Koom Ib lub Siab nrog Khetos
Nej cov uas koom nrog kuv ua tus Tswv txoj hauj lwm, kuv ntseeg tias peb ua tau zoo dua ntxiv thiab yuav tsum ua zoo dua ntxiv thaum peb tos txais cov phooj ywg tshiab los rau hauv lub Koom Txoos.
Nyob zoo, kuv cov kwv tij thiab cov muam. Ib yam li peb cov uas hais lus Brazilian Portuguese hais tias, “Boa tarde!” Kuv zoo siab koom ua ke nyob hauv lub tuam rooj sab laj zoo kawg ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg raws li peb tus yaj saub uas peb hlub coj, Thawj Tswj Hwm Russell M. Nelson. Kuv yeej zoo siab kawg vim peb txhua tus muaj cib fim mloog tus Tswv lub suab los ntawm Nws cov tub qhe hauv lub ntiaj teb hauv lub caij nyoog kawg uas peb nyob no.
Kuv lub teb chaws Brazil muaj khoom ntuj tsawb teb tsim ntau nplua mias. Xws li tus Dej Amazon uas muaj npe heev, yog ib tug dej ntev thiab dav tshaj hauv lub ntiaj teb. Tus Dej Solimões thiab tus Dej Negro los sib tshuam ua tus Dej Amazon no. Qhov txawv heev, ob tug dej no nyias ntws nyias ob peb mais ua ntej cov dej sib tov, vim ob tug dej nyias muaj nyias keeb kwm, qhov sai, qhov sov, thiab cov tshuaj haud. Tom qab ob peb mais, cov dej sib tov ua ke, ua ib tug dej uas txawv ntawm ob tug dej uas muaj dhau los. Tsuas yog tom qab ob tug dej no sib tov li no, tus Dej Amazon thiaj li muaj zog txaus kom thaum txog tus Dej Hiav Txwv Atlantic, ua rau cov dej hiav txwv raug tshoob mus thiaj li muaj dej ntshiab mus txog ntau mais dhau ntug hiav txwv.
Ib yam li tus Dej Solimões thiab tus Dej Nego ntws los sib tov ua ke kom thiaj li ua tus Dej Amazon uas zoo kawg, Vajtswv cov me nyuam, txawm nyias muaj nyias keeb kwm thiab kab lig kev cai, lawv yeej los ua ke nyob hauv Yexus Khetos lub Koom Txoos uas tau txum tim rov qab los kom thiaj li ua ib Tsoom Haiv Neeg Ntseeg uas coj raws li Khetos. Thaum kawg, thaum peb sib pab, sib txhawb nqa, thiab sib hlub, peb yeej koom ua ib pawg uas muaj hwj chim ua zoo hauv lub ntiaj teb. Vim peb coj raws li Yexus Khetos, es peb koom ib lub siab hauv tus dej zoo no, peb yeej muab tau “cov dej ntshiab” ntawm Nws txoj moo zoo rau neeg ntiaj teb uas nqhis dej heev.
Tus Tswv tau tshoov Nws cov yaj saub lub siab kom qhia peb paub peb ib leeg yuav txhawb nqa thiab hlub ib leeg peb thiaj yuav koom siab muaj kev ntseeg thiab coj raws li Yexus Khetos. Povlauj, tus Thwj Tim hauv Phau Tshiab, qhia tias cov uas “twb ua kev cai raus dej [kom] nrog Yexus Khetos koom ib txoj sia, nej thiaj coj tau nej tus yam ntxwv zoo ib yam li Yexus Khetos tus … : vim nej txhua tus puav leej koom ib lub siab rau ntawm Yexus Khetos.”1
Thaum peb ua kev cai raus dej thiab cog lus tias peb yuav coj raws li tus Cawm Seej, peb ua tim khawv tab meeg Leej Txiv hais tias peb txaus siab ris Khetos lub npe.2 Thaum peb siv zog kom coj raws li Nws tus yam ntxwv, peb hloov los ua neej txawv dua li qub, dhau los ntawm tus Tswv Yexus Khetos txoj Kev Theej Txhoj, es peb txoj kev hlub lwm tus neeg thiaj loj tuaj.3 Peb yeej txhawj txog lwm tus txoj kev zoo siab thiab txoj kev nyob zoo. Peb ib leeg saib ib leeg yog cov kwv tij thiab cov muam, yog Vajtswv cov me nyuam uas los saum ntuj los, muaj Nws tej cwj pwm thiab muaj feem nrog Nws. Peb ib leeg xav saib xyuas ib leeg thiab sib pab ris lwm tus lub nra.4
Nov yog qhov uas Povlauj hais tias yog kev siab hlub.5 Maumoos, ib tug yaj saub hauv Phau Ntawv Maumoos, piav tias yog “Khetos txoj kev hlub uas dawb paug,”6 yog txoj kev hlub tiag tiag uas tseem ceeb thiab muaj zog tshaj plaws. Peb tus yaj saub tam sim no, Thawj Tswj Hwm Russell M. Nelson, twb piav hais tias Yexus Khetos txoj kev hlub dawb paug yog kev txhawb pab, uas yog ib txoj kev dawb huv tshaj kom hlub thiab saib xyuas lwm tus zoo ib yam li tus Cawm Seej tau ua.7
Xav kom peb xav txog kev hlub thiab kev saib xyuas, zoo li tus Cawm Seej ua, thaum peb kawm txog kev txhawb nqa thiab kev pab cov uas nyuam qhuav hloov siab los ntseeg thiab cov uas peb xav koom peb lub Koom Txoos.
