Āliktata ipeļaakin laļ in, kapen tok n̄an eō ilōn̄in jabdewōt kajjitōk ko me Anij ejeļā im iakwe kōj kajjojo im bwe E ej lukkuun ikdeelel n̄an kwaļo̧k E make n̄an kōj. En̄jake kein remaron̄ itok ilo iien ko raorōk ilo mour ko ad ak emaron̄ ilo iien ko rejjab aorōk, ak rej aolep iien otemjej waļo̧k kōn tōl eo ekajoor an jetōb kam̧ool kōn iakwe eo an Anij.
Keememej en̄jake ko im raar kōm̧m̧an bwe jen bukōlōlō, āinwōt an kar Rikanaan Josep ba: “Ta eo ikar bōk ekar jān lan̄. Ikar jeļā, im iaar jeļā bwe Anij ekar jeļā.”5
Emen Waanjon̄ak
Ļōmņak kōn ememļo̧kjeņ ko am̧ ralikkar ilo jetōb eaorōk ilo aō kwaļo̧k jejjo̧ waanjon̄ok jān ko jet.
Jet iiō remootļo̧k, juon stake petriak erūtto eo im ekar wōr ruo iaan eke ko ilo menono eo an rejjab jerbal im kar akweļap n̄an kar m̧okta Dr. Russell M. Nelson n̄an m̧adm̧ade, men̄e ilo tōre eo ekar ejjeļo̧k juon jerbal in m̧wijm̧wij n̄an jorrāān in eke. Dr. Nelson eaar errā n̄an kōm̧m̧ane m̧wijm̧wij eo. Erkein naan ko an Būreejtōn Nelson:
“Ālkin jerbale eke eo jinointata, kōm kar jino jerbale eke eo kein karuo. Kōm ar lo ke emaron̄ dedeļo̧k ak jerata eo emaron̄ in jab bar jerbal einwōt kar m̧okta. Ilo iien etale eke in, eaar jikrōktok juōn ennaan n̄an kōļmenļo̧kjeņ eo aō: Kadikļo̧k tōterein doulul in eke eo. Iaar leļo̧k ennaan eo n̄an rijipan̄ eo aō. ‘Emaron̄ bwe m̧ōttan ko n̄an eke eo elan̄n̄e emaron̄ em̧m̧an ad kadikļo̧k jon̄an doulul eo ilo tōrerein eke ko n̄an jon̄an en em̧m̧an.’
“Ak elmen? … Juōn pija eaar itok n̄an kōļmenļo̧kjeņ eo aō, kwaļo̧k kilen an naj keke—n̄an kakoba ruo ijin im kadelo̧n̄ juōn ijeņ. … Ij keememej wōt pija in—dedeļo̧k ilo lain ko rebukwonkwon ijo tōrej ko rej aikuj pād ie. Jerbal eo eaar dedeļo̧k ilo an waļo̧k ilo kōļmenļo̧kjeņ eo aō. Kōm kar teeje an baib eo jerbal im kar lo ke eaar em̧m̧an an to̧o̧r. Rijipan̄ eo aō eaar ba, ‘Ekabwilōn̄lōn̄.’”6 Petriak eo eaar mour ium̧win elōn̄ iiō ko.
Dr. Nelson eaar tōl. Im ejeļā bwe Anij ejeļā ta eo ekar jeļā ke em̧ōj kar tōl e.
Kathy im n̄a kar ioon Beatrice Magré ilo France 30 iiō remootļo̧k. Jet iien remootļo̧k Beatrice eaar jiron̄ eō juon en̄jake me eaar jelet mour in jetōb eo an ālkin wōt an peptaij ke eaar juon jodikdik. Erkein naan ko an:
“Jodikdik ro ilo branch eo am rekar ito-itak ippān ritōl ro aer ļo̧k n̄an Lacanau Beach, ebōk juon jimettan awa in ettōr jān Bordeaux.
