Fakaulo Hoʻo Māmá
Fakahaaʻi ʻa ʻEne ʻOfá
Mālō e lelei! Ko hoku hingoá ko ʻOfa. ʻOku ou fakaulo ʻeku māmá ʻaki hono fakahaaʻi e ʻofá ki hoku fāmilí.
Fekauʻaki Mo Aú
ʻOku ou nofo ʻi Naisīlia. Ko ha fonua ia ʻi ʻAfilika. ʻOku ou nofo mo ʻeku ongomātuʻá mo hoku ngaahi tuongaʻané. Ko e hiva ʻoku ou manako aí ko e “ʻA e Fānau Kotoa ʻi he Māmaní.” Ko e potufolofola ʻoku ou manako aí ko e 1 Nīfai 3:7.
Ofi ki he Temipalé
ʻOku mau nofo ofi ʻaupito ki he Temipale Aba Nigeria. ʻOku miniti pē ʻe nima ʻa ʻete lue ki aí! ʻOku ou ongoʻi fiefia ʻaupito ʻi he taimi ʻoku ou ʻaʻahi ai ki he temipalé. ʻOku ou teuteu ki he taimi te u lava ai ʻo hū ai ki loto ke fakahoko e papitaisó.
Ko e Feituʻu Lelei Tahá
ʻI he ʻaho Mōnité, ʻoku ou fakamanatu ange ki hoku ngaahi tuongaʻané ʻa e efiafi fakafāmili ʻi ʻapí. ʻOku ou saiʻia ʻi he taimi ʻoku feimeʻatokoni efiafi ai ʻeku tangataʻeikí pea mau hulohula kotoa fakataha. Ko e feituʻu lelei tahá ʻa ʻapi.
Tokoni Ki Hoku Ngaahi Tuongaʻané
ʻOku ou fafangu hoku ngaahi tuongaʻané ʻi he pongipongi kotoa pē ke fai ʻemau lotu fakafāmilí. ʻOku mau hiva e ngaahi himí, ako e folofolá, pea tūʻulutui mo lotu fakataha. Hili iá ʻoku ou tokoni ke teuteuʻi kinautolu ki he akó. ʻOku ou ongoʻi ko ha fatongia ia ki heʻeku Tamai Hēvaní ke u ʻofa mo tokoni ki hoku ngaahi tuongaʻané.
Ngāué mo e Vaʻingá
Hili e akó ʻoku ou tokoni ki heʻeku faʻeé ʻi he ngāue takai homau ʻapí. ʻOku ou tokoni foki ki hoku ngaahi tuongaʻané ʻi heʻenau ngaahi ngāue fakaakó. ʻOku ʻikai lahi haʻaku taimi ke vaʻinga, ka ʻoku ou manako he heka heʻeku pasikalá mo e fakapuna lofá. ʻOku ou ongoʻi ʻa e ʻofa ʻa e Tamai Hēvaní ʻi he taimi ʻoku ou fakahaaʻi ai ʻeku ʻofa ki hoku fāmilí.