2020
Karōk eo Eļap
Māe 2020


Karōk eo Eļap

Kōj ro jejeļā kōn karōk eo an Anij im ro em̧ōj aer bujen n̄an bōk koņaer, ewōr ad eddo ealikkar n̄an katakin m̧ool kein.

Men̄e jepād ilubwiljin melejon̄ ko im apan̄ ko rejenoļo̧k, elukkuun ļap ad kam̧m̧oolol! Kweilo̧k in eļap ekar lutōk leplep iood eļap lan̄lōn̄ kōn Jepļaaktok eo an gospel eo an Jisōs Kraist. Jej lan̄lōn̄ ilo visōn eo an Jemān im Nejin eo me ekar ijjino ilo Jepļaaktok eo. Kar kakeememej kōj kōn menin bwūlōn ko kōn jepļaaktok eo an Bok in Mormon, eo me pedped in jibadbad eo an ej n̄an kam̧ool kōn Jisōs Kraist im katak ko An. Em̧ōj kōkāāl kōj kōn lan̄lōn̄ eo kōn revelesōn—n̄an rikanaan ro im n̄an kōj kajjojo. Em̧ōj ad ron̄jake naan in kam̧ool ko raorōk kōn Pinmuur eo ejjeļo̧k jem̧ļo̧kin an Jisōs Kraist im kōn lukkuun Jerkakpeje eo An. Im em̧ōj katakin kōj kōn m̧ool ko an tarlep in gospel eo An me kar leļo̧k n̄an Josep Smith ālkin an Anij Jemān kar kwaļo̧k n̄an rikanaan in me ekar kūr i: “En̄in Nejū JitōnBōro. Kwōn Ron̄jake E!” (Josep Smith—Bwebwenato 1:17).

Jekar kam̧oole kōn jeļāļo̧kjeņ eo ad kōn jepļaaktok eo an priesthood im kii ko an. Em̧ōj kōkāāl kōj kōn kālet ko ad n̄an kajim̧we etan Kabun̄ eo an Irooj me em̧ōj an jepļaaktok kōn et eo ejejjet, Kabun̄ eo an Jisōs Kraist im Armej ro Rekwojarjar ilo Raan Ko Āliktata. Im em̧ōj kar kūr kōj n̄an kobaļo̧k ilo jitlo̧k im jar n̄an kadikļo̧k ajedeed im ļapļo̧kin nan̄inmej in ekauwōtata ipeļaakin laļ in kiiō im ilju im jekļaj. Ke ej jibbon̄ jekar bōk im̧we jān rikanaan an Irooj eo emour rainin ke ekar kwaļo̧k juon naan in kean̄ an Jepļaaktok eo me ej kab wōr ilo bwebwenato. Jekar kam̧oole kean̄ in bwe “ro rej jar im ekkatak enaan eo an Jepļaaktok eo im jerbale ilo tōmak naaj jeraam̧m̧an n̄an bōk kam̧ool eo an make kōn kwojarjar in im jibadbad eo an n̄an kōpooj laļ in n̄an Itok eo Kein Karuo an Irooj im Rilo̧mo̧o̧r, Jisōs Kraist me kar kallim̧ur kake.”1

