Ol Eksampol blong Fet
Wilson Di Paula
San Jose, Uruguay
Wan aksiden long moto i mekem Wilson i paralaes. Wan yia i pas waef blong hem i ded. Olsem wan wido wetem tufala gel blong hem, Wilson i no bin save wanem blong mekem. Hem i no save sapos i gat wan stamba tingting long laef. Wilson i bin save mekem hat blong hem i kam strong. Be, hem i stat blong lukaotem trutok
Cody Bell, fotografa
Afta long moto aksiden mo waef blong mi i ded, mi stap wetem tufala gel blong mi blong lukaotem tufala. Mi no bin save hao bae mi lukaotem tufala gel blong mi long wan wiljea. Aksiden ia i bin jenisim laef blong mi fulwan.
Mi bin gat fulap kwestin. ?From wanem ol rabis samting i hapen? Mi stap traem blong mekem ol raet samting, mo waef blong mi i ded mo mi stap long wan wiljea, afta ol dokta oli mas operetem hed blong gel blong mi blong karemaot kansa. Mi stat blong tingting se i nogat wan stamba tingting long laef.
Mi kam blong luksave se mi nidim blong faenem trutok. Mi bin lukluk raon long ol defren jos mo faenem Jos Ia blong Jisas Kraes blong Ol Lata-dei Sent. Mi filim se hemia i tru.
Mi lanem se i gat laef afta long wol ia, mo taem yumi ded, hem i posibol blong yumi stap wetem olgeta we yumi lavem. Hemia i karem glad i kam long mi from ol 10 naes yia we mi bin gat wetem waef blong mi.
Blong faenem gospel ia i jenisim laef blong mi long evri wei. Mi stat blong gat pis long maen blong mi mo tingting blong mi. Hapines i kam insaed long famli blong mi taem mifala i go long Jos evri Sandei Hom blong mifala i kam strong moa. Mifala i bin baptaes mo sil blong taem we i no save finis long tempol long Ajentina.
Naoia mi stap muv i go fored long Jos. Mi wok olsem wan Kaonsela long Bisoprik, mo mi traem blong lan long ol eksperiens blong mi , from ol tes blong laef. Hemia i givim paoa long mi. Taem mi stap sidaon long wiljea i bitim 20 yia nao, mi lanem se hapines i kam insaed long hat. Wan i lan moa evri dei. From hemia mi talem tangkyu tumas.
Naoia mi save se i gat wan plan blong stap long wol ia. Yumi stap ia olsem pat blong plan ia we i no save finis blong Papa long Heven. Yumi gat wan Sevya we i bin winim ded mo Hem i laef bakegen long ded. Blong save hemia i givim mi paoa. Naoia, mi stap traehad blong gohed blong muv i go fored. Mi gat wan plan mo mi save se taem mi stap traem blong laef long wan laef we i klin inaf, mi save gat wan famli we i no save finis.
I no mata long ol jalenj we Wilson mo gel blong hem Sofia i fesem, gospel ia i karem pis, hapines, mo paoa long olgeta. Sofia i stap wetem papa blong hem afta long operesen blong hem. Wilson i faenem glad taem hem i stap givim seves insaed long Jos.
Blong kuk taem hem i stap muv raon long kijin wetem wiljea blong hem i wan skil we hem i bin divelopem stat long taem ia we aksiden ia i mekem hem i paralaes.
Wilson i faenem hop mo paoa long Sevya taem hem i stap stadi ol skripja.
Ol misinari oli joenem famli blong Di Paula blong kakae dina. Lav blong Wilson long gospel i wan paoa long famli blong hem mo long Jos.
Afta long rabis aksiden ia mo ded blong waef blong hem, Wilson i kwestinim stamba tingting blong laef ia. Hemia i faenem stamba tingting ia taem hem i faenem Gospel blong Jisas Kraes.
Wilson mo Sofia i faenem hop long gospel ia. Blong spendem kolosap 20 yia long wan wiljea i no bin stopem Wilson blong givim seves long ol wei we i gat mining.
Smael blong Wilson i prufum se laef blong hem long saed blong spirit i fulap long laef blong hem. “Hapines i kam insaed long hat,” Wilson i talem. ”Wan i lan moa evri dei.”
Taem oli stap kakae tugeta, Di Paula famli i serem moa bitim kakae wetem ol misinari, oli serem lav mo tangkyu blong olgeta from gospel ia.