ໂຄວິດ-19 ແລະ ພຣະວິຫານ
ຈົ່ງຮັກສາພັນທະສັນຍາ ແລະ ພອນຂອງພຣະວິຫານໄວ້ໃນຈິດໃຈຂອງທ່ານ. ຈົ່ງຈິງໃຈຕໍ່ພັນທະສັນຍາທີ່ທ່ານເຮັດໄວ້.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ພວກເຮົາໄດ້ຊື່ນຊົມກັບພອນທາງວິນຍານຢ່າງຫລວງຫລາຍແທ້ໆ. ຂ້າພະເຈົ້າກະຕັນຍູຫລາຍສຳລັບການອະທິຖານ, ຂ່າວສານ, ແລະ ສຽງເພງຂອງກອງປະຊຸມໃຫຍ່ຄັ້ງນີ້. ຂອບໃຈທຸກຄົນທີ່ມາຮ່ວມກັບພວກເຮົາ, ບໍ່ວ່າທ່ານຈະຢູ່ໃສກໍຕາມ.
ໃນຕົ້ນປີກາຍນີ້, ຍ້ອນການລະບາດຂອງພະຍາດໂຄວິດ-19 ແລະ ຄວາມປາດຖະໜາຂອງພວກເຮົາທີ່ຈະເປັນເພື່ອນປະຊາກອນທີ່ດີ, ພວກເຮົາຈຶ່ງໄດ້ທຳການຕັດສິນໃຈທີ່ສຳຄັນ ເພື່ອປິດພຣະວິຫານທຸກແຫ່ງຊົ່ວຄາວ. ໃນຊ່ວງໄລຍະທີ່ໄດ້ປິດພຣະວິຫານຢູ່ນັ້ນ, ພວກເຮົາຮູ້ສຶກໄດ້ຮັບການດົນໃຈໃຫ້ເປີດພຣະວິຫານເທື່ອລະນ້ອຍ ໂດຍໃຊ້ຄວາມລະມັດລະວັງ. ບັດນີ້ພຣະວິຫານຈະຖືກເປີດຄືນ ແບບສີ່ໄລຍະ, ໂດຍການປະຕິບັດຕາມຂໍ້ບັງຄັບຂອງຝ່າຍລັດຖະບານໃນທ້ອງຖິ່ນ ແລະ ຕາມລະບຽບເລື່ອງຄວາມປອດໄພ.
ສຳລັບພຣະວິຫານໃນໄລຍະທີ 1, ຄູ່ຄອງທີ່ມີຄ່າຄວນ ຜູ້ໄດ້ຮັບຂອງປະທານສັກສິດເພື່ອຕົວເອງແລ້ວ ສາມາດຜະນຶກເຂົ້າກັນເປັນສາມີ ແລະ ພັນລະຍາໄດ້.
ສຳລັບພຣະວິຫານໃນໄລຍະທີ 2, ທຸກພິທີການສຳລັບຜູ້ທີ່ມີຊີວິດຢູ່ຈະສາມາດເຮັດໄດ້, ລວມທັງການຮັບເອົາຂອງປະທານສັກສິດໃຫ້ກັບຕົວເອງ, ການຜະນຶກສາມີພັນລະຍາ, ແລະ ການຜະນຶກລູກເຂົ້າກັບພໍ່ແມ່. ເມື່ອບໍ່ດົນມານີ້ພວກເຮົາໄດ້ດັດແປງແນວທາງຊີ້ນຳຂອງໄລຍະທີ 2 ແລະ ອະນຸຍາດໃຫ້ຊາວໜຸ່ມຂອງເຮົາ, ສະມາຊິກໃໝ່, ແລະ ຄົນອື່ນໆທີ່ມີໃບຮັບຮອງເຂົ້າພຣະວິຫານທີ່ຈຳກັດ ສາມາດຮັບບັບຕິສະມາແທນບັນພະບຸລຸດຂອງເຂົາເຈົ້າໄດ້.
