សារលិខិតបង្រៀនសួរសុខទុក្ខ
ឱបក្រសោបអ្នកដែលវង្វេងដោយក្តីស្រឡាញ់
សូមសិក្សាអត្ថបទនេះប្រកបដោយការអធិស្ឋាន និងស្វែងរកការបំផុសគំនិត ដើម្បីដឹងអំពីអ្វីដែលត្រូវចែកចាយ ។ តើការយល់ដឹងអំពីគោលបំណងនៃសមាគមសង្គ្រោះ នឹងរៀបចំបុត្រីទាំងឡាយរបស់ព្រះឲ្យទទួលបានពរជ័យនៃជីវិតដ៏នៅអស់កល្បជានិច្ចយ៉ាងដូចម្ដេច ?
ប្រធាន ឌៀថើរ អេហ្វ អុជដូហ្វ ទីប្រឹក្សាទីពីរក្នុងគណៈប្រធានទីមួយមានប្រសាសន៍ថា « ការពិតនោះគឺថា គ្មានគ្រួសារណាល្អឥតខ្ចោះនៅលើផែនដីនេះឡើយ … ។ ទោះជាគ្រួសារអ្នកជួបប្រទះបញ្ហាណាក៏ដោយ ទោះជាអ្នកត្រូវធ្វើអ្វីៗដើម្បីដោះស្រាយបញ្ហានោះក្តី ការចាប់ផ្ដើម និងទីបញ្ចប់នៃដំណោះស្រាយនេះគឺជាសេចក្ដីសប្បុរស ដែលជាសេចក្ដីស្រឡាញ់ដ៏សុទ្ធសាធរបស់ព្រះគ្រីស្ទ » ។១
ចំពោះអស់អ្នកដែលពុំបានចូលរួមពេញលេញនៅក្នុងដំណឹងល្អនោះ លីនដា ខេ ប៊ើតុន អតីតប្រធានសមាគមសង្គ្រោះទូទៅបានមានប្រសាសន៍ថា ៖ « ព្រះវរបិតាសួគ៌ស្រឡាញ់កូនចៅទាំងអស់របស់ទ្រង់ ។ … មិនថាពួកគេជាមនុស្សបែបណាទេ — ទោះបីសកម្ម ឬអសកម្មក្តី — ទ្រង់សព្វព្រះទ័យឲ្យពួកគេត្រឡប់មកផ្ទះវិញ » ។២
ប្រធាន យ៉ូសែប អេហ្វ ស៊្មីធ ( ១៨៣៨–១៩១៨ ) បានបង្រៀនថា « ទោះបីជា [ កូនៗរបស់អ្នក ] ចចេសរឹងរូសយ៉ាងណាក្តី … ពេលអ្នកនិយាយ ឬជជែកជាមួយពួកគេ ចូរកុំនិយាយដោយកំហឹង ចូរកុំនិយាយដោយស្រែកខ្លាំងៗ ចូរកុំនិយាយក្នុងរបៀបស្តីបន្ទោសឡើយ ។ ចូរនិយាយជាមួយពួកគេដោយសមរម្យ » ។៣
អែលឌើរ ប៊្រែន អេច នែលសុន ក្នុងពួកចិតសិបនាក់បានលើកយកការណែនាំរបស់ព្រះអង្គសង្គ្រោះ ដល់អ្នកដែលមានកាក់ ១០ ដួង ហើយបាត់មួយថា ៖ « ចូរស្វែងរកឲ្យទាល់តែឃើញ ។ នៅពេលអ្នកដែលវង្វេងបង់ជាកូនប្រុសស្រី ជាបងប្អូនប្រុសស្រីរបស់អ្នក … អ្វីដែលយើងគ្រាន់តែអាចធ្វើបាននោះគឺ យើងស្រឡាញ់បុគ្គលនោះឲ្យអស់ពីចិត្តរបស់យើង ។
« សូមឲ្យបងប្អូន និងរូបខ្ញុំទទួលបានវិវរណៈដើម្បីស្គាល់មធ្យោបាយដ៏ល្អបំផុត ក្នុងការជួយអស់អ្នកដែលវង្វេងបង់ ហើយបើចាំបាច់ត្រូវមានការអត់ធ្មត់ និងក្ដីស្រឡាញ់មកពីព្រះវរបិតា និងបុត្រាទ្រង់គឺព្រះយេស៊ូវគ្រីស្ទ កាលយើងស្រឡាញ់ ទន្ទឹងចាំមើល និង រង់ចាំផ្លូវកូនខ្ជះខ្ជាយនោះ » ។៤
ប្រធាន ហិនរី ប៊ី អាវរិង ទីប្រឹក្សាទីមួយក្នុងគណៈប្រធានទីមួយមានប្រសាសន៍ដូច្នេះ ៖ « ខ្ញុំបានអធិស្ឋានដោយក្តីជំនឿ សូមឲ្យអ្នកដែលខ្ញុំស្រឡាញ់រកឃើញ និងទទួលអារម្មណ៍ពីអំណាចនៃដង្វាយធួន ។ ខ្ញុំអធិស្ឋានដោយសេចក្តីជំនឿថា ឲ្យមានមនុស្សរមែងស្លាប់ដូចគ្នានឹងជាជំនួយដល់ពួកគេ ហើយគេបានមកជួយ ។
« ព្រះអម្ចាស់បង្កើតមធ្យោបាយ ដើម្បីសង្គ្រោះកូនចៅទ្រង់ » ។៥
ខគម្ពីរ និង ព័ត៌មានបន្ថែម
ម៉ាថាយ ១៨:១២; អាលម៉ា ៣១:៣៥; នីហ្វៃទី ៣ ១៣:៣២; គ. និង ស. ១២១:៤១–៤២
សេចក្ដីជំនឿ ក្រុមគ្រួសារ ការសង្គ្រោះ