ແສງພຣະກິດຕິຄຸນແຫ່ງຄວາມຈິງ ແລະ ຄວາມຮັກ
ຂ້າພະເຈົ້າເປັນພະຍານວ່າ ແສງພຣະກິດຕິຄຸນແຫ່ງຄວາມຈິງ ແລະ ຄວາມຮັກກຳລັງສ່ອງແສງຢ່າງເຈີດຈ້າໄປທັງທົ່ວໂລກໃນມື້ນີ້.
ບົດເພງສວດທີ່ງົດງາມຂອງໄພ່ພົນຍຸກສຸດທ້າຍຊື່ວ່າ ທຸກຊົນຊາດຈົ່ງຟັງ! “Hark, All Ye Nations!” ບົ່ງບອກຢ່າງບໍ່ຜິດພ້ຽນເຖິງຄວາມກະຕືລົ້ນ ແລະ ຄວາມເບີກບານໃຈກັບຄວາມສົມບູນຂອງພຣະກິດຕິຄຸນທີ່ກຳລັງໄປສູ່ທົ່ວໂລກ. ໃນເພງສວດນີ້ ເຮົາຮ້ອງວ່າ:
ທຸກຊົນຊາດຈົ່ງຟັງ! ຟັງສຽງສະຫວັນ
ທຸກບັນດາຊາດເພື່ອຊາວຊົນຫັນສາ!
ເຫລົ່າທູດແຫ່ງສິຣິຮ້ອງເພງປີດາ
ຄວາມຈິງໄດ້ຖືກຟື້ນຟູອີກຄັ້ງ!1
ຫລູອີສ໌ ແອັຟ ມ້ອງ, ຜູ້ຂຽນຂໍ້ຄວາມທີ່ຕື່ນເຕັ້ນນີ້, ເປັນຜູ້ປ່ຽນໃຈເຫລື້ອມໃສຊາວເຢຍລະມັນທີ່ຂຽນຖ້ອຍຄຳໂດຍໄດ້ຮັບແຮງບັນດານໃຈສຳລັບເພງສວດ ຂະນະທີ່ອາໄສຢູ່ໃນປະເທດສະວິດເຊີແລນ ລະຫວ່າງທີ່ຮັບໃຊ້ເປັນຜູ້ສອນສາດສະໜາເຕັມເວລາໃນເອີຣົບ.2 ຄວາມຊື່ນຊົມທີ່ເກີດຈາກການເຫັນຜົນກະທົບທົ່ວໂລກຂອງການຟື້ນຟູນັ້ນ ເຫັນໄດ້ຢ່າງຊັດເຈນໃນຖ້ອຍຄຳຂອງເພງສວດດັ່ງຕໍ່ໄປນີ້:
ຄົ້ນຫາໃນຄວາມມືດ, ຊົນຊາດຮ້ອງໄຫ້;
ພວກເຂົາໄດ້ເຝົ້າຄອຍອະລຸນເຈີດຈ້າ.
ບັດນີ້ ລ້ວນຍິນດີລາຕີລັບລາ.
