2020
Lukkuun Kōjerbale juon Ekajet Ejim̧we
Māe 2020


Lukkuun Kōjerbale juon Ekajet Ejim̧we

N̄an lukkuun kōjerbale juon ekajet ejim̧we, katok in pinmuur eo an Rilo̧mo̧o̧r eo enaaj karreo maalkan būraj eo kōn jajeļo̧kjeņ im lōklōk ko rekōmettak rej kōmetak jān ro jet.

Bok in Mormon eo ej katakin kōn Kraist.

Oktoba eo ļo̧k, Būreejtōn Russell M. Nelson ekar kajjitōk ippād n̄an ļōmņak kōn “Ewi wāween an naaj mour eo ad oktak eļan̄n̄e jeļāļo̧kjeņ eo ad bōk jān Bok in Mormon eo kar kajjojo jako”1 Ikar kejōkļo̧kjeņ kōn kajjitōk in, āinwōt aō lukkuun jeļā bwe elōn̄ iami rekar. Juon ļōmņak ekar bar itok im bar itok—eļan̄n̄e ejjab Bok in Mormon eo im alikkar ko an kōn katak ko an Kraist im katok in pinmuur eo An, ia eo inaaj kar oktakļo̧k n̄ane kōn aenōm̧m̧an?

Katak ko an Kraist—ko epād ie kain̄i in lo̧mo̧o̧r ko im kain̄i ko an tōmak ilo Kraist, ukweļo̧k, peptaij, menin letok eo an Jetōb Kwojarjar, im niknik n̄an jem̧ļo̧kin—ej katakin elōn̄ kōttan ilo jeje ko rekwojarjar an Jepļaaktok eo ak kōn kajoor in emake iaan ilo Bok in Mormon eo.2 Katak ko rej ijjino ilo tōmak ilo Kraist, im aolep kajjojo in ļam̧ļam ko aer rej pedped wōt ioon katok in pinmuur eo An.

Āinwōt an Būreejtōn Nelson katakin, “Bok in Mormon eo ej letok meļeļe eo elikio im maron̄ kōn Pinmuur eo an Jisōs Kraist me jab maron̄ loe jabdewōt jikin.”3 Ilo an ļapļo̧k ad meļeļe kōn menin letok eo ekajoor an Rilo̧mo̧o̧r eo, enaaj ļapļo̧k ad bōk jeļāļo̧kjeņ, ilo kōļmenļo̧kjeņ ko ad im ilo būruwōd,4 m̧ool in kam̧ool eo an Būreejtōn Nelson kōn m̧ool in “m̧ool ko kōn Bok in Mormon eo ewōr aer kajoor n̄an kōmour, kaenōm̧m̧an, kōjepļaaktok, jipan̄, kōkajoorļo̧k, kaenōm̧m̧an, im kam̧ōņōņōik jetōb ko ad.”5

Pinmuur eo an Rilo̧mo̧o̧r eo ej Kaju Būruwōn Aolep Kajjitōk ko an Ekajet

Juon jipan̄ eaorōk im ej bōktok aenōm̧m̧an jān Bok in Mormon eo n̄an meļeļe eo ad kōn Pinmuur eo an Rilo̧mo̧o̧r eo ej katak ko an me tūriamo̧ eo an Kraist ej kakūrm̧ool aolep kajjitōk ko an ekajet. Āinwōt an Alma kōmeļeļeiki, “Anij make Eaar pinmuur kōn jero̧wiwi ko an laļ, n̄an kakūrm̧ool karōk in tūriam̧o kake, n̄an medek akweļap ko an kien, bwe Anij en maron̄ wānōk, Anij in jim̧we, im Anij in tūriam̧o kake barāinwōt.”6 Anij in tūriam̧o kake7—Ta eo jeje ko rekwojarjar rej barāinwōt ņaetan karōk in m̧ōņōņō eo8 ak karōk in lo̧mo̧o̧r eo9—maron̄ jab kōttōbrake m̧ae iien aolep kajjitōk ko an ekajet rekar ju bōro kaki.

