Mateuteu ki he Moʻuí
ʻE Taʻeoli Nai ʻa e Fineʻofá?
Naʻá ku fuʻu manavasiʻi ke kau fakataha mo e Fineʻofá, ka koeʻuhi ko e founga ne nau talitali lelei ai aú, naʻá ku ako ke manako ai.
ʻI hoku taʻu 18, naʻá ku fiefia ʻaupito ai. Ko hai ha taʻu hongofulu tupu te ne taʻe saiʻia ai? ʻIo, naʻá ku kei ʻi he akoʻanga māʻolungá, kei mata fuofua pē, mo kei ʻi ai pē ha fanga kiʻi ngāue ke fai ʻi homau fale fakafāmilí ʻi Kalefōnia, USA, ka naʻá ku fuʻu lahi. Naʻá ku kamata ʻi ha tuʻunga foʻou ʻo e moʻuí, pea naʻá ku fiefia ai. Ko e meʻa ne ʻikai te u fuʻu fiefia aí ko e fakakaukau atu ki he feohi mo e “kau fafine toulekeleka” ʻi he Fineʻofá. Ne nau maʻu ha fānau mo e ngaahi ngāue maʻuʻanga moʻui mo e ʻū kulo kuki pea ngalingali ne nau saiʻia he tui silipa fale ʻo taʻo paí. Naʻe ʻi ai ʻeku ngāue fakaako ke fai mei ʻapi mo e ngaahi feʻauhi kakau mo e valivali ngeʻesi nima lanu pulū peá u saiʻia ke fakaʻehiʻehi mei hono fakamaʻa hoku lokí ki he lōloa taha te u lavá. ʻE founga fēfē haʻaku fetaulaki lelei mo ha taha ʻi aí? Naʻe pau pē ke u faingataʻaʻia, tuenoa mo taʻeoliʻia. Pea naʻá ku ʻalu leva.
ʻUluakí, naʻe ʻikai ke taʻeoli ʻa e Fineʻofá. Naʻe lahi e fofonga malimalí mo e kakatá. Ne nau vahevahe ha ngaahi fakamatala mālie mo ongo moʻoni, ka naʻe ʻikai ke nau ilifia ke kata foki. Ko hono uá, naʻe ʻikai ke nau kehe meiate au. ʻIo, naʻa nau taʻu lahi ange ʻiate au, ka ne nau fakakata holo mo e niʻihi kehé ʻi he founga tatau pē ne fai ʻe hoku ngaahi kaungāmeʻá mo aú. Ne tuʻo lahi hono fai ʻe ha taha e fehuʻi tatau naʻá ku fifili ki aí. Pea ʻi he taimi ne nau fakahā mai ai ʻa e fakataha fakatupulaki ki he uike ko iá, naʻá ku ʻohovale. Ne nau ako ki hono maluʻi kitá! Naʻá ku fie fai ia!
Naʻá ku fuʻu manavasiʻi ʻi he taimi ne kole mai ai ʻe Sisitā Lāseni, ko e Palesiteni ʻo e Fineʻofá, ke u tuʻu ʻo fakafeʻiloaki ange aú, ka naʻe ʻikai faingataʻa ia. Naʻe malimali fiefia mai e tokotaha kotoa pē kiate au. Naʻe fakaʻilonga fiefia mai ʻa Sisitā ʻEtuate, ko ʻeku faiako semineli he taʻu hono ua ʻo ʻeku ʻi he akoʻanga māʻolungá, pea naʻe pehē mai ʻe Sisitā Lisiate, ʻa ia naʻá ne manatuʻi au mei he Palaimelí, ʻa e ʻikai ke ne tui kuó u “fuʻu lahí.” Pea naʻa nau fakafeohi mai kiate au ʻo hangē kuó u ʻosi “fuʻu lahí.” Ne u ongoʻi ʻo hangē ha kiʻi tamasiʻi ʻoku vaʻinga hangē ha taha lahí, ka ki ha tokolahi ʻo e kakai fefine he ʻaho ko iá, ko ha fefine foʻou au.
Talu mei ai, mo ʻeku manako ʻi he Fineʻofá, ʻo tatau ai pē pe ko e hā e uooti ʻoku ou ʻi aí. ʻI heʻeku hū atu pē ki ha loki Fineʻofa, ʻe lava ke u ongoʻi ia: ʻa e haʻi fakaetokouá mo e ongoʻi ʻokú ke kaú. ʻOku ou manako hono fai hoku lelei tahá ke hiki hake hoku ngaahi tokoua ʻi he Fineʻofá mo e ako e meʻa kotoa pē te u lavá meiate kinautolú.
Pea ko hono ikuʻangá, ʻoku lelei ʻeku taʻo paí.