ການສິດສອນໃນວິທີຂອງພຣະຜູ້ຊ່ວຍໃຫ້ລອດ
ໜ້າທີ່ຮັບຜິດຊອບແມ່ນຂຶ້ນຢູ່ກັບເຮົາແຕ່ລະຄົນໂດຍກົງໃນການເຮັດຕາມຕົວຢ່າງຂອງພຣະອາຈານ ແລະ ສິດສອນເໝືອນດັ່ງພຣະອົງ.
ຄູສອນທີ່ປະເສີດ
ສອງສາມເດືອນຜ່ານມານີ້, ເພື່ອນຮ່ວມຫ້ອງຮຽນໃນອະດີດທີ່ມາຈາກເມືອງໂອເວີຕັນ, ລັດນີວາດາບ້ານເກີດຂອງຂ້າພະເຈົ້າ, ໄດ້ອອກຄວາມຄິດວ່າໃຫ້ພວກເຮົາລວມເງິນກັນເພື່ອຊື້ຂອງຂວັນຄຣິດສະມາດໃຫ້ຄູສອນຊັ້ນອະນຸບານຜູ້ເປັນທີ່ຮັກຂອງພວກເຮົາ, ຜູ້ທີ່ຫາກໍໄດ້ສະຫລອງວັນເກີດຄົບຮອບ 98 ປີຂອງເພິ່ນ. ເພິ່ນໄດ້ສອນພວກເຮົາໃຫ້ເປັນຄົນໃຈດີ, ເຖິງຄວາມສຳຄັນຂອງການນອນສວຍ, ຄວາມສຸກຂອງການດື່ມນົມ ແລະ ກິນເຂົ້າໜົມປັງກອບ, ແລະ ໃຫ້ຮັກຊຶ່ງກັນແລະກັນ. ຂໍຂອບໃຈຫລາຍໆ, ຊິດສະເຕີ ເດວິສ, ສຳລັບການເປັນຄູສອນທີ່ດີເດັ່ນ.
ຂ້າພະເຈົ້າກໍມີຄູສອນທີ່ປະເສີດອີກຄົນໜຶ່ງຕອນເຂົ້າໂຮງຮຽນວິທະຍາໄລ ຣິກສ໌ ຫລາຍປີທີ່ຜ່ານມາ. ຂ້າພະເຈົ້າໄດ້ກຳລັງກຽມພ້ອມເພື່ອໄປຮັບໃຊ້ເຜີຍແຜ່ ແລະ ໄດ້ຄິດວ່າມັນຈະເປັນປະໂຫຍດໃນການເຂົ້າຮ່ວມຫ້ອງຮຽນການກຽມພ້ອມເປັນຜູ້ສອນສາດສະໜາ. ສິ່ງທີ່ຂ້າພະເຈົ້າປະສົບພົບພໍ້ໄດ້ປ່ຽນແປງຊີວິດຂອງຂ້າພະເຈົ້າ.
