Digital Only

Ngaahi Founga ʻe 3 ke Hoko ai ko ha Tamai ki ha Taha

Fai ʻe Sarah C. Keenan

Ngaahi Makasini ʻa e Siasí

Ko e hā te ke lava ʻo fai ke hoko ai ko ha tamai kiate kinautolu ʻi ho uōtí mo e koló?

father and sons

ʻE ʻi ai ha kau tangata ʻe niʻihi te nau maʻu ʻa e faingamālie ke hoko ko ha tamai, kae ʻikai malava ʻe ha niʻihi kehe ʻo aʻusia e tuʻunga fakaetamaí kae ʻoua ke hili ʻa e Toetuʻú. Ko e hā pē ho tūkungá, ko e ngaahi founga ʻeni ʻe tolu te ke lava ai ʻo hoko ko ha tamai mo ha ivi tākiekina ki he niʻihi kehé:

1. Fakahoko Totonu ho Uiuiʻí

   ʻOku tatau ai pē pe ko ha mēmipa koe ʻo e kau pīsopelīkí pe ko ha faiako nesilī, ʻoku foaki atu ʻi ho uiuiʻí ha ngaahi faingamālie lahi ke ke ala atu ʻaki ʻa e faivelenga mo e loto vēkeveke ki he niʻihi kehé ʻa ia ʻoku nau fie maʻu e fakahinohinó mo e ʻofá. ʻE lava ʻe ha ʻetivaisa ki he kōlomu ʻo e kau tīkoní ʻo fakalotolahiʻi ʻa e kau talavou ʻoku nau fefaʻuhi mo e ngaahi palopalema fakalaumālié pe fakatuʻasinó. ʻE lava ke fakatupulaki ʻe ha faiako fakaʻapi e moʻui ʻa e fāmili ʻokú ne ʻaʻahi ki aí. ʻI hoʻo fakahoko totonu ho uiuiʻí, te ke maʻu ha ngaahi faingamālie lahi ange ke ʻiloʻi kakato e mālohi ʻo e lakanga fakataulaʻeiki ʻa e ʻOtuá mo faitāpuekina e moʻui ʻa kinautolu ʻoku mou feohí (vakai, T&F 84:32–33).

2. Alanima Atu

   ʻAi ke ke maheni mo e ngaahi talēniti mo e ngaahi meʻa ʻoku mahuʻingaʻia ai ʻa e toʻu tupu ʻokú ke feohi mo iá. Fai ha ngaahi ʻī-meili mo ha faitohi ki he kau faifekaú. Langa hake ha ngaahi vā fetuʻutaki mo ho ngaahi tokouá,ʻilamutú, fakafotú, niʻihi ʻokú ke tokoua pe tuongaʻane ʻakí, mo e kau mēmipa kehe ʻo e fāmilí. Mahalo ʻe ʻikai ai ha faingamālie vavé ni mai ke ke hoko ai ko ha tamai, ka ʻi hoʻo langa hake e ngaahi vā fetuʻutakí mo tokanga makehe kiate kinautolu ʻoku faingataʻaʻiá, ʻe lava ai ke ke ʻi ha tuʻunga ke tokoni ki he ngaahi fili mahuʻinga ʻa ha taha kei talavou.

3. Fakahaaʻi e ʻOfa Taʻemālualoí

   ʻOku ʻi ai ha niʻihi ʻo e kau talavou mo e finemui ʻokú ke feohi mo iá ʻoku ʻi ai ʻenau ngaahi palopalema fakaeʻulungaanga pe tōʻonga moʻui ʻoku kovi ʻa ia ʻe lava ke fakatupu loto mamahi. Te tau ala fakahehema he taimi ʻe niʻihi ke fakatonutonu pe fokotuʻu ha ngaahi fakangatangata maʻá e toʻu tupu pe fānau ko iá. Neongo ʻe fie maʻu ke fai ʻeni ʻi ha ngaahi tūkunga ʻe niʻihi, ‘e ngalingali ʻoku ʻikai ko e founga lelei taha ia ke fakatonutonu ai kinautolú, tautautefito kapau ʻoku ʻikai ko haʻo fānau. Feinga ke muimui he sīpinga ʻa ʻetau Tamai Hēvaní, ʻa ia ʻoku “fonu ʻi he manavaʻofa, mo e angalelei, ʻoku … kātaki fuoloa, pea mohu ʻaloʻofa mo e moʻoni” (Saame 86:15).

Ko e Hā Te u Lava ʻo Faí?

Tatau ai pē pe ko e hā ho tuʻunga ʻi he moʻuí, te ke lava ʻo hoko ko ha tākiekina ki he leleí maʻá e toʻu tupu ʻokú ke feohi mo iá. Fakakaukau ki ha taha te ke lava ʻo tokoniʻi. Faʻu ha fakamanatu ki he meʻa te ke fai ke faitāpuekina ai ʻa kinautolu ʻoku faingataʻaʻiá.

ʻIlo Lahi Ange

Ki ha ngaahi fakakaukau lahi ange ki he ʻuhinga ke hoko ko ha tamaí, lau ʻa e fakamatala ʻi he Liahoná “Ko e Ivi Tākiekina ʻa ha Tamai Angatonu.”

‘Oku ʻomi ‘e he LDS.org ha fakamatala ki he founga ʻo hono langa hake ʻo e ngaahi vā fetuʻutaki ʻo e fefalalaʻakí mo fokotuʻu maʻu ʻa e toʻu tupu ʻi hoʻo moʻuí ki he ongoongoleleí.