ມັນຈະເອົາຊະນະບໍ່ໄດ້; ເຮົາຈະຕົກໄປບໍ່ໄດ້
ຖ້າເຮົາສ້າງຮາກຖານຂອງເຮົາຂຶ້ນເທິງພຣະເຢຊູຄຣິດ, ເຮົາຈະຕົກໄປບໍ່ໄດ້!
ສາດສະດາທີ່ຮັກແພງຂອງເຮົາ, ປະທານຣະໂຊ ເອັມ ແນວສັນ, ໄດ້ກ່າວໃນກອງປະຊຸມໃຫຍ່ສາມັນເທື່ອແລ້ວນີ້ວ່າ: “ໃນເວລາທີ່ຫຍຸ້ງຍາກເຫລົ່ານີ້ ຊຶ່ງອັກຄະສາວົກໂປໂລໄດ້ທຳນາຍ, ຊາຕານໄດ້ເຊົາ ພະຍາຍາມ ປິດບັງການໂຈມຕີແຜນຂອງພຣະເຈົ້າ. ຄວາມຊົ່ວຮ້າຍທີ່ກ້າຫານມີຢູ່ຢ່າງຫລວງຫລາຍ. ສະນັ້ນ, ວິທີດຽວທີ່ຈະເອົາຕົວລອດທາງວິນຍານ ຄືຄວາມຕັ້ງໃຈທີ່ຈະໃຫ້ພຣະເຈົ້າໄຊຊະນະໃນຊີວິດຂອງເຮົາ, ຮຽນວິທີທີ່ຈະໄດ້ຍິນສຸລະສຽງຂອງພຣະອົງ, ແລະ ໃຊ້ກຳລັງຂອງເຮົາເພື່ອຊ່ວຍເຕົ້າໂຮມອິດສະຣາເອນ.”1
ຂະນະທີ່ເຮົາພິຈາລະນາຄຳເຊື້ອເຊີນຂອງສາດສະດາທີ່ຈະຮຽນຮັບຟັງສຸລະສຽງຂອງພຣະເຈົ້າ, ຫົວໃຈຂອງເຮົາກໍຕັ້ງໃຈຢູ່ບໍ ຫລືວ່າແຂງກະດ້າງ? ຂໍໃຫ້ເຮົາຈົ່ງຈື່ຈຳຄຳແນະນຳທີ່ມີໃຫ້ໄວ້ຢູ່ໃນ ຢາໂຄບ 6:6: “ແທ້ຈິງແລ້ວ, ມື້ນີ້, ຖ້າຫາກພວກທ່ານໄດ້ຍິນສຸລະສຽງຂອງພຣະອົງແລ້ວ, ກໍຢ່າເຮັດໃຈແຂງກະດ້າງ; ເພາະເຫດໃດພວກທ່ານຈະຕາຍ?” ຂໍໃຫ້ເຮົາຈົ່ງຕັ້ງໃຈໃຫ້ພຣະເຈົ້າໄຊຊະນະໃນຊີວິດຂອງເຮົາ.
ເຮົາຈະສາມາດໃຫ້ພຣະເຈົ້າໄຊຊະນະໃນຊີວິດຂອງເຮົາ ແລະ ບໍ່ໃຫ້ຜູ້ປໍລະປັກໄຊຊະນະໄດ້ແນວໃດ? ໃນ ຄຳສອນ ແລະ ພັນທະສັນຍາ 6:34 ເຮົາອ່ານວ່າ, “ສະນັ້ນ, ຢ່າຢ້ານກົວ, ຝູງແກະນ້ອຍເອີຍ; ຈົ່ງເຮັດຄວາມດີ; ໃຫ້ແຜ່ນດິນໂລກ ແລະ ນະລົກລວມກັນຕໍ່ຕ້ານເຈົ້າ, ແຕ່ຖ້າຫາກເຈົ້າຖືກສ້າງຂຶ້ນເທິງດານຫີນຂອງເຮົາ, ແລ້ວມັນຈະເອົາຊະນະເຈົ້າບໍ່ໄດ້.” ມັນເປັນຄຳສັນຍາທີ່ສຳຄັນ. ເຖິງແມ່ນວ່າແຜ່ນດິນໂລກ ແລະ ນະລົກອາດລວມກັນຕໍ່ຕ້ານເຮົາ, ມັນຈະເອົາຊະນະບໍ່ໄດ້ ຖ້າຫາກເຮົາເລືອກຈະໃຫ້ພຣະເຈົ້າໄຊຊະນະ ໂດຍການສະຖາປະນາຊີວິດຂອງເຮົາຂຶ້ນເທິງດານຫີນຂອງພຣະອົງ.