ນັບແຕ່ມື້ທຳອິດຂອງຫ້ອງຮຽນ, ຂ້າພະເຈົ້າສັງເກດໄດ້ວ່າຕົນເອງໄດ້ຢູ່ຕໍ່ໜ້າຄູສອນທີ່ຊຳນານຄົນໜຶ່ງ. ຄູສອນຄົນນັ້ນແມ່ນບຣາເດີ ແອັຟ ມາວວິນ ແຮມມອນ. ຂ້າພະເຈົ້າຮູ້ວ່າ ບຣາເດີ ແຮມມອນ ຮັກພຣະຜູ້ເປັນເຈົ້າ ແລະ ຮັກຂ້າພະເຈົ້າ. ຂ້າພະເຈົ້າສາມາດເຫັນມັນໄດ້ໃນສີໜ້າຂອງເພິ່ນ ແລະ ໃນຄຳເວົ້າຂອງເພິ່ນ. ເວລາທີ່ເພິ່ນສິດສອນ, ພຣະວິນຍານໄດ້ໃຫ້ຄວາມຮູ້ແກ່ຈິດໃຈຂອງຂ້າພະເຈົ້າ. ເພິ່ນໄດ້ສິດສອນຄຳສອນ, ແຕ່ເພິ່ນໄດ້ເຊື້ອເຊີນໃຫ້ຂ້າພະເຈົ້າຮຽນຮູ້ມັນດ້ວຍຕົວເອງເຊັ່ນກັນ. ການເຊື້ອເຊີນນັ້ນໄດ້ຊ່ວຍໃຫ້ຂ້າພະເຈົ້າເຫັນໜ້າທີ່ຮັບຜິດຊອບຂອງຕົນເອງຢ່າງແຈ່ມແຈ້ງໃນການຮຽນຮູ້ຄຳສອນຂອງພຣະຜູ້ເປັນເຈົ້າສຳລັບຕົວຂອງຂ້າພະເຈົ້າເອງ. ປະສົບການນັ້ນໄດ້ປ່ຽນແປງຂ້າພະເຈົ້າຕະຫລອດໄປ. ຂອບໃຈ, ບຣາເດີ ແຮມມອນ, ສຳລັບການສິດສອນໃນວິທີຂອງພຣະຜູ້ຊ່ວຍໃຫ້ລອດ.
ອ້າຍເອື້ອຍນ້ອງທັງຫລາຍ, ທຸກຄົນສົມຄວນທີ່ຈະໄດ້ຮັບປະສົບການຮຽນຮູ້ແບບນີ້ທັງຢູ່ໃນບ້ານ ແລະ ຢູ່ທີ່ໂບດ.
ຄຳນຳຂອງປຶ້ມ ຈົ່ງຕາມເຮົາມາ ໃຫ້ວິໃສທັດເຖິງວິທີທີ່ຈະສິດສອນເໝືອນດັ່ງພຣະຄຣິດໄດ້ແນວໃດ. “ຄວາມມຸ້ງໝາຍຂອງການຮຽນຮູ້ ແລະ ການສິດສອນພຣະກິດຕິຄຸນຂອງເຮົາທັງໝົດ,” ມັນກ່າວ, “ແມ່ນເພື່ອເຮັດໃຫ້ຄວາມເຫລື້ອມໃສຂອງເຮົາເລິກເຊິ່ງຕໍ່ພຣະເຢຊູຄຣິດ ແລະ ຊ່ວຍເຮົາໃຫ້ກາຍເປັນເໝືອນດັ່ງພຣະອົງຫລາຍກວ່າເກົ່າ. ການຮຽນຮູ້ພຣະກິດຕິຄຸນທີ່ຈະເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາ ແລະ ນຳພາໄປສູ່ການເຫລື້ອມໃສທີ່ໜ້າອັດສະຈັນໃຈ ຈະບໍ່ເກີດຂຶ້ນໃນທັນທີ. ມັນຂະຫຍາຍຈາກຫ້ອງຮຽນເຂົ້າໄປສູ່ໃຈຂອງບຸກຄົນ ແລະ ເຂົ້າເຖິງບ້ານເຮືອນ.”1
ພຣະຄຳພີໄດ້ບົ່ງບອກວ່າ ການປະຕິບັດສາດສະໜາກິດຂອງພຣະຜູ້ຊ່ວຍໃຫ້ລອດໃນອາເມຣິກາສະໄໝບູຮານ ໄດ້ສົ່ງຜົນສະທ້ອນ ແລະ ຂະຫຍາຍເປັນວົງກວ້າງຕໍ່ “ຜູ້ຄົນທັງໝົດທົ່ວຜືນແຜ່ນດິນໄດ້ປ່ຽນໃຈເຫລື້ອມໃສໃນພຣະຜູ້ເປັນເຈົ້າ, ທັງຊາວນີໄຟ ແລະ ຊາວເລມັນ, ແລະ ບໍ່ມີການຂັດແຍ້ງ ແລະ ການໂຕ້ຖຽງກັນໃນບັນດາພວກເຂົາ, ແລະ ທຸກຄົນກໍໄດ້ປະຕິບັດຕໍ່ກັນໂດຍທ່ຽງທຳ.”2
ເຮັດແນວໃດການສິດສອນຂອງເຮົາຈຶ່ງຈະມີຜົນກະທົບທີ່ຄ້າຍຄືກັນນີ້ ຕໍ່ຄົນທີ່ເຮົາຮັກ? ເຮົາຈະສາມາດສິດສອນເໝືອນດັ່ງພຣະຜູ້ຊ່ວຍໃຫ້ລອດ ແລະ ຊ່ວຍເຫລືອຄົນອື່ນໃຫ້ປ່ຽນໃຈເຫລື້ອມໃສຢ່າງເລິກເຊິ່ງໄດ້ແນວໃດ? ຂ້າພະເຈົ້າຂໍສະເໜີຄຳແນະນຳສອງສາມຢ່າງກັບທ່ານ.