ຄວາມຈິງຢູ່ໃນໂລກອີກຄັ້ງ!3
ຕ້ອງຂອບໃຈການເລີ່ມຕົ້ນຂອງການຟື້ນຟູອັນຕໍ່ເນື່ອງມາຕັ້ງແຕ່ 200 ກວ່າປີກ່ອນ, “ແສງພຣະກິດຕິຄຸນແຫ່ງຄວາມຈິງ ແລະ ຄວາມຮັກ”4 ບັດນີ້ ໄດ້ສ່ອງແສງໄປຕະຫລອດທົ່ວໂລກ. ສາດສະດາໂຈເຊັບ ສະມິດ ໄດ້ຮຽນຮູ້ໃນປີ 1820, ແລະ ຄົນອີກເປັນລ້ານໆ ໄດ້ຮຽນຮູ້ຕັ້ງແຕ່ນັ້ນມາວ່າ, “ປະທານໃຫ້ແກ່ຄົນທັງປວງດ້ວຍພຣະກະລຸນາ ບໍ່ຊົງກ່າວຕິ.”5
ບໍ່ດົນຫລັງຈາກການຈັດຕັ້ງສາດສະໜາຈັກໃນສະໄໝສຸດທ້າຍນີ້, ພຣະຜູ້ເປັນເຈົ້າໄດ້ກ່າວຕໍ່ໂຈເຊັບ ສະມິດ ແລະ ໄດ້ສະແດງໃຫ້ປະຈັກເຖິງຄວາມຮັກທີ່ປ່ຽມລົ້ນຂອງພຣະອົງທີ່ມີຕໍ່ເຮົາ ເມື່ອພຣະອົງໄດ້ກ່າວວ່າ:
“ດັ່ງນັ້ນ, ເຮົາພຣະຜູ້ເປັນເຈົ້າ, ໂດຍທີ່ຮູ້ເຖິງຄວາມເສຍຫາຍທີ່ຈະມາສູ່ຜູ້ອາໄສຂອງແຜ່ນດິນໂລກ, ຈຶ່ງໄດ້ເອີ້ນຜູ້ຮັບໃຊ້ຂອງເຮົາ ໂຈເຊັບ ສະມິດ, ຜູ້ລູກ, ແລະ ໄດ້ກ່າວກັບລາວຈາກສະຫວັນ, ແລະ ມອບບັນຍັດໃຫ້ລາວ; …
“ເພື່ອພັນທະສັນຍາອັນເປັນນິດຂອງພຣະອົງຈະໄດ້ຖືກສະຖາປະນາຂຶ້ນ;
“ເພື່ອຄວາມສົມບູນແຫ່ງພຣະກິດຕິຄຸນຂອງເຮົາຈະຖືກປ່າວປະກາດ ໂດຍຄົນທີ່ອ່ອນແອ ແລະ ຄົນທີ່ຕ່ຳຕ້ອຍຈົນເຖິງທີ່ສຸດຂອງໂລກ.”6
ບໍ່ດົນຫລັງຈາກທີ່ໄດ້ຮັບການເປີດເຜີຍນີ້, ບັນດາຜູ້ສອນສາດສະໜາໄດ້ເລີ່ມຖືກເອີ້ນ ແລະ ຖືກສົ່ງໄປສູ່ຫລາຍໆປະຊາຊາດໃນໂລກ. ເຊັ່ນດຽວກັບທີ່ສາດສະດານີໄຟໄດ້ຄາດການໄວ້, ຂ່າວສານຂອງພຣະກິດຕິຄຸນທີ່ຖືກຟື້ນຟູໄດ້ເລີ່ມຖືກສັ່ງສອນ “ໃນບັນດາທຸກປະຊາຊາດ, ທຸກຕະກຸນ, ທຸກພາສາ, ແລະ ທຸກຜູ້ຄົນທັງປວງ.”7
“ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ໄດ້ຖືກຈັດຕັ້ງຂຶ້ນຢ່າງເປັນທາງການໃນເຮືອນໄມ້ທ່ອນຫລັງນ້ອຍໆ ໃນເຂດເໜືອຂອງລັດນິວຢອກ ໃນປີ 1830.
“ມັນໃຊ້ເວລາ 177 ປີ—ຈົນຮອດປີ 1947—ກ່ອນສາດສະໜາຈັກຈະເຕີບໃຫຍ່ຂຶ້ນຈາກສະມາຊິກຫົກຄົນທຳອິດເປັນໜຶ່ງລ້ານຄົນ. ບັນດາຜູ້ສອນສາດສະໜາໄດ້ກາຍເປັນລັກສະນະເດັ່ນຂອງສາດສະໜາຈັກຕັ້ງແຕ່ລຸ້ນທຳອິດ, ໂດຍກະຈາຍໄປຍັງດິນແດນຊາວອິນເດຍແດງ, ຈົນເຖິງການາດາ ແລະ, ໃນປີ 1837, ຜ່ານກາຍທະວີບອາເມຣິກາເໜືອໄປສູ່ປະເທດອັງກິດ. ຫລັງຈາກນັ້ນບໍ່ດົນ, ບັນດາຜູ້ສອນສາດສະໜາກໍໄດ້ເຮັດວຽກໃນທະວີບເອີຣົບ ແລະ ໄກໄປຈົນເຖິງປະເທດອິນເດຍ ແລະ ໝູ່ເກາະປາຊີຟິກ.