ເມື່ອກ່າວຕໍ່ສານຸສິດຂອງພຣະອົງ, ພຣະເຢຊູຄຣິດໄດ້ສິດສອນເຖິງຄົນສະຫລາດ ແລະ ຄົນໂງ່, ທີ່ມີບັນທຶກໄວ້ຢູ່ໃນ ມັດທາຍ ບົດທີ 7 ຂອງພຣະຄຳພີໃໝ່. ທ່ານຫລາຍຄົນເຄີຍໄດ້ຍິນເພງປະຖົມໄວຊື່ວ່າ ຄົນສະຫລາດ ແລະ ຄົນໂງ່ “The Wise Man and the Foolish Man.”2 ຖ້າຫາກທ່ານໄດ້ໃຊ້ເວລາປຽບທຽບສີ່ບາດໃນເພງນັ້ນ, ທ່ານຈະພົບເຫັນວ່າ ບາດທີ 1 ແລະ 2 ແມ່ນຄ້າຍຄືກັນກັບບາດທີ 3 ແລະ 4. ທັງຄົນສະຫລາດ ແລະ ຄົນໂງ່ພາກັນປຸກເຮືອນ. ເຂົາເຈົ້າຢາກຈັດຫາບ້ານເຮືອນທີ່ປອດໄພ ແລະ ສຸກສະບາຍໃຫ້ຄອບຄົວຂອງເຂົາເຈົ້າ. ເຂົາເຈົ້າປາດຖະໜາຈະມີຊີວິດຢູ່ດ້ວຍກັນເປັນຄອບຄົວຕະຫລອດໄປຢ່າງມີຄວາມສຸກ, ເໝືອນດັ່ງທ່ານ ແລະ ຂ້າພະເຈົ້າ. ສະພາບການຢູ່ອ້ອມຮອບນັ້ນກໍເໝືອນກັນ: “ຝົນ ທັ່ງເທລົງມາ, ນ້ຳ ກໍນອງຖ້ວມລົ້ນ.” ເຮົາຮ້ອງຫົກເທື່ອເມື່ອເຮົາຮ້ອງເພງນັ້ນ. ສິ່ງດຽວທີ່ແຕກຕ່າງກໍຄືວ່າ ຄົນສະຫລາດໄດ້ປຸກເຮືອນຂອງລາວຢູ່ເທິງດານຫີນ ແລະ ເຮືອນຫລັງນັ້ນກໍບໍ່ເຈື່ອນເພພັງລົງ, ແຕ່ຄົນໂງ່ໄດ້ປຸກເຮືອນຂອງລາວຢູ່ເທິງຫາດຊາຍ ແລະ ເຮືອນຂອງລາວກໍໄດ້ເຈື່ອນເພພັງລົງ. ດັ່ງນັ້ນ, ບ່ອນທີ່ເຮົາຕັ້ງຮາກຖານແມ່ນສຳຄັນແທ້ໆ, ແລະ ສິ່ງນີ້ຈະມີຜົນກະທົບຕໍ່ຜົນທີ່ຈະໄດ້ຮັບໃນທີ່ສຸດ ແລະ ຊົ່ວນິລັນດອນ.
