2020
Bun̄ M̧aanļo̧k kōn Tōmak
Māe 2020


Bun̄ M̧aanļo̧k kōn Tōmak

Ij kōjeraam̧m̧an kom̧ kōn aenōm̧m̧an im ļapļo̧k in tōmak ilo Irooj.

Ro jeiū im jatū rejitōn bōro, ilo ad itok n̄an jem̧ļo̧kin kweilo̧k in ej kab juon kōttan ilo bwebwenato, jej kwaļo̧k ad kam̧m̧oolol n̄an Irooj. Al ko rekar lukkuun aibojooj im ennaan ko rekar kōbōkakkak.

Ilo iien kweilo̧k in, jaar en̄jake elōn̄ men ko kar kōnono kaki. Ilo iien in jej kakeememej rubuki iiō in Jepļaaktok eo, kōm kar kwaļo̧k kadkadin juon naan in kean̄ n̄an laļ in eo ej kwaļo̧k kōn m̧ool eo an Jepļaaktok eo an tarlep in gospel eo an Jisōs Kraist.

Jej kakeememej Jepļaaktok eo ilo ad Lam̧ōj Hosana.

Jej kwaļo̧k juon kōkkale kāāl ej jutak kōn tōmak eo ad ilo Irooj Jisōs Kraist im n̄an kakilen ilo ad loe meļeļe im men ko em̧ōj an Kabun̄ in kōmālimi.

Kōm ej kūr n̄an juon raan ipeļaakin laļ in n̄an jitlo̧k im jar, bwe nan̄inmej in eajedeed ipeļaakin laļ in en maron̄ bōjrak, rikōjparok ro ren pād ilo kōjparok, economy en kajoor wōt, im mour ko ren em̧m̧an. Jitlo̧k in enaaj kōm̧m̧an ilo Good Friday, Eprōļ 10. Enaaj juon Bōļaire eo em̧m̧an!

Jabōt in tok ej Jabōt in Ijtō, iien eo jenaaj bar kakeememej Pinmuur im Jerkakpeje eo an ad Irooj Jisōs Kraist. Kōn Pinmuur eo An, menin letok in jerkakpeje eo An enaaj itok n̄an aolep ro me rekar mour ioon laļ in. Im menin letok eo an mour indeeo enaaj itok n̄an aolep ro me rej karbōb kōn erreo n̄an kain̄i im bujen ko kar kōm̧m̧ani ilo m̧weo Im̧ōn ekwojarjar.

Elōn̄ m̧ōttan ko reim̧we ilo kweilo̧k in eļap ilo Eprōļ 2020—im wiik eo ekwojarjar me jej jinoe kiiō—maron̄ kōkaduikļo̧k kōn naan ko ruo rekwojarjar: “Kwōn Ron̄jake E.”1 Jej jar bwe ami jibadbad n̄an Jemedwōj Ilan̄, eo ekar ba naan ko, im n̄an eo Nejin, Jisōs Kraist, enaaj juon menin ememļo̧kjeņ eaorōk kōn aolep men ko me em̧ōj aer waļo̧k. Jej jar bwe jenaaj jino juon mour ekāāl em̧ool n̄an ron̄jake, eo̧ron̄, im pokake naan ko an Rilo̧mo̧o̧r.2 Ij kallim̧ur bwe dikļo̧k mijak im ļapļo̧k tōmak renaaj bōk jikier.

Kom̧ em̧ool kōn ikdeleel ko ami n̄an kōm̧m̧an bwe m̧weo imōmi ren jikin likōpejn̄ak em̧ool kōn tōmak, ijo Jetōb an Irooj enaaj pād ie. Kein ekkatak ko ad kōn gospel eo, Itok, Ļoor Eō, enaaj wōnm̧aanļo̧k wōt im kōjeraam̧m̧an mour ko ad. Emakijkij im jejjetin kijejeto ko ami ilo jerbal in—men̄e ilo tōre kein kom̧ij en̄jake bwe ejjab lukkuun ļap ami tōprak—enaaj ukot mour ko ami, mour an baam̧le ko ami, im laļ in. Jemaron̄ bōk kōkkajoor ilo ad erom̧ rikaļoor ro reperan an Irooj, jutak im kōnono kōn E, jabdewōt jikin jej pād ie.