ເອົາແບບຢ່າງຂອງພຣະຜູ້ຊ່ວຍໃຫ້ລອດ
ສິ່ງທຳອິດ ແລະ ສຳຄັນທີ່ສຸດ, ຍອມຮັບເອົາການຮຽນຮູ້ທັງໝົດທີ່ທ່ານສາມາດເຮັດໄດ້ກ່ຽວກັບພຣະອາຈານເອງ. ພຣະອົງໄດ້ສະແດງຄວາມຮັກຕໍ່ຄົນອື່ນແນວໃດ? ເຂົາເຈົ້າຮູ້ສຶກເຖິງຫຍັງ ເມື່ອພຣະອົງສິດສອນ? ພຣະອົງໄດ້ສິດສອນຫຍັງແດ່? ພຣະອົງຄາດຫວັງຫຍັງຈາກຄົນທີ່ພຣະອົງສິດສອນ? ຫລັງຈາກທີ່ທ່ານໄດ້ຄົ້ນຄວ້າຄຳຖາມເຫລົ່ານີ້, ໃຫ້ປະເມີນ ແລະ ປັບປ່ຽນວິທີສິດສອນຂອງທ່ານ ເພື່ອໃຫ້ເປັນເໝືອນດັ່ງພຣະອົງຫລາຍຂຶ້ນ.
ສາດສະໜາຈັກໄດ້ຈັດຫາແຫລ່ງຊ່ວຍສິດສອນຫລາຍຢ່າງໃນແອັບຫ້ອງສະໝຸດພຣະກິດຕິຄຸນ ແລະ ມີຢູ່ທີ່ ChurchofJesusChrist.org. ໜຶ່ງໃນແຫລ່ງເຫລົ່ານັ້ນແມ່ນ Teaching in the Savior’s Way. ຂ້າພະເຈົ້າເຊື້ອເຊີນທ່ານໃຫ້ອ່ານ ແລະ ສຶກສາທຸກຖ້ອຍຄຳໃນນັ້ນ. ຫລັກການຂອງມັນຈະຊ່ວຍຄວາມພະຍາຍາມຂອງທ່ານໃນການເປັນເໝືອນດັ່ງພຣະຄຣິດຫລາຍຂຶ້ນໃນການສິດສອນຂອງທ່ານ.
ປົດປ່ອຍພະລັງຂອງຄອບຄົວອອກໄປ
ຄຳແນະນຳຂໍ້ຕໍ່ໄປຂອງຂ້າພະເຈົ້າສາມາດສະແດງໃຫ້ເຫັນຈາກປະສົບການໜຶ່ງທີ່ຂ້າພະເຈົ້າມີໃນສອງສາມເດືອນທີ່ຜ່ານມາຕອນຂ້າພະເຈົ້າໄດ້ໄປແວ່ຫລິ້ນນຳເພື່ອນຮັກຂອງຂ້າພະເຈົ້າຄົນໜຶ່ງ. ຂ້າພະເຈົ້າໄດ້ຍິນສຽງພັນລະຍາຂອງລາວກຳລັງເວົ້າກັບຄົນໃດຄົນໜຶ່ງຢູ່ໃນເຮືອນ, ດັ່ງນັ້ນຂ້າພະເຈົ້າຈຶ່ງໄດ້ສັ່ງລາລາວຢ່າງໄວເພື່ອວ່າລາວຈະໄດ້ກັບຄືນໄປຫາຄອບຄົວຂອງລາວ.