ສຳລັບພຣະວິຫານໃນໄລຍະທີ 3, ຜູ້ທີ່ໄດ້ເຮັດການນັດໝາຍລ່ວງໜ້າ ບໍ່ພຽງແຕ່ສາມາດເຂົ້າຮ່ວມພິທີການສຳລັບຜູ້ທີ່ມີຊີວິດຢູ່ເທົ່ານັ້ນ ແຕ່ຍັງສາມາດເຮັດພິທີການແທນບັນພະບຸລຸດທີ່ລ່ວງລັບໄປແລ້ວນຳອີກ.
ໄລຍະທີ 4 ແມ່ນການກັບໄປເຮັດກິດຈະກຳຂອງພຣະວິຫານໄດ້ທຸກຢ່າງ.
ພວກເຮົາກະຕັນຍູສຳລັບການຮັບໃຊ້ດ້ວຍຄວາມອົດທົນ ແລະ ການອຸທິດຕົນຂອງທ່ານ ໃນຊ່ວງໄລຍະທີ່ມີການປ່ຽນແປງ ແລະ ທ້າທາຍນີ້. ຂ້າພະເຈົ້າອະທິຖານວ່າ ທ່ານຈະມີຄວາມປາດຖະໜາທີ່ຈະນະມັດສະການ ແລະ ຮັບໃຊ້ຢູ່ໃນພຣະວິຫານຫລາຍຂຶ້ນກວ່າເກົ່າໃນເວລານີ້.
ທ່ານອາດສົງໄສວ່າ ເຮົາຈະສາມາດກັບຄືນໄປພຣະວິຫານເມື່ອໃດ. ຄຳຕອບແມ່ນ: ພຣະວິຫານຂອງທ່ານຈະເປີດເມື່ອຝ່າຍລັດຖະບານໃນທ້ອງຖິ່ນຍົກເລີກຂໍ້ບັງຄັບ. ເມື່ອສະຖານະການເລື່ອງພະຍາດໂຄວິດ-19 ຢູ່ໃນເຂດຂອງທ່ານ ຢູ່ໃນຂັ້ນປອດໄພ, ແລ້ວພຣະວິຫານຂອງທ່ານຈະເປີດຄືນໃໝ່. ຈົ່ງເຮັດທຸກສິ່ງທີ່ທ່ານສາມາດເຮັດໄດ້ ເພື່ອຊ່ວຍໃຫ້ຈຳນວນໂຄວິດມີໜ້ອຍລົງຢູ່ໃນເຂດຂອງທ່ານ ເພື່ອວ່າທ່ານຈະໄດ້ກັບຄືນໄປພຣະວິຫານໄວໆ.
ສ່ວນເວລານີ້, ຈົ່ງຮັກສາພັນທະສັນຍາ ແລະ ພອນຂອງພຣະວິຫານໄວ້ໃນຈິດໃຈຂອງທ່ານ. ຈົ່ງຈິງໃຈຕໍ່ພັນທະສັນຍາທີ່ທ່ານເຮັດໄວ້.
ເຮົາກຳລັງສ້າງສາອະນາຄົດຢູ່ໃນເວລານີ້! ມີພຣະວິຫານສີ່ສິບເອັດແຫ່ງທີ່ກຳລັງຢູ່ໃນການກໍ່ສ້າງ ຫລື ສ້ອມແປງບຸລະນະ. ພຽງແຕ່ປີກາຍນີ້ເທົ່ານັ້ນ, ທ່າມກາງການລະບາດ, ພວກເຮົາໄດ້ທຳພິທີອຸທິດທີ່ດິນເພື່ອສ້າງພຣະວິຫານໃໝ່ 21 ແຫ່ງ!
ພວກເຮົາຢາກສ້າງບ້ານຂອງພຣະຜູ້ເປັນເຈົ້າໃຫ້ຢູ່ໃກ້ສະມາຊິກຂອງພວກເຮົາຫລາຍຂຶ້ນ, ເພື່ອວ່າເຂົາເຈົ້າຈະໄດ້ມີໂອກາດໄປພຣະວິຫານເລື້ອຍໆ ເທົ່າທີ່ສະຖານະການຈະເອື້ອອຳນວຍ.
