2010–2019
Txhua Leej Txhua Tus Yuav Tsum Ris Leej Txiv lub Npe
Kaum Hli Ntuj Xyoo 2018

Txhua Leej Txhua Tus Yuav Tsum Ris Leej Txiv lub Npe

Los ntawm Txwj Laug Paul B. Pieper

Ntawm Pawg Xya Caum

Tus Cawm Seej lub npe muaj hwj chim tseem ceeb. Yog tib lub npe uas ua rau peb txais tau kev cawm seej.

Ob peb lim tiam tas los, kuv mus saib ob peb tug me nyuam uas muaj yim xyoo ua kev cai raus dej. Lawv twb pib kawm Yexus Khetos txoj moo zoo los ntawm lawv niam lawv txiv thiab cov xib hwb. Lub noob ntawm lawv txoj kev ntseeg Yexus Khetos twb pib loj tuaj. Thiab lawv twb xav coj raws li Nws mus ua kev cai raus dej kom los ua mej zeej ntawm Nws lub Koom Txoos. Thaum kuv saib lawv cia siab ntsoov, ua rau kuv xav paub tias lawv to taub npaum li cas txog ib yam tseem ceeb ntawm lawv txoj kev khi lus thaum ua kev cai raus dej: qhov uas lawv yuav ris Yexus Khetos lub npe.

Txij thaum chiv keeb los, Vajtswv yeej ib txwm hais tias Yexus Khetos lub npe yog lub npe tseem ceeb tshaj plaws nyob hauv Nws txoj hau kev. Ib tug tim tswv twb qhia peb thawj leej txiv, Adas, “Yog li ntawd, koj yuav tsum ua tag nrho tej yam uas koj ua los ntawm Leej Tub lub npe, thiab koj yuav tsum hloov siab lees txim thiab hu Vajtswv los ntawm Leej Tub lub npe tas mus li.”1

Nyob hauv Phau Ntawv Maumoos tus yaj saub Vaj Ntxwv Npeyamis qhia nws cov neeg tias, “Yuav tsis muaj dua lwm lub npe los sis lwm txoj kev los sis lwm tus txheej txheem uas txoj kev cawm seej yuav los tau rau noob neej.”2

Tus Tswv rov qab qhia qhov tseeb no los ntawm tus Yaj Saub Yauxej Xamiv: “Saib seb, Yexus Khetos yog lub npe uas Leej Txiv tau muab, thiab tsis muaj lwm lub npe uas yuav cawm tau tib neeg.”3

Niaj hnub no, Thawj Tswj Hwm Dallin H. Oaks tau qhia tias “cov uas muab siab rau ntseeg Yexus Khetos lub npe dawb ceev … thiab khi lus thiab coj raws li nws tej lus txib … yuav txais tau Yexus Khetos txoj kev theej txhoj.”4

Peb Leej Txiv Saum Ntuj Ceeb Tsheej xav qhia meej hais tias Nws Leej Tub lub npe, Yexus Khetos, tsis yog ib lub npe zoo li lwm tus. Tus Cawm Seej lub npe muaj hwj chim tseem ceeb. Yog tib lub npe uas ua rau peb txais tau kev cawm seej. Vim peb Leej Txiv qhia qhov tseeb hauv txhua lub caij nyoog, Nws qhia tag nrho Nws cov me nyuam hais tias muaj ib txoj kev rov qab los cuag Nws. Tiam sis qhov uas muaj ib txoj kev tsis txhais hais tias peb yeej yuav rov qab los. Vajtswv qhia peb tias peb yuav tsum ua li cas: “Yog li ntawd, tag nrho tib neeg yuav tsum ris lub npe uas Leej Txiv tau muab rau lawv.”5