Ak ta lukkuun meļeļe eo an “kajjitōk ko an ekajet”? Ļōmņak kōn en̄jake eo make an Alma. Keememej ke ekar āinwōt juon likao em̧m̧an dettan, Alma ekar etal im pukot “n̄an an ko̧kkure kabun̄ eo.”10 Ilo m̧ool, Alma ekar jiron̄ ļaddik eo nejin Hilamōn bwe ekar “en̄taan kōn metak ko an hell” kōnke lukkuun wājabdik an “uror elōn̄ iaan ajri ro nejin [Anij]” ilo tōlļo̧k “er n̄an ko̧kkure.”11

Alma ekar kōmeļeļeiki Hilamōn bwe aenōm̧m̧an āliktata ekar itok n̄an e ke “pen ilo ļōmņak” kōn katak ko an jemān “kōn itok eo an … Jisōs Kraist … n̄an pinmuur kōn jero̧wiwi ko an laļ.”12 Kūr ilo bōro an Alma ekar akweļap kōn tūriam̧o eo an Kraist13 innām ekar en̄jake lan̄lōn̄ im rōļo̧k eo ke ekar kile bwe Kraist ekar pinmuur kōn jerawiwi ko an im kōļļāik aolep men ekajet enej aikuji. Bar juon alen, ta eo enaaj ekajet kar aikuji jān Alma? Alma make ekar katakin, “Ejjeļo̧k men ettoon emaron̄ jolōte aelōn̄ in Anij.”14 Bwe, m̧ōttan rōļo̧k jān eddodo eo an Alma ekar kōn menin bwe m̧ae tūriam̧o eo ilo etan, ekajet enaaj kar bōbrae e jān an ro̧o̧lļo̧k im mour ippān Jemedwōj Ilan̄.15

Rilo̧mo̧o̧r eo ej Kōmour Kinej ko Jejjab Maron̄ Kōmouri

Ak lan̄lōn̄ eo an Alma ekar pedped ioon wōt e make—ilo an kōttoļo̧k kakkure im an maron̄ ro̧o̧lļo̧k n̄an ippān Jemed? Jej jeļā bwe Alma ekar barāinwōt en̄taan kōn ro im ekar tōlļo̧k er jān m̧ool eo.16 Ak Alma make ekar jab maron̄ ājmour im kōro̧o̧ltok aolep ro ekar tōļļo̧k er. E make ekar jab maron̄ lale bwe er renaaj bōk jon̄an wōt juon iien em̧m̧an n̄an ekkatak katak ko an Kraist im maron̄ jeraam̧m̧an jān mour kōn pedped in katak ko rekam̧ōņōņō. Ekar maron̄ jab bar bōktok ro im rekar maron̄ mej im pilo wōt jān katak ko an reriab.

Āinwōt Būreejtōn Boyd K. Packer ekar katakin: “Katak eo ekar lo̧mo̧o̧ren Alma … en̄in: Kōjepļaakļo̧k ta eo kwojjab maron̄ kōjepļaak, kōmour kinej ko kwojjab maron̄ kōmour, kōm̧m̧ane ta eo kwaar rube im kwojjab maron̄ kōm̧m̧ane ej kōttōbar eo an pinmuur eo an Kraist.”17 Lan̄lōn̄ eo em̧ool kōn ļōmņak eo an Alma “kar dābdeb wōt” ekar jab bwe e make en maron̄ erreo ak barāinwōt ro otemjej ekar kōmetak er ren maron̄ ājmour im maron̄ mour.

Katok eo an Rilo̧mo̧o̧r eo Ej Kōjerbale juon Ekajet Ejim̧we

Iiō ko m̧okta jān an Alma kar bōk lo̧mo̧o̧r jān katak in ej joļo̧k mijak, Kiin̄ Benjamin ekar katakin kōn pilawe ej kōmour letok jān katok in pinmuur eo an Rilo̧mo̧o̧r eo. Kiin̄ Benjamin ekar kwaļo̧k bwe “naan ko rem̧m̧an im lan̄lōn̄ eļap” kar leļo̧k n̄an e “jān juon enjeļ jān Anij.”18 Ilubwilijin naan kein rem̧m̧an ekar m̧ool eo bwe Kraist enaaj en̄taan im mej kōn jerawiwi ko ad im bōd ko n̄an lale bwe “juon ekajet ejim̧we en maron̄ itok ioon ro nejin armej.”19

