ຊັບສົມບັດທາງວິນຍານ
ເມື່ອທ່ານໃຊ້ສັດທາ ໃນພຣະຜູ້ເປັນເຈົ້າ ແລະ ອຳນາດຂອງຖານະປະໂລຫິດຂອງພຣະອົງ, ແລ້ວຄວາມສາມາດຂອງທ່ານ ທີ່ຈະເຂົ້າຫາຊັບສົມບັດທາງວິນຍານນີ້ ທີ່ພຣະຜູ້ເປັນເຈົ້າມີໃຫ້ ຈະເພີ່ມທະວີຫລາຍຂຶ້ນ.
ຂອບໃຈຫລາຍໆສຳລັບເພງທີ່ມ່ວນອອນຊອນ. ຂະນະທີ່ເຮົາຢືນຮ້ອງເພງຂັ້ນ ຊື່ວ່າ, “ເຮົາຂອບພຣະໄທສຳລັບສາດສະດາ,” ແນວຄິດສອງຢ່າງໄດ້ເຂົ້າມາສູ່ຈິດໃຈຂອງຂ້າພະເຈົ້າ. ຢ່າງໜຶ່ງແມ່ນກ່ຽວກັບສາດສະດາໂຈເຊັບ ສະມິດ, ສາດສະດາຂອງຍຸກສະໄໝນີ້. ຂ້າພະເຈົ້ານັບມື້ນັບມີຄວາມຮັກ ແລະ ຍ້ອງຍໍຊົມເຊີຍເພິ່ນ. ຄວາມຄິດຢ່າງທີສອງໄດ້ເກີດຂຶ້ນ ຕອນທີ່ຂ້າພະເຈົ້າຫລຽວເບິ່ງພັນລະຍາ, ລູກສາວ, ຫລານສາວ, ແລະ ເຫລັນຂອງຂ້າພະເຈົ້າ. ຂ້າພະເຈົ້າຮູ້ສຶກວ່າ ຂ້າພະເຈົ້າຢາກຮັບເອົາທ່ານທຸກຄົນເຂົ້າເປັນພາກສ່ວນຂອງຄອບຄົວຂອງຂ້າພະເຈົ້າ.
ຫລາຍເດືອນຜ່ານມານີ້, ຫລັງຈາກພິທີຮັບຂອງປະທານສັກສິດຢູ່ໃນພຣະວິຫານ, ຂ້າພະເຈົ້າໄດ້ເວົ້າກັບເວັນດີ ພັນລະຍາຂອງຂ້າພະເຈົ້າວ່າ, “ອ້າຍຫວັງວ່າ ບັນດາເອື້ອຍນ້ອງຈະເຂົ້າໃຈເຖິງຊັບສົມບັດທາງວິນຍານ ທີ່ເປັນຂອງເຂົາເຈົ້າຢູ່ໃນພຣະວິຫານນີ້.” ເອື້ອຍນ້ອງທັງຫລາຍ, ຂ້າພະເຈົ້າຄິດກ່ຽວກັບທ່ານສະເໝີ, ລວມທັງສອງເດືອນກ່ອນ ຕອນ ເວັນດີ ແລະ ຂ້າພະເຈົ້າໄປຢ້ຽມຢາມເມືອງຮາມໂມນີ, ລັດເພັນໂຊເວເນຍ.
ມັນເປັນເທື່ອທີສອງຂອງພວກເຮົາ ທີ່ໄດ້ໄປຢາມ. ທັງສອງເທື່ອ ພວກເຮົາໄດ້ຮູ້ສຶກເຖິງພຣະວິນຍານ ຂະນະທີ່ພວກເຮົາຍ່າງຢູ່ເທິງພື້ນທີ່ສັກສິດນັ້ນ. ຢູ່ໃກ້ເມືອງຮາມໂມນີນັ້ນເອງ ທີ່ໂຢຮັນບັບຕິສະໂຕ ໄດ້ມາປະກົດຕໍ່ໂຈເຊັບ ສະມິດ ແລະ ໄດ້ຟື້ນຟູຖານະປະໂລຫິດແຫ່ງອາໂຣນ.
ຢູ່ທີ່ນັ້ນເອງທີ່ ອັກຄະສາວົກ ເປໂຕ, ຢາໂກໂບ, ແລະ ໂຢຮັນ ໄດ້ມາປະກົດ ເພື່ອຟື້ນຟູຖານະປະໂລຫິດແຫ່ງເມນຄີເສເດັກ.
ຢູ່ໃນເມືອງຮາມໂມນີນັ້ນເອງ ທີ່ ເອມມາ ເຮວ ສະມິດ ໄດ້ຮັບໃຊ້ເປັນຜູ້ຂຽນຄົນທຳອິດ ໃຫ້ສາມີຂອງນາງ ຂະນະທີ່ສາດສະດາ ແປພຣະຄຳພີມໍມອນ.