Thaum cov phooj ywg tshiab tsis ua li neeg ntiaj teb ua lawm thiab muab siab npuab Yexus Khetos txoj moo zoo, thiab koom Nws lub Koom Txoos, lawv hloov los ua Nws cov thwj tim, yug dua tshiab dhau los ntawm Nws.8 Lawv tso ib lub neej uas lawv paub zoo tseg thiab coj raws li Yexus Khetos kawg siab kawg ntsws, zoo li lawv koom ib tug “dej” tshiab zoo li tus Dej Amazon—ib tug dej uas muaj zog ua zoo thiab ua ncaj ncees uas ntws mus rau Vajtswv xub ntiag. Tus Thwj Tim Petus piav tias yog “ib tiam neeg uas tau xaiv tseg lawm, ib lub pov thawj hwj los ntawm Vajtswv, ib lub teb chaws dawb huv, ib co neeg txawv heev.”9 Thaum cov phooj ywg tshiab koom nrog tus dej tshiab no, tej zaum thaum xub thawj lawv xav tias lawv tsis tshua paub lawv nyob qhov twg lawm. Zoo li cov phooj ywg tshiab no pib sib tov nrog ib tug dej uas muaj nws keeb kwm, qhov sov, thiab cov tshuaj haud—ib tug dej uas muaj kab lig kev cai thiab tej lus txawv txawv. Lub neej tshiab coj raws li Khetos tej zaum ua rau lawv txhawj xeeb heev. Xav ib me pliag txog qhov uas lawv xav li cas thawj zaug lawv hnov tej lus zoo li no hais tias, “FHE,” “BYC,” “Hnub Xya uas yoo mov,” “kev cai raus dej rau cov tuag,” “peb phau ua ke,” thiab li ntawd.
Yooj yim rau peb paub vim li cas lawv xav tias tsis tsim nyog lawv nyob no. Tej zaum lawv nug lawv tus kheej hais tias, “Puas muaj chaw rau kuv nyob no? Kuv puas phim nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg? Cov Ntseeg puas xav tau kuv? Kuv puas yuav nrhiav tau phooj ywg tshiab uas txaus siab pab thiab txhawb nqa kuv?”
Kuv cov phooj ywg zoo, thaum lub sij hawm zoo li no, peb cov uas taug txoj kev ntev ua Yexus cov thwj tim yuav tsum cev tes pab peb cov phooj ywg tshiab, tos txais lawv txawm lawv nyob qhov twg los, thiab pab lawv, hlub lawv, thiab cia lawv koom nrog peb lub neej. Cov phooj ywg tshiab no txhua tus yog Vajtswv cov tub thiab cov ntxhais uas muaj nqis.10 Txawm peb tsuas poob ib tug neeg xwb los tsis tsim nyog, vim peb xav tau lawv npaum li lawv xav tau peb, xwv kom muaj hwj chim ua zoo hauv lub ntiaj teb no, ib yam li tus Dej Amazon tau dag zog los ntawm cov me nyuam dej.
Peb cov phooj ywg tshiab muaj tej txuj ci uas Vajtswv tau muab rau lawv, kev zoo siab, thiab kev zoo nyob hauv lawv. Qhov uas lawv xav ua raws li txoj moo zoo yeej ua rau txhua tus xav ua li ntawd thiab, ua rau peb tej zaj lus tim khawv muaj zog ntxiv thiab. Ua rau peb muaj tej kev xav tshiab txog peb lub neej thiab txoj moo zoo.
Tau ntev nyob hauv Yexus Khetos lub Koom Txoos peb tau txais kev qhia kom peb pab txais tos cov phooj ywg tshiab thiab ua rau lawv paub tias muaj neeg hlub lawv. Lawv xav tau peb qho kom muaj zog thiab rau siab ntseeg tas lawv lub neej.