Karōk Eo

Aolepān men kein rej m̧ōttan juon karōk ekwojarjar eo me jibadbad eo an ej n̄an kōmaron̄ ajri ro Nejin n̄an bōk mour eo ilōn̄tata im erom̧ āinwōt E. Ekkar n̄an, ilo jeje ko rekwojarjar āinwōt “karōk in m̧ōņōņō eļap,” “karōk in lo̧mo̧o̧r eļap,” im “karōk in lo̧mo̧or” (Alma 42:8, 11, 5karōk eo—kar kwaļo̧k ilo Jepļaaktok eo—ekar ijjino kōn juon Ko̧o̧njeļ eo Ilan̄. Āinwōt jetōb ko, jej ikdeleel n̄an tōpar mour indeeo im m̧ōņōņō ippān jined im jemed ilan̄. Ilo tōre eo, jekar eddōkļo̧k n̄an jon̄an eo me jemaron̄ ilo ad jan̄in kar bōk ānbwinnin kanniōk im jelm̧ae men ko ilo mour in. N̄an letok en̄jake in, Anij Jemān ekar karōk n̄an ejaake laļ in. Ilo mour in me em̧ōj karōke, jeban erreo kōn jerawiwi āinwōt m̧ōttanļo̧k mour in ilo ad jelm̧ae jum̧ae ko remenin aikuj n̄an eddōkļo̧k eo ad ilo jetōb. Jenaaj barāinwōt jelm̧ae mej. N̄an ad anjo̧ jān mej im jerawiwi, karōk eo an Jemedwōj Ilan̄ enaaj kōpooj juon Rilo̧mo̧o̧r. Jekakpeje eo An enaaj bar lo̧mo̧o̧ren aolep jān mej, im en̄taan in pinmuur eo An enaaj kōļļā wōnāān ko remenin aikuj n̄an aolep bwe ren erreo jān jerawiwi ilo jekjek ko kar kwaļo̧ki n̄an kōkm̧anm̧anļo̧k eddōkļo̧k eo ad. Pinmuur in an Jisōs Kraist ej pād ioļapļap ilo karōk eo an Jemed Ilan̄.

Ilo Ko̧o̧njeļ eo ilan̄, aolep ajri in jetōb nejin Anij rekar jeļā kōn karōk eo an Jemān, ekoba jekjek ko an mour in im mellijon̄ ko, jipan̄ ko jān lan̄, im aibojooj eo an mejān kajjik eo. Jekar lo jem̧ļo̧kin jān jinoin. Ilubwiljin aolep armej ro rellōn̄ rekar ļotak tok n̄an ioon laļ in rekar kālet karōk eo an Jemed Ilan̄ im jutak kake ilo ko̧o̧njeļ eo ilan̄ me ekar kōm̧m̧an tokālik. Elōn̄ rekar barāinwōt kōm̧m̧an bujen ippān Jemed Ilan̄ ikkijeen ta eo renaaj kōm̧m̧ane ilo mour in. Ilo wāween ko me rejjan̄in kar kwaļo̧ki, jerbal ko ad ilo laļ eo an jetōb ekar im̧we jekjek ko jepād ie ilo mour in.

Mour in im Laļ eo an Jetōb

Inaaj kakaduduikļo̧k kiiō jet iaan pedped in m̧ōttan ko ilo karōk eo an Jemed Ilan̄ ilo aer jelōt kōj ilo iaļ in ad ilo mour in im ilo laļ eo an jetōb ālkin mour in.

Jibadbad in eddōkļo̧k eo ad ilo mour in im mour eo tokālik me emaron̄ bōk jikin tokālik ej n̄an ro ineen Anij n̄an erom̧ āinwōt E. En̄in ej ikdeleel eo an Jemedwōj Ilan̄ n̄an aolep ajri ro Nejin. N̄an tōpar mejān kajjik eo ekam̧ōņōņō, kien eo an mour indeeo ej emenin aikuj bwe jen armej ro reerreo kōn Pinmuur eo an Jisōs Kraist bwe jen maron̄ pād im̧aan mejān Jemed Ilan̄ im eo Nejin im lan̄lōn̄ kōn kōjeraam̧m̧an ko an mour eo ilōn̄tata. Āinwōt an Bok in Mormon katakin, E ej kūrtok “aolep n̄an itok n̄an Ippān im bōk leen em̧m̧an eo An; im E ejjeļo̧k Ej kabbōjrak e jān an itok Ippān, kilmeej im mouj, rilokjak im rianemkwōj, m̧aan im kōrā; im E ej ememej ro rejjan̄in ron̄ kōn E; im aolep rej āinwōt juon n̄an Anij” (2 Nipai 26:33; barāinwōt lale Alma 5:49).