“ໄດ້ໄປຮອດເປົ້າໝາຍສະມາຊິກສອງລ້ານຄົນພຽງແຕ່ 16 ປີຕໍ່ມາ, ໃນປີ 1963, ແລະ ຮອດເປົ້າໝາຍສາມລ້ານຄົນໃນອີກແປດປີ.”8
ໂດຍການເນັ້ນໃສ່ການເຕີບໃຫຍ່ທີ່ວ່ອງໄວຂອງສາດສະໜາຈັກ, ປະທານຣະໂຊ ເອັມ ແນວສັນ ໄດ້ກ່າວໄວ້ເມື່ອບໍ່ດົນມານີ້ວ່າ: “ເວລານີ້, ວຽກງານຂອງພຣະຜູ້ເປັນເຈົ້າໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ກຳລັງກ້າວໄປໜ້າຢ່າງວ່ອງໄວ. ສາດສະໜາຈັກຈະມີອະນາຄົດທີ່ຄາດບໍ່ເຖິງ ແລະ ບໍ່ມີໃຜທຽບເທົ່າໄດ້.”9
ການຟື້ນຟູຄວາມສົມບູນແຫ່ງພຣະກິດຕິຄຸນຂອງພຣະເຢຊູຄຣິດ, ການຈັດຕັ້ງຂອງສາດສະໜາຈັກທີ່ດຳລົງຢູ່ຂອງພຣະຜູ້ເປັນເຈົ້າເທິງແຜ່ນດິນໂລກນີ້ອີກຄັ້ງ, ແລະ ການເຕີບໂຕທີ່ໜ້າອັດສະຈັນໃຈຕັ້ງແຕ່ນັ້ນມາ ໄດ້ເປັນພອນໃຫ້ຖານະປະໂລຫິດມີຢູ່ທົ່ວໂລກ. ພິທີການ ແລະ ພັນທະສັນຍາຕ່າງໆອັນສັກສິດທີ່ຜູກມັດເຮົາກັບພຣະເຈົ້າ ແລະ ວາງເຮົາໄວ້ໃນເສັ້ນທາງແຫ່ງພັນທະສັນຍາ ໄດ້ສະແດງໃຫ້ປະຈັກຢ່າງແຈ່ມແຈ້ງເຖິງ “ພະລັງແຫ່ງຄວາມເປັນພຣະເຈົ້າ.”10 ຂະນະທີ່ເຮົາເຂົ້າຮ່ວມໃນພິທີການອັນສັກສິດເຫລົ່ານີ້ເພື່ອຜູ້ທີ່ມີຊີວິດຢູ່ ແລະ ເພື່ອຜູ້ທີ່ຕາຍແລ້ວ, ເຮົາກໍເຕົ້າໂຮມອິດສະຣາເອນທັງສອງຟາກມ່ານ ແລະ ກະກຽມແຜ່ນດິນໂລກໄວ້ສຳລັບການສະເດັດມາຄັ້ງທີສອງຂອງພຣະຜູ້ຊ່ວຍໃຫ້ລອດ.