Ta juon “ekajet jim̧we” ej lukkuun aikuji? Ilo eoon in tok juon, Kiin̄ Benjamin ekar kōmeļeļeiki bwe, n̄an lukkuun kōjerbale juon ekajet ejim̧we, bōtōktōkin Rilo̧mo̧o̧r eo ekar pinmuur “jero̧wiwi ko an ro raar wōtlo̧k jān bun̄ eo an Adam” im kōn ro otemjej “raar mej im jab jeļā ankilaan Anij kōn er, ak ro raar jero̧wiwi ilo jajeļo̧kjeņ.”20 Juon ekajet ejim̧we ej barāinwōt aikuj, ekar katakin, bwe “bōtōktōkin Kraist ej pinmuur” jerawiwi ko an ajri ro reddik.21

Jeje ko rekwojarjar rej katakin juon katak eaiboojoj—: katok in pinmuur eo an Kraist ej kōmour, āinwōt juon mennin letok, ro otemjej rej jerawiwi ilo jajeļo̧kjeņ—ro otemjej, āinwōt an Jekab likūti, “ejjeļo̧k kien leļo̧k.”22 Bōk eddo kōn jerawiwi ej pedped wōt ioon meram eo jekar leļo̧k im injej ko kōn ad maron̄ in kōjerbale anemkwoj eo ad.23 Jej jeļā bwe m̧ool in kōmour im kaenōm̧m̧an in ej m̧ool wōt kōnke Bok in Mormon im jeje ko rekwojarjar jet an Jepļaaktok eo.24

Aaet, ijo ewōr juon kakien kar leļo̧k, ijo im jejjab jajeļo̧kjeņ kōn ankilaan Anij, jej bōk eddoid. Āinwōt an Kiin̄ Benjamin kwaļo̧k: “Ak wo, wo n̄an e eo e jeļā bwe e ej jum̧ae Anij! Bwe lo̧mo̧o̧r ej itok jaab n̄an juon āinwōt in ijello̧kun wōt kōn ukeļo̧k im tōmak ilo Irooj Jisōs Kraist.”25

En̄in barāinwōt ej naan ko rem̧m̧an an katak ko an Kraist. Rilo̧mo̧o̧r eo ekar jab wōt kōmour im kōjepļaak n̄an ro otemjej rej jerawiwi ilo jajeļo̧kjeņ ak barāinwōt, n̄an ro otemjej rej jerawiwi ņae meram eo, Rilo̧mo̧o̧r eo ej leļo̧k kōmour ioon jekjek ko an ukweļo̧k im tōmak ilo E.26

Alma ekar aikuj “kar dabdeb wōt” jim̧or m̧ool kein. Mool Alma ekar en̄jake ta ej kōmeļeļeiki āinwōt “lan̄ļōn̄ … ļo̧k”27 eļan̄n̄e ekar ļōmņak bwe Kraist ekar lo̧mo̧o̧ren e ak likūt wōt an ro metak wōt ro ekar tōlļo̧k er jān m̧ool eo? Em̧ool jaab. Bwe Alma en en̄jake aenōm̧m̧an eo elikio, ro otemjej ekar kōmetak er rekar barāinwōt aikuj iien em̧m̧an n̄an aer lukkuun mour.

Ak ewi wāween eo ejejet naaj n̄an er—ak ro jemaron̄ kar kōmetak er—aer maron̄ lukkuun mour. Men̄e jejjab lukkuun in meļeļe kilen ko rekwojarjar ko me katok in pinmuur eo an Rilo̧mo̧o̧r eo ej kōmour im kōjepļaak, jej jeļā bwe n̄an lukkuun kōjerbale juon ekajet ejim̧we, Rilo̧mo̧o̧r eo enaaj karreo maalkan būraj eo kōn jajeļo̧kjeņ im lōklōk ko rekōmettak rej kōmetak jān ro jet.28 Jān menin Ej kam̧ool bwe aolep ajri ro nejin Anij renaaj bōk iien em̧m̧an, kōn visōn ejjab tab, n̄an kāālet n̄an ļoor E im bōke karōk in m̧ōņōņō eo an eļap.29