ຢູ່ໃນເມືອງຮາມໂມນີນັ້ນເອງ ທີ່ໂຈເຊັບໄດ້ຮັບການເປີດເຜີຍ ທີ່ສະແດງໃຫ້ປະຈັກເຖິງພຣະປະສົງຂອງພຣະຜູ້ເປັນເຈົ້າ ຕໍ່ນາງເອມມາ. ພຣະຜູ້ເປັນເຈົ້າໄດ້ແນະນຳນາງເອມມາ ໃຫ້ອະທິບາຍພຣະຄຳພີ, ໃຫ້ແນະນຳສາດສະໜາຈັກ, ໃຫ້ຮັບເອົາພຣະວິນຍານບໍລິສຸດ, ແລະ ໃຫ້ໃຊ້ເວລາ “ຮຽນຮູ້ຫລາຍໆຢ່າງ.” ນາງເອມມາ ກໍໄດ້ຖືກແນະນຳຕື່ມອີກ ໃຫ້ “ປະຖິ້ມສິ່ງທີ່ເປັນຂອງໂລກນີ້ ແລະ ສະແຫວງຫາສິ່ງທີ່ດີກວ່າ” ແລະ ຮັກສາພັນທະສັນຍາທີ່ນາງໄດ້ເຮັດກັບພຣະເຈົ້າ. ພຣະຜູ້ເປັນເຈົ້າໄດ້ຈົບຄຳແນະນຳຂອງພຣະອົງ ດ້ວຍພຣະຄຳທີ່ໜ້າສົນໃຈດັ່ງນີ້: “ນີ້ຄືສຽງຂອງເຮົາເຖິງທຸກຄົນ.”1
ທຸກສິ່ງ ທີ່ໄດ້ເກີດຂຶ້ນຢູ່ໃນເມືອງຮາມໂມນີ ມີຄວາມໝາຍທີ່ເລິກຊຶ້ງຕໍ່ຊີວິດ ຂອງທ່ານ. ການຟື້ນຟູຖານປະໂລຫິດ, ພ້ອມດ້ວຍຄຳແນະນຳຂອງພຣະຜູ້ເປັນເຈົ້າຕໍ່ນາງເອມມາ, ສາມາດນຳພາ ແລະ ເປັນພອນໃຫ້ແກ່ທ່ານແຕ່ລະຄົນໄດ້. ຂ້າພະເຈົ້າຢາກໃຫ້ທ່ານເຂົ້າໃຈວ່າ ການຟື້ນຟູຖານະປະໂລຫິດແມ່ນກ່ຽວຂ້ອງກັບທັງຜູ້ຍິງ ແລະ ຜູ້ຊາຍທຸກຄົນ. ເປັນເພາະຖານະປະໂລຫິດແຫ່ງເມນຄີເສເດັກ ໄດ້ຖືກຟື້ນຟູ, ທັງຜູ້ຍິງ ແລະ ຜູ້ຊາຍທີ່ຮັກສາພັນທະສັນຍາ ຈຶ່ງສາມາດໄດ້ຮັບພອນທາງວິນຍານ “ທັງໝົດ ຂອງສາດສະໜາຈັກ”2 ຫລື, ເຮົາເວົ້າໄດ້ວ່າ, ໄດ້ຮັບຊັບສົມບັດທາງວິນຍານ ທີ່ພຣະຜູ້ເປັນເຈົ້າມີສຳລັບລູກໆຂອງພຣະອົງ.
ຍິງ ແລະ ຊາຍທຸກຄົນ ຜູ້ເຮັດພັນທະສັນຍາກັບພຣະເຈົ້າ ແລະ ຮັກສາພັນທະສັນຍາເຫລົ່ານັ້ນ, ແລະ ຜູ້ທີ່ມີສ່ວນຮ່ວມໃນພິທີການຂອງຖານະປະໂລຫິດຢ່າງມີຄ່າຄວນ, ເຂົາເຈົ້າຈະໄດ້ຮັບອຳນາດຈາກພຣະເຈົ້າໂດຍກົງ. ຜູ້ທີ່ໄດ້ຮັບຂອງປະທານສັກສິດແລ້ວ ຢູ່ໃນບ້ານຂອງພຣະຜູ້ເປັນເຈົ້າ ຈະໄດ້ຮັບຂອງປະທານແຫ່ງອຳນາດ ຂອງຖານະປະໂລຫິດຂອງພຣະເຈົ້າ ເປັນເພາະພັນທະສັນຍາຂອງເຂົາເຈົ້າ, ພ້ອມດ້ວຍຂອງປະທານແຫ່ງຄວາມຮູ້ ເພື່ອຈະໄດ້ຮູ້ຈັກວິທີເຂົ້າຫາອຳນາດນັ້ນ.