ໃນເດືອນເມສາ ປີ 1973, ພໍ່ແມ່ຂອງຂ້າພະເຈົ້າ ແລະ ຂ້າພະເຈົ້າ ໄດ້ເດີນທາງຈາກປະເທດອາກຊັງຕິນ ບ້ານເກີດຂອງພວກເຮົາ ເພື່ອໄປຮັບການຜະນຶກໃນພຣະວິຫານ. ໃນເມື່ອຕອນນັ້ນຍັງບໍ່ມີພຣະວິຫານຢູ່ບ່ອນໃດໃນອາເມຣິກາລາຕິນເທື່ອ, ພວກເຮົາຈຶ່ງໄດ້ບິນໄປຫລາຍກວ່າ 6,000 ໄມ (9,700 ກມ) ເພື່ອຮັບການຜະນຶກໃນພຣະວິຫານເຊົາເລັກ. ເຖິງແມ່ນວ່າໃນຕອນນັ້ນ ຂ້າພະເຈົ້າມີອາຍຸໄດ້ພຽງແຕ່ສອງປີ ແລະ ບໍ່ຈື່ປະສົບການທີ່ພິເສດນັ້ນທັງໝົດກໍຕາມ, ແຕ່ພາບສາມຢ່າງທີ່ຊັດເຈນຈາກການເດີນທາງນັ້ນ ຍັງຕິດຕຶງ ແລະ ຢູ່ໃນໃຈຂອງຂ້າພະເຈົ້າຕັ້ງແຕ່ນັ້ນມາ.
ທຳອິດ, ຂ້າພະເຈົ້າຈື່ໄດ້ວ່າ ຕົວເອງຖືກໃຫ້ນັ່ງຢູ່ໃກ້ປ່ອງຢ້ຽມຍົນ ແລະ ໄດ້ແນມເບິ່ງເມກຂາວຢູ່ທາງລຸ່ມ.
ກ້ອນເມກທີ່ສວຍງາມ ແລະ ສົດໃສເຫລົ່ານັ້ນ ຍັງຢູ່ໃນຈິດໃຈຂອງຂ້າພະເຈົ້າຄືກັບວ່າມັນເປັນກ້ອນສຳລີຝ້າຍຍັກ.
ອີກພາບໜຶ່ງທີ່ຍັງຢູ່ໃນໃຈຂອງຂ້າພະເຈົ້າແມ່ນພາບຂອງຕົວລະຄອນທີ່ຕະຫລົກສອງສາມໂຕຢູ່ສວນສະໜຸກແຫ່ງໜຶ່ງໃນເຂດເມືອງລອສ ແອັງເຈີລີສ. ຕົວລະຄອນເຫລົ່ານັ້ນຍາກທີ່ຈະລືມໄດ້.
ແຕ່ທີ່ສຳຄັນກວ່ານັ້ນກໍຄື ພາບທີ່ສຸກໃສ ແລະ ບໍ່ສາມາດລືມໄດ້:
ຂ້າພະເຈົ້າຈື່ໄດ້ຢ່າງຊັດເຈນວ່າ ກຳລັງຢູ່ໃນຫ້ອງສັກສິດຂອງພຣະວິຫານເຊົາເລັກ ບ່ອນທີ່ມີການຜະນຶກຂອງຄູ່ສາມີພັນລະຍາ ແລະ ຂອງຄອບຄົວ ເພື່ອການເວລາ ແລະ ເພື່ອຕະຫລອດຊົ່ວນິລັນດອນ. ຂ້າພະເຈົ້າຈື່ແທ່ນບູຊາຂອງພຣະວິຫານ ແລະ ຈື່ແສງຕາເວັນທີ່ເຈີດຈ້າສ່ອງເຂົ້າມາຜ່ານປ່ອງຢ້ຽມທາງນອກຂອງຫ້ອງໄດ້. ຕອນນັ້ນຂ້າພະເຈົ້າຮູ້ສຶກ, ແລະ ຍັງສືບຕໍ່ຮູ້ສຶກຕັ້ງແຕ່ນັ້ນມາ, ເຖິງຄວາມອົບອຸ່ນ, ຄວາມປອດໄພ, ແລະ ການປອບໂຍນຂອງແສງພຣະກິດຕິຄຸນແຫ່ງຄວາມຈິງ ແລະ ຄວາມຮັກ.
