Ippān Doon N̄an Kōttōprak Jerbal eo an Anij
Wāween eo ewājepdik n̄an kakūrm̧ool maron̄ eo ekwojarjar ej n̄an jerbal ippān doon, jejraam̧m̧an kōn kajoor im mālim eo an priesthood eo.
Ro jeiū im jatū rejitōnbōro, ej aō lan̄lōn̄ bwe ippād ippemi. Ijoko kwoj ron̄jake ie, ij atbo̧kwoj kom̧ sister raņ aō im idik peimi brother raņ aō. Jej ippān doon ilo jerbal in an Irooj.
N̄e jej kōļmenļo̧kjen kōn Adam im Iv, ļōmnak eo ad jinoin tata ej kōn aer kar lukkuun m̧ōņōņō ilo Jikin Kallip Eden. Ikar pijaikļo̧k an em̧m̧an mejatoto aolep iien—ejjab lukkuun bwil im ejjab lukkuun mōļo—im leen wōjke ko im pejtabōļ ko renno rekar eddōk ipeļaakin ijo rej pād ie bwe ren maron̄ m̧ōn̄ā iien eo rekōņaan. Kōnke ekar juon men ekāāl n̄an er, elōn̄ kain men ko n̄an lali, innem aolep raan ekar kalimomo ilo aer kar ikkure ippān menin mour ko im alooje peļaakier eaibojooj. Kar barāinwōt leļo̧k kien ko n̄an pokake im kar lōn̄ wāween ko roktak n̄an aerro ļoori kōmeļeļe kein, eo ekar kōm̧man bwe ren ikūm̧kūm̧ im tarpok. 1 Ak ilo aer kar kōm̧m̧ani kāālet ko ekar ukōte mour ko aer n̄an indeeo, rekar ekkatak n̄an jerbal ippān doon im erom̧ juon wōt n̄an kōttōprak jibadbad eo an Anij eo ekar leļo̧k n̄an er—im n̄an aolep ajri ro Nejin.
Kiiō pijaikļo̧k ejja rūtto rein ilo mour in. Rekar aikuj jerbal bwe en wōr kijeer, jet iaan menin mour ko rekar watōki bwe bar m̧ōn̄ā, im elōn̄ apan̄ ko reoktak me rekar maron̄ anjo̧ jāni ke rekar kapilōk doon im jar ippān doon. Ij pijaikļo̧k an kar wōr jet iien ekar oktak kōņaan ko aer jān doon kōn elmen aer maron̄ ellā ioon apan̄ ko. Ijoke, kōn Wōtlo̧k eo, rekar katak bwe eaorōk n̄an jerbal ippān doon im ilo iakwe. Ilo aer bōk jipan̄ ko jān kein jipan̄ ko rekwojarjar, rekar katakin er karōk in lo̧mo̧o̧r im pedped in katak ko an gospel eo an Jisōs Kraist me ekar kōm̧m̧an bwe karōk eo en bōk jikin. Kōnke rekar meļeļe jibadbad eo aer ilo laļ in im kōttōpar ko aer n̄an indeeo rekar jon̄an wōt juon, rekar lo m̧ōņōņō im tōprak ilo aer ekkatak n̄an jerbal ilo iakwe im mour jim̧we ippān doon.
Ilo an kar ļotak ajri ro nejier, Adam im Iv rekar katakin baam̧le eo aer ta ko rekar katak jān riboktok enaan ko rekwojarjar. Rekar lukkuun niknik ilo aer jipan̄ ajri ro nejier n̄an barāinwōt meļeļe im kaorōk pedped in katak ko me renaaj kam̧ōņōņōik er ilo mour in, barāinwōt n̄an kōpooj er n̄an jepļaak n̄an ippān jineer im jemeer ilan̄ ālikin aer kōļapļo̧k maron̄ ko aer im kwaļo̧k aer pokake Anij. Ilo aer wōnm̧aanļo̧k wōt, Adam im Iv rekar ekkatak n̄an kam̧m̧oolol kōn kajoor ko aer reoktak im aer kar rie doon ilo jerbal eo aer eaorōk im ej n̄an indeeo. 2
Ilo an bukwi iiō ko im epepen ko m̧ootļo̧k, jeļāļo̧kjeņ eo kōn eddo ko reim̧we im eaikuj ippān doon an ruo armej ekar jino mākunļo̧k kōn bōd in meļeļe im jabwe meļeļe. Ilo iien eo ikōtaan raan eo jinoin tata ilo Jikin Kallip Eden im kiiō, rinana eo ebwe an kar lōn̄ an tōprak ilo kōttōpar eo an n̄an kōjepelļo̧k em̧m̧aan im kōrā ilo an kajjieon̄ anjo̧ ioon jetōb ko aer. Lucifer ejeļā ke n̄e emaron̄ kakkure jem̧jerā eo an em̧m̧aan im kōrā ro, eļan̄n̄e emaron̄ kapok kōj kōn aorōkid ekwojarjar im eddo ko ad n̄an kōm̧m̧an bujen, enaaj ļap an tōprak ilo an kakkure baam̧le ko, ko me relukkun aorōk ilo mour indeeo.