ສະຫວັນກໍເປີດໃຫ້ ຜູ້ຍິງ ທີ່ໄດ້ຮັບຂອງປະທານສັກສິດແລ້ວ ດ້ວຍອຳນາດຂອງພຣະເຈົ້າ ທີ່ຫລັ່ງໄຫລມາຈາກພັນທະສັນຍາແຫ່ງຖານະປະໂລຫິດຂອງເຂົາເຈົ້າ ເທົ່າໆກັບຜູ້ຊາຍທີ່ດຳລົງຖານະປະໂລຫິດ. ຂ້າພະເຈົ້າຫວັງວ່າທ່ານທຸກຄົນຈະຮັບເອົາຄວາມຈິງນັ້ນ ເພາະຂ້າພະເຈົ້າເຊື່ອວ່າ ມັນຈະປ່ຽນແປງຊີວິດຂອງທ່ານ. ເອື້ອຍນ້ອງທັງຫລາຍ, ທ່ານມີສິດທີ່ຈະເຂົ້າຫາອຳນາດຂອງພຣະຜູ້ຊ່ວຍໃຫ້ລອດຢ່າງເປັນອິດສະລະ ເພື່ອຊ່ວຍຄອບຄົວຂອງທ່ານ ແລະ ຄົນອື່ນໆທີ່ທ່ານຮັກ.
ບັດນີ້, ທ່ານອາດເວົ້າກັບຕົວເອງວ່າ, “ຟັງແລ້ວກໍໜ້າຕື່ນເຕັ້ນເນາະ, ແຕ່ເຮົາຈະເຮັດຈັ່ງໃດ? ເຮົາຈະເຂົ້າຫາອຳນາດຂອງພຣະຜູ້ຊ່ວຍໃຫ້ລອດ ໃນຊີວິດເຮົາໄດ້ແນວໃດ?”
ທ່ານບໍ່ສາມາດຊອກຫາຂັ້ນຕອນເຫລົ່ານັ້ນ ຢູ່ໃນໜັງສືຄູ່ມືເຫລັ້ມໃດໆ. ພຣະວິນຍານບໍລິສຸດ ຈະເປັນຄູສອນສ່ວນຕົວຂອງທ່ານ ຂະນະທີ່ທ່ານສະແຫວງຫາທີ່ຈະເຂົ້າໃຈ ສິ່ງທີ່ພຣະຜູ້ເປັນເຈົ້າປະສົງໃຫ້ທ່ານຮູ້ ແລະ ເຮັດ. ຂັ້ນຕອນເຫລົ່ານັ້ນບໍ່ໄດ້ເປັນເລື່ອງໄວ ແລະ ງ່າຍໆ, ແຕ່ ເປັນ ສິ່ງເຕີມພະລັງທາງວິນຍານ. ຈະມີຫຍັງແດ່ທີ່ໜ້າຕື່ນເຕັ້ນຫລາຍໄປກວ່າການອອກແຮງດ້ວຍພຣະວິນຍານ ເພື່ອຈະເຂົ້າໃຈອຳນາດຂອງພຣະເຈົ້າ—ອຳນາດຂອງຖານະປະໂລຫິດ?
ສິ່ງທີ່ຂ້າພະເຈົ້າ ສາມາດ ບອກທ່ານໄດ້ແມ່ນ ການເຂົ້າຫາອຳນາດຂອງພຣະເຈົ້າ ໃນຊີວິດຂອງທ່ານ ຮຽກຮ້ອງສິ່ງດຽວກັນກັບທີ່ພຣະຜູ້ເປັນເຈົ້າໄດ້ແນະນຳນາງເອມມາ ແລະ ທ່ານແຕ່ລະຄົນໃຫ້ເຮັດ.
ດັ່ງນັ້ນ, ຂ້າພະເຈົ້າຈຶ່ງຂໍເຊື້ອເຊີນທ່ານ ໃຫ້ສຶກສາ ແລະ ຄົ້ນຄວ້າ ພາກທີ 25 ຂອງຄຳສອນ ແລະ ພັນທະສັນຍາ ດ້ວຍການອະທິຖານ ກ່ຽວກັບສິ່ງທີ່ພຣະວິນຍານບໍລິສຸດຈະສິດສອນ ທ່ານ. ຄວາມພະຍາຍາມສ່ວນຕົວ ແລະ ທາງວິນຍານຂອງທ່ານ ຈະນຳຄວາມຊື່ນຊົມມາໃຫ້ທ່ານ ເມື່ອທ່ານໄດ້ຮັບ, ເຂົ້າໃຈ, ແລະ ໃຊ້ອຳນາດທີ່ທ່ານໄດ້ຮັບມາ.
