Ol Voes blong Ol Lata-dei Sent
Gaedem go kasem Monica
Rosana Soares
Yuta, YSA
Pikja i kam long Stan Fellows
Taem mi bin stap long São Paulo, Brasil, mi kam blong save wan spesel woman we nem blong hem i Graça. Hem i wan naes mo kaen woman mo wan fren blong evriwan.
Graça i bin visiting tijing kompanion blong mi. Hem i wan mama blong tri pikinini, i wok pat‑taem, mo i nogat wan trak o telefon, be ol samting ia i no stopem hem blong givim seves.
Long fored long haos blong mi, mi save luk wan singgel windo blong haos blong hem. Taem hem i fri, bae Graça i putum wan pis blong red kaliko long windo ia blong mekem saen se hem i rere blong go visit. Hem i neva faenem wan eskius blong no givim seves. Samtaem mi stap tingbaot saen blong Graça mo gudfala eksampol blong seves blong hem we i strong mo simpol.
Wan eksperiens i stap long maen blong mi. Mifala i bin rere mo prea bifo mitufala i go visitim wan long ol sista blong mifala. Taem mitufala i stap kam kolosap long haos blong hem, mitufala i luk save se mitufala i draev i go long haos blong wan defren sista. Oli bin asaenem mitufala blong go visitim sista ia, wan les-aktiv mama blong tu pikinini, be mifala i no bin plan blong visitim hem long dei ia. From we mitufala i stap finis, mitufala i noknok, be i nogat man i ansa.
Mitufala i disaed blong stap mo wet. Sista ia, Monica, i kam mo talem long mifala se hem i bisi. Mitufala i luksave se hem i taed mo kolosap bae i krae. Taem mitufala i talem se mitufala i stap blong help, hem i letem mitufala i go insaed. Bebi blong hem i stap krae, mekem se mitufala i talem se bae hem i lukaotem bebi mo bae mitufala save wet. Taem Monica i go antap wetem bebi, mitufala i wok, klinim sam rum mo foldem evri klos we mitufala i save luk.
Taem Monica i luk se haos blong hem i naes mo i klin, hem i stat blong krae, openem hat blong hem long mitufala, mo serem sam long ol jalenj we hem i stap fesem. Mitufala i promes blong helpem hem, mo mitufala i toktok long Presiden blong Rilif Sosaeti abaot ol jalenj blong hem. Long Sandei ia, Monica i kam long jos.
Monica i kambak aktiv, wan hapi sista, mo mitufala i gohed blong givhan long hem wetem lav mo kea. Hem i stil gat ol semmak jalenj, be hem i save winim olgeta wetem moa fet mo strong tingting from se hem i aktiv long Jos.
Mi glad tumas long eksampol blong Graça taem mitufala i bin wok tugeta. Mitufala i prea from help, mo God i lidim mitufala i go long Monica.