ຄວາມຮູ້ສຶກຄ້າຍໆກັນນີ້ໄດ້ຮັບການຢືນຢັນອີກຄັ້ງໜຶ່ງໃນໃຈຂອງຂ້າພະເຈົ້າ 20 ປີຕໍ່ມາ, ເມື່ອຂ້າພະເຈົ້າໄດ້ເຂົ້າໄປໃນພຣະວິຫານເພື່ອຮັບການຜະນຶກອີກຄັ້ງ—ເທື່ອນີ້ ແມ່ນໃນຂະນະທີ່ຄູ່ໝັ້ນຂອງຂ້າພະເຈົ້າ ແລະ ຂ້າພະເຈົ້າ ໄດ້ຖືກຜະນຶກເພື່ອການເວລາ ແລະ ເພື່ອຕະຫລອດຊົ່ວນິລັນດອນ. ເຖິງຢ່າງໃດກໍຕາມ, ໃນໂອກາດນີ້, ພວກເຮົາບໍ່ຈໍາເປັນທີ່ຈະເດີນທາງເປັນພັນໆກິໂລແມັດ ເພາະພຣະວິຫານ ບວຍໂນສ ແອຣີສ໌ ອາກຊັງຕິນ ໄດ້ຖືກສ້າງ ແລະ ອຸທິດຕັ້ງແຕ່ນັ້ນມາ, ແລະ ຢູ່ຫ່າງຈາກບ້ານຂອງພວກເຮົາພຽງແຕ່ໄລຍະຂັບລົດສັ້ນໆເທົ່ານັ້ນ.
ຊາວສອງປີຫລັງຈາກການແຕ່ງງານ ແລະ ການຜະນຶກຂອງພວກເຮົາ, ພວກເຮົາໄດ້ຮັບພອນໃນການກັບຄືນໄປພຣະວິຫານຫລັງເກົ່ານັ້ນອີກ, ແຕ່ເທື່ອນີ້ ນຳກັນກັບລູກສາວຜູ້ງາມຂອງພວກເຮົາ, ແລະ ພວກເຮົາໄດ້ຖືກຜະນຶກເປັນຄອບຄົວເພື່ອການເວລາ ແລະ ເພື່ອຕະຫລອດຊົ່ວນິລັນດອນ.
ຂະນະທີ່ຂ້າພະເຈົ້າສະທ້ອນຄິດເຖິງຊ່ວງເວລາທີ່ສັກສິດຫລາຍເຫລົ່ານີ້ໃນຊີວິດຂອງຂ້າພະເຈົ້ານັ້ນ, ຂ້າພະເຈົ້າໄດ້ປ່ຽມລົ້ນໄປດ້ວຍຄວາມສຸກທີ່ເລິກເຊິ່ງ ແລະ ຢັ້ງຢືນ. ຂ້າພະເຈົ້າໄດ້ຮູ້ສຶກ ແລະ ສືບຕໍ່ທີ່ຈະຮູ້ສຶກເຖິງຄວາມຮັກທີ່ເມດຕາກະລຸນາຂອງພຣະບິດາຜູ້ສະຖິດໃນສະຫວັນ, ຜູ້ຮູ້ຄວາມຕ້ອງການສ່ວນຕົວຂອງພວກເຮົາ ແລະ ຄວາມປາດຖະໜາທີ່ຈິງໃຈຂອງພວກເຮົາ.