ພາກສ່ວນໜຶ່ງຂອງຄວາມພະຍາຍາມນີ້ ຈະຮຽກຮ້ອງໃຫ້ທ່ານປະຖິ້ມຫລາຍຢ່າງທີ່ເປັນຂອງໂລກ. ບາງເທື່ອເຮົາຈະເວົ້າແບບທຳມະດາກ່ຽວກັບການເດີນໜີຈາກໂລກ ທີ່ເຕັມໄປດ້ວຍຄວາມຂັດແຍ້ງ, ການລໍ້ລວງທີ່ແຜ່ລາມ, ແລະ ປັດສະຍາທີ່ບໍ່ຖືກຕ້ອງ. ແຕ່ ແທ້ຈິງແລ້ວ ການເຮັດແນວນັ້ນ ຮຽກຮ້ອງທ່ານໃຫ້ສຳຫລວດຊີວິດຕົວເອງຢ່າງລະອຽດ ແລະ ເປັນປະຈຳ. ເມື່ອທ່ານເຮັດເຊັ່ນນັ້ນ, ພຣະວິນຍານບໍລິສຸດຈະກະຕຸ້ນທ່ານໃຫ້ຮູ້ວ່າສິ່ງໃດທີ່ບໍ່ຈຳເປັນອີກຕໍ່ໄປ, ສິ່ງໃດທີ່ທ່ານບໍ່ຄວນເສຍເວລາ ແລະ ເຫື່ອແຮງນຳ.
ເມື່ອທ່ານບໍ່ເອົາໃຈໃສ່ຕໍ່ສິ່ງລົບກວນທາງໂລກ, ແລ້ວບາງສິ່ງທີ່ເບິ່ງຄືວ່າສຳຄັນຫລາຍຕໍ່ທ່ານໃນເວລານີ້ ຈະມີຄວາມສຳຄັນໜ້ອຍລົງ. ທ່ານອາດຕ້ອງປະຕິເສດບາງສິ່ງ, ເຖິງແມ່ນເບິ່ງຄືວ່າ ມັນບໍ່ມີພິດມີໄພກໍຕາມ. ເມື່ອທ່ານເລີ່ມຕົ້ນ ແລະ ດຳເນີນຂັ້ນຕອນຂອງການອຸທິດຖວາຍຕະຫລອດຊີວິດຂອງທ່ານຕໍ່ພຣະຜູ້ເປັນເຈົ້າ, ແລ້ວການປ່ຽນແປງທາງທັດສະນະ, ຄວາມຮູ້ສຶກ, ແລະ ຄວາມເຂັ້ມແຂງທາງວິນຍານຂອງທ່ານ ຈະເຮັດໃຫ້ທ່ານແປກໃຈຫລາຍທີ່ສຸດ!
ຕໍ່ໄປນີ້ແມ່ນຄຳເຕືອນ. ຈະມີຄົນສົງໃສຄວາມສາມາດຂອງທ່ານ ທີ່ຈະເອີ້ນຫາອຳນາດຂອງພຣະເຈົ້າ. ຈະມີຄົນຢາກໃຫ້ທ່ານສົງໃສຕົວເອງ ແລະ ລົດຄວາມສາມາດທີ່ດີເດັ່ນທາງວິນຍານຂອງທ່ານລົງ ໃນຖານະຜູ້ຍິງທີ່ຊອບທຳ.
ສິ່ງທີ່ແນ່ນອນແມ່ນ ຜູ້ປໍລະປັກບໍ່ຢາກໃຫ້ທ່ານເຂົ້າໃຈພັນທະສັນຍາທີ່ທ່ານໄດ້ເຮັດຕອນຮັບບັບຕິສະມາ ຫລື ຄວາມຮູ້ ແລະ ພະລັງທີ່ເລິກຊຶ້ງ ຊຶ່ງທ່ານໄດ້ຮັບ ແລະ ຈະໄດ້ຮັບຢູ່ໃນພຣະວິຫານ—ບ້ານຂອງພຣະຜູ້ເປັນເຈົ້າ. ແລະ ແນ່ນອນ ຊາຕານບໍ່ຢາກໃຫ້ທ່ານເຂົ້າໃຈວ່າ ທຸກເທື່ອທີ່ທ່ານຮັບໃຊ້ ແລະ ນະມັດສະການຢ່າງມີຄ່າຄວນ ຢູ່ໃນພຣະວິຫານ, ທ່ານໄດ້ກັບອອກໄປດ້ວຍອຳນາດຂອງພຣະເຈົ້າ ແລະ ເຫລົ່າທູດຂອງພຣະອົງກໍ “ຮັບຜິດຊອບດູແລ” ທ່ານ.3
ຊາຕານ ແລະ ບໍລິວານຂອງມັນ ຈະພະຍາຍາມກິດກັນທ່ານຕະຫລອດເວລາ ເພື່ອບໍ່ໃຫ້ທ່ານເຂົ້າໃຈກ່ຽວກັບ ຂອງປະທານທາງວິນຍານ ຊຶ່ງທ່ານໄດ້ຮັບ ຫລື ສາມາດໄດ້ຮັບ. ໜ້າເສຍໃຈທີ່ ສິ່ງກີດກັນບາງຢ່າງ ແມ່ນເກີດຈາກການປະພຶດທີ່ບໍ່ດີຂອງຄົນອື່ນ. ມັນເຮັດໃຫ້ຂ້າພະເຈົ້າໂສກເສົ້າ ທີ່ທ່ານບາງຄົນຄິດວ່າຕົວເອງບໍ່ເປັນທີ່ຕ້ອງການ ຫລື ຍັງເປັນທີ່ສົງໃສຕໍ່ຜູ້ນຳຖານະປະໂລຫິດ ຫລື ຖືກຂົ່ມເຫັງ ຫລື ຖືກທໍລະຍົດ ໂດຍສາມີ, ພໍ່, ຫລື ເພື່ອນ. ຂ້າພະເຈົ້າເສົ້າໃຈຫລາຍທີ່ທ່ານບາງຄົນຮູ້ສຶກຖືກເມີນເສີຍ, ຖືກດູໝິ່ນ, ຫລື ຖືກເຂົ້າໃຈຜິດ. ການກະທຳເຊັ່ນນີ້ ບໍ່ຄວນມີຢູ່ໃນອານາຈັກຂອງພຣະເຈົ້າ.
