Tabu Ples we Yu Jusum
Woman we i raet i stap long Franis.
Fren blong mi i stap hapi evritaem nomo. ?Wanem ia i mekem hem i tingting tumas?
Ol Pikja i oli kam long Reginald Swinney
Mi blong Franis, be mi mo sista blong mi i spendem wan yia long Is blong Yunaeted Stet olsem ol studen we oli kam long nara kantri. Long taem ia, mifala i mitim plante man, be wan we mi laekem tumas hem i wan gel we nem blong hem Destiny. Hem i kam wan long ol bes fren blong mi. Mitufala i mekem fulap kaen samting tugeta, long taem blong skul mo afta skul wetem sista blong mi. Destiny i hapi oltaem. Hemia wan samting we mi laekem tumas abaot hem.
Be afta wan dei mi luk se hem i no glad mo mi neva luk hem olsem bifo. Mi askem hem wanem i rong. Hem i talem se hem i no wantem tokbaot. Afta mi luksave wan pepa long han blong hem. Mi karem mo ridim.
Wan man i raetem ol nogud samting long hem. Not ia we oli no save hu i raetem i talem se hem i no naes, se i nogat man i laekem hem, se hem i no gat risen blong stap laef, mo blong hem i go kilim ded hemwan. Mi no bin bilivim nomo se wan man i save mekem nogud long hem olsem ia. I mekem mi mi harem nogud bigwan blong save harem nogud ia we hem i stap go tru long hem.
Stat long taem ia i go, mi traehad bigwan blong stap wan fren blong Destiny—i no blong spendem taem wetem hem nomo, be blong oltaem stap wetem hem, speseli blong stap wetem tru hat. Mi eksplenem long hem se hem i wan pikinini gel blong God, we oli blesem hem long wan tabu wei, hem i gud inaf blong oli laekem hem mo blong hem i save mekem ol bigfala samting.
I had blong traem blong lavem yuwan taem ol narawan i tritim nogud yu o talem nogud yu. Taem mi stap traem blong kam fren blong Destiny, Mi lanem se samtaem bes wei blong helpem ol narawan i blong lavem hem mo blong helpem hem i save huia hem.
Long en blong yia, taem mi gobak long Franis, Destiny i talem wan samting long mi we bae mi holem taet oltaem. “Emma,” hem i talem, “yu bin sevem mi. Bifo yu kam, mi bin wantem blong kilim miwan. Be afta yu mo sista blong yu i helpem mi bigwan, jes blong kea long mi. Tedei mi lavem miwan, mo mi lavem yu.”
I gat fulap pikinini long skul we oli stap fesem ol fasin blong stap jik , oli tritim nogud long olgeta o oli stap olgetawan. Faenem wan wei blong givhan long olgeta. Toktok long olgeta, tingbaot olgeta, stap kaen long olgeta. Hemia i wanem Sevya bae i mekem, mo samtaem wan simpol halo o smael i save jenisim evri samting.