?Bae Mi Mas Gohed blong Ridim?
Las yia mi karem wan buk long laebri abaot wan gel we i statem wan blog long intanet. Mi ting se bae i wan intresting buk from gel ia i gat semmak yia olsem mi mo mama blong mi i gat wan blog tu olsem hem. So, mi ting se bae i wan buk we mi save faplae.
Mi bin ridim sam pej nomo blong buk ia taem gel i no ona long nem blong Lod. Mi no bin filim gud insaed long mi afta we mi ridim pat ia. Be mi gohed blong ridim wetem hop se bae i hapen wan taem nomo. Mi ridim sam moa pej mo hem i talem bakegen.
Mi go mo talem long mama blong mi wanem mi bin faenem. Mi no save sapos bae mi gohed blong ridim o no. Mama blong mi i talem se hem i joes blong mi. Be hem i agri se i no wan gudfala samting blong gohed blong ridim sapos gel ia i stap talem ol samting we yumi save se i rong. Mama blong mi i se i no gud speseli from se gel ia i no stap ona long nem blong Lod.
Mi ting se bae mi save lukluk moa, so mi tantanem pej blong buk ia. Mi faenemaot se blong no ona long nem blong Lod i mein samting we gel i stap tokbaot oltaem long buk ia. Mi disaed blong tekembak buk ia i go long laebri mo nomo ridim bakegen.
Mi bin filim nogud from man we i raetem buk ia i no ona long nem blong Lod. Be afta we mi karembak buk i go long laebri, mi filim glad se mi mekem wan raet joes. Mi save se mi stap folem “Gospel Standet blong Mi” long Fet long God blong mi buk ia i talem, “Bae mi ridim nomo ol samting we i stret long Papa long Heven.” Mi save se yumi mas yusum nomo nem blong Papa long Heven mo Jisas Kraes wetem revren mo respek.