ກົງກັນຂ້າມ, ຂ້າພະເຈົ້າດີໃຈຫລາຍ ເມື່ອຂ້າພະເຈົ້າໄດ້ຍິນວ່າ ຜູ້ນຳຖານະປະໂລຫິດມັກໃຫ້ຜູ້ຍິງມີສ່ວນຮ່ວມຢູ່ໃນການປະຊຸມສະພາຫວອດ ຫລື ສະພາສະເຕກ. ຂ້າພະເຈົ້າໄດ້ຮັບການດົນໃຈຈາກສາມີຜູ້ທີ່ສະແດງໃຫ້ເຫັນວ່າ ໜ້າທີ່ຮັບຜິດຊອບທີ່ສຳຄັນທີ່ສຸດຂອງຖານະປະໂລຫິດ ແມ່ນການດູແລພັນລະຍາຂອງຕົນ.4 ຂ້າພະເຈົ້າຊົມເຊີຍຜູ້ຊາຍທີ່ນັບຖືພັນລະຍາຕົນ ທີ່ນາງສາມາດຮັບການເປີດເຜີຍ ແລະ ທະນຸຖະໜອມນາງ ໃນຖານະຮຸ້ນສ່ວນທີ່ເທົ່າທຽມກັນ ໃນຊີວິດແຕ່ງງານຂອງເຂົາເຈົ້າ.
ເມື່ອຜູ້ຊາຍເຂົ້າໃຈອະນຸພາບ ແລະ ພະລັງຂອງຄວາມຊອບທຳ ແລະ ການສະແຫວງຫາ ຂອງຜູ້ຍິງໄພ່ພົນຍຸກສຸດທ້າຍທີ່ໄດ້ຮັບຂອງປະທານສັກສິດແລ້ວ, ຈຶ່ງບໍ່ແປກໃຈເລີຍ ທີ່ລາວຮູ້ສຶກວ່າຕົນເອງຄວນລຸກຢືນຂຶ້ນເພື່ອໃຫ້ກຽດ ຂະນະທີ່ນາງຍ່າງເຂົ້າມາໃນຫ້ອງ ແມ່ນບໍ?
ນັບແຕ່ດຶກດຳບັນເປັນຕົ້ນມາ, ຜູ້ຍິງໄດ້ຮັບພອນດ້ວຍຄວາມສຳນຶກທາງສິນທຳ—ເປັນຄວາມສາມາດທີ່ຈະຮູ້ຈັກຄວາມດີຈາກຄວາມຊົ່ວ. ຂອງປະທານນີ້ຂະຫຍາຍອອກກວ້າງ ໃນຜູ້ທີ່ເຮັດ ແລະ ຮັກສາພັນທະສັນຍາ. ແລະ ມັນຈະລົດນ້ອຍຖອຍລົງ ໃນຜູ້ທີ່ຕັ້ງໃຈເມີນເສີຍຈາກພຣະບັນຍັດຂອງພຣະເຈົ້າ.
ຂ້າພະເຈົ້າຂໍບອກດຽວນີ້ວ່າ ຜູ້ຊາຍກໍບໍ່ຖືກຍົກເວັ້ນຈາກເງື່ອນໄຂຂອງພຣະເຈົ້າ ທີ່ໃຫ້ ເຂົາເຈົ້າ ຮູ້ຈັກຈຳແນກຄວາມດີຈາກຄວາມຊົ່ວຄືກັນ. ແຕ່ ເອື້ອຍນ້ອງທີ່ຮັກແພງຂອງຂ້າພະເຈົ້າ, ຄວາມສາມາດຂອງທ່ານທີ່ຈະຮູ້ຈັກຄວາມດີຈາກຄວາມຊົ່ວ, ທີ່ຈະເປັນຜູ້ປົກປັກຮັກສາສິນທຳຂອງສັງຄົມ, ແມ່ນສຳຄັນຫລາຍໃນຍຸກສຸດທ້າຍນີ້. ແລະ ພວກເຮົາເພິ່ງອາໄສທ່ານ ເພື່ອສິດສອນຄົນອື່ນໃຫ້ເຮັດຄືກັນ. ຂ້າພະເຈົ້າຂໍອະທິບາຍວ່າ: ຖ້າຫາກໂລກນີ້ຂາດຄວາມຖືກຕ້ອງທາງສິນທຳຂອງພວກຜູ້ຍິງ, ແລ້ວໂລກນີ້ຈະ ບໍ່ມີວັນ ຈະເລີນກ້າວໜ້າໄດ້.