Rilo̧mo̧o̧r eo Enaaj Kōkōm̧anm̧anļo̧k Aolep Men ko Jekar Rubi

Mool ko kein me renaaj kar bōktok aenōm̧m̧an n̄an Alma. Im m̧ool ko kein me rej aikuj bōktok n̄an kōj aenōm̧m̧an eļap barāinwōt. Āinwōt piktokin em̧m̧aan im kōrā ro, kōj aolep jej ioon kōkkaj, ak jet iien itaak, ippān doon im kōmetak doon. Āinwōt an jabdewōt jinen im jemān ajri ro maron̄ kam̧ool, metak eo ej ekkejeltok ippān bōd ko ad ejjab baj mijak in kaje eo ad make ak mijak eo me jekar maron̄ kalikjab an ajri ro nejin lan̄lōn̄ ak ilo jet wāween kar kapen er jān aer loe im meļeļe m̧ool eo. Kallim̧ur eo eaiboojoj an katok in pinmuur eo an Rilo̧mo̧o̧r eo ej bwe āinwōt n̄an bōd ko ad āinwōt ro jinen im jemān rej inepata, Ej dāpij ajri ro nejid ro rerreo im kallim̧ur n̄an kōmour er.30 Im aaet n̄e rekar jerawiwi ņae meram eo—āinwōt kōj aolep—pein tūriam̧o eo an An ej erļo̧ktok,31 im Enaaj lo̧mo̧o̧ren er eļan̄n̄e renaaj ak reilo̧k n̄an E im mour.32

Men̄e Rilo̧mo̧o̧r eo ewōr an kajoor n̄an kōkōm̧anm̧anļo̧k ta eo jejjab maron̄ kōm̧m̧ane, Ej kean̄ kōj bwe jen kōm̧m̧an em̧m̧an jon̄an wōt ad maron̄ n̄an kōm̧m̧an kōro̧o̧ltok ko āinwōt m̧ōttan wōt ukweļo̧k eo ad.33 Jerawiwi ko ad im bōd ko rej bōk jikier jab wōt jān jemjerā eo ad ippān Anij ak barāinwōt jān jemjerā ko ad ippān ro jet. Jet iien kijejeto ko ad n̄an kōmour im kōjepļaaktok maron̄ pidodo āinwōt juon naan in joļo̧k bōd, ak jet iien kōro̧o̧lļo̧k ko remaron̄ bōk iiō in ettā bōro.34 Ak, n̄an elōn̄ iaan jerawiwi ko ad im bōd ko, jeban baj maron̄ in lukkuun kōmour ro jekar kōmetak er. Em̧m̧an eo, kallim̧ur in leļo̧k aenōm̧m̧an eo jān Bok in Mormon eo im jepļaaktok eo an gospel eo ej bwe Rilo̧mo̧o̧r eo enaaj kōkōm̧anm̧anļo̧k aolep men ko jekar rubi.35 Im Enaaj barāinwōt kōkōm̧anm̧anļo̧k kōj eļan̄n̄e jej oktak n̄an E ilo tōmak im ukweļo̧k jān kōmetak ko jekar kōm̧m̧ani.36 Ej letok jim̧or menin letok kein kōnke Ej iakwe kōj aolep kōn iakwe ewāppen37 im kōnke E ekar kallim̧ur in lukkuun kōjerbale juon ekajet ejim̧we eo ej kautiej ekajet im tūriam̧o. Ij kam̧ool bwe menin ej m̧ool ilo etan Jisōs Kraist, amen.

Kakeememej ko

  1. Russell M. Nelson, “Naan in Ikkilōk ko,” Liahona, Nov. 2019, 122.

  2. Lale 2 Nipai 31; 3 Nipai 11:28, 32, 35, 39–40; Katak im Bujen Ko 10:62–63, 67–70; 68:25; Moses 6:52–54; 8:24; Laajrak in Tōmak 1:4.

  3. Russell M. Nelson, “Bok in Mormon eo: Eļan̄n̄e en kar Ejjeļo̧k Elmen Nej Kar Mour eo Am̧?” Liaona, Nob. 2017, 62.

  4. Lale Katak im Bujen Ko 8:2–3.

  5. Russell M. Nelson, “Bok in Mormon eo: Eļan̄n̄e en kar Ejjeļo̧k Elmen Nej Kar Mour eo Am̧?” 62.

  6. Alma 42:15.

  7. Lale Alma 42:15.

  8. Lale Alma 42:8.

  9. Lale Alma 24:14; Moses 6:62.

  10. Lale Mosaia 27:8–10.

  11. Alma 36:13, 14.

  12. Alma 36:17, 18.

  13. Lale Alma 36:18.

  14. Alma 40:26; barāinwōt lale 1 Nipai 15:34; Alma 7:21; 11:37; Hilamōn 8:25.

  15. Lale 3 Nipai 27:19; barāinwōt lale Moses 6:57.

  16. Lale Alma 36:14–17.

  17. Boyd K. Packer, “The Brilliant Morning of Forgiveness,” Ensign, Nov. 1995, 19–20.

  18. Mosaia 3:2, 3.

  19. Mosaia 3:10; eoon eo eaorōk kar kobaiktok.

  20. Mosaia 3:11; barāinwōt lale 2 Nipai 9:26.

  21. Mosaia 3:16; barāinwōt lale Mosaia 15:25; Moronai 8:11–12, 22.

  22. 2 Nipai 9:25.

