Wan Prea Longwe Nomo
Prodi i bin fraet blong gobak silip. ?Wanem sapos hem i drim nogud bakegen?
“Prea, Hem i stap” (Children’s Songbook, 12).
Prodi i sidaon stret long bed hariap nomo. Hat blong hem i stap pam kwik.
Ren i stap faerap long ruf taem hem i stap sidaon long tudak. Hem i save harem wota i stap foldaon long wan tri blong Afrika aotsaed long windo blong hem, mo ea i wetwet mo wom. Prodi i pulum wan longfala win mo traem blong slakem hem. Hem i wan drim nomo.
Hem i kamaot long bed mo spae long rum blong papa mo mama blong hem. Mama mo Papa oli stap slip long pis. Smol sista blong hem, Célia, i slip gud long bed blong hem tu. Evri samting i ORAET. Famli blong hem i sef.
Prodi i klaem gobak long bed mo traem blong slip bakegen. Hem i tantanem hem, afta i tantanem hem bakegen mo bakegen Hem i save se drim ia i no tru, !be i mekem hem i fraet we! Nomata hem i taed, hem i fraet blong slip bakegen. ?Wanem sapos hem i drim nogud bakegen?
Prodi i slip long bak blong hem mo lukluk siling. Hem i traem blong tingting long ol hapi tingting. “?Papa long Heven, i tru se yu stap ia? ?Mo yu stap harem mo ansarem evri prea blong pikinini?” Prodi i kasem wan wom filingi kam long hem olsem wan wef taem hem i tingting long ol toktok blong Praemeri singsing we hem i laekem tumas. Sista Kioska i bin tijim olgeta se Papa long Heven oltaem i stap lukaot gud long olgeta. Oli save prea long Hem enitaem, eni ples.
Prodi i save wanem blong mekem. Hem i kamaot long bed mo nildaon blong prea.
“Dia Papa long Heven,” hem i bin prea, “Mi mi fraet tumas. Plis mekem se famli blong mi i sef. Mo plis, helpem mi blong gobak slip mo nomo gat ol nogud drim.”
Prodi i finisim prea blong hem mo klaem i gobak long bed. Hem i slakem bodi blong hem, mo maen blong hem i stap long pis. I no longtaem hem i slip.
Taem moning i kam, Prodi i wekap mo wom san i stap saen tru long windo. Hem i save harem ol sospen oli stap faerap long kijin mo i girap blong go faenem Mama. Célia i stap long tebol mo stap kakae haf maniok blong yestedei. Mama i stap hotem sam maniok blong hem i kakae tu.
“Gud moning,” Mama i talem. “?Yu slip gud?”
“Mi bin drim long nogud drim we i fraet tumas” Prodi i talem. “Be afta mi bin mekem wan prea. Papa long Heven i helpem mi blong filim sef.”
“Mi sori yu bin gat wan nogud drim,” Mama i talem. Hem i haggem Prodi strong mo no lego hem blong longtaem. “Be mi glad tumas we yu bin mekem wan prea. I luk olsem Papa long Heven i rili helpem yu.”
“Hem i helpem mi,” Prodi i talem. “Mi save slip bakegen, mo mi nomo gat ol nogud drim.” Prodi i haggem Mama strong. Hem i glad blong save se nomata hamas hem i filim fraet, Papa long Heven i wan prea longwe nomo.