Setan ej kwaļo̧k bwe keidi kōj make ej juon kein jerbal n̄an ejaake en̄jake in utiej ak ettā, noje m̧ool ko an mour indeeo me bwe oktak ko ikōtaan em̧m̧aan im kōrā ro me Anij ekar letok im rej jim̧or aorōk. Em̧ōj an kajjieon̄ joļo̧ke ijo koņaan kōrā ro jim̧or ilo baam̧le eo im ilo jukjukin pād eo, kōn menin ekar kadikļo̧k maron̄ eo aer n̄an kōketak n̄an em̧m̧anļo̧k eo. Kōttōpar eo an ej n̄an kōm̧m̧an bwe ren jieāik doon bōk maron̄ ijjeļo̧k aer m̧ōņōņō kōn jipan̄ ko aer rejeņoļo̧k an em̧m̧aan im kōrā ro me rej kōketak doon im kōm̧m̧an bwe ren juon wōt.
Kōn menin, ilo iiō ko maantak im ilo aolepān laļ in, juon meļeļe eo elikio kōn ippān doon eo ekwojarjar men̄e eoktak ijoko koņaad im eddo ko an kōrā im em̧m̧aan ro em̧ōj an mākunļo̧k. Kōrā ro kajjojo ilo elōn̄ jukjuk in pād ko rettā jān em̧m̧aan ro ijjeļo̧kin aer jipan̄ doon āinwōt jet paatnōr, jerbal ko aer elōn̄ jon̄an. Eddōkļo̧k ilo mour in jetōb eļapļo̧k an rūm̧ūj ilo iien ko remarok; em̧ool, jidik wōt meram an jetōb emaron̄ pād ilo kōļmenļo̧kjeņ im bōro ilo manit ilo kajoor.
Innem meram eo an gospel eo me ekar jepļaaktok ekar romaak “ilōn̄ļo̧k meram eo an al” 3 iien eo Anij Jemen im eo Nejin, Jisōs Kraist, rekar waļo̧k n̄an juon ļaddik Josep Smith jibbon̄in jipiriin̄ in 1820 ilo bukwin wōjke ko ilo New York. Iien in ekar jino lutōkleplep revelesōn ko raan kein jān lan̄. Juon iaan pedped ko an kabūn in an Kraist m̧okta n̄an kōjepļaaktok mālim in ej priesthood eo an Anij. Ilo an Jepļaaktok eo wōnm̧aanļo̧k wōt, em̧m̧aan im kōra ro rekar bar jino kile aorōkin im maron̄ jerbal ippān doon āinwōt jet paatnōr, kar kōmālim im kar tōl ilo jerbal in ekwojarjar jān E.