  23. Lale 2 Nipai 2:26–27; Hilamōn 14:29–30.

  24. Lale Laajrak in Tōmak 1:2; barāinwōt lale Katak im Bujen Ko 45:54. Bar kōmeļeļeiki katak eo kōn peptaij kōn ro remej, Rikanaan Josep juon iien ekar ba: “Ilo an juon m̧ōttan in armej ekajet im liaakeļo̧k ro jet ilo ejjeļo̧k tūruam̧o, eo Jemen Eļap an laļ in ej kalimjōk aolepān baam̧le eo an armej kōn kea eo an juon jemen im iakwe an juon jemen ak jinen” bwe “An iakwe [ej] em̧wilaļ. … E ej juon Rikōm̧m̧an kien emāletlet, im naj ekajet aolep armej, jab ekkar n̄an tōmak eo edik, kōjerbal jān armej. … Enaaj ekajete er, ‘jab ekkar wōt kōn ta eo ejjeļo̧k ippāer, ak kōn ta eo ewōr ippāer’; ro otemjej rekar mour ilo ejjeļo̧k kakien, naaj ekajet ilo ejjeļo̧k kien, im ro ekar wōr ippāer juon kien, naaj ekajet ekkar jān kien eo. Jej aikuj jab pere māletlet im jeļāļo̧kjeņ an Jeova eo Eļap; Enaaj nōbar ekajet ak tūriam̧o n̄an aolep laļ ekkar n̄an merit ko aer roktak, jeraam̧m̧an ko aer n̄an bōk jeļāļo̧kjeņ, kakien ko mej rej kiene, jikin ko rej leļo̧k n̄an er n̄an aer bōk meļeļe ko rejim̧we, im … jenaaj aolep aaet kwaļo̧k bōro em̧ool bwe Ekajet an aolep laļ ekar kōm̧m̧an jim̧we” (Teachings of Presidents of the Church: Joseph Smith [2007], 404).

  25. Mosaia 3:12; barānwōt lale 2 Nipai 9:27.

  26. Lale Mosaia 3:12; Helamōn 14:30; Moronai 8:10; Katak im Bujen Ko 101:78. Kajjojo armej remaron̄ jajeļo̧kjeņ kōn jet kien im bujen ko ak jab maron̄ kōjerbal anemkwoj eo aer ilo jet jekjek ko ak naaj wōt bōk eddo ilo jekjek ko jet kōn Meram eo an Kraist rej bōke (lale 2 Nipai 9:25; Moronai 7:16–19). Rilo̧mo̧o̧r eo, eo ej ad riekajet ekar lukkuun kōjerbale juon ekajet ejim̧we, naaj kalikkar jekjek kein (lale Mormon 3:20; Moses 6:53–57). Im Ekar kōļļāik wōņāān kōn jim̧or—jekjek ko m̧okta rekar jab āinwōt im tokālik ioo jekjek ko kōn ukweļo̧k.

  27. Alma 36:21.

  28. Lale Mosaia 3:11; barāinwōt lale D. Todd Christofferson, “Redemption,” Liahona, May 2013, 110; Alma 7:11–12 (“Enaaj bōk Ioon metak ko im nan̄inmej ko an armej ro An. … Im Enaaj bōk Ioon m̧ōjņo̧ ko aer,”); Aiseia 53:3–5 (“E m̧ool Ear ineek en̄taan ko ad, im bōkļo̧k būrom̧ōj ko ad”); 61:1–3 (“Irooj ear kapit Eō bwe In … kūrimi ro e rup būrueir, … Bwe in likūt n̄an ro rej liaajlo̧ļ ilo Zaion, im leļo̧k n̄an er pāllin bōraer kōn bwidej in upaaj, oil in lan̄lōn̄ kōn būrum̧ōj”). Ej kōmeļeļe bwe kar kouti Rilo̧mo̧o̧r eo jān eoon kein ilo Aiseia ke Ekar kōjjeļļā messaia: “Rainin naan ilo Jeje in e jejjet ilo lo̧n̄iln̄ōmi” (lale Luk 4:16–21).

