Ngaahi ʻAta ʻo e Tuí
Delva Netane
Kalefōnia, USA
ʻOku fiefia ʻa Televā mo Kēkome Netane ʻi he taimi ʻokú na feohi ai mo ʻena fānaú, Teisa (toʻomataʻu) mo MeLa (toʻohema). Talu mei ai kuo tāpuekina e fāmili Netané ʻaki ha tānaki atu ha toe fānau ʻe toko ua.
Neongo naʻe faingataʻa e feitama hono ua ʻa Televaá, ʻoku fakamālō ʻa Televā mo Kēkome koeʻuhí ko e ngaahi tapuaki kuó na maʻú. ʻOku pehē ʻe Televā, “‘Kuo ʻomi ʻe he aʻusia ko ʻení homau fāmilí ke ofi ange ki he niʻihi kehé pea ofi ange ki he ʻEikí.”
ʻOku pehē ʻe Kēkome ʻi heʻene manatu ki heʻene feitama faingataʻá, “Naʻá ku ʻi ha taimi faingataʻa lahi moʻoni. Ka naʻá ma piki maʻu mo hoku uaifí ki heʻema fakamoʻoni ki he ongoongoleleí. Naʻá ma piki maʻu ki he ʻamanaki leleí mo felotoi kapau ʻoku ʻi ai ha faingamālie te ma lava ʻo foaki ki homa ʻofefiné, te ma fai homa lelei tahá.”
ʻOku pehē ʻe Kēkome, “Ko ha tāpuaki ia ke mau vaʻinga mo MeLa he ʻaho kotoa pē mo mamata ki heʻene malimalí.” “Ko ha fakamoʻoni maʻu pē ia kiate kimautolu ʻoku pule ʻa e ʻOtuá pea ʻe lava ke maʻu e tali ki heʻetau ngaahi lotú ʻi ha ngaahi founga ʻoku ʻikai lava ke tau makupusi.”
ʻI hono fā mahina ʻi heʻene feitama hono uá, naʻe fakahā ange kia Televā ʻoku maʻu ʻe heʻene pēpeé ha mahaki ʻoku hāhāmolofia ʻoku ui ko e trisomy 13. Naʻe siʻi ha faingamālie ʻe moʻui ai ʻa e kiʻi pēpeé, pea koeʻuhi ko e malava ke ʻi ha tuʻunga fakatuʻutāmaki e moʻui ʻa Televaá, naʻe toutou faleʻi ʻe he kau toketaá ke ne fakatooki e pēpeé. ʻI heʻene fehangahangai mo ha ola naʻe taʻe paú, naʻe fili ʻa Televā ke ne falala ki he Tamai Hēvaní ʻo tatau ai pē pe ko e hā e meʻa ʻe hokó.
Tokotaha faitaá, Christina Smith
Naʻe talamai he ʻikai moʻui ʻeku pēpeé ʻo lahi hake ʻi ha houa ʻe taha ʻo kapau ʻe moʻui. Pea kapau te ne moʻui, naʻe fakahā mai te ne moʻui faingataʻaʻia. Naʻe faleʻi mālohi au ʻe heʻeku toketaá ke fakatooki e pēpeé. Naʻá ku ʻalu ki ha toketā ʻe taha pea naʻe fakahā mai e meʻa tatau: fakatooki e pēpeé.
Naʻá ku ʻalu leva ki ha toketā ʻa ia ko ha kaungāmeʻa pea ko ha mēmipa ia ʻo e Siasí. Naʻá ku fakaʻamu ke ueʻi ia ʻe he Laumālié ke ne ʻomi ha fakamatala fakafaitoʻo ʻoku kehé. Naʻá ne sio ki he ngaahi ola ʻo e siví mo e ngaahi hulu fakaʻata ʻo e pēpeé ʻo ne ʻomi e hohaʻa tatau pē mo e kau toketā kehé. Ka naʻá ne talamai te ne ʻaukai mo lotu ki hoku fāmilí pea mo fakaʻamu ki he lelei tahá.
Naʻá ku sio ki ha kau toketā mo e kau mataotao kehekehe lolotonga ʻeku feitamá. Naʻa nau fokotuʻu mai he taimi kotoa pē ke fakatooki e pēpeé telia naʻa hoko ha fakatuʻutāmaki ki heʻeku moʻuí. Ka naʻe ʻikai ke u fakakaukau ke fai ia.
Naʻá ku loto fiemālie mo hoku husepēnití ke ma tali pē pe ko e hā pē meʻa ʻe hoko maí. Ka mālōlō homa ʻofefiné, te ma ʻiloʻi ko ha laumālie pelepelengesi ia. Kapau te ne moʻui pea hoko mo e faingataʻá, naʻá ma maʻu e tui ʻe lava ke ma tokangaʻi ia.
