Tāpuekina ʻi Hono Fakahaaʻi ʻEku Tuí
Kristin McElderry, Massachusetts, USA
Tā fakatātaaʻi ʻe Eva Vazquez
Naʻe papitaiso au ʻi hoku taʻu 19. Naʻe ʻikai tali ʻe ha tokolahi ʻo hoku fāmilí mo e ngaahi kaungāmeʻá ʻeku fili ke kau ki he Siasí, ka naʻe ʻikai taʻofi ai au. Hili ha uike ʻe ua, naʻe kamata hoku taʻu hono ua ʻi he ʻunivēsití. ʻI heʻeku foki ki ʻapiakó, naʻe kamata ke u tailiili koeʻuhí ko ʻeku tui foʻoú.
Naʻe kamata ke u hohaʻa naʻa ʻikai ke u maʻu ʻa e loto-toʻa ke taukaveʻi ʻeku tui fakalotú. Naʻá ku ongoʻi tuenoa. Naʻe teʻeki keu fetaulaki mo ha mēmipa ʻo e Siasí ʻi he ʻunivēsiti, pea naʻe ʻikai ke u ʻilo ha hala ki ha falelotu, pe naʻe ʻi ai nai ha uooti pe kolo ʻe ofi ange. Naʻá ku lotu ki he Tamai Hēvaní ke u maʻu ha loto-toʻa. Naʻá ku lotu ke u maʻu ʻa e loto falala ke taukaveʻi ʻeku tui foʻoú.
Hili ha ngaahi ʻaho siʻi, naʻá ku tokoniʻi ha niʻihi ne nau hiki ange. Naʻá ku fetaulaki ai mo ha talavou ko Polaieni pea naʻe fakaʻau ʻo ma hoko ko ha ongo kaungāmeʻa. Ne ma lue atu he loto ʻapi akó ʻi ha ʻaho ʻe taha ʻo ne ʻeke mai pe ko e hā ʻeku ngaahi palani ki he Sāpaté. Naʻá ku talaange te u ʻalu ki he lotú.
Naʻá ne ʻeke mai, “ʻOi, ko e Siasi hā ʻokú ke ʻalu ki aí?”
Neongo ʻeku ongoʻi tailiilí, naʻá ku tuʻu hangatonu hake peá u pehē ange, “ʻOku ou kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.”
Naʻá ku fiefia ʻiate au pē! Naʻá ku tailiili foki pe ko e hā ha tali ʻa Polaieni. ʻI he taimi pē ko iá, naʻá ku vakai atu ki he ongo faifekaú. Kimuʻa pea tali mai ʻa Polaiení, naʻá ku talaange te u toe foki mai pē. Naʻá ku lele ki he ongo faifekaú. Naʻá na fiefia heʻemau fetaulakí mo ʻomi e ngaahi fakaikiiki kotoa pē naʻá ku fie maʻu ke u ʻalu ai ki he lotú ʻi he ʻaho hono hokó.
Naʻá ku foki kia Polaieni mo fakamatala ange e meʻa naʻe toki hokó. Naʻá ku vahevahe foki ha meʻa siʻi fekauʻaki mo e Siasí, pea hoko atu ʻe ma lué kuo ʻikai toe ʻi ai ha ma fuʻu faikehekehe, tukukehe ʻeku maʻu he taimi ko iá ha ivi makehe. Naʻá ku ongoʻi foki e māfana mo e melino ko e Laumālié pē ʻokú ne lava ʻo foakí. Ne u tokanga ki heʻeku tuenoá mo e ʻikai ke u ʻilo e feituʻu ke u ʻalu ʻo lotu ki aí. Ka ʻoku ou tui ko e aʻu ange ʻa e ongo faifekaú ʻi he feituʻu tatau ʻi he taimi ko iá, ko ha founga ia naʻe tāpuekina ai au ʻe he Tamai Hēvaní ʻi hono fakahaaʻi ʻeku tuí.
Kuo ʻosi ʻeni ha taʻu ʻe 10 tupu, pea talu mei he ʻaho ko iá, kuo teʻeki ke u toe ilifia ke pehē, “Ko ha mēmipa au ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní!”