  29. Ilo laļ eo an jetōb, “Gospel eo kwaļo̧k kake n̄an ro rejajeļo̧kjeņ, ro rejjan̄in ukweļo̧k, im rinana ro bwe ren maron̄ anemkwoj jān kalbuuj im wōnm̧aanļo̧k n̄an kōjeraam̧m̧an ko an Jemedwōj Ilan̄ ej iakwe ekar kakuņi n̄an kōj” (Dallin H. Oaks, “Trust in the Lord,” Liahona, Nov. 2019, 27). Lale 1 Piter 4:6; 2 Nipai 2:11–16; Katak im Bujen Ko 128:19; 137:7–9; 138:31–35.

  30. Lale Moses 6:54. Būreejtōn M. Russell Ballard ekar katakin katak in kōn kautiej m̧akūtkūt eo: “Irooj wōt ejeļā aolep meļeļe ko, im E eo enaaj ekajet e kōm̧m̧an ko ad ioon laļ in. N̄e Ej ekajet e kōj, ij en̄jake enaaj bōk men otemjej im ļōmņak kaki: kadkad eo ad im piktokid, jekjek in ļōmņak eo ad, jon̄an jeļā eo ad, katak ko jekar ekkatak, m̧anit ko an ro jemād, ājmour eo ad, im ko jet. Jej ekkatak ilo jeje ko bwe bōtōktōkin Kraist enaaj pinmuur jerawiwi ko an armej ro ’rekar mej ilo aer jab jeļā ankilaan Anij kake er, ak ro rekar jerawiwi ilo aer jajeļo̧kjeņ’ (Mosaia 3:11)” (“Suicide: Some Things We Know, and Some We Do Not,” Ensign, Oct. 1987, 8; Tambuli, Mar. 1988, 18).

  31. Lale Jekab 6:5; Mosaia 29:20; 3 Nipai 9:14; Katak im Bujen Ko 29:1.

  32. Lale Hilamōn 8:15.

  33. Lale Levitikōs 6:4–5; Ezekiel 33:15–16; Hilamōn 5:17; Katak im Bujen Ko 58:42–43.

  34. Ekar baj kijejeto in ilo wāween an Alma make jerbal (lale Alma 36:24).

  35. Būreejtōn Boyd K. Packer ekar katakin katak in:

    “Elōn̄ iien koban maron̄ kōkōm̧anm̧anļo̧k ta eo kwaar rube. Bōlen juon kōmetak kar kōm̧m̧an etto im etto, ak jorrāān kwaar makoko in kōm̧m̧ane. Bōlen jorrāān eo ekar ļap me kwojjab maron̄ kōm̧m̧ane jekdo̧o̧n ewi jon̄an am̧ kar kōņaan.

    “Ukweļo̧k eo am̧ ekar jab maron̄ errā kake m̧ae iien juon kajim̧we ej kōm̧m̧an. Eļan̄n̄e kwojjab maron̄ bar kōm̧m̧ane ta eo kwaar kōm̧m̧ane, kwoj kalbuuj. Epidodo n̄an meļeļe wāween an ejjeļo̧k jipan̄ im ejjeļo̧k kōjatdikdik ippem innām kwoj en̄jake etke komaron̄ in ebbeer, āinwōt kar Alma. …

    “Ewi wāween an aolep maron̄ kōm̧m̧ani, jejjab jeļā wāween kōm̧m̧ani. Emaron̄ jab tōbrak aolepāer ilo mour in. Jej jeļā bwe visōn ko im lotok ko me rikarejar ro an Irooj rej wōnm̧aanļo̧k kōn jerbal in pinmuur eo itulik ilo rōn̄ōl.

    “Jeļāļo̧kjeņ in ej aikuj āinwōt naan in kaenōm̧m̧an eo erreo āinwōt n̄an ro rej ajļo̧k. Ij ļōmņak kōn jinen im jemān ajri ro rej en̄taan kōn bōd an ajri ro nejier rejebwābwe im rej jako kōjatdikdik ippāer” (“The Brilliant Morning of Forgiveness,” 19–20).

  36. Lale 3 Nipai 12:19; barāinwōt lale Matu 6:123 Nipai 13:11.

  37. Lale Jon 15:12–13; 1 Jon 4:18; Dieter F. Uchtdorf, “Perfect Love Casteth Out Fear,” Liahona, May 2017, 107.