ປະມານໜຶ່ງຊົ່ວໂມງຈາກນັ້ນ ຂ້າພະເຈົ້າໄດ້ຮັບຂໍ້ຄວາມຈາກພັນລະຍາທີ່ໜ້າຮັກຂອງລາວວ່າ: “ບຣາເດີ ນິວແມນ, ຂອບໃຈທີ່ເຈົ້າໄດ້ມາແວ່ຫລິ້ນນຳ. ພວກເຮົາຄວນເຊີນເຈົ້າໃຫ້ເຂົ້າມາໃນເຮືອນ, ແຕ່ຂ້ອຍຢາກເລົ່າໃຫ້ເຈົ້າຟັງວ່າພວກເຮົາກຳລັງເຮັດຫຍັງຢູ່ຕອນນັ້ນ. ນັບຕັ້ງແຕ່ການແຜ່ລະບາດ ພວກເຮົາໄດ້ສົນທະນາກັບລູກໆຜູ້ໃຫຍ່ຂອງພວກເຮົາທຸກວັນອາທິດກ່ຽວກັບປຶ້ມ ຈົ່ງຕາມເຮົາມາ ຜ່ານທາງວິດີໂອຊູມ. ມັນຊ່ວຍເຫລືອຢ່າງເປັນປະຕິຫານແທ້ໆ. ຂ້ອຍຄິດວ່າມັນແມ່ນຄັ້ງທຳອິດທີ່ລູກສາວຂອງພວກເຮົາອ່ານພຣະຄຳພີມໍມອນດ້ວຍຕົວເອງ. ມື້ນີ້ເປັນບົດຮຽນສຸດທ້າຍກ່ຽວກັບພຣະຄຳພີມໍມອນ ແລະ ພວກເຮົາໃກ້ຈະຈົບບົດຮຽນພໍດີຕອນທີ່ເຈົ້າມາຮອດ. … ຂ້ອຍຄິດວ່າເຈົ້າອາດຈະສົນໃຈຢາກໄດ້ຍິນກ່ຽວກັບປຶ້ມ ຈົ່ງຕາມເຮົາມາ, ວິດີໂອຊູມ, ແລະ ການແຜ່ລະບາດໄດ້ໃຫ້ໂອກາດທີ່ເໝາະສົມສຳລັບການປ່ຽນໃຈດວງໜຶ່ງແນວໃດ. … ມັນເຮັດໃຫ້ຂ້ອຍສົງໄສວ່າມີປະຕິຫານນ້ອຍໆຈັກຢ່າງທີ່ໄດ້ເກີດຂຶ້ນໃນຊ່ວງເວລາທີ່ບໍ່ປົກກະຕິນີ້.”