ຂ້າພະເຈົ້າຫວັງ ແລະ ອະທິຖານວ່າ ເຮົາທຸກຄົນຈະພົບເຫັນ ແລະ ຄົງຢູ່ເທິງຮາກຖານທີ່ແໜ້ນໜານັ້ນ ຂະນະທີ່ເຮົາສະຖາປະນາຊີວິດໃນອະນາຄົດຂອງເຮົາ. ເຮົາຖືກເຕືອນຢູ່ໃນ ຮີລາມັນ 5:12 ວ່າ: “ແລະ ບັດນີ້, ຈົ່ງຈື່ໄວ້, ລູກຂອງພໍ່, ຈົ່ງຈື່ໄວ້ວ່າ ລູກຈະຕ້ອງສ້າງຮາກຖານຂອງລູກຂຶ້ນເທິງດານຫີນຂອງພຣະຜູ້ໄຖ່ຂອງພວກເຮົາ, ຄືພຣະຄຣິດ, ພຣະບຸດຂອງພຣະເຈົ້າ; ເພື່ອວ່າເມື່ອມານສົ່ງລົມພະຍຸຮ້າຍຂອງມັນມາ, ແທ້ຈິງແລ້ວ, ຟ້າແມບເຫລື້ອມກັບລົມບ້າໝູຂອງມັນມາ, ແທ້ຈິງແລ້ວ, ເມື່ອໝາກເຫັບທັງໝົດ ແລະ ລົມຝົນອັນແຮງກ້າຂອງມັນລົງມາຕີລູກ, ມັນຈະບໍ່ມີອຳນາດອັນໃດເໜືອລູກເລີຍທີ່ຈະແກ່ລູກລົງໄປຫາເຫວເລິກແຫ່ງຄວາມທຸກທໍລະມານ ແລະ ຄວາມຈິບຫາຍອັນບໍ່ສິ້ນສຸດ, ເພາະດານຫີນບ່ອນທີ່ລູກຖືກສ້າງຂຶ້ນເທິງມັນ ຊຶ່ງເປັນຮາກຖານທີ່ແໜ້ນໜາ, ເປັນຮາກຖານຊຶ່ງຫາກມະນຸດສ້າງຂຶ້ນເທິງມັນ ພວກເຂົາຈະຕົກໄປບໍ່ໄດ້.”
ນັ້ນລະຄືຄຳສັນຍາຈາກພຣະເຈົ້າ! ຖ້າເຮົາສ້າງຮາກຖານຂອງເຮົາຂຶ້ນເທິງພຣະເຢຊູຄຣິດ, ເຮົາຈະຕົກໄປບໍ່ໄດ້! ເມື່ອເຮົາອົດທົນຢ່າງຊື່ສັດຈົນເຖິງທີ່ສຸດ, ພຣະເຈົ້າຈະຊ່ວຍເຮົາສະຖາປະນາຊີວິດຂອງເຮົາໄວ້ເທິງດານຫີນຂອງພຣະອົງ, “ແລະ ປະຕູນະລົກຈະເອົາຊະນະ [ເຮົາ] ບໍ່ໄດ້” (ຄຳສອນ ແລະ ພັນທະສັນຍາ 10:69). ເຮົາອາດບໍ່ສາມາດປ່ຽນແປງທຸກສິ່ງທີ່ຈະເກີດຂຶ້ນໄດ້, ແຕ່ເຮົາສາມາດເລືອກໄດ້ວ່າເຮົາຈະກະກຽມສຳລັບສິ່ງທີ່ຈະເກີດຂຶ້ນແນວໃດ.
ບາງຄົນອາດຄິດວ່າ, “ພຣະກິດຕິຄຸນກໍດີ, ສະນັ້ນເຮົາຈຶ່ງຕ້ອງໃຫ້ມັນເປັນພາກສ່ວນໃນຊີວິດຂອງເຮົາອາທິດລະເທື່ອ.” ພຽງແຕ່ໄປໂບດອາທິດລະເທື່ອກໍບໍ່ພຽງພໍທີ່ຈະສ້າງຂຶ້ນເທິງດານຫີນນັ້ນ. ຊີວິດທັງໝົດຂອງເຮົາຄວນເຕັມໄປດ້ວຍພຣະກິດຕິຄຸນຂອງພຣະເຢຊູຄຣິດ. ພຣະກິດຕິຄຸນບໍ່ໄດ້ເປັນພາກສ່ວນຂອງຊີວິດຂອງເຮົາ, ແຕ່ແທ້ຈິງແລ້ວຊີວິດຂອງເຮົານັ້ນເປັນພາກສ່ວນຂອງພຣະກິດຕິຄຸນຂອງພຣະເຢຊູຄຣິດ. ຂໍໃຫ້ຄິດກ່ຽວກັບເລື່ອງນີ້ເບິ່ງ. ນັ້ນບໍ່ແມ່ນຄວາມຈິງບໍ? ຊີວິດມະຕະຂອງເຮົາກໍເປັນພຽງແຕ່ພາກສ່ວນໜຶ່ງຂອງແຜນແຫ່ງຄວາມລອດ ແລະ ຄວາມສູງສົ່ງທັງໝົດ.