Xwv kom txais tau lub hwj chim cawm peb dim uas los ntawm Khetos lub npe xwb, peb yuav tsum “txo [peb] hwj chim rau Vajtswv … thiab los nrog lub siab puas tas thiab lub siab xav ua zoo … thiab txaus siab ris Yexus Khetos lub npe” peb thiaj yuav tsim nyog, ib yam li kuv cov phooj ywg uas muaj yim xyoo, kom “los mus rau hauv nws lub koom txoos los ntawm kev cai raus dej.”6

Tag nrho cov uas xav ris tus Cawm Seej lub npe tiag tiag yuav tsum ua kev cai raus dej kom ua pov thawj rau Vajtswv txog lawv txoj kev txiav txim siab.7 Tiam sis kev cai raus dej yeej yog qhov ib xwb.

Lo lus ris yeej tsis yam uas yus ua. Yog ib lo lus yus ua kiag uas muaj ob peb lub ntsiab.8 Ib yam li ntawd, peb yuav tsum ua tej yam thiab paub ob peb lub ntsiab thaum peb cog lus tias peb yuav ris Yexus Khetos lub npe.

Piv txwv hais tias, ib lub ntsiab ntawm lo lus ris yog kom ris rau saum yus lub cev, xws li thaum peb ris ib lub nra. Thaum peb ris Khetos lub npe, peb cog lus tias peb yuav ris Nws tej lus qhia, Nws tej cwj pwm, thiab Nws txoj kev hlub, ua kom tej ntawd yeej yog ib feem ntawm peb tus kheej. Yog li ntawd, Thawj Tswj Hwm Russell M. Nelson tej lus caw cov tub hluas ntxhais hluas kom “thov Vajtswv thiab rau siab [nrhiav] kom to taub tias [tus Cawm Seej] tej lub npe txhais li cas rau [lawv] tus kheej,”9 yeej tseem ceeb heev thiab mloog ntsoov Khetos tej lus hauv cov vaj lug kub, qhov tseem ceeb yog Phau Ntawv Maumoos.10

Ib lub ntsiab ntxiv txog lo lus ris yog kev lees yuav ib tug neeg tej lus los sis lees txais qhov tseeb ntawm ib lub tswv yim los sis ntsiab cai. Thaum peb ris Khetos lub npe, peb lees yuav Nws ua peb tus Cawm Seej thiab ris Nws tej lus qhia kom coj peb lub neej. Txhua zaus peb yuav tsum txiav txim siab, peb yuav ris Nws txoj moo zoo thiab ua neej raws li txoj moo zoo kom kawg siab kawg ntsws kawg dag kawg zog.

Lo lus ris kuj txhais tias yus lav ris ib lub npe los yog ib txoj hauj lwm. Peb feem coob twb muaj sij hawm thaum peb lav ris hauj lwm los sis lav ris ib lub hom phiaj. Thaum peb ris Khetos lub npe, peb lav ris ua ib tug thwj tim tseeb, peb txhawb nqa Nws lub hom phiaj, thiab peb “sawv ua tim khawv txog [Nws] txhua lub sij hawm thiab ua tim khawv txog txhua yam, thiab ua tim khawv nyob hauv txhua qhov chaw uas [peb] nyob.”11 Thawj Tswj Hwm Nelson twb hu “txhua tus ntxhais hluas thiab txhua tus tub hluas … kom tso npe rau hauv tus Tswv pawg tub rog hluas kom pab muab Ixayees sib sau ua ke.”12 Thiab peb txhua tus yeej zoo siab ua raws li tus yaj saub hais kom tshaj tawm lub npe ntawm Nws lub Koom Txoos uas tus Cawm Seej Nws tus kheej twb qhia rau peb: Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg.13

Thaum peb ris tus Cawm Seej lub npe, peb yuav tsum to taub hais tias lub hom phiaj ntawm Khetos thiab lub hom phiaj ntawm Nws lub Koom Txoos yeej yog tib yam. Yeej cais tsis tau. Ib yam li ntawd, peb txoj kev ua tus Cawm Seej tus thwj tim thiab kev ua mej zeej hauv Nws lub Koom Txoos los kuj cais tsis tau. Yog peb tsis ua raws li peb tau cog lus rau Nws ces peb yeej yuav tsis xav ua raws li tej yam nyob hauv Nws lub Koom Txoos, muaj tseeb ib yam li yeej muaj hmo ntuj tom qab nruab hnub.

