លុះត្រាជួបទៀត
ចូរជួយនរណាម្នាក់ក្នុងថ្ងៃនេះ
ដោយប្រធាន ថូម៉ាស អេស ម៉នសុន
ដកស្រង់ចេញពី « តើនៅថ្ងៃនេះខ្ញុំបានធ្វើអ្វីខ្លះដល់មនុស្សម្នាក់ ? » Liahona, ខែ វិច្ឆិកា ឆ្នាំ ២០០៩ ទំព័រ ៨៤–៨៧ ។
យើងគឺជាព្រះហស្តរបស់ព្រះអម្ចាស់ ។ ទ្រង់ពឹងលើយើង ។
រូបថតដកស្រង់ចេញពី ព្រះគ្រីស្ទព្យាបាលអ្នកឈឺនៅស្រះទឹក បេថែសដា ដោយ ខាល ហៀនរីច ប្លូច ។ ទទួលបានសិទ្ធិអនុញ្ញាតពីសារៈមន្ទីរសិល្បៈនៃសាកលវិទ្យាល័យ ព្រិកហាំ យ៉ង
ខ្ញុំមានទំនុកចិត្តថា វាគឺជា បំណងប្រាថ្នា របស់សមាជិកម្នាក់ៗនៃសាសនាចក្រនេះ ដើម្បីបម្រើ និងជួយអស់អ្នកដែលត្រូវការជំនួយ ។ នៅពេលបុណ្យជ្រមុជទឹក យើងបានចុះសេចក្តីសញ្ញាថានឹង « រែកបន្ទុកគ្នាទៅវិញទៅមក ដើម្បីឲ្យបន្ទុកនោះបានស្រាល » [ ម៉ូសាយ ១៨:៨ ] ។ « តើប៉ុន្មានដងហើយដែលដួងចិត្តអ្នកបានក្តុកក្តួល នៅពេលអ្នកបានមើលឃើញពីសេចក្តីត្រូវការរបស់អ្នកដទៃ ? តើអ្នកធ្លាប់មាន បំណង ដើម្បីធ្វើជាមនុស្សដែលជួយគេញឹកញាប់ប៉ុណ្ណា ? ប៉ុន្ដែ តើកិច្ចការរស់នៅប្រចាំថ្ងៃបានបង្អាក់បំណងនេះញឹកញាប់ប៉ុណ្ណា ហើយដែលអ្នកបានទុកបំណងនេះឲ្យអ្នកផ្សេងទៀតជួយធ្វើវិញ ដោយមានអារម្មណ៍ថា ‹ អូ៎ ប្រាកដណាស់ នឹងមាននរណាម្នាក់នឹងជួយការងារនោះហើយ » ។
« យើងជាប់ជំពាក់នឹងភាពមមាញឹកក្នុងជីវិតរបស់យើងយ៉ាងខ្លាំង ។ ប៉ុន្តែប្រសិនបើយើងត្រឡប់ទៅមើលកិច្ចការដែលយើងបានធ្វើ យើងអាចរកឃើញថា … ជាញឹកញាប់យើងបានចំណាយពេលភាគច្រើនបំផុតរបស់យើងយកចិត្តទុកដាក់ទៅអ្វីដែលពុំសំខាន់សោះឡើយ នៅក្នុងគម្រោងការណ៍ដ៏ធំ ដោយព្រងើយកន្កើយនឹងរឿងដែលសំខាន់ជាងនោះទៅវិញ ។ …
យើងត្រូវបានហ៊ុមព័ទ្ធដោយអ្នកដែលត្រូវការការយកចិត្តទុកដាក់ ការលើកទឹកចិត្ត ការគាំទ្រ ការលួងលោម និងចិត្តសប្បុរសពីយើង — មិនថាពួកគេជាសមាជិកគ្រួសារ មិត្តភក្ដិ អ្នកស្គាល់គ្នា ឬអ្នកដទៃនោះទេ ។ យើងគឺជាព្រះហស្ដរបស់ព្រះអម្ចាស់នៅលើផែនដីនេះ ដោយទទួលបានបញ្ជាឲ្យបម្រើ ហើយជួយដល់កូនចៅទ្រង់ ។ ទ្រង់ពឹងលើយើងម្នាក់ៗ ។ …
សូមឲ្យទំនុកបទនៅក្នុងទំនុកតម្កើងដ៏ល្បីល្បាញនេះជ្រៀតចូលក្នុងព្រលឹងយើង ។ …
តើខ្ញុំបានធ្វើល្អដល់ពិភពលោកឬទេ ?
តើខ្ញុំបានជួយអ្នកទីទ័លទេ ?
តើខ្ញុំបានជួយអ្នកសោកសៅ ឬនរណាឲ្យរីករាយ ?
បើអត់ខ្ញុំមិនធ្វើល្អ ?
តើបន្ទុកនរណាម្នាក់បានស្រាលទេថ្ងៃនេះ
ដោយជំនួយធ្វើចេញពីចិត្តខ្ញុំ ?
តើអ្នកឈឺនិងអ្នកនឿយហត់ត្រូវបានជួយឬទេ ?
តើពេលគេត្រូវការខ្ញុំនៅឬទេ ?
[ « តើខ្ញុំបានធ្វើល្អឬទេ ? » ទំនុកតម្កើង លេខ ១៣៨ ] ។
… សូមយើងសួរសំណួរនេះដល់ខ្លួនយើង … « តើខ្ញុំបានធ្វើអ្វីខ្លះហើយសម្រាប់នរណាមា្នក់នាថ្ងៃនេះ ? » ការទូន្មានរបស់ខ្ញុំដល់សមាជិកទូទាំងពិភពលោកគឺថា ចូរស្វែងរកនរណាម្នាក់ដែលមានការលំបាក ឬមានជំងឺ ឬឯកោ ហើយធ្វើអ្វីមួយសម្រាប់គាត់នាថ្ងៃនេះ ។