Mateuteu ki he Moʻuí
Ko Hoku ʻUluaki ʻAho ʻi he Kōlomu ʻo e Kaumātuʻá
ʻOku nofo e tokotaha naʻá ne fai e talanoá ʻi Kalefōnia, USA.
Naʻá ku kei siʻi, pea hoko ko ha kaumātuʻa foʻou. Ko e hā haʻaku meʻa ke tokoni ki he kōlomu ʻo e kaumātuʻá? Ta naʻe lahi ʻaupito!
Naʻe ʻikai ke u manavasiʻi ke kau ki he kōlomu ʻo e kaumātuʻá koeʻuhi naʻá ku ongoʻi ne u ʻosi ʻiloʻi e meʻa ke u ʻamanaki ki aí. Ne u maheni foki mo e taha kotoa ʻi he kōlomu ʻo e kaumātuʻa ʻo hoku uōtí. Ko e ngaahi tamai kinautolu ʻo hoku ngaahi kaungāmeʻá pea ko e kau tangata ne u ʻosi fakaʻapaʻapaʻi ko ha kau faifakahinohino. Naʻá ku ʻiloʻi ne nau fiefia ke tokoni mai ke mahino ha ngaahi meʻa, pea ko ia naʻe ʻikai fakatupu tailiili ke u kau mo kinautolu ʻi he kōlomu ʻo e kaumātuʻá.
Ko e meʻa naʻe kiʻi fakatupu tailiilí ko e tokoni ki he ngaahi lēsoní. ʻI he kamataʻangá naʻe faingataʻa ke u fakakaukau ʻe lava ke u tokoni ki ha kakai tangata naʻa nau taukei ange ʻi he moʻuí ni mo poto ange ʻiate au.
Naʻe Kehe, Kae Tatau
ʻOku matuʻaki kehe ʻaupito ʻa e kōlomu ʻo e kaumātuʻá mei he kōlomu ʻo e taulaʻeikí. Fakafokifā pē kuó te ʻi he kakai lalahí, kae ʻikai mo ha kau talavou ʻi hoto toʻú. ʻI heʻeku kamakamata ʻalu ki aí, naʻe ʻikai ke u lea ki ha meʻa. Naʻá ku hohaʻa ki heʻeku fuʻu kei siʻí pea ʻikai ha ʻilo feʻunga ke fai ha tokoni.
Ka ko e lahi ange ʻeku ʻalú, ko e lahi ange ia ʻeku fiemālié, pea lahi ange ʻeku ʻiloʻi ʻe tatau ai pē pe ʻokú te taʻu fiha, ʻoku ʻi ai pē e meʻa ke tokoni ai e taha kotoa. ʻOku kehekehe pē ʻa e aʻusia ʻa e taha kotoa pē ʻi he ongoongoleleí pea ʻoku tuʻunga kehekehe e mahino ʻa e taha kotoa pē ki he ngaahi tefitoʻi moʻoni kehekehé.
Naʻá ku Maʻu ha Meʻa ke Vahevahe
ʻI he taimi ʻe taha ne mau talanoa ai ki he Fakalelei ʻa e Fakamoʻuí, peá u hiki hake hoku nimá. Naʻá ku fakamatala koeʻuhi ko ʻEne Fakaleleí, ʻoku ʻikai ngata pē ʻi hono fakatauʻatāinaʻi kitautolu ʻe Sīsū Kalaisí ka ʻokú Ne lava foki ʻo tokoniʻi kitautolu ke tau ofi ange kiate Ia pea mo e ʻOtuá. Ne u talanoa ki hoku vā mo e Tamai Hēvaní mo Sīsū Kalaisí mo e founga kuo fakamālohia ai ia ʻe he tupulaki ʻeku mahino ki he Fakaleleí. Hili e kalasí, naʻe haʻu ha tangata kiate au ʻo fakamālō mai ʻi heʻeku ngaahi fakamatalá. Naʻá ne talamai ne teʻeki ai ke ne fakakaukau ki ha ngaahi meʻa ʻi he founga naʻá ku fakamatala ai ki aí peá ne houngaʻia moʻoni heʻeku fakakaukaú.
ʻOku Lelei ʻAupito e Faiako Fakaʻapí!
ʻOku ʻikai te ke ako pē mei he faiakó ʻi he kōlomu ʻo e kaumātuʻá; ka ʻokú ke ako foki mei he Laumālié mo e tokotaha kotoa pē ʻi he kōlomú. ʻOku tokoni kotoa pē e ngaahi fakakaukaú ke te toe maʻu ha ʻilo lahi ange ki he ngaahi meʻa ʻoku akoʻi ʻaki kitá. Pea ʻoku tokoni ia ke te hoko ai ko ha tamaioʻeiki lelei ange ʻa e ʻEikí. Hangē ko ʻení, talu ʻeku hoko ko ha kaumātuʻa, kuó u kamata ke u saiʻia lahi ʻi he faiako fakaʻapí! ʻOku ou tui ʻoku ou kiʻi fakamātoatoʻi ia koeʻuhí he ʻoku ou ʻiloʻi ʻi he taimi te u hoko ai ko ha faifekau ʻi ha kiʻi māhina siʻi mei hení, te u ʻaʻahi ki he kakaí mo vahevahe e ngaahi pōpoaki ʻo e ongoongoleleí mo kinautolu ʻo hangē pē ko e meʻa ʻoku ou fai ʻi he faiako fakaʻapí. Kuó u kamata teuteu ki heʻema ngaahi ʻaʻahí, kae ʻikai ke u tangutu pē ʻo tuku ki hoku hoá ke ne fai kotoa e akonakí. ʻOku ou fakapapauʻi ʻoku ou lea hake. ʻOku ou ʻilo ko e teuteu lelei ia ki heʻeku ngāue fakafaifekaú, ka kuó ne ngaohi foki ʻa e faiako fakaʻapí ke toe mahuʻingamālie ange kiate au. ʻOku ou maʻu he taimí ni ha loto houngaʻia lahi ange ki he kakai ʻi hoku uōtí mo e kakai ʻoku ou faiako fakaʻapi ki aí.
Kapau ʻOku Ou Lava ʻO Fai Ia, Te Ke Lava Mo Koe
ʻOku ʻikai fie maʻu ke ke ilifia he kōlomu ʻo e kaumātuʻá, ka te ke lava ʻo hanganaki moʻoni atu ke fanongo ki ha ʻilo lahi ange fekauʻaki mo e ngaahi tefito ʻokú ke ako ki aí. ʻE lava ke ke ʻamanaki atu ke hoko ko ha faiako, taki, mo e tamaioʻeiki lelei ange ʻa e ʻEikí. Pea ʻoku tō atu ia!