Ib txhia tsis xav ris Yexus Khetos lub npe thiab Nws lub hom phiaj vim lawv xav tias ua rau lawv nyob tsis ywj siab. Tiam sis, yog peb ris Khetos lub npe ces ua rau peb muaj kev ywj siab loj heev. Ua rau peb xav zoo ib yam li peb xav thaum peb lees yuav Vajtswv txoj hau kev los ntawm peb txoj kev ntseeg tus Cawm Seej. Nrog rau kev xav no nyob hauv peb lub siab, peb yuav paub vim li cas Vajtswv tau muab txuj ci thiab txiaj ntsim rau peb, yuav muaj Nws txoj kev hlub, thiab haj yam yuav xav pab lwm tus. Thaum peb ris tus Cawm Seej lub npe, peb tuav tau txhua yam uas zoo thiab hloov los ua neeg zoo li Nws.14

Yeej yog ib qho tseem ceeb nco ntsoov tias kev ris tus Cawm Seej lub npe yog ib txoj kev khi lus—kev khi lus thib ib yog thaum peb ua kev cai raus dej. Thawj Tswj Hwm Nelson tau qhia hais tias, “Qhov uas [peb] cog lus tseg hais tias [peb] yuav ua raws li tus Cawm Seej hais thaum nej nrog Nws sib khi lus thiab tom qab ntawd ceev tej kev khi lus ntawd es ua li no yuav pab nej txais tau txhua txoj koob hmoov ntawm sab ntsuj plig uas nej txais tau.”15 Lub txiaj ntsim zoo tshaj plaws los ntawm qhov uas peb ris tus Cawm Seej lub npe thaum peb ua kev cai raus dej yog qhov uas peb txais tau txoj kab ke ntxiv nyob ntawm txoj kev ntawm kev khi lus, uas yog kev pom zoo. Thaum kuv nug kuv ib tug phooj ywg uas muaj yim xyoo hais tias nws xav li cas txog txoj kev ris Khetos lub npe, nws teb hais tias, “Ua rau kuv txais tau tus Vaj Ntsuj Plig Dawb Huv.” Nws hais yog lawm.

Peb txais lub txiaj ntsim Vaj Ntsuj Plig Dawb Huv thaum peb txais kev pom zoo tom qab peb ua kab ke ua kev cai raus dej. Lub txiaj ntsim no yog txoj cai thiab lub cib fim muaj tus Vaj Ntsuj Plig Dawb Huv ua nej tus khub tsis tu tsis tseg. Yog peb mloog Nws lub suab yau yau, ces Nws yuav pab peb ua raws nraim li peb tej kev khi lus tom qab peb ua kev cai raus dej, ceeb toom peb thaum peb raug ntxias, thiab yaum peb hloov siab lees txim thaum peb yuav tsum ua li ntawd. Tom qab peb ua kev cai raus dej peb xav muaj tus Vaj Ntsuj Plig Dawb Huv nrog nraim peb nyob peb thiaj yuav ua raws li peb tej kev khi lus mus ntxiv. Tus Vaj Ntsuj Plig Dawb Huv yuav nrog peb nyob tsuas yog peb ua neej huv thiab tsis txhob ua txhaum.