Qhov thib ib, lawv xav tau cov kwv tij thiab cov muam nyob hauv lub Koom Txoos uas xav paub txog lawv tiag tiag, cov phooj ywg zoo uas yeej pab tau lawv, koom nrog lawv, thiab teb tau lawv tej lus nug. Peb cov mej zeej yuav tsum tsom ntsoov thiab nrhiav tej tus neeg tshiab thaum mus rau lub Koom Txoos tej yam ntxim saib ntxim ua thiab tej kev sib ntsib, txawm yog peb muaj kev lav ris, kev txib, los yog kev txhawj dab tsi los xij. Peb ua tau tej yam yooj yim kom pab peb cov phooj ywg tshiab paub tias muaj neeg hlub lawv nyob hauv lub Koom Txoos, xws li hais nyob zoo, luag ntxhi, zaum nrog lawv thaum peb hu nkauj thiab teev tiam Vajtswv ua ke, thiab pab lawv ntsib lwm tus mej zeej, thiab li ntawd. Thaum peb ua tej yam zoo li no kom qhib peb lub siab rau peb cov phooj ywg tshiab, peb ua raws li kev txhawb pab lwm tus. Thaum peb txhawb pab lawv zoo ib yam li tus Cawm Seej ua, lawv yuav tsis xav tias lawv yog “neeg qhua nyob hauv peb lub tsev.” Lawv yuav xav tias lawv nyob tau thiab muaj phooj ywg tshiab, thiab qhov tseem ceeb tshaj plaws, lawv yuav hnov tau tus Cawm Seej txoj kev hlub los ntawm peb txoj kev saib xyuas.
Qhov thib ob, cov phooj ywg tshiab xav tau kev txib—ib lub cib fim kom pab lwm tus. Kev pab lwm tus yeej yog ib yam kev txawj ntse nyob hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Yog tus txheej txheem uas pab peb txoj kev ntseeg muaj zog zuj zus tuaj. Txhua tus phooj ywg tshiab tsim nyog muaj cib fim li no. Txawm tus npisov thiab pawg ntseeg pawg sab laj muaj kev lav ris kom muab hauj lwm rau lawv ua tom qab lawv ua kev cai raus dej, tsis muaj dab tsi txwv peb cov mej zeej kom tsis txhob caw peb cov phooj ywg tshiab koom nrog peb pab lwm tus los sis ua tej hauj lwm ua ke.
Qhov thib peb, cov phooj ywg tshiab yuav tsum muaj “Vajtswv txoj lus zoo … tu [lawv].”11 Peb pab tau lawv nyiam thiab paub cov vaj lug kub thaum peb nyeem thiab sib tham txog tej lus qhia ntawd nrog lawv, qhia lawv txog lub ntsiab ntawm tej zaj thiab piav txog tej lus nyuaj rau lawv. Peb kuj qhia tau lawv kom lawv paub txais kev tshoov siab los ntawm kev kawm vaj lug kub. Tsis tas li ntawd xwb, peb pab tau peb cov phooj ywg tshiab nyob hauv lawv tsev thiab caw lawv tuaj xyuas peb thaum ib lub sij hawm uas tsis tau teem rau lub Koom Txoos kev sib ntsib thiab tej yam ntxim saib ntxim ua, thiaj li pab tau lawv koom siab koom ntsws nrog Tsoom Haiv Neeg Ntseeg.
Yog peb pom tej yam uas nyuaj rau peb cov phooj ywg tshiab hloov thaum lawv los ua mej zeej hauv Vajtswv tsev neeg, ua peb cov kwv tij thiab cov muam, peb qhia tau lawv hais tias peb tau ua li cas kom kov yeej tej kev sim siab li ntawd nyob hauv peb lub neej. Qhov no yuav pab lawb paub tias lawv tsis nyob lawv tus kheej xwb thiab Vajtswv yuav foom koob hmoov rau lawv thaum lawv muab siab rau ntseeg Nws tej lus cog tseg.12
Thaum tus Dej Solimões thiab tus Dej Negro sib tov ua ke, tus Dej Amazon thiaj li muaj zog heev. Ib yam li ntawd, thaum peb thiab peb cov phooj ywg sib koom siab ua ke, Yexus Khetos lub Koom Txoos thiaj li muaj zog thiab nyob ruaj nrees. Kuv tus poj niam, Rosana, thiab kuv wb zoo siab ua tsaug rau tag nrho cov neeg uas tau pab wb sib koom siab hauv lub koom txoos tshiab ntau xyoo tas los, thaum wb tau muab siab npuab Yexus Khetos txoj moo zoo hauv wb lub teb chaws uas yog Brazil. Txij thaum ntawd los, cov neeg zoo kawg nkaus no yeej tau txhawb pab wb thiab tau pab wb ua ncaj ncees tas mus li. Wb yeej ua Vajtswv tsaug rau lawv.