Ilo 1842 eo, ke kōrā ro ilo Kabun̄ in me ejjan̄in kar lukkuun ejaake rekar kōņaan ejaake juon doulul eo em̧ōj kōmālimi n̄an jipan̄ ilo jerbal in, Būreejtōn Josep Smith ekar en̄jake im̧we n̄an ejaake “iumwin priesthood eo kōn laajrak in priesthood eo” 4 Ekar ba, “Ij kiiō lewaj maron̄ in n̄an kom̧ ilo etan Anij …—en̄in ej ijjino in raan ko rem̧m̧an” 5 Im jān tōre eo kar leļo̧k maron̄ eo, iien ko rem̧m̧an ikkijeen jikuul, kien, im ikkijeen jāān ekar jino ļapļo̧k ilo aolepān laļ in. 6
Doulul in ekāāl ilo Kabūn in n̄an kōrā, ņae etan Doulul eo an Kōrā ro, eoktak tata jān aolep doulul ko an kōrā ilo iien ko kōnke ekar ejaak jān juon rikanaan eo ekar lōn̄ ippān kajoor in priesthood eo n̄an leļo̧k n̄an kōrā ro mālim, eddo ko rekwojarjar, im jerbal ko em̧ōj kōmālimi ilo kōlaajrak eo an Kabun̄ in, rejjab jeņoļo̧k jān kabun̄ in. 7
Jān iien ko an Rikanaan Josep Smith n̄an tōre kein ad, jepļaaktok eo an aolep men ko me ej wōnm̧aanļo̧k wōt ekar bōktok eļap meram kōn eļap aikuj mālim im kajoor an priesthood eo ilo an jipan̄ jim̧or em̧m̧aan im kōrā ro kōttōprak eddo ko aer em̧ōj leļo̧ki. Raan ko ļo̧k kar katakin kōj bwe kōrā ro em̧ōj kōjeņoļo̧k er ium̧win tōl eo an juon eo ej kabwijer ki ko an priesthood me ej kōjerbale kōn mālim eo an priesthood ilo kūr ko aer. 8
Ilo Oktoba 2019 eo, Būreejtōn Russell M. Nelson ekar katakin bwe kōrā ro rej bōk menin letok kwojarjar ko ilo tampeļ ewōr aer kajoor in priesthood ilo mour ko aer im ilo m̧ōko m̧weir ilo aer kōjparok kallim̧ur ko rekar kōm̧m̧ani ippān Anij. 9 Ekar kōmeļeļe bwe “lan̄ ko rej peļļo̧k n̄an kōrā ro rej bōk mennin letok kwojarjar eo kōn kajoor an Anij ej ibebtok jān bujen ko an priesthood ko aer āinļo̧k wōt em̧m̧aan ro rej kabwijere priesthood eo.” Im ekar barāinwōt rōjān sister ro n̄an “kōmakijkij ami kōjerbal kajoor eo an Rilo̧mo̧o̧r eo āinwōt kein jipan̄ n̄an jipan̄ baam̧le eo ami im ro jet kwoj iakwe er.” 10
Kiiō ta meļeļein menin n̄an kwe im n̄a? Ekōjkan an meļeļe kōn mālim im kajoor an priesthood eo ukōt mour ko ad? Juon iaan kii ko ej n̄an meļeļe bwe n̄e kōrā im em̧m̧aan ro rej jerbal ippān doon, jemaron̄ kōttōprak eļapļo̧k jān n̄e jekar kōm̧m̧ane make ļo̧k iaad. 11 Jerbal ko ad rej dedeļo̧k ijeļo̧kin ad jieāik doon. Mekarta kōrā ro rejjab kabwijer priesthood eo, ilo an kar ba m̧oktaļo̧k bwe em̧ōj kōjeraam̧m̧an kōrā ro kōn kajoor eo an priesthood ilo aer kōjparok bujen ko aer, im rej jerbal kōn kajoor eo an priesthood n̄e rej bōk kōjenolo̧k eo n̄an juon kūr.
Juon raan aiboojoj ilo O̧kwoj, ekar juon iien em̧m̧an n̄an aō jijōt ippān Būreejtōn Russell M. Nelson ilo m̧weo imōn kar Josep im Emma Smith me rekar bar kalōke ilo Harmont, Pensylvania, turin ijo Priesthood eo an Aron ekar jepļaaktok ilo raan kein āliktata. Ilo ekōnono eo am̧ro, Būreejtōn Nelson ekar kōnono kōn jerbal eo aorōk me kōrā rej kōm̧m̧ane ilo Jepļaaktok eo.
Būreejtōn Nelson: “Juon iaan m̧ōttan ko raorōk me ej kakeememej n̄a n̄e ij itok n̄an jikin eo me jepļaaktok eo an priesthood ekar bōk jikin ie, ej jerbal eo eaorōk me kōrā ro rej kōm̧m̧ane ilo Jepļaaktok eo.
“Jinoin an Josep kar ukōte Bok in Mormon, wōn eo ekar jeje? Ekwe, e eo ekar kōm̧m̧ane jidik, ak ejjab lukkuun ļap. Emma ekar bōk koņaan.
“Im ij ļōmņak kōn wāween an kar Josep etal n̄an bukwon wōjke ko n̄an jar turin m̧weo im̧ōn ilo Palmyra, New York. Ia eo ekar etal n̄ane? Ekar etal n̄an Bukwon Wōjke ko Rekwojarjar. Etke ekar etal n̄an ijeņ? Kōnke ej ijo Jinō ekar etal n̄an e ke ekar kōņaan jar.
