Taimi Mohe ʻa Fēlisí
ʻOku nofo e tokotaha naʻá ne fai e talanoá ʻi ʻIutā, USA.
“Fiefia he tokoní, hiva hono fai iá. Fie tokoni ki he faʻeé, ʻoku tau ʻofa aí” (Tohi Hiva ʻa e Fānau, 108).
Naʻe siofi ʻe ʻAnitoni ʻa e komipiutá ʻo toutou louti hake ʻa e lēvolo onó. Naʻá ne mihiʻi ʻene mānavá ʻo kamata ke fou he hala fihifihí, puna fakalaka he ngaahi tao lanu kehekehé mo hū he ngaahi tānolo vela kakaha he lalo fonuá. Naʻá ne tātā hono vaʻé ʻo vave ange ʻi heʻene fakaofiofi atu ki he ngataʻangá.
“ʻE ʻAnitoni?” Ko e leʻo ia ʻo e Fineʻeikí. Ne ongo mai hono leʻó hangē naʻá ne fie maʻu ha meʻá.
Naʻá ne fakakaukau, “ʻOleva!” Naʻá ne puna fakalaka ʻi ha toe tao ʻe taha pea lele fakavavevave ʻi ha toe tānolo ʻe taha. Naʻá ne pehē, “Ko au?” kae ʻikai pē toʻo hono matá mei he komipiutá.
“Kātaki, te ke lava ʻo fakatui e vala mohe ʻo Fēlisí mo lau ha talanoa ki ai? ʻOku fie maʻu ke u fakaʻosi hono fakamaʻa e peitó.”
“ʻAaaa … ,” Naʻá ne fuʻu ofi ʻaupito! Naʻá ne afe he holo fakaʻosí ne fonu he ngaahi taó, fakalaka atu ha afi kakaha, pea mo ha monumanu fakailifia, pea … ʻIO! kuo aʻu ki he tepí!
Ne louti hake he komipiutá ʻa e lēvolo fitú. Naʻe hā ngali faingataʻa ange, ka naʻe ʻikai faʻa tatali ‘a ʻAnitoni ke ʻahiʻahiʻi ia. Kuó ne feinga mālohi ke aʻu ki he tuʻunga ko ʻení. Ne lomiʻi ʻe ʻAnitoni e taʻofi fakataimí pea sio hake ki he Fineʻeikí, ʻa ia naʻá ne fua hono kiʻi tehina, ko Fēlisí. “ʻE lava ke u toe maʻu ha kiʻi miniti siʻi ange? Ko ʻeku toki aʻu ʻeni ki he lēvolo fitú!”
Naʻe talaange ʻe he Fineʻeikí, “ʻOku ou fuʻu fie maʻu hoʻo tokoní.” “ʻE lava ke ke vaʻinga ha toe lēvolo ʻe taha ʻoka hili hoʻo tokangaʻi ʻa Fēlisí.”
Ne malimali ʻa Fēlisi. Naʻá ne pehē ʻi hono kiʻi leʻo taʻu-uá, “Fa-molemole?”
Naʻe sio ʻa ʻAnitoni ki he komipiutá mo māpuhoi. “Sai.” Kuo pau pē ke ne fakavavevave kae lava ke ne foki ki heʻene keimí.
Naʻa ne fua hake ʻa Fēlisi he sitepú ki hona lokí.
Naʻá ne pehē, “Ko hai e kiʻi pēpē ʻoku ou saiʻia taha aí?” mo ne ʻeneʻi e kiʻi foʻi kete ʻo Fēlisí. Naʻá ne puhi e kete ʻo Fēlisí mo malimali ʻi he kata kikī ʻa Fēlisí.
Naʻe fakatui ʻe ʻAnitoni e vala mohe tainasoa ʻo Fēlisí ʻa ia naʻá ne saiʻia taha aí. Naʻá ne fua hake leva ʻa Fēlisi ki hono mohengá pea lue ki he matapaá. Naʻe talaange ʻe he Fineʻeikí ke ne toe lau foki mo ha talanoa kia Fēlisi, ka kuó ne ʻosi fai e konga mahuʻingá. Mahalo pē ko hono faingamālie ʻeni ke ne feingaʻi ai ha lēvolo ʻe ua kimuʻa pea taimi ke mohé.
Ne ongoʻi ʻe ʻAnitoni hono kiʻi fusi hono soté. Naʻá ne sio hifo ʻo fakatokangaʻi kuo hifo mai ʻa Fēlisi mei he mohengá.
“Peá?” Ko e fehuʻi ange ia ʻa Fēlisí. Naʻá ne lele ki heʻene kato tohí ʻo foki mai mo ha tohi fekauʻaki mo ha pea ʻoku ʻasi ʻi he takafí.
“Siʻi ē, Fēlisi, ʻoku ai e ngaahi meʻa ke u fai!” Ko e lea ange ia ʻa ʻAnitoní. Ne hiki hake ʻe Fēlisi e tohí ki ʻolunga, mo ne sio hake kia ʻAnitoni.
Ne ʻikai lava ʻe ʻAnitoni ʻo mapukepuke ʻene malimalí. “He ʻikai pē te ke foʻi koe ia he kolé, ko ia? Sai, sai pē ia.”
Ne tangutu hifo ʻa ʻAnitoni ʻi he mohenga ʻo Fēlisí, pea kaka hake ʻa Fēlisi ki hono fungá. Naʻe fakaava hake ʻe ʻAnitoni ki he peesi ʻuluakí peá ne lau kae falala ʻa Fēlisi kiate ia. Naʻe tuhu ʻa Fēlisi ki he monumanu takitaha ʻi he pēsí mo akoako puʻaki hono hingoá. “Sī-pa … famingo … Uaa-uasi.”
ʻI he taimi naʻe ʻosi aí, naʻe tāpuni ʻe ʻAnitoni e tohí peá ne fakakafuʻi ʻa Fēlisi. Naʻá ne ʻuma hifo kia Fēlisi mo tuʻu hake ke ʻalu pea mo ʻene pehē ange, “Mohe ā, Fēlisi ē.”
Ka ʻi heʻene lue ki he matapaá, naʻá ne toe fanongo ki he kiʻi leʻo ko iá. “Kuku au?”
Ne malimali ʻa ʻAnitoni. “Sai pē. ʻUnu atu. Te u kiʻi nofo taimi siʻi pē.”
Ne tokoto hifo ʻa ʻAnitoni ʻi he piló. ʻI he kiʻi taimi ko ʻení, ne ʻikai te ne ongoʻi ke fai ha meʻa kehe. Naʻá ne malimali ʻi he taimi naʻe fuʻu mamao ai ʻa Fēlisi mo kuikui hono matá. Naʻá ne ongoʻi ko e fiefia lahi taha ia ne ne aʻusia he ʻahó kotoa. ʻE lava pē ke tatali ʻene keimí.