Kiiō jen kōnono kōn tampeļ ko. Em̧ōj aje 168 tampeļ ipeļaakin laļ in. Ko jet rej pād wōt ilo karōk im ko jet rej kōm̧m̧ani wōt. N̄e karōk ko kar kōjjeļļā kaki n̄an kalōk juon tampeļ kāāl, rej erom̧ m̧ōttan eo bwebwenato ko rekwojarjar.

Emaron̄ kōjak n̄an kōjeļļā kōn tampeļ ko rekāāl ke aolep tampeļ ko ad rekilōk ilo tōre in.

Elōn̄ļo̧k jān bukwi iiō ko rem̧ootļo̧k, Būreejtōn Wilford Woodruff ekar lo jekjek ko ad rainin, āinwōt kar je ilo jar in aje ko an ilo Salt Lake Tampeļ, kar bōk jikin ilo 1893. Jet iaami bōlen rej kab kar loe naan ko jān jar in ekabwūlōn̄lōn̄ ilo social media.

Ron̄jake kajjitōk kein jān juon rikanaan an Anij ekajoor: “N̄e armej rein An reban wōr aer iien em̧m̧an n̄an deļon̄e m̧wiin Im̧ōn ekwojarjar … im repād ilo inepata im jorrāān, jepool kōn men ko reppen … im naaj oktakļo̧k n̄an m̧weo Im̧ōn ekwojarjar im kajjitōk Ippān kōn anemkwoj, kōn jipan̄, kōn kajoor eo An n̄an erļo̧ke ilo etaer, jej kajjitōk Ippam̧, n̄an reilaļtak jān ijo Jikūm̧ Ekwojarjar ilo tūriam̧o … im ron̄jake ainikieer. Ak n̄e ajri ro nejin armej ro Am̧, ilo iiō ko rej itok, renaaj ejepepļo̧k, kōn jabdewōt men ko renaaj waļo̧k, jān jikin in, … im renaaj lam̧ōj n̄an Eok jān tum̧ūlaļ in en̄taan im buromōj ko aer n̄an kōmeraikļo̧k er im kanemkwoj er, jej ettā ilo am kajjitōk Ippam̧ n̄an … eo̧ron̄ ainikieer, im leļo̧k n̄an er kōjeraam̧m̧an ko me rej kajjitōk kaki.”3

Ro jeiū im jatū, ilo iien ko ad reppen im tampeļ ko rekilōk, kom̧ maron̄ epaake wōt kajoor eo an bujen ko an tampeļ im menin letok kwojarjar ilo ami kautiej bujen ko ami. Jouj im kōjerbal iien in me tampeļ ko rekilōk n̄an wōnm̧aanļo̧k wōt im mour erreo n̄an deļon̄e ak n̄an erom̧ juon eo erreo n̄an deļon̄e tampeļ.

Kōnōnō kōn tampeļ ippān baam̧le eo am̧ im ro m̧ōttam̧. Kōnke Jisōs Kraist ej pād ilo ioļapļap in men otemjej jej kōm̧m̧ane ilo tampeļ eo, ilo am̧ ļōmņak eļapļo̧k kōn tampeļ eo, kwonaaj ļōmņak eļapļo̧k kōn E. Katak im jar n̄an ekkatak kōn kajoor im jeļāļo̧kjeņ kōn kōn ami kar bōk menin letok kwojarjar—ak kōn ami naaj bōk menin letok kwojarjar eo.

Rainin jej m̧ōņōņō in kōjeļļā kōn karōk ko n̄an kalōk ruwalitōk tampeļ ko rekāāl ilo eria kein em̧ōj kōlaajraki: Bahía Blanca, Argentina; Tallahassee, Florida; Lubumbashi, Democratic Republic of the Congo; Pittsburgh, Pennsylvania; Benin City, Nigeria; Syracuse, Utah; Dubai, United Arab Emirates; and Shanghai, People’s Republic of China.

Ilo aolep jikin kein ruwalitōk, architect ro an Kabun̄ in renaaj jerbal ippān ritōl ro ilo jikin kein be tampeļ ko rej ekkaļ ilo inem̧m̧an ippān im erom̧ juon men eo eaibojooj ilo kajjojo jukjuk in pād ko.

Karōk eo n̄an tampeļ eo ilo Dubai ej itok āinwōt juon uwaak n̄an tūriam̧o in karuwainene eo aer, eo me jej kile kōn kam̧m̧oolol.