Yog vim li ntawd, tus Tswv tau npaj ib txoj kev rau peb rov qab hloov los ua neeg huv zoo li thaum peb ua kev cai raus dej los ntawm ib txoj kab ke ntxiv—lub cim nco txog. Txhua lub lim tiam peb yuav “ua tim khawv … tias [peb] txaus siab ris Leej Tub lub npe”16 thaum peb ncav tse thiab txais cov cim ntawm tus Tswv cov nqaij daim tawv thiab cov ntshav—cov mov mog thiab cov dej—thiab txais tej ntawd rau hauv peb sab ntsuj plig. Ces tus Cawm Seej ua Nws qhov txuj ci tseem ceeb ua rau peb rov qab hloov los ua neeg huv thiab ua rau peb tsim nyog rov qab muaj tus Vaj Ntsuj Plig Dawb Huv nrog peb nyob. Qhov no puas yog puav pheej txog kev siab hlub uas nyob mus ib txhis uas tsuas yog los ntawm Yexus Khetos lub npe xwb? Ib yam li peb ris Nws lub npe rau peb tus kheej, Nws ris peb tej kev txhaum thiab kev tu siab rau Nws tus kheej, tiam sis Nws “txhais npab hlub tshua tseem cev tuaj”17 vim Nws xav muab Nws ob txhais npab ntawm Nws txoj kev hlub puag khawm peb.18

Lub cim nco txog pab peb nco ntsoov txhua lub lim tiam hais tias kev ris Yexus Khetos lub npe yog ib txoj kev cog lus uas peb tsis tso tseg, tsis yog ib yam uas peb ua ib zaug thaum peb ua kev cai raus dej.19 Peb pheej yuav rov qab zoo siab txais “txoj kev txi dawb huv, uas neeg yeej paub tsis tag, kom tso peb tej kev txhaum tseg txais nws lub cev thiab ntshav.”20 Peb paub tias thaum twg Vajtswv cov me nyuam to taub cov koob hmoov ntawm sab ntsuj plig uas los ntawm lawv txoj kev ris Yexus Khetos lub npe, lawv yeej xyiv fab thiab xav ua kev khi lus nrog lawv tus Vajtswv.21

Thaum peb ua raws li Vajtswv tej kev khi lus no, yog peb rau siab ris Yexus Khetos lub npe ces peb yuav muaj zog “nco ntsoov sau [Nws] lub npe no cia rau hauv [peb] lub siab tas mus li.”22 Peb yuav hlub Vajtswv thiab peb cov neeg zej zog thiab xav txhawb pab lawv. Peb yuav ua raws li Nws cov lus txib thiab xav nyob ze Nws thaum peb ua kev khi lus nrog Nws. Thiab thaum peb qaug zog thiab ua tsis taus raws li peb xav, peb yuav thov kom muaj zog uas los ntawm Nws lub npe xwb thiab Nws yuav los pab peb. Thaum peb rau siab ntseeg nyiaj mus tom ntej, yuav muaj ib hnub thaum peb yuav pom Nws thiab nrog Nws nyob, thiab peb yuav paub hais tias peb twb hloov los ua neeg zoo li Nws, peb thiaj tsim nyog rov qab mus cuag Leej Txiv.

Vim tus Cawm Seej cov lus cog tseg muaj tseeb tiag: cov uas “ntseeg Yexus Khetos lub npe, thiab tuav nws lub npe teev tiam Leej Txiv, thiab ntseeg nws lub npe nyiaj mus kom txog thaum kawg”23 cov ntawd yuav txais tau kev cawm dim nyob hauv Vajtswv lub nceeg vaj. Nrog nej, kuv zoo siab tias peb txais tau cov koob hmoo zoo kawg no thaum peb ris Yexus Khetos lub npe, es kuv ua tim khawv txog Nws thiab ua tim khawv los ntawm Nws lub npe, amees.