ພຣະເຈົ້າເປັນພຣະບິດາເທິງສະຫວັນຂອງເຮົາ. ພຣະອົງຮັກເຮົາທຸກຄົນ. ພຣະອົງຮູ້ເຖິງສັກກະຍະພາບຂອງເຮົາດີກວ່າທີ່ເຮົາຮູ້ຕົວເຮົາເອງ. ພຣະອົງບໍ່ພຽງແຕ່ຮູ້ລາຍລະອຽດຂອງຊີວິດຂອງເຮົາເທົ່ານັ້ນ. ພຣະເຈົ້າຮູ້ລາຍລະອຽດ ຂອງລາຍລະອຽດ ຂອງລາຍລະອຽດ ຂອງຊີວິດຂອງເຮົານຳອີກ.
ຂໍຈົ່ງເຮັດຕາມຄຳແນະນຳທີ່ສະຫລາດຂອງສາດສະດາທີ່ມີຊີວິດຢູ່ຂອງເຮົາ ປະທານແນວສັນ. ດັ່ງທີ່ມີບັນທຶກໄວ້ຢູ່ໃນ ຄຳສອນ ແລະ ພັນທະສັນຍາ 21:5–6 ວ່າ:
“ເພາະຖ້ອຍຄຳທີ່ພວກເຈົ້າຈະໄດ້ຮັບ, ກໍຄືກັບວ່າມັນມາຈາກປາກຂອງເຮົາເອງ, ດ້ວຍຄວາມອົດທົນທີ່ສຸດ ແລະ ສັດທາທັງໝົດ.
“ເພາະໂດຍການເຮັດສິ່ງເຫລົ່ານີ້ ປະຕູນະລົກຈະເອົາຊະນະພວກເຈົ້າບໍ່ໄດ້; ແທ້ຈິງແລ້ວ, ແລະ ອົງພຣະຜູ້ເປັນເຈົ້າຈະເຮັດໃຫ້ອຳນາດແຫ່ງ ຄວາມມືດກະຈາຍໄປຕໍ່ໜ້າພວກເຈົ້າ, ແລະ ເຮັດໃຫ້ຟ້າສະຫວັນ ສັ່ນສະເທືອນເພື່ອຄວາມດີຂອງພວກເຈົ້າ, ແລະ ລັດສະໝີພາບຂອງພຣະນາມຂອງພຣະອົງ.”
ເພາະເຫດຜົນນັ້ນ, ມັນຈະເອົາຊະນະບໍ່ໄດ້, ແລະ ເຮົາຈະຕົກໄປບໍ່ໄດ້!
ຂ້າພະເຈົ້າເປັນພະຍານວ່າ ພຣະຄຣິດຈະສະເດັດມາອີກເທື່ອທີສອງ ດັ່ງທີ່ພຣະອົງໄດ້ສະເດັດມາເທື່ອທຳອິດ, ແຕ່ໃນເທື່ອນີ້ມັນຈະເປັນໄປດ້ວຍລັດສະໝີພາບ ແລະ ສະຫງ່າລາສີອັນຍິ່ງໃຫຍ່. ຂ້າພະເຈົ້າຫວັງ ແລະ ອະທິຖານວ່າຂ້າພະເຈົ້າຈະກຽມພ້ອມທີ່ຈະຕ້ອນຮັບພຣະອົງ, ບໍ່ວ່າຢູ່ຟາກມ່ານເບື້ອງນີ້ ຫລື ເບື້ອງນັ້ນກໍຕາມ. ຂະນະທີ່ເຮົາສະເຫລີມສະຫລອງເທດສະການອີດສະເຕີທີ່ປະເສີດນີ້, ຂ້າພະເຈົ້າຫວັງວ່າ, ຜ່ານທາງການຊົດໃຊ້ຂອງພຣະເຢຊູຄຣິດ ແລະ ອຳນາດແຫ່ງການຟື້ນຄືນພຣະຊົນຂອງພຣະອົງ (ເບິ່ງ ໂມໂຣໄນ 7:41), ຂ້າພະເຈົ້າຈະສາມາດຂຶ້ນໄປ ແລະ ພົບກັບພຣະຜູ້ສ້າງຂອງຂ້າພະເຈົ້າ ແລະ ກ່າວວ່າ, “ຂອບພຣະໄທພຣະອົງເຈົ້າ.” ໃນພຣະນາມຂອງພຣະເຢຊູຄຣິດ, ອາແມນ.