Cov yaj saub nyob hauv lub Ntuj Sab Hnub Poob paub zoo yuav tsum ua li cas kom cov phooj ywg tshiab rau siab ntseeg ua ke hauv tus dej tshiab uas ntws mus rau txoj sia nyob mus ib txhis. Piv txwv hais tias, vim nws tau pom peb lub caij nyoog thiab vim nws paub tias peb yuav muaj tej kev sim siab zoo ib yam li nws,13 Maulaunais tau sau tej yam tseem ceeb nyob hauv Phau Ntawv Maumoos hais tias:
“Thiab tom qab tau txais lawv los ua kev cai raus dej, thiab tus Vaj Ntsuj Plig Dawb Huv lub hwj chim tau los tshoov lawv lub siab thiab ntxuav lawv lawm, cov ntseeg yuav suav lawv nrog cov neeg ntawm Khetos lub koom txoos; thiab cov ntseeg muab lawv lub npe sau cia, xwv kom yuav nco qab lawv thiab Vajtswv txoj lus zoo yuav los yug lawv, kom ceev tau lawv taug txoj kev yog, kom ceev tau lawv faj seeb tsis tu ncua rau txoj kev thov Vajtswv, cia siab ntsoov rau Khetos tej kev ua zoo xwb, tus uas yog lub hauv paus ntawm lawv txoj kev ntseeg thiab tus ua kom lawv txoj kev ntseeg tiav.
“Thiab cov ntseeg tuaj sib ntsib ua ke tsis tu ncua, tuaj ua kev cai yoo mov thiab thov Vajtswv, thiab tuaj sib tham ib leeg nrog ib leeg ntsig txog txoj kev nyob zoo ntawm lawv tus ntsuj plig.”14
Nej cov uas koom nrog kuv ua tus Tswv txoj hauj lwm, kuv ntseeg tias peb ua tau zoo dua ntxiv thiab yuav tsum ua zoo dua ntxiv thaum peb tos txais cov phooj ywg tshiab los rau hauv lub Koom Txoos. Kuv caw nej xav txog qhov uas peb yuav tsum ua li cas kom txais tau lawv, yuav lawv, thiab pab lawv, pib thaum Hnub Xya tom ntej no. Ua tib zoo tsis txhob cia nej tej hauj lwm hauv lub Koom Txoos tab kaum nej kom nej tsis tos txais cov phooj ywg tshiab hauv lub Koom Txoos tej kev sib ntsib thiab tej yam ntxim saib ntxim ua. Vim Vajtswv saib cov neeg no rau nqi thiab lawv yeej tseem ceeb dua li tej txheej xwm thiab tej yam ntxim saib ntxim ua. Yog peb txhawb pab peb cov phooj ywg tshiab nrog ib lub siab uas puv npo tus Cawm Seej txoj kev hlub dawb paug, kuv cog lus rau nej, los ntawm Nws lub npe, hais tias Nws yuav pab peb Thaum peb rau siab ua neeg txhawb pab, ib yam li tus Cawm Seej, peb cov phooj ywg tshiab yuav muaj kev pab uas yuav tsum muaj kom lawv thiaj li muaj zog thiab rau siab ntseeg mus txog thaum kawg. Lawv yuav koom tes nrog peb thaum peb hloov los ua Vajtswv haiv neeg thiab lawv yuav pab peb muab dej ntshiab rau neeg ntiaj teb uas xav tau cov koob hmoov ntawm Yexus Khetos txoj moo zoo heev. Vajtswv cov me nyuam no yuav xav tias lawv “tsis yog lwm haiv neeg lawm, [lawv] yog Vajtswv haiv neeg.”15 Kuv cog lus rau nej tias lawv yuav paub tias peb tus Cawm Seej, Yexus Khetos, yeej nyob hauv Nws lub Koom Txoos. Lawv yuav nrog peb ntws mus li ib tug dej rau hauv lub hauv paus ntawm tag nrho txoj kev zoo mus txog thaum tus Tswv Yexus Khetos txais yuav lawv, thiab lawv hnov Leej Txiv hais tias, “Nej yuav tau txoj sia nyob mus ib txhis.”16
Kuv caw nej nrhiav tus Tswv txoj kev pab kom hlub lwm tus ib yam li Nws tau hlub nej. Thov kom peb yuav ua raws li Maumoos qhia hais tias: “Yog li ntawd, kuv cov kwv tij uas kuv hlub es, cia li thov Leej Txiv kawg siab kawg ntsws, xwv kom nej yuav muaj txoj kev hlub no puv npo, uas nws tau muab rau tag nrho cov uas coj raws li nws Leej Tub, Yexus Khetos, tiag tiag.”17 Kuv ua tim khawv li txog tej yam tseeb no, thiab kuv ua los ntawm Yexus Khetos lub npe, amees.