ເລື່ອງນີ້ເຮັດໃຫ້ຂ້າພະເຈົ້າຮູ້ວ່າຄຳສັນຍາທີ່ປະທານຣະໂຊ ເອັມ ແນວສັນ ໄດ້ເວົ້າໄວ້ໃນເດືອນຕຸລາ ປີ 2018 ນັ້ນໄດ້ເກີດເປັນຈິງ. ເພິ່ນໄດ້ເວົ້າວ່າການເຮັດໃຫ້ບ້ານເຮືອນເປັນສູນກາງ, ໂດຍທີ່ມີສາດສະໜາຈັກສະໜັບສະໜູນການຮຽນຮູ້ພຣະກິດຕິຄຸນ “ຈະປ່ອຍພະລັງຂອງຄອບຄົວອອກໄປ, ເມື່ອແຕ່ລະຄອບຄົວປະຕິບັດດ້ວຍຄວາມເອົາໃຈໃສ່ ແລະ ດ້ວຍຄວາມຮອບຄອບ ເພື່ອປ່ຽນບ້ານເຮືອນຂອງຕົນ ໃຫ້ເປັນສະຖານທີ່ສັກສິດແຫ່ງສັດທາ. ຂ້າພະເຈົ້າສັນຍາວ່າ ເມື່ອເຮົາທຳງານຢ່າງພາກພຽນ ເພື່ອສ້ອມແປງບ້ານເຮືອນຂອງເຮົາ ໃຫ້ເປັນສູນກາງການຮຽນຮູ້ພຣະກິດຕິຄຸນ, ແລ້ວເມື່ອເວລາຜ່ານໄປ ວັນຊະບາໂຕ ຂອງທ່ານ ຈະເປັນມື້ທີ່ມີຄວາມສຸກຫລາຍ. ລູກໆ ຂອງທ່ານ ຈະຕື່ນເຕັ້ນ ທີ່ຈະຮຽນຮູ້ ແລະ ດຳລົງຊີວິດຕາມຄຳສອນຂອງພຣະຜູ້ຊ່ວຍໃຫ້ລອດ. … ການປ່ຽນແປງໃນຄອບຄົວຂອງທ່ານ ຈະເປັນສິ່ງທີ່ໜ້າຕື່ນເຕັ້ນ ແລະ ຄ້ຳຈູນ.”3 ຊ່າງເປັນຄຳສັນຍາທີ່ງົດງາມແທ້ໆ!
ເພື່ອປ່ຽນແປງຊີວິດຢ່າງແທ້ຈິງ, ການປ່ຽນໃຈເຫລື້ອໃສໃນພຣະເຢຊູຄຣິດຈຳຕ້ອງຮ່ວມດ້ວຍຈິດວິນຍານຂອງເຮົາທັງໝົດ ແລະ ຊຶມຊັບເຂົ້າໄປໃນທຸກຊອກທຸກມຸມໃນຊີວິດຂອງເຮົາ. ດ້ວຍເຫດນີ້ມັນຈຳເປັນຕ້ອງສຸມໃສ່ທີ່ສູນກາງຂອງຊີວິດຂອງເຮົາຄື—ຄອບຄົວ ແລະ ບ້ານເຮືອນຂອງເຮົາ.
ຈື່ຈຳວ່າການປ່ຽນໃຈເຫລື້ອມໃສເປັນເລື່ອງສ່ວນຕົວ
ຄຳແນະນຳສຸດທ້າຍຂອງຂ້າພະເຈົ້າຄືໃຫ້ຈື່ຈຳວ່າການປ່ຽນໃຈເຫລື້ອມໃສຈຳຕ້ອງມາຈາກຂ້າງໃນ. ດັ່ງທີ່ສະແດງໃຫ້ເຫັນໃນຄຳອຸປະມາຂອງຍິງສາວບໍລິສຸດສິບຄົນ, ເຮົາບໍ່ສາມາດເອົານ້ຳມັນແຫ່ງການປ່ຽນໃຈເຫລື້ອມໃສຂອງເຮົາໃຫ້ຄົນໃດຄົນໜຶ່ງ, ເຖິງແມ່ນວ່າເຮົາຢາກມອບໃຫ້ຫລາຍປານໃດກໍຕາມ. ດັ່ງທີ່ແອວເດີ ເດວິດ ເອ ແບ໊ດນາ ໄດ້ສິດສອນວ່າ: “ນ້ຳມັນທີ່ມີຄ່າປະເສີດເລີດລ້ຳນີ້ ຈະໄດ້ຮັບເທື່ອລະຢົດ… ດ້ວຍຄວາມອົດທົນ ແລະ ຄວາມສະໝ່ຳສະເໝີ. ຈະເປັນດ້ວຍວິທີງ່າຍໆບໍ່ໄດ້; ຈະຕຽມແບບຟ້າວຟັ່ງໃນນາທີສຸດທ້າຍບໍ່ໄດ້.”4
ປຶ້ມ ຈົ່ງຕາມເຮົາມາ ແມ່ນອີງຕາມຄວາມຈິງນັ້ນ. ຂ້າພະເຈົ້າປຽບທຽບມັນກັບທູດຜູ້ທີ່ຊ່ວຍນີໄຟໃຫ້ຮຽນຮູ້ກ່ຽວກັບພຣະເຢຊູຄຣິດໂດຍເວົ້າວ່າ, “ເບິ່ງເຖີດ!”5 ເຊັ່ນດຽວກັນກັບທູດອົງນັ້ນ, ປຶ້ມ ຈົ່ງຕາມເຮົາມາ ເຊື້ອເຊີນເຮົາໃຫ້ເບິ່ງໃນພຣະຄຳພີ ແລະ ຖ້ອຍຄຳຂອງສາດສະດາໃນປະຈຸບັນເພື່ອຈະໄດ້ພົບເຫັນພຣະຜູ້ຊ່ວຍໃຫ້ລອດ ແລະ ຟັງພຣະອົງ. ເຊັ່ນດຽວກັນກັບນີໄຟ, ເຮົາຈະຖືກສິດສອນໂດຍພຣະວິນຍານເປັນສ່ວນຕົວຂະນະທີ່ອ່ານ ແລະ ໄຕ່ຕອງພຣະຄຳຂອງພຣະເຈົ້າ. ປຶ້ມ ຈົ່ງຕາມເຮົາມາ ເປັນໄມ້ກະດານໂດດນ້ຳທີ່ຊ່ວຍໃຫ້ເຮົາແຕ່ລະຄົນດຳເລິກລົງໄປໃນນ້ຳທີ່ປະກອບດ້ວຍຊີວິດແຫ່ງຄຳສອນຂອງພຣະຄຣິດ.
ໜ້າທີ່ຮັບຜິດຊອບຂອງພໍ່ແມ່ກໍຄ້າຍຄືກັນໃນຫລາຍດ້ານ. ລູກໆສືບທອດຫລາຍສິ່ງຫລາຍຢ່າງຈາກພໍ່ແມ່ຂອງເຂົາ, ແຕ່ວ່າປະຈັກພະຍານບໍ່ແມ່ນໜຶ່ງໃນນັ້ນ. ເຮົາບໍ່ສາມາດມອບປະຈັກພະຍານໃຫ້ແກ່ລູກໆຂອງເຮົາ ຄືກັນກັບທີ່ເຮົາບໍ່ສາມາດບັງຄັບໃຫ້ເມັດພືດເຕີບໂຕໄດ້. ແຕ່ເຮົາສາມາດໃຫ້ການບຳລຸງລ້ຽງ, ດ້ວຍດິນທີ່ດີ, ປາດສະຈາກຕົ້ນໜາມທີ່ອາດຈະ “ຫຸ້ມຮັດພຣະທຳ.” ເຮົາສາມາດພະຍາຍາມສ້າງສະພາບທີ່ເໝາະສົມທີ່ສຸດເພື່ອວ່າລູກໆຂອງເຮົາ—ແລະ ຄົນອື່ນໆທີ່ເຮົາຮັກ—ຈະສາມາດມີບ່ອນສຳລັບເມັດພືດ, “[ໄດ້ຍິນ] ພຣະທຳ, ແລະ [ເຂົ້າໃຈ] ພຣະທຳນັ້ນ”6 ແລະ ຄົ້ນພົບດ້ວຍຕົວຂອງເຂົາເອງ “ວ່າມັນແມ່ນເມັດດີ.”7
