Ol Eksampol we I Leftemap Tingting
Givim seves long Lod long lanwis Spein
Man we i raet i stap long Yuta, YSA.
Traem blong pikjarem wan fren blong yu i givim wan bes buk we hem i bin ridim. Yu openem kova blong hem … mo yu faenemaot se yu no save ridim buk ia. !Hem i stap long wan defren lanwis! ?Wanem nao bae yu mekem?
Long ol eli yia blong Jos, Buk blong Momon oli printim long Inglis nomo. Presiden Brigham Yang i singaotem tu misinari blong go mo prijim gospel long Meksiko mo transletem Buk blong Momon i go long lanwis Spein. Be oli nidim moa help blong mekem. Oli no save nating se krosem solwota ia, God i rere long wan man we bae i givim long olgeta help ia we oli nidim.
Meliton Gonzalez Trejo i kam long wan famli we i rij long Spein. Hem i stadi had long skul mo i kam wan ofisa blong ami long Spein. Hem i gat intres oltaem long relijin, be hem i no faenem wan we i stret yet. Wan dei hem i harem wan nara ofisa i tokbaot wan grup blong ol pipol we oli singaotem olgeta “Ol Sent”. Olgeta i blong Jos Ia blong Jisas Kraes blong Ol Lata-dei Sent, mo wan profet blong God i lidim olgeta i go long Roki Maonten long Yunaeted Stet. Meliton i gat wan strong tingting blong mitim olgeta. Hem i joenem militeri trip i go long Filipin, wetem hop se bae rod ia bae i tekem hem i go long Yunaeted Stet afta. Be Meliton i bisi tumas long wok blong hem i mekem se filing ia blong visitim ol Sent i stat blong i nomo kam impoten long hem.
Afta Meliton i sik tumas. Hem i tingbaot from wanem hem i bin kam long Filipin mo i prea long God se wanem nao hem i mas mekem. Long naet ia, Meliton i gat wan spesel drim. Hem i save se hem i mas go long Roki Maonten.
Taem Meliton i kam oraet long sik blong hem, hem i gohed long rod blong hem i go long Yunaeted Stet. Hem i kasem Kalifonia long 4 Julae, 1874 mo i gohed kasem Sol Lek Siti.
Taem Meliton i kasem Sol Lek, hem i gat wan problem:hem i save rid Inglis be i neva toktok Inglis. !Hem i no save toktok wetem eniwan! Be hem i disaed se sapos hem i no save toktok long ol pipol, bae hem i mas faenem wan nara wei blong pulum intres blong olgeta. Meliton i putum ami yunifom blong hem blong Spein mo i wokbaot i go antap mo i kam daon long ol rod blong siti. !Olsem we hem i tingting, plante man i lukluk hem! Afta hem i luk wan memba blong Jos we nem blong hem i Brata Blanchard, wan yunivesiti profesa we i toktok lanwis Spein. Brata Blanchard i helpem Meliton blong stap long Sol Lek mo tijim hem gospel. Afta Meliton i kasem Baptaes.
Brata Blanchard i introdiusum Meliton long Presiden Brigham Yang. Meliton i talem long Presiden Brigham Yang se hem i wantem tumas bitim evri nara samting, blong transletem Buk blong Momon i go long lanwis Spein.
Presiden Yang i askem Meliton blong helpem ol misinari we oli stap go long Meksiko blong transletem ol pat blong Buk blong Momon i go long lanwis Spein. Meliton i spendem plante wik blong i transletem ol Inglis toktok i go long lanwis Spein. Evri naet hem i luklukbak long translesen blong hem wetem ol misinari. Oli toktok smol lanwis Spein be oli filim se impoten translesen ia i nidim wan stret man Spein we i toktok lanwis ia. Oli save se Meliton i wan ansa long ol prea blong olgeta. Long 1875 oli bin pablisim translesen ia. Oli singaotem Trozos Selectos del Libro de Mormon (Sam Pat we Oli Jusum long Buk blong Momon).
Ol misinari oli rere nao blong go long Meksiko. Oli karem 1,500 kopi blong ol skripja ia we oli transletem i go long bak blong wan hos mo statem rod blong olgeta. !Blong fastaem, ol man we oli toktok lanwis Spein i save ridim Buk blong Momon long lanwis blong olgeta! Nomata Meliton i stap taosen mael longwe long Spein, Papa long Heven i lidim hem i go stret long ples we hem i nid blong stap long hem. From fasin blong leftemap tingting mo fet blong Meliton, hem i helpem blong karem toktok blong God i go long plante man.