ເຮົາຜູ້ເປັນໄພ່ພົນຍຸກສຸດທ້າຍ ບໍ່ແມ່ນຂອງໂລກ; ເຮົາແມ່ນຂອງອິດສະຣາເອນແຫ່ງພັນທະສັນຍາ. ເຮົາຖືກເອີ້ນໃຫ້ກະກຽມຜູ້ຄົນສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ.
ບັດນີ້, ຂ້າພະເຈົ້າຂໍອະທິບາຍຫລາຍຈຸດຕື່ມອີກ ດ້ວຍຄວາມນັບຖືຕໍ່ຜູ້ຍິງ ແລະ ຖານະປະໂລຫິດ. ເມື່ອທ່ານຖືກແຕ່ງຕັ້ງເປັນທາງການ ເພື່ອຮັບໃຊ້ຢູ່ໃນຕຳແໜ່ງ ພາຍໃຕ້ການຊີ້ນຳຂອງຜູ້ທີ່ດຳລົງຂໍກະແຈຂອງຖານະປະໂລຫິດ—ດັ່ງເຊັ່ນອະທິການ ຫລື ປະທານສະເຕກຂອງທ່ານ—ທ່ານໄດ້ຮັບສິດອຳນາດຂອງຖານະປະໂລຫິດ ເພື່ອທຳງານໃນຕຳແໜ່ງດັ່ງກ່າວ.
ຄ້າຍຄືກັນນັ້ນ, ຢູ່ໃນພຣະວິຫານສັກສິດ ທ່ານໄດ້ຮັບອະນຸຍາດໃຫ້ປະຕິບັດ ແລະ ປະກອບພິທີການຂອງຖານະປະໂລຫິດ ທຸກເທື່ອ ທີ່ທ່ານໄປຮ່ວມ. ຂອງປະທານສັກສິດ ທີ່ທ່ານໄດ້ຮັບຢູ່ໃນພຣະວິຫານ ຈະຊ່ວຍທ່ານເຮັດສິ່ງນີ້ໄດ້.
ຖ້າຫາກທ່ານໄດ້ຮັບຂອງປະທານສັກສິດແລ້ວ ແຕ່ເວລານີ້ຍັງບໍ່ໄດ້ແຕ່ງງານເທື່ອກັບຜູ້ທີ່ດຳລົງຖານະປະໂລຫິດ ແລະ ບາງຄົນອາດເວົ້າກັບທ່ານວ່າ, “ຂ້ອຍເສຍໃຈນຳ ທີ່ເຈົ້າບໍ່ມີຖານະປະໂລຫິດຢູ່ໃນບ້ານ,” ຂໍໃຫ້ທ່ານເຂົ້າໃຈວ່າ ຄຳນັ້ນບໍ່ຖືກຕ້ອງ. ທ່ານອາດບໍ່ມີ ຜູ້ດຳລົງ ຖານະປະໂລຫິດຢູ່ໃນບ້ານ, ແຕ່ທ່ານໄດ້ຮັບ ແລະ ໄດ້ເຮັດພັນທະສັນຍາທີ່ສັກສິດກັບພຣະເຈົ້າຢູ່ໃນພຣະວິຫານຂອງພຣະອົງ. ຈາກພັນທະສັນຍາເຫລົ່ານັ້ນ ຂອງປະທານສັກສິດ ຈະຫລັ່ງໄຫລມາສູ່ທ່ານຈາກອຳນາດຂອງຖານະປະໂລຫິດຂອງພຣະອົງ. ແລະ ຈົ່ງຈຳໄວ້ວ່າ, ຖ້າຫາກສາມີຂອງທ່ານໄດ້ເສຍຊີວິດໄປແລ້ວ, ທ່ານ ຈະກາຍເປັນຜູ້ປົກຄອງຢູ່ໃນບ້ານເຮືອນຂອງທ່ານ.
ໃນຖານະຜູ້ຍິງໄພ່ພົນຍຸກສຸດທ້າຍທີ່ຊອບທຳ ແລະ ໄດ້ຮັບຂອງປະທານສັກສິດແລ້ວ, ທ່ານສາມາດເວົ້າ ແລະ ສິດສອນດ້ວຍອຳນາດ ແລະ ສິດອຳນາດຈາກພຣະເຈົ້າ. ບໍ່ວ່າຈະເປັນການຊຸກຍູ້ ຫລື ການສົນທະນາ, ພວກເຮົາກໍຕ້ອງການທ່ານ ໃນການສິດສອນຄຳສອນຂອງພຣະຄຣິດ. ພວກເຮົາຕ້ອງການຄວາມຄິດຄວາມເຫັນຂອງທ່ານໃນສະພາຄອບຄົວ, ສະພາຫວອດ, ແລະ ສະພາສະເຕກ. ການມີສ່ວນຮ່ວມຂອງທ່ານແມ່ນສຳຄັນ ແລະ ກໍບໍ່ເຄີຍຖືວ່າ ທ່ານເປັນພຽງແຕ່ສິ່ງປະດັບປະດາເທົ່ານັ້ນ!