Karōk eo an ekwojarjar n̄an kōj n̄an erom̧ wōn eo jej aikuj erom̧ emenin aikuj bwe jen kōm̧m̧ane jokālet ko ad n̄an jum̧ae ko an eo enana me ej kapoik armej n̄an jab pokake kien ko an Anij im karōk eo An. Ej barāinwōt menin aikuj bwe jen jelm̧ae jum̧ae ko jet an mour in, āinwōt jān jerawiwi ko an ro jet im jān wōtam̧we in ānbwin ko jej ļotak tok kaki. Jet iien eddōkļo̧k eo ad me emenin aikuj jej tōpare ilo ad dibuk en̄taan im apan̄ ijjeļo̧kin an em̧m̧an kōjeied im aeņōm̧m̧an. Im ejjeļo̧k jum̧ae ilo mour in emaron̄ tōpar kōttōpar eo an indeeo n̄e kajoor jān lan̄ ej kōmerai kōj jān aolep menin jum̧ae ko an mour in.

Karōk eo ej kwaļo̧k mejān kajjik eo ad ilo mour indeeo, jibadbad eo im jekjek ko ilo iaļ in ad ilo mour in, im jipan̄ ko jān lan̄ jenaaj bōki. Kien ko an Anij rej kakkōl kōj ņae jabwābwe ilo jekjek ko renana im rekauwōtata. Katak ko an ritōl ro em̧ōj im̧we er rej tōl iaļ eo ad im letok kam̧ool alikkar me ej kōkm̧anm̧anļo̧k iaļ eo ad n̄an mour indeeo.

Karōk eo an Anij ej letok n̄an kōj emen kam̧ool ko reļļap n̄an jipan̄ kōj ilo iaļ eo ad ilo mour in. Aolepāer kar letok n̄an kōj kōn Pinmuur eo an Jisōs Kraist, m̧ōttan eo eaorōk tata ilo karōk eo. Kam̧ool eo kein kajuon n̄an kōj bwe kōn En̄taan eo An kōn jerawiwi ko me jej ukweļo̧k jāni, jemaron̄ erreo jān jerawiwi kein. Innem ekajet eo āliktata naaj “jab bar keememeji” (Katak im Bujen ko 58:42).

Kein karuo, āinwōt m̧ōttan Pinmuur eo an ad Rilo̧mo̧o̧r, E ekar bōk Ioon make aolep m̧ōjņo̧ ko jet an mour in. Menin ej kōtļo̧k bwe jen bōk kajoor im jipan̄ ekwojarjar n̄an ineek eddo ko jejjab maron̄ kejekdo̧o̧ni an mour in, eddo ko ad make im ko jet, āinwōt tariņae im ajedeed in nan̄inmej. Bok in Mormon ej letok n̄an kōj juon kōmeļeļe eo ealikkar ilo jeje ko rekwojarjar kōn kajoor in Pinmuur eo me emenin aikuj. Rilo̧mo̧o̧r ekar bōk Ioon make “metak ko im nan̄inmej [im m̧ōjņo̧ ko] an armej ro an. … Enaaj bōk Ioon make m̧ōjņo̧ ko aer, bwe būruōn ren maron̄ obrak kōn tūriam̧o, ekkar n̄an kanniōk, bwe En maron̄ jeļā ekkar n̄an kanniōk ekōjkan jipan̄ armej ro An ekkar n̄an m̧ōjņo̧ ko aer” (Alma 7:11–12).

Kein Kajilu, Rilo̧mo̧o̧r, kōn Pinmuur eo An ejjeļo̧k jem̧ļo̧kin, ekar anjo̧ jān mej im letok kam̧ool ekam̧ōņōņō bwe kōj aolep jenaaj jerkakpeje. Bok in Mormon ej katakin, “Kōjepļaaktok in enaaj itok n̄an aolep; rūtto im dik jim̧or, riatajinemjen im rianemkwōj jim̧or, m̧an im kōrā jim̧or, rijero̧wiwi im riwānōk jim̧or; im em̧ool enaaj jamin wōr kooļan bar e jako; a men otemjej naaj kōjepļaakļo̧k n̄an jekjek eo eweeppān an” (Alma 11:44).

Jej keememej m̧ool eo an Jerkakpeje ilo jijen in Ijtō in. Menin ej letok n̄an kōj meļeļe im kajoor n̄an jelm̧ae apan̄ ko an mour in me kōj kajjojo jej jelm̧aeiki im ro rejitōnbōro ippād, men ko āinwōt nan̄inmej ilo ānbwin, ļōmņak, ak en̄jake ko jej ļotak tok kaki ak en̄jaki ilo ad mour ioon laļ in. Kōn Jerkakpeje eo, jejeļā bwe nan̄inmej kein ilo mour in rej an jidik wōt iien!