ໃນການກ່າວເຖິງການເຕົ້າໂຮມອິດສະຣາເອນໃນຍຸກສຸດທ້າຍ, ພຣະຜູ້ເປັນເຈົ້າ ພຣະເຢໂຮວາໄດ້ກ່າວວ່າ, “ເຮົາຈະຕັ້ງກົດບັນຍັດຂອງເຮົາໄວ້ພາຍໃນພວກເຂົາ ແລະ ຂຽນກົດບັນຍັດນັ້ນໄວ້ທີ່ຫົວໃຈຂອງພວກເຂົາ; ເຮົາຈະເປັນພຣະເຈົ້າຂອງພວກເຂົາ, ແລະ ພວກເຂົາຈະເປັນປະຊາຊົນຂອງເຮົາ.”11 ຂ້າພະເຈົ້າຮູ້ສຶກກະຕັນຍູຊົ່ວນິລັນດອນ ທີ່ຕັ້ງແຕ່ຕອນຂ້າພະເຈົ້າຍັງນ້ອຍ ພຣະບັນຍັດຂອງພຣະຜູ້ເປັນເຈົ້າໄດ້ເລີ່ມຖືກສະຫລັກລົງໃນໃຈຂອງຂ້າພະເຈົ້າຢ່າງເລິກເຊິ່ງ ຜ່ານທາງພິທີການທີ່ສັກສິດຕ່າງໆໃນບ້ານທີ່ສັກສິດຂອງພຣະອົງ. ມັນສຳຄັນຫລາຍຂະໜາດໃດທີ່ຮູ້ວ່າ ພຣະອົງເປັນພຣະເຈົ້າຂອງເຮົາ, ວ່າເຮົາເປັນຜູ້ຄົນຂອງພຣະອົງ, ແລະ ບໍ່ວ່າສະພາບການໃດຈະຢູ່ອ້ອມຕົວເຮົາກໍຕາມ, ຖ້າເຮົາຊື່ສັດ ແລະ ເຊື່ອຟັງພັນທະສັນຍາຕ່າງໆທີ່ເຮົາໄດ້ເຮັດໄວ້, ແລ້ວເຮົາຈະສາມາດ “ຖືກລ້ອມໄວ້ໃນອ້ອມພຣະພາຫາແຫ່ງຄວາມຮັກຂອງພຣະອົງຊົ່ວນິລັນດອນ.”12
ໃນລະຫວ່າງພາກສະຕີຂອງກອງປະຊຸມໃຫຍ່ສາມັນໃນເດືອນຕຸລາ ປີ 2019 ນັ້ນ, ປະທານແນວສັນໄດ້ກ່າວວ່າ, “ຄວາມພະຍາຍາມຂອງເຮົາທີ່ຈະປະຕິບັດສາດສະໜາກິດຕໍ່ກັນແລະກັນ, ປະກາດພຣະກິດຕິຄຸນ, ຊ່ວຍເຫລືອໄພ່ພົນໃຫ້ດີພ້ອມ, ແລະ ໄຖ່ຄົນຕາຍທັງໝົດລວມກັນຢູ່ໃນພຣະວິຫານທີ່ສັກສິດ.”13
ເຊັ່ນດຽວກັນ, ໃນລະຫວ່າງກອງປະຊຸມໃຫຍ່ສາມັນດຽວກັນ, ປະທານແນວສັນໄດ້ສິດສອນວ່າ: “ແນ່ນອນ, ສິ່ງທີ່ສຳຄັນທີ່ສຸດຂອງການຟື້ນຟູ ແມ່ນພຣະວິຫານທີ່ສັກສິດ. ພິທີການ ແລະ ພັນທະສັນຍາທີ່ສັກສິດຂອງພຣະວິຫານ ເປັນສິ່ງຈຳເປັນຕໍ່ການກະກຽມຜູ້ຄົນເພື່ອຕ້ອນຮັບພຣະຜູ້ຊ່ວຍໃຫ້ລອດ ໃນການສະເດັດມາຄັ້ງທີສອງຂອງພຣະອົງ.”14
ການຟື້ນຟູອັນຕໍ່ເນື່ອງແມ່ນເຫັນໄດ້ຢ່າງແຈ້ງຊັດໂດຍການສ້າງ ແລະ ການອຸທິດພຣະວິຫານຫລາຍໆແຫ່ງໃນລະດັບທີ່ໄວຂຶ້ນກວ່າເກົ່າ. ຂະນະທີ່ເຮົາເຕົ້າໂຮມທັງສອງຟາກມ່ານ, ຂະນະທີ່ເຮົາເສຍສະລະເພື່ອທີ່ຈະຮັບໃຊ້ ແລະ ເຮັດໃຫ້ພຣະວິຫານເປັນສິ່ງສຳຄັນໃນຊີວິດຂອງເຮົານັ້ນ, ພຣະຜູ້ເປັນເຈົ້າກຳລັງສ້າງເຮົາຂຶ້ນຢ່າງແທ້ຈິງ—ພຣະອົງກຳລັງສ້າງຜູ້ຄົນແຫ່ງພັນທະສັນຍາຂອງພຣະອົງ.