ເອື້ອຍນ້ອງທີ່ຮັກແພງຂອງຂ້າພະເຈົ້າ, ພະລັງຂອງທ່ານຈະເພີ່ມທະວີຫລາຍຂຶ້ນ ຂະນະທີ່ທ່ານຮັບໃຊ້ຄົນອື່ນ. ຄຳອະທິຖານ, ການຖືສິນອົດເຂົ້າ, ເວລາກັບພຣະຄຳພີ, ການຮັບໃຊ້ຢູ່ໃນພຣະວິຫານ, ແລະ ວຽກງານສືບປະຫວັດຄອບຄົວຂອງທ່ານ ຈະເປີດສະຫວັນໃຫ້ທ່ານ.
ຂ້າພະເຈົ້າຊຸກຍູ້ທ່ານໃຫ້ສຶກສາຄວາມຈິງ ທຸກຢ່າງ ດ້ວຍການອະທິຖານ ກ່ຽວກັບອຳນາດຂອງຖານະປະໂລຫິດ. ທ່ານສາມາດເລີ່ມຕົ້ນດ້ວຍ ຄຳສອນ ແລະ ພັນທະສັນຍາ ພາກທີ 84 ແລະ 107. ສອງພາກເຫລົ່ານັ້ນ ຈະພາທ່ານໄປຫາຂໍ້ຄວາມບ່ອນໃໝ່. ພຣະຄຳພີ ແລະ ຄຳສອນຂອງສາດສະດາ, ຜູ້ພະຍາກອນ, ແລະ ຜູ້ເປີດເຜີຍໃນສະໄໝໃໝ່ ກໍເຕັມໄປດ້ວຍຄວາມຈິງເຫລົ່ານີ້. ເມື່ອທ່ານມີຄວາມເຂົ້າໃຈ ແລະ ໃຊ້ສັດທາໃນພຣະຜູ້ເປັນເຈົ້າ ແລະ ໃນອຳນາດຂອງຖານະປະໂລຫິດັ່ງກ່າວຫລາຍຂຶ້ນເທົ່າໃດ, ແລ້ວຄວາມສາມາດຂອງທ່ານ ທີ່ຈະເຂົ້າຫາຊັບສົມບັດທາງວິນຍານນີ້ ທີ່ພຣະຜູ້ເປັນເຈົ້າມີໃຫ້ ຈະເພີ່ມທະວີຫລາຍຂຶ້ນເທົ່ານັ້ນ. ເມື່ອທ່ານເຮັດເຊັ່ນນັ້ນ, ທ່ານຈະພົບເຫັນຕົວເອງ ຊ່ວຍສ້າງຄອບຄົວນິລັນດອນ ໃຫ້ດີຂຶ້ນກວ່າເກົ່າ ເປັນນ້ຳໜຶ່ງໃຈດຽວກັນ, ຜະນຶກຢູ່ໃນພຣະວິຫານຂອງພຣະຜູ້ເປັນເຈົ້າ, ເຕັມໄປດ້ວຍຄວາມຮັກສຳລັບພຣະບິດາເທິງສະຫວັນ ແລະ ສຳລັບພຣະເຢຊູຄຣິດ.
ຄວາມພະຍາຍາມຂອງເຮົາທີ່ຈະປະຕິບັດສາດສະໜາກິດຕໍ່ກັນແລະກັນ, ປະກາດພຣະກິດຕິຄຸນ, ຊ່ວຍເຫລືອໄພ່ພົນໃຫ້ດີພ້ອມ, ແລະ ໄຖ່ຄົນຕາຍ ທັງໝົດລວມກັນຢູ່ໃນພຣະວິຫານທີ່ສັກສິດ. ປະຈຸບັນນີ້ ພວກເຮົາມີພຣະວິຫານຢູ່ 166 ແຫ່ງ ຕະຫລອດທົ່ວໂລກ, ແລະ ກໍຈະມີຕື່ມອີກ.
ດັ່ງທີ່ທ່ານຮູ້ຈັກ, ພຣະວິຫານເຊົາເລັກ, ພ້ອມທັງບໍລິເວນພຣະວິຫານ, ແລະ ອາຄານຕ່າງໆທີ່ຢູ່ໃກ້ຕຶກຫ້ອງການໃຫຍ່ຂອງສາດສະໜາຈັກ ຈະຖືກສ້ອມແປງບຸລະນະ ຊຶ່ງຈະເລີ່ມຕົ້ນໃນທ້າຍປີນີ້. ພຣະວິຫານທີ່ສັກສິດແຫ່ງ ນີ້ ຈະຖືກຮັກສາ ແລະ ຖືກກະກຽມໄວ້ ເພື່ອເປັນສິ່ງດົນໃຈຄົນລຸ້ນຫລັງ, ຄືກັນກັບທີ່ມັນໄດ້ເປັນອິດທິພົນຕໍ່ລຸ້ນຂອງພວກເຮົາ.