ເມື່ອຫລາຍປີກ່ອນ, ທ້າວແຈັກລູກຊາຍຂອງຂ້າພະເຈົ້າ ແລະ ຂ້າພະເຈົ້າໄດ້ມີໂອກາດໄປຕີກ໋ອບທີ່ສະໜາມກ໋ອບເມືອງເຊນ ແອນດຣູ ປະເທດສະກອດແລນ, ບ່ອນທີ່ເກມກິລາກ໋ອບໄດ້ເລີ່ມຕົ້ນ. ມັນອັດສະຈັນຫລາຍ! ເມື່ອຂ້າພະເຈົ້າກັບຄືນມາ ຂ້າພະເຈົ້າໄດ້ພະຍາຍາມຖ່າຍທອດປະສົບການສຸດຍອດນັ້ນໃຫ້ກັບຄົນອື່ນ. ແຕ່ຂ້າພະເຈົ້າກໍເຮັດບໍ່ສຳເລັດ. ທັງຮູບຖ່າຍ, ວິດີໂອ, ແລະ ຄຳອະທິບາຍທີ່ດີທີ່ສຸດຂອງຂ້າພະເຈົ້າກໍບໍ່ພຽງພໍ. ສຸດທ້າຍຂ້າພະເຈົ້າສັງເກດໄດ້ວ່າ ວິທີທີ່ຈະໃຫ້ຄົນໃດຄົນໜຶ່ງຮູ້ເຖິງຄວາມຍິ່ງໃຫຍ່ຂອງເມືອງເຊນ ແອນດຣູ ແມ່ນຕ້ອງໄດ້ປະສົບພົບພໍ້ດ້ວຍຕົວເອງ—ເຫັນສະໜາມກ໋ອບທີ່ກວ້າງໃຫຍ່, ສູດອາກາດ, ສຳຜັດສາຍລົມພັດໃສ່ໃບໜ້າຄ່ອຍໆ, ແລະ ຕີລູກກ໋ອບພາດອອກນອກສະໜາມໄປຫາດິນຊາຍ ແລະ ເຂົ້າພຸ່ມໄມ້ຈັກສອງສາມເທື່ອ, ຊຶ່ງພວກເຮົາກໍເຮັດໄດ້ດີ.
ເຊັ່ນດຽວກັນກັບພຣະຄຳຂອງພຣະເຈົ້າ. ເຮົາສາມາດສິດສອນມັນ, ເຮົາສາມາດສັ່ງສອນມັນ, ເຮົາສາມາດອະທິບາຍມັນ. ເຮົາສາມາດເວົ້າລົມກ່ຽວກັບມັນ, ເຮົາສາມາດບັນລະຍາຍມັນ, ແມ່ນແຕ່ເຮົາຍັງເປັນປະຈັກພະຍານເຖິງມັນໄດ້. ແຕ່ຈົນກວ່າຄົນຜູ້ໜຶ່ງຮູ້ສຶກເຖິງຄວາມສັກສິດຂອງພຣະຄຳຂອງພຣະເຈົ້າກັ່ນລົງມາເທິງຈິດວິນຍານຂອງເຂົາເໝືອນດັ່ງຢາດນ້ຳຄ້າງຈາກສະຫວັນຜ່ານທາງອຳນາດຂອງພຣະວິນຍານບໍລິສຸດ,8 ມັນກໍຈະເປັນຄືກັນກັບໄດ້ເບິ່ງໂປສຄາດ ຫລື ຮູບຖ່າຍວັນພັກຜ່ອນຂອງຄົນອື່ນເທົ່ານັ້ນໃນເວລານີ້. ທ່ານຕ້ອງໄປທີ່ນັ້ນດ້ວຍຕົວເອງ. ການປ່ຽນໃຈເຫລື້ອມໃສເປັນການເດີນທາງສ່ວນຕົວ—ການເດີນທາງແຫ່ງການເຕົ້າໂຮມ.