ໂອ, ບັນລັງຈາກເບື້ອງບົນຈະມີສະຫງ່າລາສີສ່ຳໃດ
ສ່ອງແສງພຣະກິດຕິຄຸນແຫ່ງຄວາມຈິງ ແລະ ຄວາມຮັກ!
ເຈີດຈ້າດັ່ງແສງສຸລິຍາ
ສ່ອງທົ່ວທຸກແຜ່ນດິນມື້ນີ້.15
ຂ້າພະເຈົ້າເປັນພະຍານວ່າ ແສງພຣະກິດຕິຄຸນແຫ່ງຄວາມຈິງ ແລະ ຄວາມຮັກກຳລັງສ່ອງແສງຢ່າງເຈີດຈ້າໄປທັງທົ່ວໂລກໃນມື້ນີ້. ວຽກງານທີ່ໜ້າ “ງຶດງໍ້ແລ້ວງຶດງໍ້ອີກໂດຍບໍ່ໄດ້ຄາດຝັນ” ໄດ້ຖືກບອກໄວ້ລ່ວງໜ້າໂດຍສາດສະດາເອຊາຢາ16 ແລະ ໄດ້ເຫັນໂດຍນີໄຟ17 ກຳລັງເກີດຂຶ້ນໃນລະດັບທີ່ເລັ່ງດ່ວນ, ແມ່ນແຕ່ໃນຊ່ວງເວລາທີ່ທ້າທາຍນີ້. ດັ່ງທີ່ໂຈເຊັບ ສະມິດ ໄດ້ປະກາດຢ່າງພະຍາກອນໄວ້ແລ້ວວ່າ, “ມາດຕະຖານແຫ່ງຄວາມຈິງໄດ້ຖືກສ້າງຕັ້ງຂຶ້ນແລ້ວ; ແລະ ບໍ່ມີມືທີ່ຊົ່ວຮ້າຍໃດສາມາດຢຸດວຽກງານບໍ່ໃຫ້ກ້າວໜ້າໄດ້ ຈົນກວ່າຈຸດປະສົງຂອງພຣະເຈົ້າຈະສຳເລັດຄົບຖ້ວນ, ແລະ ພຣະເຢໂຮວາທີ່ຍິ່ງໃຫຍ່ຈະກ່າວວ່າ ວຽກງານສຳເລັດແລ້ວ.”18
ອ້າຍເອື້ອຍນ້ອງທັງຫລາຍ, ຂໍໃຫ້ເຮົາເຕັມໃຈ ແລະ ຕັດສິນໃຈໃນມື້ນີ້ ວ່າຈະຮ່ວມຕົວເຮົາເອງ ແລະ ຄອບຄົວຂອງເຮົາໃນການຟັງສຽງສະຫວັນ, ແມ່ນແຕ່ສຸລະສຽງຂອງພຣະຜູ້ຊ່ວຍໃຫ້ລອດຂອງເຮົາ. ຂໍໃຫ້ເຮົາເຮັດ ແລະ ຮັກສາພັນທະສັນຍາກັບພຣະເຈົ້າ, ຊຶ່ງຈະເຮັດໃຫ້ເຮົາໝັ້ນຄົງໃນເສັ້ນທາງທີ່ນຳໄປສູ່ທີ່ປະທັບຂອງພຣະອົງ, ແລະ ຂໍໃຫ້ເຮົາປິຕິຍິນດີຢູ່ໃນພອນທັງປວງຂອງແສງທີ່ສະຫງ່າລາສີ ແລະ ຄວາມຈິງແຫ່ງພຣະກິດຕິຄຸນຂອງພຣະອົງ. ໃນພຣະນາມຂອງພຣະເຢຊູຄຣິດ, ອາແມນ.