“Errein rej kōrā ro wōt ruo ekar lōn̄ aer kii ilo jerbal eo an jepļaaktok eo an priesthood im ilo Jeplaaktok eo an Kabūn in. Ejjeļo̧k pere, jemaron̄ ba bwe kōrā ro pāleed relukkuun aorōk rainin āinwōt kar ro ilo tōre ko etto. Aaet em̧ool reaorōk.”
Āinwōt Emman im Lucy im Josep, ej wōr tokjāer eļan̄n̄e jekōņaan ekkatak n̄an doon im ne jej ippān doon ilo kōttōpar ko ad n̄an erom̧ rikaļoor ro an Jisōs Kraist im jipan̄ ro jet ilo ial ņe.
Kar katakin kōj bwe “priesthood eo ej kōjeraam̧m̧an mour ko an ajri ro nejin Anij ilo elōn̄ wāween ko. Ilo kūr ko ilo [Kabun̄] in, kain̄i ko an tampeļ, jem̧jerā ko an baam̧le, im jerbal in karejar eo ettino̧ an juon make, kōrā im em̧m̧aan ro rekwojarjar ilo Raan Ko Āliktata rej jerbal kōn kajoor im mālim an priesthood eo. Ippān doon eo an em̧m̧aan im kōrā rein rej kōttōprak jerbal eo an Anij kōn kajoor eo An ej juon m̧ōttan eo ioļapļap ilo gospel eo an Jisōs Kraist me kar kōjepļaaktok n̄an Rikanaan Josep Smith.” 12
Ippān doon ej aorōk ilo jerbal in ekwojarjar jekar kūr n̄an kōm̧m̧ane, ak ejjab kaju waļo̧k. Ebōk iien im kijejeto n̄an lukkuun jerbal ippān doon—ron̄jake doon, meļeļe kōn meļeļe ko an ro jet, im kwaļo̧k en̄jake—ak tōprakin jerbal ilo kāļet ko eļapļo̧k aer im̧we. Men̄e jerbal ko ilo m̧ōko ak eddo ko ad ilo Kabūn in, men eo em̧m̧an tata n̄an kōttōprak jerbal ko ad rekwojarjar ej n̄an jerbal ippān doon, jeram̧m̧aan kōn kajoor im mālim eo an priesthood ilo jerbal ko ad reoktak bōtaab juon wōt ilo eddo ko.
Elmen an mour in paatnōr kōm̧m̧an ilo mour ko an kōrā in bujen ro raan kein? Ikōņaan kwaļo̧k juon waanjon̄ok.
Alison im John ekar wōr juon aerro jem̧jerā ejeņoļo̧k. Rej iuwe ioon juon bajikōl eaitok ilo iaikwōj eo ekadu ak eaitok. N̄an maron̄ jieāik doon ilo bajikōļ eo, armej ro ruo ilo bajikōļ eo rej aikuj jerbal ippān doon. Rej aikuj ļoor wōt ejja iaļ eo wōt ilo iien eo ejim̧we. Juon ejjab aikuj in kajoor jān juon, ak rej aikuj kōnono ippān doon im kajjojo ej aikuj kōm̧m̧ane ijo koņaan. Kāapen eo, ilo m̧aan, ej kōjebwebweik im ba n̄e ej iien n̄an bōjrak ak n̄an jutak. Armej eo, ilo lik, ej aikuj lukkuun lale ta ko rej waļo̧k im pojak n̄an an leļo̧k eļapļo̧k kajoor eļan̄n̄e rej rūmūj ak n̄an kadikļo̧k ak karūm̧ūjļo̧k eļan̄n̄e rej epaake ro jet ilo bajikōļ eo. Rej aikuj jipan̄ doon n̄an wōnm̧aanļo̧k im kōttōprakj kōttōpar eo aer.