Gospel eo em̧ōj an jepļaaktok ej kam̧ool n̄an kōj bwe Jerkakpeje eo emaron̄ koba iien eo em̧m̧an n̄an ro uwaan baam̧le eo ad—ļeo pālele, lio pālele, ajri ro, im pāāren ro. Menin ej juon kapilōk ekajoor n̄an kōj n̄an kakūrm̧ool eddo ko ad ilo baam̧le eo ad ilo mour in. Ej jipan̄ kōj bwe jen mour ippān doon ilo iakwe ilo mour in im m̧ōņōņō kōn ippān doon ko rekam̧ōņōņō im koba ippān doon eo ilo mour eo ej itok.

Kein kemen im āliktata, revelesōn ko raan kein rej katakin kōj bwe eddōkļo̧k eo ad ejjab aikuj jem̧ļo̧k ilo mour in. Jidikin wōt kam̧ool ko raorōk em̧ōj ae jepļaaktok. Kar jiron̄ kōj bwe mour in ej iien n̄an m̧aanjappopo n̄an ioon Anij im bwe jejjab aikuj aipādpād kōn ukweļo̧k ko ad (lale Alma 34:32–33). Jekdo̧o̧n ak, kar katakin kōj bwe ilo laļ eo an jetōb gospel eo ej ajedeed n̄an barāinwōt “ro rinana im ro rekar jab pokake im rekar jab bōk m̧ool eo” (Katak im Bujen ko 138:29) im bwe ro rekar katakin ijeņ remaron̄ ukweļo̧k m̧okta jān iien Ekajet eo Āliktata (lale eoon ko 31–34, 57–59).

En̄rein rej jet iaan pedped in katak ko kōn karōk eo an Jemedwōj Ilan̄:

Gospel eo an Jisōs Kraist me em̧ōj an jepļaaktok ej letok juon jeļāļo̧kjeņ ejeņoļo̧k kōn unin kōnono ko kōn mour erreo, m̧are, im keotak ajri ro. Ej katakin bwe m̧are ekkar n̄an karōk an Anij emenin aikuj n̄an kadedeikļo̧k jibadbad in karōk eo an Anij, n̄an letok ijjitōn ko rekwojarjar kar karōke n̄an ļotak ilo mour, im n̄an kōpooj ro uwaan baam̧le ko n̄an mour indeeo. “M̧are ej kōmālim jān Anij n̄an armej,” Irooj ekar ba, “… bwe laļ en maron̄ uwaake unin ejaake eo an ” (Katak im Bujen ko 49:15). Karōk in, karōk eo An, aaet em̧ool, ejjab errā kōn jet jum̧ae ko rekajoor an laļ in ilo kien im manit.

Kajoor eo n̄an ejaake mour in ej kajoor eo ekajoortata me Anij ekar letok n̄an ajri ro Nejin. Ekar menin aikuj ilo kein eo m̧oktata n̄an Adam im Iv, ak bar juon kien kar letok bwe ne jab bōd aō kōjerbale. Mokta jān m̧are, im kōjerbal kajoor eo ad make n̄an neji ej jerawiwi im ej kadikļo̧k im ukōt m̧wil eo ekwojarjar an juon m̧aan im juon kōrā. Ilo gospel eo em̧ōj an jepļaaktok ej kwaļo̧k aorōk in kien erreo in ej kōnke jibadbad eo an kōn kajoor ko an ilo kadedeikļo̧k karōk eo an Anij.

Ta eo tok Juon?

Ilo iien in kakeememej eo an Visōn eo M̧oktata 200 iiō, me ekar jinoe Jepļaaktok eo, jejeļā bwe karōk eo an Irooj im kar kapilōk kōj jān ruo bukwi in epepen ko an kōjeraam̧m̧an ko kōn Kabūn eo em̧ōj an jepļaaktok. Ilo iiō in 200, ewōr ippād ta eo rej ņa etan 20/20 n̄an ekkatak kōn ta ko rekar waļo̧k m̧oktaļo̧k.