Kobban karōk eo n̄an Shanghai elukkuun ļap an aorōk. Elōn̄ļo̧k jān rubuki iiō ko, membōr ro reereo n̄an deļon̄e tampeļ ilo Republic eo an China eto aer etal n̄an Hong Kong China Tampeļ, Ak ilo Juļae eo 2019, tampeļ eo ekar kilōk kōn wōt karōk in pepe ko raitok kitieer im elukkuun menin aikuj bwe en kōkāāl.

Ilo Shanghai, juon im̧ōn kweilo̧k eo me maron̄ kōjerbal n̄an elōn̄ m̧akūtkūt ko enaaj kōpooj iaļ eo n̄an membōr ro ilo China n̄an wōnm̧aanļo̧k wōt im bōk koņaer ilo kain̄i ko an tampeļ—ilo Republic eo an China—n̄an er im ro jibūeer im jim̧m̧aer etto.4

Ilo aolep laļ, Kabun̄ in ej katakin membōr ro an n̄an kautiej, pokake, im rejtake kien eo.5 Jej katakin kōn aorōk in baam̧le, n̄an erom̧ m̧am̧a im baba ro rem̧m̧an im riwaanjon̄ak ro rem̧m̧an ilo jikin ko rej pād ie. Kōnke jej kautiej kien ko im kakien ko an Armej in Republic eo an China, Kabun̄ in ejjab jilkinļo̧k mijenede ro n̄an kwaļo̧k naan ijeņ; im jeban kōm̧m̧ane menin kiiō.

Jarlepju an rilikin ro im Richina ro renaaj wōnm̧aanļo̧k wōt im jeņoļo̧k iien jar ko aer. Status eo an Kabun̄ in ijeņ eban oktak. N̄an jino kōjerbal m̧ōko m̧ōn kabūn in, deļon̄e enej aikuj wōr appoinmen wōt. M̧weo Im̧ōn Irooj ilo Shanghai eban erom̧ juon jikin alooj an rilotok ro jān laļ ko jet.

Tampeļ kein ruwalitōk renaaj kōjeraam̧m̧an mour ko an elōn̄ armej ro ilo jim̧or turājet in ran̄ōl ilo mour im mour eo tok juon. Tampeļ ko rej m̧ōttan ko reļļap ilo Jepļaaktok eo an tarlep in gospel eo an Jisōs Kraist. Kōn em̧m̧an im tūriam̧o an Anij, E ej boktok im kepaake tok kōjeraam̧m̧an ko an tampeļ n̄an ajri ro Nejin ijoko jabdewōt.

Āinwōt an wōnm̧aanļo̧k wōt Jepļaaktok eo, Ijeļā bwe Anij enaaj kwaļo̧k elōn̄ men ko reļļap im aorōk im rej ekkeijelļo̧k n̄an aelōn̄ in kiin̄ eo An ioon laļ.6 Aelōn̄ in Anij ej Kabun̄ eo an Jisōs Kraist im Armej ro Rekwojarjar ilo Raan Ko Āliktata.

Ro jeiū im jatū, ij kwaļo̧k aō iakwe kom̧. Ilo iien in eļap inepata im kapokpok, im owar mālim in em̧ōj likūt ioō, ikōņaan lewaj n̄an kom̧ juon kōjeraam̧m̧an jān rijilōk an Anij.

Ij kōjeraam̧m̧an kom̧ kōn aenōm̧m̧an im ļapļo̧k in tōmak ilo Irooj.7

Ij kōjeraam̧m̧an kom̧ kōn juon ikdeleel n̄an ukweļo̧k im erom̧ eļapļo̧k āinwōt E kajjojo raan.8

Ij kōjeraam̧m̧an kom̧ n̄an jeļā bwe Rikanaan Josep Smith ej juon rikanaan an Jepļaaktok eo an gospel eo an Jisōs Kraist ilo lukkuun tarlep in.

N̄e elōn̄ nan̄inmej ko ilubwiljimi ak ro rejitōnbōro ippami, ij likūt aō kōjeraam̧m̧an in kōmour, en jejjet ippān ankilaan Irooj.

Ij kōjeraam̧m̧an kom̧, kobaik bar juon alen aō iakwe n̄an kajjojo iaami, ilo et eo ekwojarjar etan Jisōs Kraist, amen.