Naʻe kei fuʻu faingataʻa pē. Ne u feinga ke tukulotoʻi ʻeku ngaahi ongó koeʻuhi ne ʻi ai haʻaku tama fefine ʻoku taʻu ua pea naʻe ʻikai te u loto ke sio ki heʻeku mamahi lahí. Naʻe ʻikai ke u ʻiloʻi e meʻa ke faí, pe ko e meʻa ke fakakaukauʻí, pe ko e feituʻu ke u kumi tokoni ki aí. Naʻe poupou mai hoku husepānití, ngaahi kaungāmeʻá, mo e fāmilí, ka naʻá ku ongoʻi ne ʻikai mahino kakato kiate kinautolu e meʻa ne u fekuki mo iá. Ko e toko taha pē ʻa ia ʻe lava ke mahino moʻoní ko e ʻEikí. Naʻá ku lotu maʻu pē ki ha fakafiemālie mo ha fakahinohino.
Ne faifai pea u feʻiloaki mo ʻemau pīsopé ʻou fakamatalaʻi e meʻa ʻoku hokó. Naʻá ne fakaafeʻi ʻa e uōtí ke nau ʻaukai maʻa homau fāmilí. Ko ha liliuʻanga ʻeni kiate au. Ne u kamata ke ongoʻi e tataki e maama fakalangí ʻi he fili kotoa pē naʻá ku faí.
ʻI hoku māhina valu mo e kongá, naʻá ku ʻalu ʻo hulu fakaʻata 4D.
Naʻe totonu ke fāʻeleʻi ʻema pēpeé ʻi ha ngaahi uike siʻi, pea naʻá ku ʻiloʻi mahalo ko e ngataʻangá ia. Naʻá ku fie maʻu foki mo ha hiki tatau ʻo e tā e mafu hoku ʻofefiné ke faʻo ʻi loto ʻi ha kiʻi tamapua molū ke ʻi ai ha meʻa ke manatuʻi ʻaki ia.
ʻI he ngaahi hulu kimuʻá, naʻe ʻikai lava ke sio e kau toketaá ki ha fōtunga. Koeʻuhi ko e meʻá ni, naʻa nau pehē ko e nima ʻo ʻema tama fefiné ko ha tunga pē pea ʻe mele ʻa hono fofongá. ʻOku toe fakaikiiki ange ʻa e ngaahi ʻata mei ha hulu 4D, ko ia ai ʻi he taimi naʻe kamata ai ʻe he tokotaha ngāué ʻa e hulú, naʻá ku sio ki he nima haohaoa hoku ʻofefiné ʻoku taʻataʻalo mai ʻi he ʻatá. Naʻá ku sio foki ki ha ongo mata haohaoa mo ha fofonga haohaoa. Naʻe lōmekina au ʻe ha ongo he ʻikai te ne mate.
ʻI he taimi naʻe fāʻeleʻi ai ʻema taʻahine ko MeLá, naʻe tuʻu tatali e kau mataotaó ka naʻe ʻikai fie maʻu kinautolu. Naʻe ʻikai ke maʻu ‘e MeLa e trisomy 13. Ne ʻikai lava ke fakamatalaʻi ‘e he kau toketaá mo e kau mataotaó hono ʻuhingá, ka naʻá ku ʻilo mo hoku husepānití ko ha mana ia.
Hili hono fāʻeleʻi ʻo MeLá, naʻe fokotuʻu mai ʻe he kau toketaá ke fai ha ngaahi sivi ke fakapapauʻi pe ʻoku ʻi ai ha faʻahinga meʻa ʻoku kehe. Naʻe fakahā mai ʻe he ngaahi ola ʻo e siví naʻá ne maʻu ha faʻunga ʻoku hāhāmolofia. Ne hohaʻa e mataotao ki he faʻunga ʻo hono sinó naʻa kui, tuli, pea ʻikai lava ke lue mo talanoa ʻa MeLa. ʻI he ʻaho ní, neongo ʻoku kiʻi lōloa ange ʻene fakalakalaká, ʻoku malava ʻa MeLa ke mamata, fanongo mo fakaʻaongaʻi ha meʻangāue ke tokoni kiate ia ʻi he lué. ʻOkú ne lava foki ʻo kiʻi lea. Ko ha kiʻi taʻahine fiefia ʻaupito!
ʻOku mau fakamālō lahi ʻi he ngaahi tāpuaki kuo mau maʻú ʻo fakafou ʻi he foungá ni. ʻOku mau ʻilo ko e Tamai Hēvaní ʻa e Tupuʻanga taupotu tahá mo e Tokotaha Fai Tuʻutuʻuni taupotu taha ʻo e moʻuí. ʻOku mau monūʻia pē ke kau atu ki ha konga ʻo ia. ʻI he ʻaho kotoa pē ʻokú ma vakai atu kia MeLa pea ʻiloʻi ko ha mana ia. ʻOku ʻomi ʻema fānaú ha fiefia ki heʻema moʻuí mo fakamanatu mai ʻa e ngaahi meʻa lahi ke fakahoungaʻí.