“Mokta jen ro̧o̧lļo̧k n̄an kapijuknen, juon iaan ritōl ro eaar ļōmņak in bar tutu im tuļo̧k kōn mej ko an. Ke ej waļo̧ktok jen dān, eaar jako mej ko an. … Raar jako ilo lo̧jet.
“Kōn an jako mej ko an ekōm̧m̧an bwe en jab kattōre wa eo waan. Ebwe ad ettoļo̧k jen kapijuknen.
“Juon sister eo ewōr tōmak ippān eaar ba ren jar.
“Ikar ellotaan bwe jar eban kōm̧m̧an jabdewōt, im iaar mijak in kobaļo̧k ippān kurup eo n̄an jar lo̧bwilej ke kōmij in jutak bwilōn dān.
“Ke ej m̧ōj jar eo, iaar erļo̧ke peiū im jaun aolep. Ke ij kōm̧akūtkūti dān eo, mej ko mejen raar waļo̧ktok ilo pein. Juon en̄jake ekajoor eaar kam̧weer aō bwe Anij ej lukkuun ron̄jake im uwaaki jar ko ad.”7
En̄oul-ļalem iiō ko tokālik, eaar keememej āinwōt n̄e eaar waļo̧k inne. Beatrice eaar jeraam̧m̧an im eaar jeļā bwe Anij ejeļā bwe em̧ōj kōjeraam̧m̧ane.
En̄jake in an Būreejtōn Nelson im Siter Magré rekar kanooj pen, aaet jim̧or, juon jetōbin ememļo̧kjen eo ealikkar ban meļo̧kļo̧k kōn iakwe eo an Anij ilo būruweer.
Iien kein ralikkar ekkā aer itok ilo ekkatak kōn jepļaaktok eo an gospel eo ak n̄an kwaļo̧k gospel in n̄an ro jet.
Pija in kar bōke ilo São Paulo, Brazil, ilo 2004. Floripes Luzia Damasio jen Ipatinga Brazil Stake ekar 114 iiō rūttoon. Kōnono kōn oktak eo an, Sister Damasio ekar jiron̄ eō kōn mijenede ro ilo jikin eo an rekar leļo̧k juon kōjeraam̧m̧an an priesthood n̄an juon nin̄nin̄ eo elukkuun nain̄inmej eo eaar mour kōn kabwilōn̄lōn̄. Eaar kōņaan jeļā eļapļo̧k. Ke eaar jar kōn ennaan eo aer, juon kam̧ool eo ban kariabe kōn jetōb eaar kapen n̄an e bwe Josep Smith ekar juon rikanaan an Anij. Ekar peptaij, ke ej 103, im ekar bōk menin letok kwojarjar eo, ke ej 104. Aolep iiō ālkin, an kōm̧m̧ane 14 awa in iuwe ilo baaj n̄an joļo̧k juon wiik ilo tampeļ. Sister Damasio ekar bōk juon kapen, jen lan̄ im eaar jeļā bwe Anij ejeļā bwe eaar jeļā bwe kam̧ool eo em̧ool.
En̄in ej juon jetōbin ememļo̧kjen jān mijen eo aō jino n̄an France 48 iiō remootļo̧k.
Ke kōmij kaļļaļļal, eo m̧ōtta im n̄a kar likūt juon Bok in Mormon ippān juon liļļap. Ke kōmij ro̧o̧lļo̧k n̄an abatmen eo juon wiik tokālik, eaar kōpeļļo̧k kōjem eo. Mokta jen an waļo̧k jabdewōt ekōnono, iaar en̄jake juon m̧weir jetōb ekajoor. En̄jake eo ekajoor eaar etal wōt ke Madame Alice Audubert eaar kadeļo̧n̄ kōm im kar ba n̄an kōm ke eaar riiti Bok in Mormon im kar jeļā ke em̧ool. Ke kōmij etal jen abatmen eo an raan eo, iaar jar, “Jemedwōj Ilan̄, jouj im jipan̄ eō bwe in jab meļo̧kļo̧k ta eo ikar en̄jake.” Ikar jab.