Alison ekar kōmeļeļe: “Ej kab kar kein kajuon, armej eo ej kaāpen enaaj ba ‘Jutak’ n̄e jej aikuj jutak im ‘Bōjrak’ n̄e emenin aikuj bwe ne bōjrak an pādōl. Ālikin jet iien, armej eo ilo lik ekar ekkatak bwe kaapen eo ekar tin juur bōrāāk eo, im ilo an ejjeļo̧k kar naan aikuj kar ba. Jekar ekkatak n̄an kile wāween an doon kōm̧m̧an im kar maron̄ jeļā n̄e juon eapan̄ [innem] eo juon ej jipan̄ e kōn m̧ōjņo eo an, Aolepān men kein rej kōn lōke im jerbal ippān doon.” 13
John im Alison rekar jab juon wōt ippān doon n̄an pātōļ e bajikōļ eo waeero wōt, ak rekar juon wōt ilo m̧are eo aer barāinwōt. Juon iaer ej ikdeleel kōn mōņōņō eo an eo juon eļapļo̧k jān e make; kajjojo rej kapukkōt em̧m̧anļo̧k eo an eo juon n̄an kōkajoorļo̧k im jipan̄e ilo m̧ōjņo ko an. Rekar kajjojo tōl im rekar kajjojo jipan̄ eļapļo̧k n̄e paatnōr eo juon ej jelm̧ae apan̄. Kajjojo rej kaorōk eddo eo an eo juon im lo bwe uwaak ko rem̧m̧anļo̧k n̄an apan̄ ko aer ilo aer kakobaik tōļan im meļeļe ko aer ippān doon. Eļap aerro ippān doon kōn iakwe eo an Kraist.
Bwe en ļapļo̧k ad ļoor jon̄ak eo ekwojarjar n̄an jerbal ippān doon eaorōk ilo raan kein me ekkā ad ron̄ naan in “n̄a m̧okta” me ej waļo̧k ipeļaakid. Kōrā ewōr ippāer menin letok ko rekwojarjar im rejeņoļo̧k 14 im kar leļo̧k n̄an er eddo ko rejeņoļo̧k, bōtaab men kein rej jab ļapļo̧k— ak dikļo̧k— aer aorōk jān menin letok im eddo ko an em̧m̧aan ro. Aolep kar kōm̧anm̧an im kar aikuji er n̄an kakūrm̧ool karōk eo ekwojarjar an Jemedwōj Ilan̄ n̄an leļo̧k n̄an kajjojo ro Nejin iien ko rem̧m̧an kakūrm̧ool kōttōprak eo an rekwojarjar.
Rainin, “jej aikuji kōrā ro me reperan im ewōr aer visōn āinwōt eo jined Iv” 15 n̄an juon wōt ippān ro em̧m̧aan ro n̄an jetōb ko n̄an Kraist. 16 Em̧m̧aan ro rej aikuj in erom̧ paatnōr ro rem̧ool ijjeļo̧kin aer likūt eļap eddo ko aer ak jerbal “bajjōk” paatnōr ilo an kōrā eo kōm̧m̧ani aolepān jerbal ko. Kōrā ro rej aikuj ikdeleel n̄an “wōnm̧aanļo̧k [im] bōk joko jikier ko me rejim̧we im remenin aikuj” 17 āinwōt paatnōr ro aer ijjeļo̧kin ļōmņak bwe rej aikuj in kōm̧m̧an aolep men make iaad ak kōttar n̄an ba ta eo rej aikuj kōm̧m̧ane. 18
Ilo kalimjōk ļo̧k kōrā āinwōt ro rej bōk koņaer me relukkuun aorōk ejjab bwe jen juon wōt ak ej n̄an meļeļe kōn m̧ool ko an katak ko. Ijjeļo̧kin ejaake juon būrokūraam̧ n̄an kakūrm̧ool menin, jemaron̄ lukkuun jerbal n̄an kaorōk kōrā ro āinwōt an Anij kaorōk er: ro paatnōr ro raorōk ilo jerbal in lo̧mo̧o̧r im mour eo eutiejtata.
Jepojak ke? Jenaaj ke wōnm̧aanļo̧k n̄an anjo̧ ioon m̧anit ko rejjab jim̧we im mōņōņō kōn ial ko im kaminene ko ekkar n̄an pedped in katak ko? Būreejtōn Russell M. Nelson ej karuwainene kōj n̄an “etetal ilo ad jibwe pein doon ilo jerbal in ekwojarjar … [n̄an] jipan̄ kōpooj laļ in n̄an Itok eo Kein Karuo an Irooj.” 19 Ilo ad kōm̧m̧ane, jenaaj katak n̄an kaorōke jerbal ko an kajjojo im kōļapļo̧k wāween ko n̄an kōttōprak jerbal ko ad rekwojarjar. Jenaaj en̄jake eļapļo̧k mōņōņō jān jon̄an eo jekar en̄jake.
Kōjtadidik bwe kajjojo kōj jenej kālet n̄an erom̧ juon wōt ilo wāween eo eim̧we an Irooj n̄an jipan̄ ilo jerbal in An n̄an wōnmaanļo̧k. Ilo etan ad Rilo̧mo̧o̧r ejitōn bōro, Jisōs Kraist, amen.