Dijitol Nomo: Blong Ol Yang Adalt
Mi Bin Faet blong Winim Ponografi. ?From Wanem Bae Hem I No Mekem?
Taem mi bin faenemaot se boefren blong mi i bin gat problem wetem ponografi, mi bin traem bes blong helpem hem blong tanem hem i go long Sevya blong kasem help.
Woman ia we i raet i stap long Gwatemala.
Mi bin stap deitem wan yang man we mi bin lavem tumas blong kolosap wan yia. !Mi rili ting se bae mi maredem hem ia nao! Be mi neva ting se blong deit wetem hem bae i mekem mi fesem wan problem we mi bin fesem miwan blong winim wetem evri paoa blong mi.
Taem mi stap rere blong go long misin, mi bin go long bisop blong mi mo konfes se mi bin traehad wetem ponografi bifo. Afta we mi bin sakem sin mo karemaot hevi samting ia long mi, mi neva ting se ponografi bae i spolem laef blong mi bakegen. Be mi bin rong.
Taem mi bin faenemaot se man ia we mi bin stap plan blong maredem i bin stap yusum ponografi, mi wantem tumas blong helpem mo sapotem hem blong winim hadtaem ia. Mi bin go tru long rod blong sakem sin wetem traehad ia blong winim ponografi, mo mi bin save wanem we Lod i save mekem blong hem. Be i luk olsem se evri taem we mi traem blong givhan long hem blong hem i save kasem help we hem i nidim blong winim problem blong hem, bae i mas gat samting i rong oltaem. I luk olsem se hem i no wantem kasem help. Afta smol taem, mi luksave se mitufala i nogat sem tingting abaot ponografi. Yes, mitufala tugeta i memba blong Jos, be i luk olsem ol tijing blong gospel i no minim sem samting long mitufala.
Mi harem nogud bigwan. Mi bin lavem hem, mo mi biliv se wetem help, hem i save winim problem ia. Mi bin filim nogud tu from mi mas fesem sem problem we mi bin wokhad blong winim bifo. Mi bin disaed blong prea wan naet mo askem blong kasem waes tingting long Papa long Heven long olsem wanem blong go fored from mi nidim paoa blong kamaot long temtesen, mo mi wantem save tu olsem wanem blong sapotem man we mi bin mekem plan blong serem laef blong mi wetem hem.
Taem we mi kasem ansa, mi bin filim pis mo mi bin save se mi mas toktok long man ia we mi deit wetem, be wetem wan stamba tingting long maen. Mi wantem blong letem hem i save long wanem nao mi wantem aot long wan man we mi deitem, we hem i blong kasem mared long tempol mo gat ol pikinini. Mi nidim blong save sapos fiuja blong mitufala i semmak mo sapos hem i stap muv i go fored long Sevya. Mi nidim blong save sapos mitufala i mas gohed long rilesensip blong mitufala. Mi bin gat bigfala hop from hemia mo biliv se afta we bae mitufala i toktok, evri samting bae i kam oraet.
I bin wan Sandei aftenun we san i saen, taem we mi bin serem wetem hem ol drim mo gol blong mi abaot fiuja famli blong mi mo blong mekem ol pikinini i gro insaed long gospel. Mi sapraes wantaem, afta we hem i lisin long mi, hem i no glad long mi. Mi kam blong luksave se mitufala i gat ol tingting we oli defren tumas abaot fiuja laef. Mi bin harem nogud, be wetem sapraes, mi filim pis, mo mi bin save se ansa blong mi i blong stopem rilesensip Hem i no stap long wan ples we bae hem i wantem blong traem blong winim problem blong hem wetem ponografi o blong tanem i go long Sevya fom help, mo bae mi no save helpem hem sapos hem i no wantem help blong mi.
Blong smol taem, mi stap tingting se from wanem afta we mi mekem wan raet samting mo mekem evri samting blong save help, hat blong mi i gohed blong brokbrok i go long pisis. Be long en, wota blong ae blong mi i bin ron laswan from hem mo mi lukluk long pis we mi bin filim taem mi endem rilesensip ia. Mi bin save se ansa ia i bin kam long heven.
Rilesensip blong mi wetem man ia i bin en sam yia nomo i jes pas. Mo mi stap luk hem yet olsem wan gudfala man olsem we hem i bin stap. Be mi bin save se hem nao i nidim blong go long Sevya blong kasem help—mi no save fosem hem. Hem i gat fridom blong joes mo mi tu mi gat. Afta long eksperiens ia, mi bin traem blong folem voes blong Tabu Spirit mo nogat tu tingting from. Mi save se Papa long Heven i gat wan plan blong yumi evriwan mo yumi save trastem se taem yumi mekem ol desisen folem smol voes blong spirit, Hem bae i neva lego yumi go lus. Hem i oltaem rere long yumi from ol gudgudfala samting we i stap kam.