Ilo juon iien ejeja, ilo juon kōjem eo āinwōt bukwi kōjem ko jet, iaar en̄jake kajoor an lan̄. Im iaar jeļā bwe Anij ejeļā bwe ikar jeļā bwe wintō in lan̄ eaar peļļo̧k.
Individualized and Undeniable
Jetōb in alikkar in ej itok ilo iien ko reoktak im ilo wāween ko reoktak.
Ļōmņak kōn waanjon̄ok ko am rem̧m̧an ilo jeje ko rekwojarjar. Ro raar ron̄jake Rijilōk Paul raar “le [būrueir].”8 Kōrā in riLeman eo etan Abij ekar tōmak kōn “visōn eo eaiboojoj an jemān.”9 Im juon ainikien ekar jiktok ilo ļōmņak eo an Inōs.10
Eo m̧ōtta Clayton Christensen eaar kōmeļeļeik juon en̄jake ilo wāween eo ekajoor kōn riit Bok in Mormon ilo wāween in: “Juon Jetōb eo em̧m̧an, … ekar jepooļ eō im kar kobrak aō, kalbubuik eō ilo juon en̄jake in iakwe me ijjab maron̄ antoone aō en̄jake [im en̄jake kein raar etal wōt bon̄ im bar bon̄].”11
Ewōr iien ko n̄e en̄jake ko an jetōb itok n̄an būruwōd āinwōt kijeek, kōmeramļo̧k jetōb eo ad. Josep Smith eaar kōmeļeļeki bwe jet iien “em̧ōkaj an itok ļōmņak ko” im ekkā an “itok ilo jeļāļo̧kjen eo ekwojarjar.”12
Būreejtōn Dallin H. Oaks, n̄an uwaake em̧m̧aan eo ekar ba ke ejjan̄in kar bōk kain en̄jake rot in, kar kapilōk, “Bōlen jar ko am raar uwaak im bar uwaak, ak kwoj aikuj in pukot kōkkaļļ eo bwe en waļo̧k ak ainikien elaaj me kwoj ļōmņak kwojjan̄in bōk uwaak.”13 Rilo̧mo̧o̧r Make eaar kōnono kōn eļap tōmak an armej ro “rekar [jeraam̧m̧an] kōn kijeek im kōn Jetōb Kwōjarjar, [ak wōn] rejjab jeļā kake.”14
Ekōjkan Am̧ Ron̄jake E?
Jekar ron̄ an Būreejtōn Russell M. Nelson ba: “Ij karuwaineneik kom̧ n̄an lukkuun ļōmņak im kōn kajjitōk in: Elmen am ron̄jake E? Ij bar karuwaineneik kom̧ n̄an bōk bun̄ten ko bwe en em̧m̧anļo̧k ami ron̄jake E.”15 Ekar āliji kūr in kiiō ejibbon̄.
Jej ron̄jake E ilo jar ko ad, ilo kapijuknen ko ad, ilo jeje ko rekwojarjar, ilo al in jar ko ad, ilo ad erreeo n̄an bōk m̧ōttan kwojkwoj eo, ilo ad kwaļo̧k ad tōmak, ilo ad jerbal n̄an ro jet, im ilo ad pād ilo tampeļ ippān ritōmak ro jet. Jetōb in alikkar ej itok ilo ad lukkuun ron̄jake kweilo̧k eo eļap im ilo em̧m̧an ad kōjparok kien ko. Im ajri ro, en̄jake kein rej bar n̄an kom̧. Keememej, Jisōs “eaar katakin im jerbal n̄an ro nejin jarlepju eo … im [ajri ro] rekar kōnono … men ko reļļap im kabwilōn̄lōn̄.”16 Irooj ekar ba:
“[Jeļāļo̧kjeņ in] liwōj jān Jetōb eo Aō n̄an kom̧, … im ijello̧un wōt n̄e en kar jān kajoor eo Aō kom̧ij jab maron̄ [bōke];
“Kōn menin, kom̧ maron̄ kam̧ool bwe kom̧ ar ron̄ Ainikiō, im jeļā naan ko Aō.”17
Jemaron̄ “ron̄jake E” kōn wōt kōjeraam̧m̧an in Pinmuur eo an Rilo̧mo̧o̧r.