ທຸກຄົນທີ່ສິດສອນໃນບ້ານ ແລະ ທີ່ໂບດ, ສາມາດເປີດໂອກາດໃຫ້ກັບຄົນອື່ນໃຫ້ມີປະສົບການທາງວິນຍານດ້ວຍຕົວຂອງເຂົາເອງ. ຜ່ານທາງປະສົບການເຫລົ່ານີ້, ເຂົາເຈົ້າຈະໄດ້ “ຮູ້ຈັກຄວາມຈິງຂອງທຸກເລື່ອງ” ດ້ວຍຕົວຂອງເຂົາເອງ.9 ປະທານແນວສັນໄດ້ສິດສອນວ່າ, “ຖ້າຫາກທ່ານມີຄຳຖາມທີ່ຈິງໃຈກ່ຽວກັບພຣະກິດຕິຄຸນ ຫລື ສາດສະໜາຈັກ, ຂະນະທີ່ທ່ານເລືອກໃຫ້ພຣະເຈົ້າໄຊຊະນະ, ທ່ານຈະຖືກນຳພາໄປພົບ ແລະ ເຂົ້າໃຈຄວາມຈິງທີ່ແນ່ນອນ ແລະ ນິລັນດອນ ທີ່ຈະນຳພາຊີວິດ ແລະ ຊ່ວຍທ່ານໃຫ້ຍຶດໝັ້ນຢູ່ໃນເສັ້ນທາງແຫ່ງພັນທະສັນຍາ.”10
ປັບປຸງການສິດສອນໃຫ້ດີຂຶ້ນເລື້ອຍໆ
ຂ້າພະເຈົ້າເຊື້ອເຊີນຜູ້ນຳ ແລະ ຄູສອນໃນທຸກອົງການຂອງສາດສະໜາຈັກໃຫ້ປຶກສາຫາລືກັນກັບຜູ້ເປັນພໍ່ແມ່ ແລະ ຊາວໜຸ່ມເພື່ອປັບປຸງການສິດສອນໃຫ້ດີຂຶ້ນເລື້ອຍໆໃນທຸກລະດັບ—ໃນສະເຕກ, ໃນຫວອດ, ແລະ ໃນບ້ານ. ສິ່ງນີ້ຈະສຳເລັດໂດຍການສິດສອນຄຳສອນ ແລະ ເຊື້ອເຊີນພຣະວິນຍານໃຫ້ມາເຕີມເຕັມການສົນທະນາກ່ຽວກັບຄວາມຈິງທີ່ພຣະວິນຍານບໍລິສຸດໄດ້ສິດສອນເຮົາໃນຕອນທີ່ສຶກສາດ້ວຍຕົວເອງໃນເວລາມິດງຽບ.
ເພື່ອນທີ່ຮັກແພງໃນພຣະຄຣິດຂອງຂ້າພະເຈົ້າ, ໜ້າທີ່ຮັບຜິດຊອບແມ່ນຂຶ້ນຢູ່ກັບເຮົາແຕ່ລະຄົນໂດຍກົງໃນການເຮັດຕາມຕົວຢ່າງຂອງພຣະອາຈານ ແລະ ສິດສອນເໝືອນດັ່ງພຣະອົງ. ວິທີຂອງພຣະອົງເປັນວິທີທີ່ຖືກຕ້ອງ! ຂະນະທີ່ເຮົາເຮັດຕາມພຣະອົງ “ເມື່ອພຣະອົງສະເດັດມາ ເຮົາຈະເປັນເໝືອນດັ່ງພຣະອົງ, ເພາະວ່າເຮົາຈະເຫັນພຣະອົງຢ່າງທີ່ພຣະອົງເປັນຢູ່ນັ້ນ; ເພື່ອເຮົາຈະມີຄວາມຫວັງນີ້; ເພື່ອເຮົາຈະຖືກເຮັດໃຫ້ບໍລິສຸດຄືກັນກັບພຣະອົງທີ່ບໍລິສຸດ.”11 ໃນພຣະນາມຂອງພຣະອົງຜູ້ໄດ້ຟື້ນຄືນພຣະຊົນ, ພຣະອາຈານເອງ, ພຣະເຢຊູຄຣິດ, ອາແມນ.