ຂະນະທີ່ຂ້າພະເຈົ້າປະກາດການວາງແຜນກໍ່ສ້າງພຣະວິຫານຕື່ມອີກ 20 ແຫ່ງ, ຂ້າພະເຈົ້າໄຕ່ຕອງ ແລະ ສັນລະເສີນຜູ້ບຸກເບີກ—ໃນອະດີດ ແລະ ປະຈຸບັນ—ຜູ້ໄດ້ອຸທິດຖວາຍຊີວິດ ເພື່ອຊ່ວຍສ້າງປະຫວັດສາດໃນປະຈຸບັນນີ້. ພຣະວິຫານໃໝ່ຈະຖືກສ້າງຂຶ້ນໃນສະຖານທີ່ດັ່ງຕໍ່ໄປນີ້: ອໍຊະໂລ, ນອກແວ; ບຣັດໂຊສ໌, ແບນຊິກ; ວິແອນນາ, ໂອຕຣິດ; ຄູມາສີ, ການາ; ເບຣາ, ໂມຊຳບິກ; ເຄບທາວ, ອາຟຣິກາໃຕ້; ສິງກະໂປ, ສາທາລະນະລັດສິງກະໂປ; ເບໂລ ໂຮຣິໂຊນເທ, ບຣາຊິນ; ຄາລີ, ໂກໂລມບີ; ເກເຣ່ຕາໂຣ, ແມັກຊິໂກ; ຕໍເຣໂອ່ນ, ແມັກຊິໂກ; ເຮເລນາ, ມອນທານາ; ແຄັດຊະເປີ, ວາຍໂອມິງ; ແກຣນຈັງເຊິນ, ໂຄໂລຣາໂດ; ຟາມມິງຕັນ, ນິວແມັກຊິໂກ; ເບີລີ, ໄອດາໂຮ; ຢູຈີນ, ອໍເຣກອນ; ແອວໂກ, ນີວາດາ; ໂຢບາ ລິນດາ, ແຄລິໂຟເນຍ; ແລະ ສະມິດຟຽວ, ຢູທາ.
ພຣະວິຫານແມ່ນພາກສ່ວນທີ່ຈຳເປັນຕໍ່ການຟື້ນຟູພຣະກິດຕິຄຸນຂອງພຣະເຢຊູຄຣິດໃນຄວາມສົມບູນຂອງມັນ. ພິທີການຂອງພຣະວິຫານຈະນຳພະລັງ ແລະ ຄວາມເຂັ້ມແຂງມາສູ່ຊີວິດຂອງເຮົາ ຊຶ່ງບໍ່ສາມາດມີໄດ້ໃນວິທີອື່ນ. ພວກເຮົາຂອບຄຸນພຣະເຈົ້າສຳລັບພອນເຫລົ່ານັ້ນ.
ຂະນະທີ່ພວກເຮົາປິດກອງປະຊຸມໃຫຍ່ນີ້, ພວກເຮົາຂໍສະແດງຄວາມຮັກຕໍ່ທ່ານທັງຫລາຍອີກຄັ້ງ. ພວກເຮົາອະທິຖານວ່າ ພຣະເຈົ້າຈະຖອກເທພຣະພອນຂອງພຣະອົງລົງມາເທິງທ່ານ ແລະ ເຝົ້າດູແລທ່ານ. ເຮົາທຸກຄົນມີສ່ວນຮ່ວມໃນການຮັບໃຊ້ທີ່ສັກສິດຂອງພຣະອົງ. ຂໍໃຫ້ເຮົາຈົ່ງດຳເນີນໄປໜ້າໃນວຽກງານທີ່ສະຫງ່າລາສີຂອງພຣະຜູ້ເປັນເຈົ້າດ້ວຍຄວາມກ້າຫານ! ຂ້າພະເຈົ້າອະທິຖານສຳລັບສິ່ງນີ້, ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.