ເມື່ອສາດສະໜາຈັກເຕີບໂຕຫລາຍຂຶ້ນເທົ່າໃດ, ກໍຈະມີການສ້າງພຣະວິຫານຫລາຍຂຶ້ນເທົ່ານັ້ນ ເພື່ອວ່າຫລາຍໆຄອບຄົວຈະສາມາດເຂົ້າເຖິງພອນທັງໝົດທີ່ຍິ່ງໃຫຍ່ທີ່ສຸດ, ນັ້ນຄືຊີວິດນິລັນດອນ.5 ພວກເຮົາຖືວ່າພຣະວິຫານ ເປັນ ອາຄານທີ່ສັກສິດທີ່ສຸດ ໃນສາດສະໜາຈັກ. ເມື່ອໃດທີ່ມີການລາຍງານກ່ຽວກັບແຜນການສ້າງພຣະວິຫານຫລັງໃໝ່, ມັນກໍກາຍເປັນພາກສ່ວນທີ່ສຳຄັນໃນປະຫວັດສາດຂອງພວກເຮົາ. ດັ່ງທີ່ພວກເຮົາໄດ້ກ່າວໃນຄ່ຳຄືນນີ້, ເອື້ອຍນ້ອງທັງຫລາຍ ທ່ານສຳຄັນຫລາຍຕໍ່ວຽກງານພຣະວິຫານ, ແລະ ພຣະວິຫານກໍເປັນບ່ອນທີ່ທ່ານສາມາດຮັບເອົາຊັບສົມບັດທາງວິນຍານທີ່ສູງສຸດ.
ບັດນີ້ຂໍໃຫ້ຟັງຢ່າງຕັ້ງໃຈ ແລະ ດ້ວຍຄວາມຄາລະວະ ຂະນະທີ່ຂ້າພະເຈົ້າປະກາດແຜນການສ້າງພຣະວິຫານຕື່ມອີກແປດແຫ່ງ. ຖ້າຫາກພຣະວິຫານແຫ່ງໃດທີ່ຖືກປະກາດໄປ ມີຄວາມໝາຍຕໍ່ທ່ານ, ຂ້າພະເຈົ້າຂໍແນະນຳທ່ານໃຫ້ກົ້ມຫົວອະທິຖານ ດ້ວຍຄວາມກະຕັນຍູຢູ່ໃນໃຈ. ພວກເຮົາຍິນດີທີ່ຈະປະກາດແຜນການສ້າງພຣະວິຫານ ໃນສະຖານທີ່ດັ່ງຕໍ່ໄປນີ້: ຟຣີທາວ, ຊີແອຣາ ລີອອນ; ອໍຣຳ, ຢູທາ; ຜອດ ມໍເຣສ໌ບີ, ປາປູອາ ນິວ ກີນີ; ເບັນທັນວຽວ, ອາແຄນຊໍ; ບາໂກໂລດ, ຟີລິບປິນ; ມິກອາເລັນ, ເທັກຊັດ; ໂຄບານ, ກົວເຕມາລາ; ແລະ ເທເລີສະວຽວ, ຢູທາ. ຂໍຂອບໃຈ, ເອື້ອຍນ້ອງທີ່ຮັກແພງທັງຫລາຍ. ພວກເຮົາຮູ້ບຸນຄຸນຢ່າງຍິ່ງ ທີ່ທ່ານໄດ້ຮັບເອົາແຜນການເຫລົ່ານີ້ ແລະ ຕອບຮັບດ້ວຍຄວາມຄາລະວະ.
ສຸດທ້າຍນີ້, ຂ້າພະເຈົ້າຂໍອວຍພອນທ່ານ, ເພື່ອທ່ານຈະເຂົ້າໃຈອຳນາດຂອງຖານະປະໂລຫິດ ທີ່ທ່ານໄດ້ຮັບ ແລະ ວ່າທ່ານຈະຂະຫຍາຍອຳນາດນັ້ນ ໂດຍການໃຊ້ສັດທາຂອງທ່ານ ໃນພຣະຜູ້ເປັນເຈົ້າ ແລະ ໃນອຳນາດຂອງພຣະອົງ.
ເອື້ອຍນ້ອງທີ່ຮັກແພງ, ຂ້າພະເຈົ້າຂໍສະແດງຄວາມຮັກຕໍ່ທ່ານ ດ້ວຍຄວາມນັບຖື ແລະ ດ້ວຍຄວາມຮູ້ບຸນຄຸນຢ່າງຍິ່ງ. ດ້ວຍຄວາມຖ່ອມຕົວ, ຂ້າພະເຈົ້າຂໍປະກາດວ່າ ພຣະເຈົ້າຊົງພຣະຊົນຢູ່! ພຣະເຢຊູ ຄືພຣະຄຣິດ. ນີ້ແມ່ນສາດສະໜາຈັກຂອງພຣະອົງ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.