Ilo ad jab kālet iien n̄an bōk men kein ralikkar, Būreejtōn Henry B. Eyring eaar letok kapilōk in ilo ad keppopo: “Joteenin, im ilju jota kwomaron̄ jar im kōļmenļo̧kjeņ, kajjitōk kajjitōk ko: Anij ekar ke letok juon ennaan n̄an n̄a? Iaar ke lo Pein ilo mour e aō ak mour ko an [baam̧le] eo aō?”18 Tōmak, pokake, ettā, im bōro erub n̄an kōpelļo̧k wintō ko an lan̄.19
Juon kōmeļeļe
Kwomaron̄ ļōmņake ememļo̧kjeņ eo am̧ ilo jetōb ilo wāween in. Kōn jar, juon kije n̄an kōjparok bujen ko ad, im kōn menin letok eo an Jetōb Kwojarjar, jej jerak im dipuk mour. N̄e apan̄ ko ad make, pere, ak ebweer kapan̄ ad iaļ, ak n̄e jekjek ko an laļin rej ilōn̄ļo̧k maron̄ ko ad n̄an tōlļo̧k kōj n̄an ļōmņak kōn ilju eo ad, ememļo̧keņ in jetōb in alikkar ilo mour ko ad rej āinwōt dōkā ko rej ebbōļ ilo maron̄ me ej jipan̄ kōmeramļo̧k iaļ ko ad im̧aan, kam̧ool n̄an kōj be Anij ejeļā wōn kōj, ej iakwe kōj, im ekar jilkintok Nejin Emake Wōt, Jisōs Kraist, n̄an jipan̄ kōj jepļaakļo̧k n̄an kapijuknen eo ad ilan̄. Im n̄e juon ej likūt ememļo̧kjeņ ko ralikkar aer im ej jebwābwe ak tarpok, jej oktakļo̧k n̄an Rilo̧mo̧o̧r ilo ad kwaļo̧k ad tōmak im ememļo̧kjeņ kaki, jipan̄ er bar lo men ko an jetōb rekar kaorōki.
Jet en̄jake ko raorōk me jej kōjparoki ilo ememļo̧kjeņ in jetōb eo ad im jab kwaļo̧ki.20
“Enjeļ raņ rej kōnono kōn kajoor in Jetōb Kwōjarjar; kōn menin, rej kōnono naan ko an Kraist.”21
“Barāinwōt enjeļ raņ [raar jab] bōjrak n̄an jerbal ippān ro nejin armej raņ.
“Bwe lo, er rej rijerbal n̄an [Kraist], n̄an jipan̄ ekkar n̄an … naan eo an An naan in jiron̄, im kwaļo̧k er n̄an er ro ekajoor aer tōmak im epen ļōmņak ko aer ilo wāween m̧wil otemjeļo̧k em̧m̧an.”22
A “Ri Kaenōm̧m̧an, E Jetōb Kwōjarjar, … enaaj katakin kom̧ men otemjej, im kakememej men otemjej n̄an kom̧.”23
Dāpij ememļo̧kjeņ ko ami rekwojarjar. Tōmaki. Jei. Kwaļo̧k n̄an baam̧le eo am. Lōke bwe rej iwōj n̄an eok jān Jemedwōj Ilan̄ im Nejin Emake Wōt.24 Kōtļo̧k bwe ren bōktok kijenmej n̄an pere ko am im meļeļe apan̄ ko am.25 Ij kallim̧uri kom̧ bwe ilo am kile im lukkuun kaorōk jetōb in alikkar eo ilo mour eo am, elōn̄ļo̧k renaaj itok n̄an eok. Jemedwōj Ilan̄ ejeļā im ej iakwe eok!
Jisōs ej RiKraist eo, gospel eo An em̧ōj an jepļaaktok, im ilo ad tiljek wōt, Ij kam̧ool jenaaj An indeeo, ilo etan Jisōs Kraist, amen.