Ilo ad ereim̧aanļo̧k n̄an ilju im jekļaj, ijoke, vison eo ad ejjab lukkuun alikkar. Jejeļā bwe rubuki iiō ālkin jepļaaktok eo, laļ eo an jetōb kiiō ekoba elōn̄ ro rej kōm̧m̧an jerbal ko ilo laļ eo jetōb n̄an kadedeikļo̧k kwaļo̧k naan eo me ej bōk jikin ijeņ. Jej barāinwōt jeļā bwe kiiō elōn̄ tampeļ ko n̄an kōm̧m̧ani kain̄i ko an mour indeeo n̄an ro me rej ukweļo̧k im kaorōk gospel eo an Irooj ilo jait ko jim̧or an ran̄ōl an mej. Aolepān menin ej kōļapļo̧k karōk eo an Jemedwōj Ilan̄. Iakwe eo an Anij elukkuun ļap jon̄an n̄an ro reiiet E ekar leļo̧k juon mejān kajjik aibojooj n̄an aolep ajri ro Nejin (lale Katak im Bujen ko 76:43).

Jejeļā bwe Rilo̧mo̧o̧r enaaj jepļaaktok im bwe enaaj wōr taujin iiō in tōl eaenōm̧m̧an n̄an kōjem̧ļo̧k m̧ōttan eo an mour in ilo karōk an Anij. Jej barāinwōt jeļā bwe enaaj wōt jekakpeje ko, an ro rūm̧m̧an im ro renana, kōn juon ekajet āliktata n̄an kajjojo armej aolep juon ilo̧k juon.

Naaj ekajet e kōj ekkar n̄an jerbal ko ad, ikdeleel in buruō, im jouj an armej em̧ōj ad erom̧. Ekajet in enaaj kōm̧m̧an bwe aolep ajri ro nejin Anij ren jino n̄an juon aelōn̄ in kiin̄ eaibojooj kōn pokake eo aer ekar kōkarbōbe er im ijo renaaj ineem̧m̧an ie. Ekajet in an aolep en̄in ej ad Rilo̧mo̧o̧r, Jisōs Kraist Riekajet eo ej ad Rilo̧mo̧o̧r, Jisōs Kraist (lale Jon 5:22; 2 Nipai 9:41). An kajoor pōtata ej leļo̧k n̄an E juon jeļāļo̧kjeņ ewāppen kōn aolep jerbal im ikdeleel ko ad, jim̧or ro me rekar jab ukweļo̧k ak otak im ro me rekar ukweļo̧k ak mour jim̧we. Kōn menin, ālkin ekajet eo An jenaaj aolep kwaļo̧k ruōd “ekajeet ko An rejim̧we” (Mosaia 16:1).

N̄an kōjem̧ļo̧ke, ij kwaļo̧k kam̧ool eo ealikkar me ekar itok n̄an eō jān leta ko rellōn̄ im kōn etale elōn̄ kajjitōk ko n̄an kōjepļaake n̄an Kabun̄ in ālkin kar bukweļo̧k etaer ak bun̄ jān tōmak. Elōn̄ iaan membōr ro ad rejjab lukkuun meļeļe karōk in lo̧mo̧o̧r in, me ej uwaake eiten aolep kajjitōk ko kōn katak im kakien ko reim̧we an kabun̄ in me em̧ōj an jepļaaktok. Kōj ro jejeļā kōn karōk eo an Anij im ro em̧ōj aer bujen n̄an bōk koņaer ewōr ad eddo ealikkar n̄an katakin m̧ool kein im kōm̧m̧an jon̄an ad maron̄ n̄an kōļapļo̧k n̄an ro jet ilo jekjek eo ad jepād ie ilo mour in. Ij kam̧ool kōn Jisōs Kraist, ad Rilo̧mo̧o̧r im Ripinmuur, eo ej kakūrm̧ool men otemjej, ilo etan Jisōs Kraist, amen.

Kakeememej ko

  1. “Jepļaaktok eo an Tarlep in Gospel eo an Jisōs Kraist: Juon Naan in Kean̄ n̄an Laļ in,” in Russell M. Nelson, “Ron̄jake E,” Liaona, Māe 2020, 91.