ទទួលបានការគោរពខ្លួនឯងតាមរយៈភាពខ្លួនទីពឹងខ្លួន
ហូសេ អាល់ប៊ែតូ ណាវ៉ាស ( ដូចដែលបានប្រាប់ មែរៀម ស្វីនី ) សាន ហូសេ កូស្តា រីកា
ខ្ញុំរៀបការហើយ ខ្ញុំមានកូនបីនាក់ ហើយខ្ញុំគ្មានការងារធ្វើឡើយ ។ ការខ្វះការងារធ្វើនេះបានធ្វើឲ្យខ្ញុំបាត់បង់ក្តីសង្ឃឹម ។ ខ្ញុំបានព្រួយបារម្ភអំពីសុវត្ថិភាពគ្រួសារខ្ញុំ ហើយខ្ញុំបានឈប់ជឿជាក់លើខ្លួនឯង ។
ភរិយាខ្ញុំ ខាឡា បានលើកទឹកចិត្តខ្ញុំឲ្យចូលរៀនក្នុងក្រុមភាពខ្លួនទីពឹងខ្លួន ។ វាជាការអៀនខ្មាសណាស់សម្រាប់ខ្ញុំក្នុងការសារភាពថា ខ្ញុំគ្មានការងារធ្វើ ប៉ុន្តែភរិយាខ្ញុំបានលើកទឹកចិត្តខ្ញុំឲ្យចូលរួមក្នុងក្រុមនោះ ប្រយោជន៍ឲ្យខ្ញុំអាចមើលថែគ្រួសារយើងបាន ។
ខ្ញុំស្ទាក់ស្ទើរមិនចង់សាកល្បង ។ អំឡុងពេលចូលរួមក្រុមនោះ ខ្ញុំបានដឹងថាជំនាញភាសាអង់គ្លេសរបស់ខ្ញុំអាចក្លាយជាទ្រព្យសកម្មដ៏មានតម្លៃនៅក្នុងពិភពការងារ ។ ខ្ញុំបានសិក្សាភាសាអង់គ្លេសនៅក្នុងបេសកកម្ម ប៉ុន្តែខ្ញុំគ្រាន់តែដឹងអំពីរបៀបនិយាយអំពីសាសនាតែប៉ុណ្ណោះ ។ ខ្ញុំបានចុះឈ្មោះចូលរៀនថ្នាក់ភាសាអង់គ្លេសដែលព្រះវិហារបានផ្តល់ឲ្យ ដើម្បីបង្កើនផ្នែកវេយ្យសព្ទរបស់ខ្ញុំឲ្យប្រសើរឡើង ។ ថ្ងៃមួយ ពេលខ្ញុំត្រឡប់មកពីរៀនថ្នាក់អង់គ្លេសវិញ ខាឡា បានហុចទូរសព្ទមកឲ្យខ្ញុំនិយាយ ។
ខ្ញុំបានសួរ ៖ « តើជានរណា ? » ។
ភរិយាខ្ញុំបាននិយាយថា « អូនពុំដឹងទេ ។ ពួកគេនិយាយភាសាអង់គ្លេស » ។
វាជាការទូរសព្ទមកពីអ្នកតំណាងធនធានមនុស្សពីក្រុមហ៊ុនដ៏ធំបំផុតមួយនៅក្នុងប្រទេស កូស្តា រីកា សួរចង់សុំសម្ភាសខ្ញុំ ។ ខ្ញុំបានស្រឡាំងកាំង ប៉ុន្តែការសម្ភាសន៍នោះបានដំណើរការទៅយ៉ាងអស្ចារ្យ ។ ក្រោយមកខ្ញុំបានដឹងថា ខាឡា បានរៀបចំការសម្ភាសន៍នោះ ។
ខ្ញុំបានមានការងារធ្វើ ហើយខ្ញុំបានចាំពីរបៀបដែលក្រុមភាពខ្លួនទីពឹងខ្លួនបានជួយខ្ញុំ ។ ក្រោយមក ខ្ញុំបានគិតអំពីរបៀបដែលខ្ញុំអាចអនុវត្តអ្វីដែលខ្ញុំបានរៀនឲ្យបានកាន់តែប្រសើរឡើង ។ ខ្ញុំបានចាប់ផ្តើមរកការងារដែលកាន់តែប្រសើរជាងមុន ហើយខ្ញុំបានទទួលការងារនោះ ។ បន្ទាប់មក ខ្ញុំបានធ្វើការខិតខំជាខ្លាំង ដោយចាប់ផ្តើមអាជីវកម្មសាងសង់ផ្ទាល់ខ្លួនខ្ញុំ ។
ខ្ញុំពុំអាចស្រមៃឃើញថា តើគ្រួសារខ្ញុំ និងខ្ញុំនឹងប្រែទៅជាបែបណានោះទេ ប្រសិនបើយើងពុំបានចាប់ផ្តើមពីក្រុមភាពខ្លួនទីពឹងខ្លួននោះ ។ ខ្ញុំបានរៀនបន្ទាបខ្លួន ហើយទូលសូមជំនួយពីព្រះអម្ចាស់ ។ ខ្ញុំក៏បានរៀនដើម្បីឲ្យអស់អ្នកដែលចង់ជួយខ្ញុំ ផ្តល់ពរដល់ជីវិតខ្ញុំផងដែរ ។ យើងមានពរជ័យច្រើនណាស់ ។ ឥឡូវនេះ ខ្ញុំមានការគោរពខ្លួនឯង ហើយខ្ញុំអាចផ្តល់ពរដល់គ្រួសារខ្ញុំជាមួយប្រាក់កាក់ដែលខ្ញុំរកបាន ។ ខ្ញុំដឹងថា ព្រះវិញ្ញាណប្រទានពរជ័យដល់យើងនៅពេលយើងបន្ទាបខ្លួន ។