Lus Cim

  1. Mauxes 5:8.

  2. Mauxiyas 3:17.

  3. Lus Qhuab Qhia thiab Kev Khi Lus 18:23.

  4. Dallin H. Oaks, “Taking upon Us the Name of Jesus Christ,” Ensign, Tsib Hlis Ntuj 1985, 82.

  5. Lus Qhuab Qhia thiab Kev Khi Lus 18:24; ntxiv qhov uas ntawv qaij.

  6. Lus Qhuab Qhia thiab Kev Khi Lus 20:37; ntxiv qhov uas ntawv qaij.

  7. Thawj Tswj Hwm Dallin H. Oaks tau qhia hais tias: “Peb ris tus Cawm Seej lub npe thaum peb los ua mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. … Vim peb ntseeg Khetos tiag tiag, peb twb tau muaj kev zoo siab ris nws lub npe” (“Taking upon Us the Name of Jesus Christ,” 80).

  8. Nyob hauv phau ntawv qhia ntsiab lus Merriam-Webster muaj 20 lub ntsiab ntawm lo lus take, uas yog los lus Akiv uas siv nyob hauv kab lus “ris Yexus Khetos lub npe” (saib merriam-webster.com/dictionary/take).

  9. Russell M. Nelson, “Prophets, Leadership, and Divine Law” (kev tshaj tawm rau cov neeg hluas thoob ntiaj teb, Ib Hlis Ntuj 8, 2017), broadcasts.lds.org.

  10. Saib Russell M. Nelson, “Phau Ntawv Maumoos: Nej lub Neej Yuav Zoo Li Cas Yog Tias Tsis Muaj?” Liahona, Kaum Ib Hlis Ntuj 2017, 60–63.

  11. Mauxiyas 18:9.

  12. Russell M. Nelson, “Hope of Israel” (kev tshaj tawm rau cov neeg hluas thoob ntiaj teb, Rau Hli Ntuj 3, 2018), HopeofIsrael.lds.org.

  13. Tus Tswv tau tshoov kuv lub siab kom paub tias lub npe rau Nws lub Koom Txoos uas Nws tau qhia tseem ceeb npaum li cas, lub npe uas yog Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Peb muaj hauj lwm ua xwv kom peb ua raws li Nws lub siab nyiam” (Russell M. Nelson, nyob hauv “The Name of the Church” [zaj lus tshaj tawm raug cai, Aug. 16, 2018], mormonnewsroom.org).

  14. Saib Maulaunais 7:19.

  15. Saib Russell M. Nelson, “Thaum Peb Mus Tom Ntej Ua Ke,” Liahona, Plaub Hlis Ntuj 2018, 7.

  16. Lus Qhuab Qhia thiab Kev Khi Lus 20:77; ntxiv qhov uas ntawv qaij.

  17. 3 Nifais 9:14; kuj saib Amas 5:33–34.

  18. Saib 2 Nifais 1:15.

  19. “Thaum peb qhia tias peb txaus siab ris Yexus Khetos lub npe, peb qhia txog peb txoj kev cog lus tias peb yuav ua txhua yam peb ua tau kom txais tau txoj sia nyob mus ib txhis nyob hauv Leej Txiv lub nceeg vaj. Peb qhia tias peb tsim nyog—los yog qhia txog peb txoj kev txiav txim siab tias peb yuav rau siab—kom txais tau kev tsa nto nyob hauv lub nceeg vaj xilethi-aus. …

    “… Peb tsis ua pov thawj tias peb ris nws lub npe tiam sis peb ua pov thawj tias peb txaus siab ua li ntawd. Yog li ntawd, peb txoj kev ua pov thawj li no yog hais txog ib yam uas tej zaum yuav muaj los yav tom ntej, tiam sis nyob ntawm tus Cawm Seej txoj cai los sis nws lub siab nyiam” (Dallin H. Oaks, “Taking upon Us the Name of Jesus Christ,” 82, 83).

  20. “Vajtswv uas Nyob Mus Ib Txhis,” Cov Nkauj Qhuas Vajtswv, zaj 74.

  21. Saib Mauxiyas 5; 6; 18; 3 Nifais 19.

  22. Mauxiyas 5:12.

  23. Lus Qhuab Qhia thiab Kev Khi Lus 20:29.